طيفك ماف

13

طبعا بقيت لا بسمع لا بشوف قبلت على الجهة العكس وطوالي بقيت اجري واجري ومخلوعة لما م واعية وبقع وبقوم زي السكرانة ومواصلة.. بقيت بتخبط وبلف يمين شمال كل مرة اخبط بحيطة فندق لحدي م ف النهايه قعدت ف الاض بارهاق قبل م اقوم وانا جارة نفسي بالغصب وارجع الاوضه.. طبعا دا كلو وانا عندي المغص اتخيلو.. الوضع كان سيء ولما وصلت الغرفه امين صحى بي (اصلا الساعه كانت قربت ل7 صباحا) واتخلع انا بقيت ابكي ليهو وقلت نرجع اندورا هسه.. قال لي مع انو م كانت مخططاتي كدا لكن تمام اساسا الفندق د حجزتو 24 ساعه بس وكدا كدا كان حيمرقونا وحاضطر اجدد الحجز.. لكن بنعوضها ان شاء الله ونجي هنا ف ايام احلى,,
انا مشيت لملمت حاجاتي الاساسا م كتيره وامين كذلك ورجعنا بعربية وصلتنا لحدي اندورا م بعرف لي م مشينا بالقطر.. المهم انا لمن شفت الفندق داك يادوب ارتحت كدا.. طلعنا فوق طوالي شلت لي من الشنطة هدوم مريحة ومشيت استحميت ولبستهم وجيت اتجدعت نمت .. لكن كل مرة كنت بصحى بكوابيس واكون خايفه شديد.. والسمكه ديك خوفتني شديد وبقت تطلع لي ف الكوابيس جد حسيت نفسي خلاص جنيت.. امين بجي ويحاول يعمل نفسو رومانسي وعايز يهديني بس ببعدو من وشي.. اخر مرة قعدت ابكي قريت اية الكرسي واتحصنت وشغلت قران حسيت نفسي احسن وارتحت رقدت نمت وكدا يادوب م جاني كوابيس تاني بس نمت نومة عمييقة ومريحة.. صحيت م بعرف متين لكن تقريبا الوقت كان مغربية كدا.. اصلا دا المتوقع لاني م نمت الليل كلو.. غايتو جطت جدول نومي جوطة وسطتو سواطه 😭 المهم كنت جعانه شديد وكمان عندي مغص ماشه وبتلوى مشيت استحميت وغيرت هدومي وبقيت ببكي من المغص (صحباتي متعودين على حركاتي دي وحافظنها ومستحملنها😭🤣❤),, امين بقى يدخل ويمرق زي ام العروس، ف النهايه عمل لي شاي بابونج شربتو وبقيت احسن الحمدلله.. قال لي تنزلي ولا اجيب ليك الاكل هنا؟ قلت ليهو هنا ورقدت عامله نفسي غمرانه عديل.. هو صح كان اتحسنت بس لسه فترانه.. المهم جاب لي الاكل فوق،، م اكلت كتير من الاكل بس كان ف التحلية اكلتها وقلت لامين عايزه ميلك شيك.. وسبرايت او ميرندا فراوله واحسن لو جبتهم الاتنين.. وتاني حاسه عايزه شي تاني بس م متذكرة اسه امشي جيب ديل.. طبعا ولا معترض على اسلوب الامر طوالي قال لي حاضر ومرق.. ضحكت كدا مع نفسي وقلت العرس فيهو ايجابيات سمحه او على الاقل الولد د بجيب لي طلباتي م بعرف لي🤣😭,, قعدت افكر كدا قلت حاسه نفسي اتغيرت،،... انا زمان كنت باردة كدا وقليلة ادب ولئيمة و م بهمني شي وما زلت لكن الاتغير اني زمان م كنت ببكي نهائيا يعني كدا صنم ممكن عادي 4 5 شهور اكون م بكيت.. او اكتر دي زاتو شويه.. وهسه م عارفه الوقع علي شنو ياهو الفترة دي كلها بس بكيت وبكينا واتباكيت واتبكيت🙂 صاح برضو رجعت نزلت السناب عشان مرة مرة اصور بيهو لكن اكتر شي بالكاميرا.. برضو عندنا مع البنات قروب هناك ف بطمنهم هناك لكن جد نفسي الاقيهم احكي ليهم اني خلاص قربت اجن ه ه.. طبعا شنطتي العندي دي كم شنطه لكن الشنطه ستفوها معاي صحباتي وهم عارفين شكل عرسنا كيف عشان كدا ختو لي هدوم عادية بل وواسعة ومريحة كمان.. اساسا انا جني وجن شي اسمو جلبابات لبسي كلو بنطلون بلوزة بس ومررررررررة مررة فستان لكن ف المناسبات يعني م ساي كدا.. المهم ف هدومي كلها واسعه ومريحه كدا حقت بناطلين وبلايز واسعه وجيب شورتات والخ حاجات كتيييرة.. الشنط التانيه دي هدوم الشيله وحاجات كدا م هبشتها.. في كلام كتير ف راسي و م مرتب بقيت متضاربة وحاسه نفسي شويه واقوم اصرخ.. طبعا القران كان قفل يمكن امين قفلو.. المهم ف اللحظة د وانا بفكر كدا امين ج داخل وعيوني عملت قلوب قلوب وكنت حامشي احضنو وابوسو لكن اتذكرت هو منو ف قمت عاينت ليهو بنظرة باردة كدا قلت ليهو ختها هنا.. واشرت ليهو على تربيزة.. رفع حاجبو وختاها و ج قعد ف تلقونو.. يدوب انتبه قال لي دا شنو دا انتِ م اكلتي حاجه!!! يا بت عايزه تموتي؟ قلت ليهو اي.. قال لي اسه تاكلي عشان م استعمل معاك طريقه الغصب والمرة دي كواريكك م بتخوفني.. قلت ليهو يعني خوفتك قبل كدا😏؟ قال لي حبيبي نتناقش ف الموضوع دا مرة تانيه اسه اكلي عشان اتطمن انك تبقي احسن شويه.. قلت ليهو م عندي نفس حاسه اني لو اكلت حارجع.. بس عايزه اكل الحاجات الجبتهم دي.. قال لي الشوكولاتات لقيتيهم كيف؟؟ بقيت استرجع اتذكرت انو كان جاب لي شوكولاتات وحاجات كتيره كدا وختيتهم ف التلاجه.. قلت ليهو لسه م ضقتهم.. قال لي بنبرة فيها شويه زعل ليه؟؟ قلت ليهو انت حتاخد وتدي معاي ف الكلام؟؟!؟!؟ م تحل عن سماي عايزه اكل الجبتو دا! كان شويه زعل لكن بلعها وقال لي الاكل الجبتو دا عبارة عن مشروبات اصلا م اكل.. الميلك شيك جبتو من محل قريب كدا، ان شاء الله يعجبك لكن برضو م يعتبر اكل،، مفروض تاكلي الاكل دا كلو بعدين حتى تشربي الجبتو دا وتاكلي الشوكولاتات المفروض اصلا انك اكلتيها.. اكلك ضعيف شديد وانت اضعف من اكلك زاتو.. صبجه لما بهناك.. قلت ليهو انت بتوريني اعمل شنو ولا م اعمل شنو؟؟؟؟! قال لي وبعدين م تاكلي قدامي عادي م بعاتي انا! قلت ليهو عليك الله اطلع عشان ارتاح ف الغرفه لانو مع كامل احترامي او عدمو وجودك بيضايقني.. واضح انو زعل شديد اكتر من الزعلتين الفاتو ف بس شال كرت الاوضه او الجناح بمعنى اصح وقال لي طيب تلقيني هنا ي ف كافيه الفندق ي في الكافيه البرا الجمب الفندق.. قلت ليهو م سالتك.. شكلو بلع احراجات كتيرة وجبهتو مشت السودان وجات راجعه ولفلفت اوربا كلها.. المهم مرق.. انا حسيت يادوب الروح اتردت لي قلت بلاء وانجلا.. صراحه بحس نفسي قاسيه لكن يستاهل اكتر يلا.. فجاة جا راجع قال لي بنبرة صارمة لازم تاكلي والا حأكلك بيدي.. بنبرة ساخرة وشوية واطية كدا قلت اخير اكل براي كان كدا.. برضو بلعها وقال لي يلا اكلي طيب.. قلت ليهو م حآكل برضو وفكيتها ليك ضحكة مستفزة كدا.. صراحه عجبتني ضحكتي وهو اتغااظ كدا.. ف نفسي شغاله اتغزل ف نفسي قلت زول ضحكتو حلوة زي دي يستاهل يعرس عديم الاخلاق دا.. المهم كل شويه بزيد ف الضحك لما مسكت بطني وضحكت كدا لما فترت وبعدين وقفت.. ودا كلو وهو بعاين لي بزهج.. قال لي خلصتي؟؟ قلت ليهو وبرضو م حآكل وفكيتها ضحكه تاني زي الفاتت😭😭😂😂😂😂😂😂 شكلنا حنستمر ف الدائرة نفسها.. عاين لي بزهج وقال اللهم طولك يا روح.. انا فجاة كدا حسيت نفسي دايرة ابكي طوالي ف عز ضحكتي اتحولت لبكية لما هو اتخلع وكان داير يجي يحضني لكن اتراجع.. قال لي دندون حبيبي مالك؟ قلت ليهو وانا بتنهد م.. م.. عايزه اكل صراحه حاسه بطني طامة من الاكل المالح شديد ولو اكلت اي حاجه حارجعها انا هسه ساي بدون سبب حاسه بطمام بس عايزه ارتااححح.. وبقيت ازيد ف البكاء لما حننتو قال لي خلاص بس هسه اهدي وبطلي بكاء.. وشال حاجات الاكل الكان جابها ديك وطلع.. تقريبا كان جابها من مطعم الفندق.. واحنا عشان جناح فخم وكدا عادي بخلونا نشيل الاكل فوق.. الاكل طبعا محلي يعني اكل اسباني واكل فرنسي وحاجات كدا من اندورا جد جد جد الاكل رهيب شديد ماشاءالله جد حلو شديد يخ دي حاجات برجوازيين احنا م بنضوقها😭 لكن قلة ادب مني بس.. المهم بعد هو طلع مشيت جبت الشوكولاتات من التلاجه انتظرتها تفك شويه واكلتها جد كانت حلوة شديد ويعني زاتو الانواع الاختارها حلوة شديد حبيتها صح ف منهم واحدات محصل جربتهم بس طلعو يستاهلو التجربة.. م اكلتهم كلهم طبعا كتار بس اكلت جزء بسيط حسيت نفسي اكتفيت ختيت الباقي ف التلاجه,, لقيتو جايب لي سبرايت وزبادي وميرندا حمراء والميلك شيك بنكهة السنيكرز ختيتو ف التلاجه.. كبيت السبرايت مع الزبادي وختيتهم ف التلاجه برضو.. قلت بشربهم بعدين.. هسه بس شربت الميرندا الحمراء حب قلبي يخ💜🔥 مع انو م مفروض اشرب بارد وغازي عشان م ازيد المغص لكن م اشتغلت بالموضوع عاد اخلي العناد لمنو.. المهم استمتعت جد كان طعمو حلو وقريت روايه وبعدها راجعت قران شويه الساعه كانت عملت 9 ونص.. قمت لبست لي لبس تقيل كدا ونزلت م عارفه بفتش على شنو المهم مشيت كافيه الفندق لقيت امين.. قلت هسه الجابني ليهو شنو.. المهم قال لي هسه كنت جاييك.. م رديت عليهو.. قال لي كويس لبستي هدوم مرقه دايره اسوقك مكان.. قلت ليهو بعصبية م شايف حالتي تسوقني وين؟!,!,!,😡 مسك يدي وضغط عليها قال لي خلاص خليناهو ارح فوق.. قلت ليهو لا ارح نمرق.. ضحك وقال لي يلا.. مشينا حتة كدا زي البحيرة متلمين فيها الناس قلت ليهو م ياهو ف بحر هنا مالك فالقنا! اتجاوز اسلوبي الزفت وكمان ضحك وقال لي البحيرة م زي البحر.. قلت د مالو دراماتيك كدا احنا اصلا عندنا النيل ف السودان.. اتذكرت كلام السمكه عايزه تمسكني رجفه كدا بقيت احولق واذكر الله حسيت نفسي اطمنت🤎🤎🤎 البحيرة كان منظرها حلو خصوصا انو الوقت ليل المهم قعدنا فيها شويه وبعدها مشينا كم حتة كدا واحنا راجعين البيت حسيت المغص تاني حيرجع لي اسااسا كنت متجاهلاهو وبنتمشى لكن كنت بمشي براحه على عكس عادتي بمشي بسرعه فائقة دايما عشان افرغ الغضب الجواي ولو كتحت كمان بكون م قصرت.. اسرع من الشفع.. المهم بدون م احس مسكت ف امين قوووي اتخلع قال لي مالك.. قلت ليهو سندني بس بطني واجعاني.. قال لي خلاص عندي فكره استحملي بس حبه.. م رديت عليهو..
اصلا كنا قربنا من الفندق ف لفينا كدا لقيت حته مكتوب عليها كلام بلغة كدا مدري شنو المهم وتاني مكتوب بالانجليزي supermarket عرفتو شنو.. المهم خشينا جد جد كان خورررافي ورهيب ي جماعه السوبر ماركيتات برا السودان حلوة شديدددددددددد😭😭😭 وفيها حاجات كتييتيتيتيتتيييييييييييرررررة عمري م سمعت بيها اصلا جد فيهو اي شي يخطر على بالك ومتنوع تنوع كبير.. صح احنا ف السودان نعتبر الطبقة الراقيه عشان ساكنين الرياض وكدا.. لكن يطرشني كان شفت شي زي د.. جد حاجات مبالغه مبالغه بس ماشاءالله يعني اي شي فيهو حاجات انواع عمري م سمعت بيها.. يخ خلاص م قادره اعبر المهم فضحت نفسي زي المخلوعه اتلفت واصـ (خلاص خلاص معليش عارفنها بتصور😂) امين قال لي اخدي كل شي ف نفسك وركزي على انك تشيلي مثلا نسكافيه وكم حاجه مشروب حار عشان لم يجيك مغص تعمليهو.. وانا حاشيل ليك بابونج برضو لانو الخاتنو لينا ف الفندق قرب يخلص.. قلت براهو وقع م سمى😈😈😈😈😈 اي شي يعجبني يلفتني يجيني فيهو فضول شلتو.. طبعا مكتوبين بلغة كدا اسبانية ولا شنو م عارفه مرة مرة كدا بلقى ترجمة بالانجليزي.. ياخ شلت لي عربية مليتها حاجات على ذوقي ومشيت وريتها ليهو😂😂😂😂😂 يعععنيي من كل الانواع ماكولات مشروبات معلبات وجبات خفيفه حلويات واكتر واكتر واكتر بس التعبير م بكفي دا كـ نوع عامة خليكم ك جوا الانواع الفرعيه والاصناف شلت قدر شنو يخ مبالغه بس😂 قلت ليهو يلا نحاسب.. طبعا قرب يكفتني لكن م قال شي,, مشى حاسب و م فهمتو قال ليهو كم طبعا لانو بتكلمو باللغة ديك المهم امين طلع قروش كتيرررة كدا واداها وجا ماشي.. قال لي اهم شي انك مبسوطه.. مبسوطه؟ قلت ليهو الحمدلله.. طبعا انا قلت الحمدلله ك انو بحمد ربنا ف كل الاحوال سواء سيئة او كويسة.. لكن هو فهمها كاجابة نعم.. المهم اصلا السوبر ماركت جمممب الفندق ف سريع وصلنا وانا فرحانه بحاجاتي رتبتهم وضايرتهم جزء ف المطبخ الامريكي حق الجناح وجزء ف التلاجه وكدا لما خلصت وانا مبسوطه وامين يعاين لي ساي.. المهم هو نام وانا قعدت شويه لما جاني نوم نمت.. طبعا هو بنوم ف كرسي بتحول لسرير وانا بنوم ف السرير الكبيرر..
الايام البعدها كلها قضيناها تجول في اندورا حرفيا حللناها حتة حتة.. مشينا كل انواع الاماكن واستمتعت شديد صراحه.. م خلينا حتة م مشيناها.. اسه كدا الليله تمينا 6 يوم من التجول بعد م رجعنا من الحتة الساحلية ديك.. الاماكن المشيناها ودي لو اكتبها كلها بس كتيرة شديد.. ياخ م قادرة اعبر لكن مشينا حتات كتيرة كتيرة كتيرة كتيرة شديديدددد يعني كل الانواع والدولة لفيناها كلها.. المهم بعدها اتفقنا انو م نمشي نفس الحتة ديك لانها اساسا كانت حتة شبه م رسمية كدا يعني ياهو بس ساحلية يعني اي مرات بجوها ناس لكن م كتار.. مشينا مدينة في اقصى شمال اسبانيا.. لفيناها واستمتعنا فيها شديد شفنا كل حتاتها واكلنا اكلاتهم وشفنا ثقافتهم.. قعدنا فيها يومين.. طبعا انا لسه بتجاهل امين وعلاقتنا علاقة السجم والرماد لكن هو بتجاهل كل شي اقولو ليهو وأي شي اطلبو بجيبو لي.. ويعني م قصر فسحني ف كل مكان وكدا.. لكن لسه م يزال كريه وباطل..,, بعدها مشينا مدينة في اقصى جنوب فرنسا.. برضو نفس قصة المدينة الفي اسبانيا.. والاتنين واقعين على ساحل ف غصنا وسبحنا وعملنا رياضات وفعاليات كتيرة ف المويه ومشينا الشاطئ وركبنا مركب وحاجات كتيره كتيره شديد.. حتى ف اسبانيا كان ف مدينة العاب واقعه فوق البحر ظط لعبنا فيها قطر الموت فوق م انو قطر موت رهيب وعالي كمان بحسسك انك حتقع ف البحر ف جد كان شي حلو شديد وطبعا صـور... خلاص معليش😂المهم استمتعنا شديد يعني حسيت نفسي عشت ف فرنسا حتى اكلت الكرواسان الشهير حقهم وكدا.. وشوارع فرنسا يخ🥺 المهم ونفس الشي مع اسبانيا.. ف بعد اليومين ف مدينة فرنسا رجعنا حبينا فندق اندورا.. قعدنا فيهو شويه يعني م كتير يعني اقل من يوم وتاني مرقنا.. امين قال لي اختاري ي باريس ي مدريد.. بذهول قلت ليهو شنو!!!!!!!! قال لي اختاري سريع.. فرنسا واسبانيا المحاوطننا د عواصمهم.. حاوديك واحده هسه والتانيه ف الاجازة الجايه ان شاء الله.. بدون تفكير قلت ليهو باريس طبعا😍💜🔥 قال لي بس اول شي عندي ليك مفاجاة..
سافرنا لبرشلونة.. قلت ليهو برشلونة الحووب يخ😍 لاحظت اني بقيت اتكلم معاهو احسن شويه لكن كرهي ليهو م اختفى بس يعني ك امتنان لمعاملتو الكويسه مع اني لسه قرفانه منو.. لكن حكايه انو بنفذ لي كل طلباتي دي خلتني اقدرو شويه.. قال لي لو علي الفلفك العالم كلو لكن اسه الوقت ضيق لكن قدامنا العمر يا قلبي.. بقرف قلت ليهو تقلب الهوبة ان شاء الله قلب شنو وقلب منو؟! اوعى م تقول لي كدا تاني.. المهم اتفسحنا ف برشلونة لكن م نزلنا ف فندق بس بنمشي برجولنا لما نتعب نقعد ف الشارع وشوارعهم انضف من حياتي اصلا ورصيف سمح كدا😂❤ يعني م اسمنت زاتو رصيف وحجر عديل ماشاءالله.. المهم بعدها تاني رجعنا مشينا لفرنسا غايتو راسي لفا.. مشينا باريس❤❤ قال لي كان عندي مخططات انزلك ف مدينة ف جنوب فرنسا غير المشيناها واحده اكبر شويه لكن طوالي حنمشي على باريس عشان الوقت.. طبعا باريس الحب شديد شديد شديد يخ لدرجة م بوصف د المكان المن اتولدت نفسي امشيهو ❤ حلو مبالغه مبالغه ياخ كنت سعيدة شديد وصورتـ.. اوبس المهم يخ,, كنت سعيدة لدرجة مبالغه شديد جد الحمدلله.. وصلنا فندق فخم شديد م بعرف الود د بجيب القروش قدر د من وين ماشاءالله ..,, الرحلة كانت طويلة ومرهقة لانو احنا اساسا ف اندورا الي هي اقرب شي ليها ف فرنسا جنوب فرنسا.. وباريس بتقع ف شمال فرنسا ف جد سفر.. المهم ارتحنا اليوم الاول كلو نايمين وكدا يلا بعد داك اسبوع ونص بنلف فيها❤❤❤ وبعد دا م اتفسحنا فيها كلها يعني وفي حتات كتيرة م شفناها لكن بشعر بسعادة شديدة.. تقريبا بطني لو شقوها بلقوها قهوة بمختلف انواعها الباردة والحارة من كافيهات باريس وكرواسان😂❤..
كنت بحنس ف امين نتم الاسبوعين ف باريس لاني صراحه اتعلقت بيها شديددد.. شغاله اقول ليهو امين عليك الله🥺 قال لي م كنت عارف اسمي حلو كدا.. عاينت ليهو بقرف كدا وقلت ليهو بالمناسبة اسمك شين وانا وصحباتي من زمان قلنا كدا.. اتجاهل كلامي وقال لي انا موافق على انو نقعد زيادة لكن بشرط وكمان بزيدها ليك تاني نص اسبوع يعني نبقى قعدنا اسبوعين ونص لكن بشرط.. عيوني عملت قلوب.. قال لي تتعاملي معاي كويس وتبطلي العدوانيه دي كلها ف النهايه احنا خلاص لازم نتعايش مع بعض وانا جد جد م بتمنى ليك الا كل الخير,,.. صراحه م عجبني الكلام لكن كلو يهون عشان باريس الحبيبه😂😂😂😂 قلت ليهو تم..
كان فرحان وظهرت فرحتو دي شديد واليوم داك فسحني ف حتات احلى كمان.. فعلا اخدنا اسبوع زيادة تاني وفي الاسبوع دا اتفسحنا ف اماكن زيادة (اكيد برج ايفل م نسوهو) واكتشفت انو اللف اللفيناهو دا كلو لسسسه م شفنا ربع باريس.. وهسه لسه بعد دا م شفناها كلها لكن مشينا اماكن كتيرة من كل الانواع وكل مكان مميييييزززز بطريقتو وكل مكان كان احلى من التاني حرفيا م خلينا مكان م مشيناهو بس لسه امين بقول لي م شفنا شي فيها.. برضو عرفني على صاحبو ساكن هنا.. اكتشفت انو السودانيين ديل مشردين ف كل العالم وفي ف باريس كتار شديد! انا م كنت متوقعه انو ف سودانيين ساكنين ف فرنسا او باريس اصلا لكن اتصدمت.. طبعا صاحبو مرتو مزززززة مززة مزة مزازة بعيدة عيني باردة😭 لكن جد مبالغه.. تقريبا مرات تركب زمام ومرات لا وبتلبس عدسات ي زرقاء ي خضراء وبتكون متمكيجة فل ميكب ونفس الشي شعرها بتعملو بطريقة حلوة شديد دايما بتكون حللللوة شيدديدديد يعني جد تبارك الله يخ مبالغه م قادره اوصف😭 المهم طوالي اتصاحبنا,, م عارفه الاجتماعية النزلت علي فجاة د شنو😂😂😂💔 لكن المهم برضو بتذكر انها اتصورت معاي وختتها ستوري طبعا هي مشهورة عديل يعني عشان سمحه وكدا😂💔قلت ليها انها سمحه قالت لي انتِ م بتقلي عني ف حاجه.. قلت ليها هظارك سمح.. قالت لي لا والله العظيم for real انا بتكلم چـد انت سمحه ولو اجتهدتي شويه بتبقي سوبر مودل عديل وبتصلي امريكا ماشاءالله, زاتو احنا بنتشابه يعني بس انا بخت اوفر ميكب وانتِ طبيعية💙 المهم كنا اتلاقينا كذا مرة وعديل كنا مرات بنتفسح سوا.. اخر يوم كنت ببكي عشان خلاص مسافرة من باريس امين ج قرب مني ومسح لي دموعي قال م تبكي بوعدك انو اجيبك تاني ولو اتوفرت نستقر فيها عديل.. قلت ليهو ياريت.. قال لي عيوني ليك.. طبعا كان نفسي اديهو كف ثلاثي الابعاد يغير ملامح وشو بس وعدي لازم اوفيهو.. طبعا كنا مسافرين بكرا الصباح وهسه الوقت مغربيات كدا.. صليت المغرب وهو م صلى م سالتو اصلا م فارق معاي كتير.. المهم بعدها مرقنا اخر وجهة الي هي مدينة الالعاب او ملاهي جد كانت حلوة وفخمة شديد..اصلا مشينا ديزني لاند طبعا.. لكن هسه د ملاهي تانيه لكن جد فخمة ورهيبة شديد واحلى من حقت البحر زاتو.. المهم كانت ذكرى حلللللللللللللللللللللوة شديد وصور.. خلاص المهم واحلى شي انو السماء كدا كانت لا معروفه ليل لا نهار يعني شكلها ظابط شديد والملاهي حلوة ومليانه ناس اساسا هي رهيبة يخ مبالغه المهم.. بعدها اشتريت حلاوة قطن ودونتس كان شكلها ظابط شديد طبعا اتصوور.. معليش يخ المهم واحنا راجعين ف الطريق للبيت امين حاول يمسك يدي طوالي بدون تفكير قلعتها ولويتها ليهو وكوركت فيهو كترة كواريك وهو من الزعل لما ملامح وشو اتغيرت.. م اشتغلت بيهو اتصرفت عادي.. هو بقى يتجنبني واول م وصلني الفندق طلع.. انا الموضوع اكل معاي جنبة.. تاني ج راجع الغرفه شال ليهو حاجه و م بعاين لي كأنو م بعرفني وجا عايز يطلع ناديتو م رد علي وطلع.. الموضوع حرقني شديد زعلت وبقيت بفكر,, ف النهايه م عرفت اعمل شنو ضربت لرؤى (دي مرة صحبو النجفه السمحه) قلت ليها تعاليني سريع.. هي عارفانا ف ياتو فندق قالت لي طيب بيبي كم دقيقه وبكون معاك.. طبعا هي سايقه,,.. المهم انتظرت شويه والمدة دي كلها كنت متوترة وباكل اظافري وكانت حالتي صعبه,, بعد شويه ضربت لي رؤى قالت لي انا ف البفين (يعني اختصار الاستقبال بالفرنسي) حموني اخش تعالي.. قلت ليها ثواني طيب.. لبست عباية ونزلت ليها.. لقيتها مشتبكة مع ناس الاستقبال "بتكلمو بالفرنسي طبعا" هي شغاله ليهم انا اختي قاعده هنا جوا خلوني اخش والموظفة بتقول ليها واحنا الضمنا شنو انها اختك وانك م كذابه دايره تتفسحي بالفندق ساي؟! ورؤى تكورك وهم يكوركو المهم جيت لما شافوني سكتو الموظفة سلمت علي قالت لي كيف حالك سيدتي.. طبعا بالعافيه بعرف فرنسي حالتو دا كلام ساهل وبسيط لكن برضو اترددت لكن رديت ليها قلت ليها بخير وقلت الحمدلله بالعربي.. تقريبا ي م فهمتها ي فهمت انو شي ليهو علاقة بالاسلام من كلمة الله وهم عنصريين اتجاه المسلمين بالمناسبة..,, لكن عشان احنا ضيوفهم ف الفندق م فتحت خشمها بس ادتني ابتسامة مجاملة كدا.. انا سريع فتحت ترجمة قوقل ف تلفوني شفت اخت بالفرنسي شنو ويلا اشرت ليها على رؤى قلت ليها الكلمه قامت قالت لي خلاص سوقيها.. طبعا انا بفهم فرنسي اكتر من م بعرف اتكلم.. قلت غايتو مشم هسه كان بتكلمو انجليزي مالو.. المهم انا ورؤى طلعنا فوق اول م دخلنا الغرفه رؤى قفلت الباب,, انا حضنت رؤى وبقيت ببكي فيها..
.. يتبع ..

بقلم/مريم (مبتغى)

"كلهم زائلون الا الله💗💗"