طيفك ماف

20

 لو سمحتو ممكن تضغطو التصويت للبارت عشان تدعموني؟ وربنا يجزاكم خير

طيب مس هدير بتاعة الHR حتواصلك لو قبلوك تمام؟ ربنا يوفقك ي زوله وان شاء الله حيقبلوك لانو هسه ف حوجة ماسة وانتِ تبارك الله شهاداتك ممتازة شديد يعني،،...
انا كنت ساكته وبسمع فيها وهي بتقول كلامها د وأول م خلصت قلت ليها شكرا ومرقت،،.... وانا سايقه العربيه اساسا م مركزة وبقيت خاله العربية تتحرك براها وفوق دا كمان ماشه بسرعه عاليه لما قربت اخش ف شاحنه وصراحه م هماني كتير،،.. حاولت اني استعيد تركيزي مع انو م كان عندي رغبة خالص،، المهم ف النهايه وصلت البيت بالسلامة،،.. من الباب اتلقتني مرح وهي جاريه ماماااا،،.. شلتها وحضنتها وبستها الصراحه اشتقت ليها شديد،،... مواهب قالت لي والله بتك دي سكر عديل وطبعها كويس م مدلعه زي اختك التانيه ديك (قصدها اسيل)،، والله اسيل تعضي مرح ومرح دمعتها ف عينها وبتقول لأسيل سامحتك ولأنك اكبر مني واخت ماما... ولأنو وخالتو سرو "اسراء" قالت لي احترمك واحبك،،..... والله ماشاءالله كلامها ذاتو كبير عن عمرها وشي فوق الاعتيادي انو في طفل بالعقلانيه دي،،.. قلت ليها عادي زي م انتِ فجاة قلبتي طيبة وحنونة بعد م كنتي اوسخ خلق الله،،... عاينت لي بس وخشت المطبخ..،، قالت لي اها المعاينة كانت كيف؟؟ م رديت عليها..،، قالت لي طيب خشي غيري عشان تاكلي انا عامله الاكل،،، برضو م رديت عليها وخشيت غرفتي ورزعت الباب...،، وطوالي مشيت على الدرج طلعت الدفتر المكتوب فيهو "ما بعد مصر" وبديت اقرا ف الكلام البقراهو كل يوم الي هو جزء كتبتو انا وجزء كتبوهو ناس اسراء على حسب حكاويهم وانا لحد هسه م قادرهـ استوعب انو دا حصل لاني م متذكرة كويس!!! المهم بديت اقرا......:
" اول ما جيت من مصر فضلت مع حنين كم يوم وحكيت ليها كل شي ولباقي البنات وكلهم كانو مصدومين جدا لاننا م متوقعنو بالسوء دا...،، والصاعقه الاكبر الجات علينا الرسايل الجات لـ لين من رقم غريب واتضح انو زول بفضح ف ريان وانها ف مصر بت م تمام يعني بصراحه كدا بتبيع نفسها!!! وهسه متورطه بفيديوهات وشرايط وفي ناس بهددوها وهي م نفذت الطلبوهو منها ف فضحوها لينا وهددوها انو المرهـ الجاية حيفضحوها لأهلها!!! احنا الصراحه بقينا م عارفين نلقاها من وين ولا من وين والموضوع مسانا كلنا لانو بنحب ريان اكتر من نفسنا ومصدومين فيها شديد وراسنا ضارب حرفيا،،،.. م قدرنا نشتكي للجهات المختصة لانو حيحققو ويعرفو شغل ريان ووقتها حتكون مصيبة كبيرة وحتتسجن وحتحصل مشاكل كتيرهـ،،... حرفيا راسنا كان ضارب شديد بس ماسكين ف الدعوات لانو م عندنا غير ربنا واسراء كانت بتقيم ليل،، او بمعنى اصح هي اساسا بتقيم الليل كل يوم قصدي احنا بقينا نقيم الليل وندعي،، ونقضي حوائج الناس ونصلح بينهم ونتصدق ونساعد الناس ولو مساعدات بسيطة،، طبعا ي جماعه دي حاجات عظيمة شديد ومفروض الزول طبيعيا يعملها والطبيعي انو الزول يكون طوالي متمسك بـ ربو مش بس يرجع ليهو ف وقت المصيبة وبعد المصيبة تخلص تاني يرجع يبعد💔!!! تاني راجعنا وبحثنا ف الموضوع اكتشفنا انو مصر م بتعاقب على الحاجات دي لانها حبه بلد منفتحه او احتمال العقوبة تكون مخففة! ف طوالي بلغنا جهات الامن وطمنونا انو ف كم يوم ريان حتكون ف امان والتهاديد حتوقف،،.. طبعا احنا كلنا كنا متلمين ف بيت ناس لين او انا قاعده مع لين عديل (ف البدايه كنت مع حنين لكن تاني جيت هنا)..،، والبنات كل يوم بقيلو معانا،،.. ف يوم سمعنا الجرس بضرب مزن مشت فتحت الباب لقت ريان باركه ف الارض وبتبكي،،، مزن من الصدمه قفلت الباب وفتحتو تاني وبقت تكورك وهنا كلنا جينا جارين،،... حنين ادتها ليك كف وهزأتها تمام واسراء بقت تبكي وهي بتنصح فيها وبتأنبها وكانت شايفه الموضوع كبير شديد وهو فعلا كذلك واعظم كمان...،، كلنا شاكلناها و م خلينا ليها صفحه تتكي عليها لما حالتها بقت تحنن وكفتناها واي شي عملناهو ليهو وكوركنا وطلعنا الفي قلبنا كلو،،،.. وهي بينت لينا انها تابت واتعظت وناوية ترجع الى الله وندمانة شديد وقرفانة من نفسها،،.. واحنا ذاتنا كنا قرفانين منها لكن نعمل شنو عاد؟ المهم ريان رجعت خلاص السودان وقالت م حتتم الجامعهـ ف مصر وحتواصل دراستها ف السودان،،... اليوم التاني كنت قاعده مع لين فالاوضة فجاة جاني اتصال من مواهب ف شريحتي السودانية،، م رديت... بقت تكررو زي حكاية 20 مرة ف النهاية لين زهجت وشالت التلفون ردت ليها وفتحت الاسبيكر وقالت آلو،، مواهب قالت ليها لين كيفك بس سندس وين؟ اديها التلفون عندي كلام مهم شديد معاها،،،، لين قالت لي هاكي يا سندس،،.. سكتت ساااي،،.. مواهب قالت لي سامعاني انتِ؟؟؟ لين قالت ليها والله ي خالتو سامعاك بس م عندها شي تقولو انتِ قولي كلامك،،.. قالت لي راجلك ضرب لينا ورانا انك ف السودان ليك كم يوم ياخ ان شاء الله خير مالك جايه بدون راجلك والجامعه شغاله وصحباتك هناك زاتهم م كلمتيهم انك جايه لما اتخلعو وبعدين سفر بدون راجلك ليييه عندك شنو ف السودان!!؟!؟؟ قلت ليها مواهب.. انا م عندي راجل انا اتطلقت...،، تقريبا مواهب دي من الخلعه قفلت الخط،، وتاني رجعت ضربت،،.. لين فتحت الخط والسبيكر،،.. جاني صوتها وهي بتكورك...: كيف يعني اتطلقتي دا كلام شنو دا بتهظري ولا جادة هااا؟؟ وبتك؟؟؟ وعمرك وسمعتك؟؟!؟!؟؟! والسبب؟؟؟؟ في زول بتطلق من راجل زي راجلك د بالله!!!!!!!!!!!! يا الله منك انا وبقت تكورك وتجوط،،،.. قالت لي هسه تضربي ليهو تقولي ليهو رجعني،،.. قلت ليها ببرود طلقني بالتلاته ماف رجعه،،، هنا هي هاجت وانصدمت زيادة،،،.. قالت لي بكرهـ دي انا بعقد ليك على واحد وتطلقيهو بعد اسبوع وترجعي لراجلك ولا من شاف ولا من دري،،،.. قلت ليها مواهب نكاح التحليل حرام! بقت تجووووووووووووووووووووووط بطريقة م طبيعية،،... قلت ليها انتِ مالك محروقه طليقك ولا طليقي؟ شايلهـ همنا ليهه؟ احنا م اتفقنا بس وخلاص ماف سبيل رجعه بيننا،،.. قالت لي بكواريك م اتفقتو دي بعد ما قعدتو مع بعض سنتين وشويه وجبتو ليكم بت قربت تخش الروضة؟؟؟؟! عليك الله قلة ادبك دي انا بعرفها بس التصبري لي لمن ابوك يجي وارصرص ليهو الكلام دا كلو..،، بس ارجي الراجيك... وانا هسه بضرب لمريم دي نشوف ليكم حل وطريق رجعة،، قلت ليها ببرود اضربي ليها عشان تعرف.. لكن رجعهـ م راجعهـ... وقفلت الخط... لين قالت لي وااي لكن ي سوسو م كتير كدا عليها؟ قلت ليها تؤ تستاهل اكتر،،قالت لي غاايتو انتِ....
تاني يوم لين كانت ف الجامعه وانا قاعده ف غرفتها راقدهـ ف سريرها بحضر اسبيستون ف التلفزيون ومرح نايمهـ جمبي...،، فجاة جاتني الشغاله قالت لي سوندووس في ضيوف تحت.. قلت ليها طيب كلمي مدام وصال... قالت لي لا ضيوف قال سندس،،، قلت ليها طيب نازله،، طبعا استغربت لانو ناس اسراء بطلعو فوق طوالي لكن عادي يمكن خالاتي يمكن صحباتي التانيات البعيدات لانو اي زول بعرف بيت لين دا لاني كتير بكون معاها...،،، لما نزلت تحت لقيت ليك ابوي ف وشي".......
وقفت بصوت مواهب بتناديني للغداء ولا الفطور م بعرف المهم وجبة،،،،،،، قلت ليها م عاوزهـ ورجعت خشيت جوه..،،، جاني اتصال من الرقم البضرب لي ليهو كم يوم قفلت التلفون...،،، سمعت مرح بتناديني وبتكورك طلعت مخلوعهـ لقيت انها لقت صوفيا الاولى ف التلفزيون والي هو برنامجها المفضل زي م هو برنامجي المفضل،،.. كانت فرحانه وبتنطط وانا فرحت لفرحتها،، هي واسيل قعدو يحضرو ومواهب جابت ليهم حليب وشوكلاته،، الصراحه انا م بقدر اقاوم صوفيا دي ف طوالي قعدتـ وبقيت احضر معاهم باستمتاع،،،.. بعد كم حلقهـ كدا اسيل قالت انها نعست ومرح نفس الشي ف نومناهم وختيناهم ف غرفهم،،، كنت ح اخش جوه بس مواهب قالت لي ارح نشرب جبنهـ وحنادي رشا جارتنا دي تشرب معانا لانو حعملها بالطقوس،، وصراحهـ دي حاجة تانية م بقدر اقاومها ف وافقت وقعدت،،.. رشا جات ومعاها بتها القدري الي هي شبه صحبتي وبقينا نتونس وكان برنامج حلو ورايق،،، وبخور الجبنه دا كان كمان حاجهـ براهــا،،.... لحدي م استاذنو مشو،، لميت مع مواهب العدة واثناء م بنلم فيها كدا قالت لي ي بتي راجلك رسل ليك قروش وضرب داير يشوفك استلمتيها ولالا لكن م رديتي كلمني ابوك،،، عاينت ليها بس و م رديت،،.. طلعت من المطبخ ورجعت الاوضه ومسكت الدفتر وواصلت قرايهـ.......:
"طبعا ابوي من شافني هاج وبقى يكورك ومسكني جرا طرحتي وقعها وبقى يمعطني من شعري وينبز فيني ويشلت فيني و م خلا شي م عملو غايتو،،، بعدها قال لي 5 دقايق تلمي حاجاتك انت وبتك والقاكم قدامي فاهمهـ؟؟؟؟؟ قلت ليهو لا..... طبعا انا بتكلم بكل قوة عين وقلة ادب...،، والحاجه دي استفزتو زيادة...، قال لي تقولي لي انا لا يا بت الكلب واداني كف،، طبعا بجوطتو ناس البيت كلهم اتلمو واهل لين ديل شغالين ليهو استهدى بالله ي الصادق مالك مع البت وهو م مراعي ليهم نهائي وشغال يجوط وقال بس هسه دي تمشي تجيب هدومها وانا بشوف شغلي معاها العفنه،، وناس اهل لين ديل يحنسو فيهو ويقولو ليهو م كدا وخليها و م تسوقها و م تعمل ليها شي،، طبعا هم م عارفين قصة الطلاق وكدا،،... وهو معصلج وقال ليهم انا ابوها بتحموني بتي؟؟ ها بتحموني ليها بشتكيكم للقانون وبخرب علاقتي بيكم!!! المهم ف النهايه اخت لين ستفت لي حاجاتي وحاجات مرح ومشيت غصب،،، لما وصلت البيت ابوي قفلني ف غرفه وجاب معلقه نارية تشاني بيها وبقى يجلد ويجلد ويضرب بسوط العنج لما اغمى علي 3 مرات وجسمي دا كلو وارم وقايم وكدمات،، ومرح كانت بتبكي شديد مواهب ساقتها قفلتها ف غرفه مع اسيل،،... ضربني اكعب ضرب ف العالم دا وشوهني وشكلو كان غضبان شديد لدرجة تخوف شديد،،... ومن اليوم داك...... انا فقدت نفسي.........."
قفلت الدفتر وانا ببكي شديد لاني استرجعت الذكريات ديك،،، من اليوم داك حياتي بدت تتدمر وتخرب قدام عيوني،،،.. الجزء الجاي من الدفتر دا م كتبتو انا كتبتو اسراء ومرات بتساعدها حنين ف التفاصيل،،..... واصلت قرايهـ,,.......:
" كنا قلقانين على سندس شدديد و م مرة ولا اتنين حاولنا نصل ليها و م قدرنا،،، حرفيا م فضل لينا حل غير نكسر الباب ودا الكنا حنعملو!!! خصوصا انو الجيران م ببشرو بالخير ولا بطمنو وبرضو الاصوات الكنا بنسمعها من جوا كانت مرعبة شديد،،، ف لحظة انفعال مزن شايلة خشبة كبيرة كدا بقت تكسر بيها الباب بكل قوتها والحمدلله قدرت كسرتو مع انو انا ك اسراء م كنت موافقه على الموضوع دا وشايفاهو غلط لكن صراحه مف حل غيرو،، مكالماتنا لمواهب وسندس وابوها ميات وميات لكن كلهم ي بدينا مغلق ي خارج النطاق،، ومواهب دي بتفصل فينا.... المهم لقينا البيت جايط وكواريك وبكى طبعا اتعرفنا على صوت البكى انو بكا شفع وغالبا مرح،،، (من سندس جات السودان صحباتها هم الربو مرح عديل🤣🤣)،، المهم الوضع كان سيء لدرجة بعيدة وسندس دي م بتقدر تعاين ليها مرتين،،،،، مواهب وابو سندس طردونا كم مرهـ بس م طلعنا من البيت وفضلنا مع سندس بنمارضها وبنعتني بمرح واحنا ف نفسنا منهارين وسندس دي اساسا م واعيهـ وبدت تحصل عليها حاجات غريبة،،.. بقت مثلا تحرق نفسها ف يدها ولما تنتبه تتخلع كأنها هي الما حرقت نفسها،،، او تكسر كباية وبعدين تتخلع تقول منو الكسر دي،، وتعمل تصرفات لما احنا نسألها تقول دي م انا وتتخلع وتخاف،،.. مرهـ جرحت نفسها لما بقى دمها جاري ف المكان كلو لانو الجرحة كبيرة وفجاة بقت تصرخ وتقول انو ف زول جا جرحها ومشى،،، كلنا الموضوع كان مقلق بينا شديد حتى مواهب وابوها،، واحمد اخوها دا بقى م بحب يجي من الروضة لانو البيت كلو دم وصريخ و م حاقول مشاكل لانو اتخطى مرحلة المشاكل دي زمان بقت حاجه افظع،،،... وديناها المستشفى العاديه والدكتور بيّن انو دمها ناقص شديد وداخلهـ على مرحلة سوء تغذية وحولنا للطب النفسي لانو قال الشغله نفسية اكتر،،.. وهناك!!! هناك احتجزوها ودخلوها مصحة عقلية لانها في مرحلة شبه متقدمة من مرض الفصام او الشيزوفرينيا،،.. وجواها تقريبا 24 شخصية ودا حسب انو عقلها بصور ليها انهم بجو يستولو عليها ويسيطرو على تصرفاتها وهي م بتقدر تتحكم فيهم! لو وعت طوالي كانت بتقول انهم هسه حيجو وياخدو مكانها وانهم نفسهم يقتلوها وحتى انو عندهم اسماء! كل شخصية اسم براها وبتتصرف بطريقة مختلفة تماما عن التانيه وبتتكلم بطريقة براها وبلهجة براها وحرفيا شخصيات فرق السماء عن الارض من بعض!!! والخبر دا كان صعب علينا كلنا حتى مواهب كانت كل يوم بتبكي بدموعها! والمرض دا خلاها تحس بالذنب والتأنيب شديد،،.. خصوصا لما الدكتور قال انو احتمال يكون الموضوع برجع لانها من صغيرة جدا كانت بتشوف مشاهد عنف قدامها بين امها وابوها وفي النهاية فقدت امها وفقدت حنان الام للابد ولقت معاملة قاسية من ابوها وحياتها كانت مشتتة ولما جاتها مرة ابو عاملتها بطريقة سيئة زادت عليها الصدمة!! وفوق التراكمات العاديه البمر بيها كل انسان دي هي كانت بتكتم حاجاتها دي كلها وبتقابلها بالبرود وبتتصرف كأنها انسانه طبيعية ودا التعبها من جوهـ اكتر،، وفوق دا كلو اتعرضت للخداع من راجلها بطريقة سيئة وحست انها غبية ومستغفلة وفوق انو ابوها طول حياتها بعاملها بطريقة كعبة كمان بعد الطلاق دا بقى اسوء من اي يوم واتحول لوحش وكلمة وحش ارحم،، اتعرضت لكل انواع العنف اللفظي والجسدي ف حدود كم يوم بس وفوق م انو زمان اتعرضت لمحاولات عنف جنـ*سي كم مرهـ،، من تحرش لاغتصاب والمشكلهـ انو كان عمرها صغير جداً...،، وحاجات تانيه كتيره لا تعد ولا تحصى ساعدت المرض دا انو يتكون عندها بسبب الصدمة! في المصحة سندس كانت بتتلقى العلاج المناسب وبتخضع للمعالجات من قِبَل اطباء مختصين لكن برضو كنا بنحاول كل وقت زيارة نلقى طريقة نكون فيها معاها لاننا مقلقين شديد،،،.. وهي اساسا م مستوعبه ولا متفاعلهـ معانا ومرات بتتكلم معانا شخصيات تانيه م هي! كانت فترة مؤلمة شديد شديد شديد وكلمة سيئة بسيطة عليها الحمدلله و م نفسي اوجع قلبي اكتر وانا بتكلم عنها!!! ف المهم انو بعد سنه ونص حالتها بدت تتحسن حبة والحمدلله دا بفضل الله ودعواتنا ليها... لسه ممكن ف اي لحظه شخصية تانيه تطلع وتاخد مكانها لكن بقت متمكنة انها تسيطر عليهم حبة م زي زمان! لكن اقل صدمة او حاجة تزعلها حالتها بتنتكس ف بقينا نعمل حسابنا ف التعامل معاها شديييد،، عشان م نزعلها والموضوع دا ضايقها،،.. طبعا مرح تمت 3 سنوات وتقريبا قضتها بينا وبين مواهب لكن كان واضح انها مشتاقه لامها شديد مع انها م بتتذكرها كويس لانو كان عمرها سنه لكن برضو!! كانت م زي زمان... وقصة امين واهلو دي حصلت فيها تعقيدات كبيرهـ المهم ف النهايه اهل امين لسه بلاقو مرح ويسوقوها كم يوم لانهم ناس كويسين حبه وفيهم طيبة...،،، وأمين داك صح م كل الناس عارفين هو عمل ف سندس شنو لكن بقى م بورينا وشو وتقريبا اساسا هو خارج السودان..... الحمدلله الآن سندس طلعت من المصحة وباذن الله بدت تستعيد عافيتها حبة حبة واتغيرت كتير وبقت اوعى واعقل وتجربتها علمتها كتيير وهي الطلبت مني اكتب ملخص للحصل معاها ف دفترها وانا بعد دا حاخلي ليها هي المساحة عشان تكتب............"
قفلت الدفتر بصوت تلفوني بضرب... رديت بدون م اعاين للرقم،،... جاني صوت بت بتقول..:
_ الو السلام عليكم معانا سندس الصادق محمد؟
_ ايوا.
_ مبروك يا مِس انتِ رسميا مقبولة معانا كممرضة في الرعاية الصحية الاولية بالاضافة للعناية اليومية والعناية المتوسطة والمكثفة،،.. تعالي بكرهـ عشان تتمي الاجراءات وتبصمي وممكن تبدي دوام طوالي .
_ ان شاء الله،، تسلمي..
_ يلا عن اذنك...،،
_ في امان الله .
كنت حارجع لدفتري،،،حرفيا بقيت مجنونة بالشي دا مع انو دي المرهـ الالف اقراهو بس بقعد اقراهو كل يوم كداا،،... و م بمل لما حفظت الكلمات دي... بس قبل م ارجع اتذكرت الليلة في نـاس جايين لناس حـنين تعارف،، يعني دايرين يطلبو يدها وكذا،،، الزول انسان كويس شديد هو طبعا م اتواصل مع حنين بس كلم ابوها وقالو يجوهم،، واحنا كاخواتها المخابراتيات عملنا مباحثاتنا بطريقتنا وسألنا منو وعرفناهو ماشاءالله اخلاقو عاليه قدر شنو🤣🖤 المهم بما اني طلعت على المقابله الصباح بدري شديد وكل الوقت دا يادوب كان مشى حبه من اليوم وسبحان الله قبلوني ف سويعات بس!! المهم الوقت كان ضُهُر كدا،،... صليت الظهر واستحميت ولبست وجهزت كويس وبعدين طلعت الصالة،،.... مواهب لما شافتني لابسة قالت لي ماشة لحنين مش؟؟ اقبال كلمتني ربنا يتم ليها على خير قالت لي خلي سندس تجي اول واحدهـ وانتِ زاتك تعالي بس انا اعتذرت ليها عشان اقعد مع البنات،،.. "الي هم مرح واسيل"،،،.. مدت لي مفتاح عربيتها وقالت لي سوقي ولو احتجتو تقضو مشاوير برضو امشو بيها،، استمتعي حبيبتي،، شلت منها المفتاح وقلت ليها شكرا ومشيت على اوضة مرح واسيل،، طبعا هم فردات شدييييييد😂❤ يعني نفس العمر وعايشين ف بيت واحد صح اسيل دي تبقى لمرح خالتها طوالي لانها اختي لكن جات قدرها نعمل شنـو🤣🤣💔 يعني حرفيا هم صحبات لدرجة بعيدة بعيدة شديد ياخ علاقتهم دي ماشاءالله م قادرهـ اوصف انها قوية قدر شنو،، يعني هم للحمام دا بخشو مع بعض و م بعملو اي شي الا مع بعض ولو عملتي شي لواحدهـ و م عملتيهو للتانية بقعدو يبكو،، يعني زي التوأم كدا مع انو اسيل اكبر بكم شهر...،، ومواهب دي زي م بتحب اسيل بتها بتحب مرح،، ياخ بتحب مرررح دي شدديديييد وبتريدها ريدة غريبة،، يعني بتحبهم الاتنين بطريقة مبالغه ومدلعاهم دلع لدرجة انو مرح دي بتقول لمواهب ماما 1 وانا ماما 2 اتخيلو🙂 المهم خشيت واديت كل واحدهـ بوسه وصورتهم لانو صراحه اشكالهم كانت كيووووت شديد و م بتقاوم الزول نفسو يجضمهم وياكلهم من حلاوتهم ماشاءالله تبارك الله،،.. والعجب لما يفتحو عيونهم وتشوف عيونهم الكبيرة اللامعة (عيون الشفع الكيوت دي ياخ) ماشاءالله تبارك الرحمن جد❤! طلعت ونزلت تحت لقيت احمد جاي من المدرسة (كداري)،، وواضح انو الشمس طلعت عينو كان زهجان زهج وقرب يبكي،، اتكاوينا واتهاظرنا كدا وختم كلامو بكواريك،، قال لي سندس انقلعي من وشي اخير ليك،، وانا اديتو ضحكة شريرة مستفزة كدا حقت نياهااها كدا وخليتو بحمر لي ومشيت ركبت العربية،،، احلى شي ف عربية مواهب دي انها يعني ماشاءالله نوع العربات السمحه شديد شديد شديد شديد شديد يعني افخم عربية واحدث موديل وكذا،،.. وبالتالي كل شي فيها ظابط ورهيب من جوا وبرا،، المكيف دا من برودتو تحس نفسك قاعد جوا القطب المتجمد،،... كنت سايقهـ برواقهـ💙 لما وصلت بعد مسافة بسيطة،، نزلت وكان ف كم عربية الي هي عربات صحباتي الحافظاها اكتر من نفسي،،... خشينا وبدينا ف موالات التجهيز وكدا وبنهدي ف حنين المتوترة مع انو مجرد تعارف،، وتوترها دا اتقلب بكا وخوف،،، واثناء م هي ف الحاله دي قالو انو الناس وصلو،،... ف نص البنات طلعو يساعدو خالتو ف استقبال الضيوف والقعاد معاهم وكدا والنص التاني الي كنت انا منهم كنا قاعدين مع حنين ف الغرفه وبنظبطها بحاجه بسيطه كدا يعني م شي كتير،،، عملنا ليها شعرها بطريقة حلوة شديد وجميلة وهي اساسا شعرها حلو ف ساعدنا،، ولانو اصلا بس حتسلم وحتلاقي النسوان، الرجال مفصولين ف جزء تاني تماما،،... وعملنا ليها حاجات عناية بسيطة ليدها واظافرها وزي كدا وعامة خليناها تظهر نايرة وحلوة ومرتاحة،،.. وبرضو عملنا ليها شكل حنة بيضاء بسيط وحلو شديد،،.. وبالنسبة لوشها عملنا ليها برايمر وكونسيلر خفيف مظبوط مع درجتها شديد،، وسرحنا ليها حواجبها بدون م نرسمها يعني بس بالفرشة وكدا،،.. وختينا ليها حبة هايلايتر وهي اساسا م محتاجه كونتور،،.. وعملنا ليها ماسكارا شفافة🔥،،.. وملمع شفايف شفاف وبخاخ مثبت مكياج وبس🖤،،.. طلعت رهيبببببة لدرجة اننا بقينا نصرخ من غير م نحس،،... الا سكتونا بالغصب بعد م اتفضحنا قدام الضيوف،،،.. المهم الجماعهـ قعدو يتعارفو وكدا وفي النـهـــاية نادو حنين وشافوها وواضح انها عجبتهم شديد وصراحه هي ماشاءالله تبارك الله تعجب الما بعجبو شي!! حنين قعدت بخجل وهم بقو يتفحصو فيها!! فجـاة كدا ام العريس عاينت لحنين شديد كدا قالت ليها اسمك منو يا بتي انتِ؟ قالت ليها بتوتر حنين،،.. المرهـ فجاة قامت على حيلها وقعدت قالت يا بت انتِ حنين ولا بلقيس؟؟؟ كلنا بخلعه قلنا بلقيس منو!! قالت لينا اجي كيفن يعني بلقيس منو مش عروس ولدي اسمها بلقيس؟؟!؟؟! طبعا كلنا بقينا مستغربين ومهجومين،،.. المرة قبلت على ام حنين قالت ليها انت مش اسمك فيروز؟؟؟ ام حنين بخلعه قالت ليها بررررررري الا كان انت ملخبطة لكن لا انا اسمي فيروز لا بتي اسمها بلقيس شكلك غلطانه!! المرة عاينت ليها شديد كدا وقالت ليها انتِ اقبال؟؟؟ ام حنين قالت ليها ايييييييييييوا بالظبط ياها انا،،.. حمدلله على السلامة شبكتك طشت ليه ههه،، قبل م ام حنين تكمل ضحكتها، المرة وقفت على حيلها بطريقة انفعالية كدا وبقت تكورك وتتنفض بأعلى حسها،،.. لدرجة اننا كلنا قلوبنا وقعت ف رجولنا ودخلنا ف حالة اسكتو منها بس.. شغاله تقول انتِ حنيييييييييييين المغتصبة حنييييييييييييييين الما بنت انا اديك ولدي كييييييييييييييف! قايله ولدي ناقص ولا معيوب عشان اديهو واحدهـ زي البت دي،، او قصدي زي السيدة دي بما انها م بت اصلا،،،.. طبعا حنين كانت واقفة قامت قعدت وهي متجمدة كدا ووشها عبارة عن فريزر،،، بس دموعها بتتساقط واحده ورا التانيه وهي م مبدية اي ردة فعل ولا متحركة ولا حركة بس حرفيا ثابتة ف مكانها!!.. طبعا المرهـ بتكورك بأعللللللللللللللللى حسها يعني بطريقة فظيعة لدرجة انو اي زول اتلم،،،... زادت كواريكها لدرجة انو اضنيننا بقت توجعنا وهي بتقول ولدي ذنبو شنننننو يعرس واحدهـ زي بتكم دي،، لا وكمان فاتحين نفسكم وقاعدين كأنها بت مع البنات ومتوقعين العرس يتم ومتوقعين واحده زي بتكم دي تعرس اصلا!! ولو عرست متوقعنو يكون ولدي انا!!؟ ولدي انا ي يمه سييد الرجال البنات كلهن متكسرات فيهو سماحه وعلم واخلاق وادب،، ولدي الفيهو كل الصفات البتتمناها اي بت انا اجي اديهو بت زي دي؟؟؟! ليييه ذنبو شنو!!! ذنبو شنو يستحمل واحده وسخه زي دي وذنبنا شنو نغطيها؟؟ شايفينو ولد عمها؟؟؟ ولا ولد خالتها عشان يغطي عليها؟؟؟! ولا الغلطت معاهو؟!؟!؟ م تمشي تشوف درب العملت معاهو عملتها الوسخه دي تخليهو يتبلي بيها احنا مالنا!!! يلا يا جماعه قوماكم نمشي!! دا كلام شنو كمان!! اخر الزمان انا بدور دي ادي ولدي لواحده م تامه بت مع البنات اصلا!!!!!!!!! يلا ي جماعه ارح سرعه من البيت دا الله لا بارك فيهم،،.. انا سمعت قصتكم دي من بعيد لانكم قرايبنا من بعيد وقلت مسكينة وشنو وشنو لكن م اتوقعت انا اجي بيتكم دا واطلبكم لي ولدي!! بقت تتكلم كلام كتير وهي واقفه والرجال زاتهم معصبين وابو حنين منزل راسو،، اما حنين حالتها صعبه وأمها مشت قفلت نفسها ف الاوضه بعد م رزعت الباب وهي بتبكي شديد،،،... واخواتها شغالات يتحسبنو وكانو عايزين يكفتو المرة لو م اكبر منهم،، المهم المرة بعد ما قالت كل انواع الكلام الجارح ف الحياة اتخارجت وهي بلزوها عشان تمرق وخلت لينا احنا ذكرى سيئة عمرنا م ننساها! وآثار وجروح قديمة اتفتحت،،، ابو حنين وقع بي كومة سكري ودوهو المستشفى واخواتها ببكو شديد من جهة عشان ابوهم ومن جهة عشان حنين ومن جهة عشان امهم الما راضية تفتح الباب وواضح انها ممكن تموت من وجع القلب في اي لحظة! واحنا زاتنا كنا بنبكي زي بكاء اخوات حنين واكتر،، والواجعنا انو حنين م فتحت خشمها بـ ولا كلمة بس داخلهـ ف حالة عجيبة!!!!،،،... بعد ساعات من محاولاتنا للتصبير ليها،،.. فاقت من الصدمة ومشت اوضتها رزعت الباب،،.. اسراء دخلت ليها لقتها بتسمع قران وبتبكي،، ولما شافتها وقفت القران،،... قامت اسراء طلعت خلتها،، وهي اظن بعدها بتكون رجعت شغلتو تاني،،، المهم قعدنا معاهم لنهاية اليوم،، و ف النهاية رجعنا بيوتنا وقلوبنا مقبوضة لكن لازم نرجع عشان عندنا مسؤوليات واحنا م نفس الشفع الزمان،،....
انا رجعت البيت بس استحميت ونمت،، ولا حتى جاوبت اسئلة مواهب عن اليوم وإنو كان كيف... تاني يوم صحيت و همي بس اكمل قراية الدفتر كأني اول مرهـ اقراهو،، مشيت عاينت لاسيل ومرح لقيتهم بحضرو كرتون،، بستهم وشربت حليب بسرعة عشان م اقعد جعانة ودخلت الاوضة وقفلت الباب وفتحت الدفتر من المحل الوقفت فيهو... :