طيفك ماف

3

انا كان عمري ٤ م كنت مستوعبه كتير.. بقيت احكي واحكي في التفاصيل وكيف رجعنا السودان وابوي عرس مواهب مع انو اهلو اعترضو ورجعنا السعودية تاني والتنمر الاتعرضت ليهو في المدرسة والعنصرية ورجعتنا السودان تاني ومعاملة مرة ابوي.. قلت ليهو يعني هي م شرانية للدرجة المبالغة ديك لكن برضو تعاملها باثر علي.. ابوي عمرو م حسسني انو ابوي دايما بارد وخدام لمواهب بس.. لو اتكلم معاي كلامو بكون اوامر اوامر وشكل.. ولما كان عمري ١٢ فسنه سابع مواهب اقنعت ابوي يخطبني ويكملو العرس لما اخش الثانوي والخطبوهو لي كان عمرو ٢٩ وكان تافه ومقرف وحاول يغتصبني في المرة التانية ابوي قبضو ودقاهو وقلع لي الخطوبة.. وغيرها في عشرين الف حاجه كعبه.. قال لي احكي انا هنا.. بقيت احكي واحكي وابكي لما الدموع كملت لكن حسيت نفسي ارتحت شديد.. قلت ليهو نون د صحبتي من الروضة لما جيت السودان بعد وفاة امي نزلت روضة هنا.. ونادين ومزن صحباتي من سنة سادس لما جينا راجعين السودان.. واسراء كانت جارتي في السعودية وبرضو جو السودان واتلمينا كلنا في الثانوي.. الباقين كلهم لاقيناهم في الثانوي لكن تقريبا لين كانت جارة ناس حبوبتي ام ابوي.. فجاة جات حنين سلمت على امين بحرارة.. قالت ليهو معليش قطعنا ليك الشغل يا.. التفتت علي بخلعه لقتني ببكي حضنتني طوالي وبقت تهديني.. مشينا سقنا اسراء اسراء خلت كل شي وبقت مخلوعه وملهوفه برضو بقت تحاول تطمني.. مشينا قعدنا فزاوية ادوني موية شربت وغسلت وشي حكيت ليهم اني حكيت ليهو.. اسراء طبعا الكلام كلو م عاجبها قالت الله يهديكم.. مشينا ركبنا فعربية خالتو ورجعتهم ورجعنا.. بالليل امين رسل لي دعم كتير وكلام معسول. واليوم التاني لقيت بتاع توصيل جاي مشيت استلمت لقيتو بوكس فيهو شوكولاتات كتيرة بانواع مختلفه ومغلفه بطريقة جميلة وغسول وطقم عناية بالبشرة وظرف مكتوب فيهو كلام حب وصندوق تاني فيهو فستان كدا حق سهرة خنفشاري ومعاهو مكياجات كتيرة.. طبعا ضربت ليهو وشكرتو واتكلمنا ياها ردة الفعل العاديه د.. وكنت مبسوطه وحبي وتعلقي بيهو ماشي في زيادة.. بالعصر كدا الجرس بقى يرن شديد نزلت تحت لقيتها لين نفسها قايم قالت لي اتخيلي لبنى اختي ماشه مشوار بالركشه وصلتني نص المشوار والباقي جيتك وانا بجري.. قلت ليها الشلاقه ليك شنو والجري ليك شنو.. م اشتغلت بي طلعت اوضتي فتحت المكيف وفتحت التلاجه بقت تاكل الشوكولاتات والحلاوات.. لقت بارد بقت تشربو.. واتشاكلنا واتعاورنا طبعا.. جات خالتي نجلاء قالت الغداء وسلمت على لين.. طبعا لين ك بت ظريفة مفروض تقول شكرا م عاوزه لكن اول واحدة قعدت ف الصينية وعيونها عامله كدا🤩 خالتي صفية قالت ليها اكل السوسه والعافيه مدسوسه.. قالت ليها ي صفو د الطول عشان طويلة بس.. قلت ليها لا بالجد انت معصعصه.. المهم بعد الغداء وموالاتو طلعنا الغرفه قلت ليها اها خير مالك .. قالت لي واي ي دنو النتايج قالو بكرا ف قلنا نشرد وكدا يعني.. نهرب المكسيك كلنا بي حفاراتنا لانو تانيه د م بتتجااازف والله.. قلت ليها د كلامك؟ انقلعي يلا برا.. قالت لي ابيت ورقدت في سريري.. فلعتها بالمخده قلت ليها يلا برا.. قالت لي قلت ليك لا.. قعدت كدا لما فترت وامها ضربت ليها شاكلتها،، شمتت فيها واتشاكلنا،، بعدها جات اختها لبنى بعربية صحبتها رجعتها.. المهم دخلت القروب لقيتهم فعلا قالو النتايج بكرا ف الصباح كلمت حبوبة ومشينا المدرسه اتلمينا هناك وفليناها يخ.. ادونا نتايجنا طبعا اسراء اولتنا جايبة 92% ماشاء الله.. ولين العيوطه حقت امبارح جابت 89% وكانت بتقل ادبها بس م اكتر.. ونادين 86.7% ونون 83.1% ومزن 83.6% وحنين بالجلاله جابت 64.9% وريان 70.9% وانا اخيرا جبت 88.7% لاني ف فترة الامتحانات ضغطت نفسي شديد.. طبعا الدرجات د حتظهر كعبه لكن الثانوي اصلا كدا خصوصا في مدارس السودان القوية بجيبو الامتحانات صعبه شديد.. نزلنا التيرم التاني وجاتنا بت جديدة قولة مزة بسيطة عليها قالو اسمها رتاج او ريتاج جات من الامارات شهادة عربية وبالجد شهادة عربية وناعمة ماشاءالله😭 المهم اتسلبطنا فيها قعدناها معانا ووريناها المدرسه كلها.. نون قالت ليها الليله ي بقيناك من شلتنا ي بقيناك من شلتنا ماف تالت ليهم.. مزن قالت ليها ي بت امي شلتنا م بتتفوت عاد النصيحه والقولة الصريحة.. قالت لينا بت امي يعني شنو؟ وبعدين مالكم بتتكلمو كدا.. اسراء قالت ليها بنتكلم كيف؟ قالت ليها كلامكم مفيهو انوثة وفوضى زيادة عن اللزوم.. فقعناها ضحكة وبقينا بنفتش في البسكتنا م لاقين والبت بتعاين لينا بس.. خلصت الفسحه ودخلنا الفصل الحصه الرابعه مفروض هندسية لكن الاستاذ م ج ف قعدنا فاضين ويلا اتلمينا ليك فيها تاني.. كرهناها العيشه غايتو اتموضعنا بيها.. نادين قالت ليها احنا لما زول يجي جديد بنووريهو الكلام د.. ريتاج قالت شنو؟ حنين قالت ليها اسه بتشوفي.. نون قالت يلا حابدا اوريك بسم الله..
شايفه القاعده ديك؟؟ د اسراء وزي م واضح ليك انها سمراء سمار غامق.. متنقبه وملتزمة جدا جدا جدا وهي الشيخه بتاعتنا وبتامر بالمعروف وبتنهى عن المنكر.. طولها 172 ووزنها 49 وشاطره شديد وحياتها كلها اسلام ودين والتزام.. امها خالتو مريم وعندها 4 اخوان و 3 اخوات وطبعا بما انها شاطره جابت في تامن 279.. زمان كانو ساكنين في السعودية وكانت جاره سندس وصحبتها شديد ولسه.. وبعدين جو السودان هسه ساكنين في الرياض..
والقاعده تضحك وتتعاور د حنين.. سمورية برضو وملامحها حلللللوة وياها شايفاها مركبة زمام وكل يوم بتجي المدرسه ممكيجه وبتاعة اولاد الف (هنا حنين حمرت ليها).. قالت ليها جدجد بتاعة اولاد وبتموت في شي اسمو ارتباط طولها 169 ووزنها 64.. يخ طوالي شايله ليها شوكولاته ولا جوال هديه من حبيبها الكل يوم جديد.. وياها فاكه ساي لا حجاب لا شي والطرحه كان بالغت بتختها في رقبتها.. امها خالتو اقبال وعندها 4 اخوات واخوين ولا شاطره لا شافت للشطاره شي (طبعا بتقول الكلام د قدامها).. جابت في تامن 196 بالجلاله بس.. ساكنه في المعمورة..
والمزة القميلة د دايما بشاغلوها لما نجي ماشين بالنسبه لشكلها الزي عارضات الازياء من جمالها الفايت الحد اللهم بارك.. نادين الحلبية وطولها 165 ووزنها 61 تحسي بيها بت بت كدا وياهو براك شايفه ماشاءالله الشعر واللبس والمكياج والضحكه والكلام والملمس.. مرات تلبس طرحه في نص راسها ومرات لا وابتسامتها كساره عديل.. امها خالتو سارة وعندها اخت واخو.. ممكن نقول مستواها الدراسي مقبول جابت في تامن 237 وساكنه في المنشية وهم ناس هاي وكدا.. يعني تحسيها عايشه في الامارات م معانا في السودان ماشاءالله..
والاخت دي اسمها لين طولها 169 ولونها اسمر وعندها الخصل والبيبي هير كان م طلعتهم م تبقى لين.. وزنها 54 وزوله ظريفة جدا جدا وعندها الحاله واحدة.. وبتلبس طرحتها بس بالبيبي هير والخصل ف ماف فايدة.. ويخ زوله كدا ملامحها شفاتيه م تساليني كيف.. امها خالتو وصال وعندها 4 اخوات واخو واحد.. مستواها ماشاءالله جابت في تامن 272 ساكنين حي المطار..
وريان د الشفته جدجد وام الشفتنه زاتو.. تحسيها بت داخليه مع انها ساكنه مع اهلها عادي.. مركبه زمام وجنها تسوق عربات مرة سارقه عربية امها مرة اختها.. حنين زاتها مركبه زمام لكن مرات بتقلعو اما ريان مركباهو طوالي.. المهم طولها 171 ووزنها 59 لونها اسمر وجريئة واهم شي تاخد حقها والطرحه د مرات تجدعها مرات لا حسب مزاجها الله يسامحنا بس.. امها خالتو انعام وعندها اختين و 4 اخوان.. في تامن جابت 200 وزغردو ليها لانو كويسه شديد عليها.. ساكنين الرياض..
ودي مزن كان شفتيها اكل السوسه والعافيه مدسوسه السنة كلها لهط وتاكل اهم شي بطنها والفطور.. جنها ضحك و م جادة وبسيطة وشبه رداحة.. طبعا كلنا جميلين ف م محتاجه اقول انها جميلة.. لونها اسمر فاتح والشامة حقتها احي بس.. طولها 161 ووزنها 39 ومحجبة حجاب جدجد ماشاءالله بالبندانة ..ابوها اتوفى لمن كانت في تامن.. امها خالتو زينب وعندها اخو واخت وحفارة لكن في تامن جابت 268 عشان ظروفها وايام البكى وكدا.. ساكنين المنشية..
ودي سندس الحساسه الجنها اكتئاب ونفسنه لونها برونزي كدا يعني اسمر لكن مغبش او وااي خلاص اسمر بس.. البت دي ياخ لو زول اتنفس جمبها ساي هي خلاص بتزهج وتفقد اعصابها،، طوالي اعصابها مشدودة مسكينة عندها نفسيات،، امها متوفية من زمان ساكنة مع مرة ابوها الشريرة الله لا كسبها.. (نصيحة م تدعو الناس) .. طولها 164 ووزنها مرة 42 مرة 40 لانها عندها نفسيات واكلها مضطرب.. وفاكه والطرحه د م بتسئل فيها وبتلبس اول شي ف وشها م فارق معاها شي بارده خلاص.. اسه بس الطرحه عشان المدرسه.. في تامن جابت 270 هي ماشاءالله شاطره لكن م بتديك الاحساس د بتحسسك انها مهمله مهمله كدا.. ساكنين الرياض لكن بيت حبوبتها في حي المطار جمب ناس لين.. وامها الله يرحمها كان اسمها صديقه اسه مرة ابوها الفقر حامل..
واخييرااا حي انا نون م محتاجه امدح ليك نفسي ماشاءالله سمحه اسمح واحده فيهم.. خلاص بهظر والله المهم ياهو حلبية وقصيرة شديد للاسف سنفورة وزي م شايفه اجتماعية وفصيحة طولي 153 ووزني 56 انا الدبة فيهم لكن عادي بعد د احلى واحدة ويهيهيهي.. وعندي غمازات وطوالي ضاحكه ضحكتي حلوة ومصاحبة المدرسه كلها والاساتذة كمان اكتر واحدة بتمشي المكتب تسالهم وتخليهم يشرحو ليها.. بحب التصوير وصحباتي.. شبه محجبة كدا لانو طرحتي م بتنزل لكن بلبس حجل وبحاول اخليهو الله يهديني.. طبعا اسراء هي البتورينا انو اساليب حياتنا كلها غلط في غلط.. مع كدا م قادره اخلي سيد ريدي تقريبا كلنا مربطين م عدا اسراء وبعض الصالحات.. في تامن جبت 267 واتعولقت جنس عولاق لاني اشطر من كدا.. امي خالتو خديجة هيي يهظر امي اسمها خديجة المهم وعندي 5 اخوات وانا سادستهم واخوين مكرهننا العيشه.. ساكنين الطائف لكن بيت اختي المعرسه في المنشية ف كل يومين ناطه هناك..
اها رايك شنو ي رتج..

طبعا البت عاينت لينا بنظرة الله يشفيكم وقامت.. قعدنا نضحك في البداية لكن بعدين قعدنا نلوم في نون وقلنا ليها لازم كل مرة تفضحينا كدا و..و..و.. وكل واحدة قعدت تقول رايها .. في النهاية اتشكلنا كلنا شكلة كبيرة واصواتنا وصلت المدرسه كلها حتى اسراء الما بتحب الخصامات اتشاكلت معانا واتقاطعنا وودونا للمديرة قالت لينا قلة ادبكم د متين حتخلوها وخلت اصعب استاذ يجلد كل واحدة 5 جلدات وفي مننا بكو.. رجعت البيت قافله معاي مع انو كتير بنتحارب كدا وبنتقاطع كم يوم لكن بنرجع زي م كنا.. وبما انو امين هواي البتنفسو ومتعلقه بيهو حكيت ليهو ادق التفاصيل حتى الاستاذ الجلدنا وهو طمني وقال لي كم كلمة حب كدا.. فجاة قال لي م ممكن نتكلم مكالمة فيديو؟
انا اتخلعت بس قلت عشان خاطرو حاقول حاضر لانو اساسا م فارق معاي..
قلت ليهو كويس بس اجهز,, هو اتخلع م كان متوقعني اوافق بالسرعه د.. قال لي تجهزي شنو انا دايرك زي م انتِ ي بيبي..
قلت ليهو بس اديني راحتي 10 دقايق..
فعلا قفل لبست حلو وعملت شعري بطريقة سريعة واتمكيجت وضربت ليهو فيديو واتكلمنا فيديو والاتنين كنا فرحانين بالموضوع د.. استمرينا كم ساعه بنتكلم رغم انو خالاتي كانو بدقو لي الباب بس عملت نفسي بستحمى.. بعدها بسرعه غسلت وشي ومسحتو بمزيل مكياج ورجعت شعري وشكلي زي م كان وطلعت اتونست معاهم عادي.. عدا كم يوم كدا.. في المدرسه بقعد براي اعاين في الفراغ الفسحه كلها.. وكل واحدة فينا بطريقتها وبنحمر لبعض..
اسراء مشت لشلتها التانيه كلها بنات متنقبات وملتزمات زيها.. هي وعائشة واسلام وفاطمة وخولة وخالدة.. وهم فرحو جدا بيها وكانو بعملو محاضرات دينية سوا وحتى بقرو قران سوا في الفسحه.. وبفطرو بحليب وتمر.. بنات المدرسه كانو بتريقو عليهم وهم م بعاينو ليهم زاتو.. ولو كترو فاطمة بتقول ليهم الله يهديكم.. و م بشتغلو بوصفهم ليهم بالجبن عشان م بردو ليهم بالعكس زي الكانو م سامعنهم زاتو.. وكلامهم كلو الله يسامحكم الله يهديكم..
في يوم في الفسحة كنت قاعده كدا وبعاين في الهوا.. و م فطرت زاتو.. جات رتاج ديك قعدت جمبي وهي مبتسمة.. هي صراحه بت سمحه كدا وواضح انها شهادة عربية ومدلعة.. لونها قمحي او حلبي عديل وعندها غمازات وواضح انها مهتمة بشكلها شديد غير انها اساسا سمحه ماشاءالله.. جات قعدت جمبي وهي شايله عصير مانجو شكلو غريب كدا.. ومعاهو كرواسون.. واضح الحاجات د م من السودان.. مدتهم لي.. قلت ليها د من الامارات صح؟ بانزعاج قالت لي اي.. م اشتغلت بانزعاجها ولا سالتها السبب بس فضلت ساكته.. قالت لي امسكي.. مسكتهم وقلت ليها شكرا لكن م عاوزه صراحه معندي نفس اكل.. قالت لي انا اسفه على الشكله الحصلت بينك وبين صحباتك.. وانا اخترتك دونهم لانو حسيت قلبي ارتاح ليك ومن وصف البت اللعلاعه ديك حسيت انك اكتر واحدة بتشبهيني..
سكتت مسافه كدا وبعدها قالت انا برضو فقدت اختي التوأم .. وانتِ امك.. قلت ليها طيب لي م مزن مزن فقدت ابوها.. قالت لي الاناث م زي الذكور.. قلت ليها الام م زي الاخت حتى لو كانت توام ف عمرك م حتحسي بي ولا ف زول حيحس بي..
اتجاوزت كلامي وبقت تفتح معاي مواضيع.. تلقائيا ارتحت ليها لكن بطبعي المتحفظ والبارد م بينت ليها.. لما هي اتحسست بقيت اضحك معاها عادي وبينت ليها انو حتى انا حبيتها.. في نهاية الفسحه بقينا شبه صحبات.. دخلنا الفصل سوا طبعا لسه قاعده مع ديل في نفس الكنبه لكن م بينا ولا سلام ولا كلام بس بنحمر لبعض.. المهم رتاج جات قعدت في الكنبة الجمبنا بالقسم التاني بدلت بت وبقت جمبي.. بقينا كلما نلقى فرصة نتونس ومرقنا سوا وحكيت ليها عن حاجات كتيره..
نهاية اليوم لاقيت امين برا.. قال لي تعالي معاي وساقني بورا المدرسه.. مشيت معاهو وانا مغمضه لانو واثقه فيهو.. طلع سلسل فضي وقرب مني شديد لدرجة انو انفاسنا اختلطت ولبسني ليهو قال لي عقبال م البسك الدبلة وانا بقيت اتبسم.. فجاة كدا قرب شديد كانو عايز يعمل حاجه م كويسه لكن بسرعه زح وخت يدو في راسو ومشى.. انا اساسا م فرق معاي ولا عملت اي شي بس انبسطت وطلعت السلسل ختيتو في الشنطة عشان ناس حبوبة م يشكو..
الايام الجايه قضيتها بين رتاج وامين.. في يوم جيت خاشه الفصل لقيت شلتي المتشاكلين جايطين وببكو والبنات متلمين.. وفي بنات من الفصول التانيه جو يتشمشرو طردوهم.. انا اساسا عرفت الحاصل.. وفعلا.. جو وبقو يحضنوني ويبكو فيني وبكدا اتسامحنا.. نون فكت زغرودة وقالت يخ د شنو اللياقه د اخد مننا وقت طويل..
رتاج كانت قاعده بعيد و م مبسوطه.. مشيت عليها.. ابتسمت لي ابتسامة باهتة قالت لي خلاص حترجعي لصحباتك وانا حارجع وحيدة.. امشي امشي..
حضنتها وقلت ليها ديل اخواتي م صحباتي.. عاينت لي باستنكار.. قلت ليها وانتِ م اقل منهم معزة💛..
ابتسمت لي.. قلت ليها عشان خاطري جربي اقعدي معانا يوم واحد.. كلنا كدا.. قالت لي يخ صحباتك اقصد اخواتك ديل حشريات و عشوائيات كدا.. انت راقيه.. قلت ليها يبت انا م احسن منهم في شي.. المهم بعد تردد وافقت واليوم التاني برضو قعدت معانا وهم حبوها وهي حبتنا وبكدا انضافت لشلتنا.. فجاة في يوم نون جابت متر وميزان المدرسه وقاست رتاج قالت ليها انت طولك 160 ووزنك 56.. قلنا ليها اسه لزومو شنو.. قالت عشان لما تجي بت جديدة نضيفك للتعريف ي رتاج.. قالت ليها م بسالك واخدت الموضوع عادي اساسا اتعودت على عفويتها..
كان فضل يوم ومواهب ترجع.. خالتي صفية نادتني اوضتها وعاينت لي شديد جوة عيوني بحدة وقالت لي انتِ بتحبي صح؟؟ نططت عيوني وبقيت اتلفت يمين شمال.. حاولت احافظ على ثباتي الانفعالي بعد مسافه حتى قدرت لكن بعد فوات الاوان.. قالت لي تصرفاتك كاشفاك واخير ليك تبعدي من الكلام الفاضي د.. قلت ليها مف شي من د ي خالتو ولو دايره اسالي صحباتي.. قالت لي على اساس صحباتك حيكشفوك هه.. م اكيد حيغطو عليك ي بتي انا عارفاك وبكلمك وحاديك فرصة 4 شهور انفصلتو وتبتي تمام م حصل كدا عندي تصرف تاني.. شويه غضبت من كلامها بس عشان هي خالتي احترمتها وقلت ليها حتعرفي انو مف شي من الكلام د.. م ختيت في راسي كلامها كتير ومرقت.. تاني يوم ج ابوي ساقني وطلعت بالبكا والوديع من حبوبتي وخالاتي.. حتى عندي خالاتي متزوجات باولادهم بجو كتير وبناتهم قدري.. المهم ختا لي شنطتي في الضهرية ومشينا المطار.. نزلنا في صاله الاستقبال عشان نستقبل مواهب.. شفت امين ماسك ليهو بت كدا وهي شايله شنطه كبيرة كدا جاراها.. عاينت ليهم ببرود م اشتغلت بالموضوع.. قلت بتكون بت خالتو ولا حاجه.. و م حسيت بغيرة زاتو.. المهم هو فجاة اتلفت كدا وعاين لي بخوف.. ورجع حاول يعمل نفسو طبيعي مع البت.. احنا سقنا مواهب ومشينا وهي من م ركبنا حمرت لي وقالت لي د شنو اللبس القرف د م لقيتي غيرو؟ كاسية عارية وادب ماف الحمدلله بس.. خايفه بناتي بعدين يطلعو زيك.. طبعا هي كرشها كبرت كدا.. المهم م اشتغلت بيها.. رجعنا بيتنا وطبعا انا الوقعت النضافه علي كلها.. وبما انو اسراء وريان ساكنين الرياض زيي ضربت ليهم جو نضفو معاي.. ومواهب م عاجبها الوضع كانت عاوزاني انضف براي شغاله تعاين لي من فوق لتحت وتطاعن.. اسراء قالت لي الله يرضى عنك م تشتغلي بيها.. ريان قالت لي الحيوانه د م تسكتي ليها اصلللو لو تابعتي اسراء د حقك راح.. اسراء قالت ليها عارفه كسبتي كم سيئة بكلامك د؟؟ ريان قالت ليها رجعنا تاني للكلام د اوووووووووف.. اسراء قالت ليها الله يهديك.. ويهدينا كلنا.. قلتا ليها آمين.. نضفنا البيت كلو وقعدو معاي شويه ومشو.. تاني يوم الاستاذ طلب مننا بحث في الكيمياء.. وجا استاذ الهندسية برضو طلب مننا.. الفصل كلو م اتذمر قدامهم لكن بي وراهم.. مزن قالت ليهم كان تقولو الكلام قدامهم عشان تتكفتو.. م تجو تصدعو بينا اسه.. في بت ردت ليها وقعدو يتشاكلو كداا واصلا د الطبيعي مزن كل يوم بتتشاكل مع واحده لانها م بتسكت.. المهم في النهايه صحبات البت خافو من مزن سكتو البت وساقوها بالغصب وهي م راضيه.. مزن قالت ليهم تخافو مني لي؟؟ شايفني شنو تعالو! البت هاجت وكانت جايه بس مسكوها قالو ليها خليها.. اسراء قالت لمزن خلاص ي مزن وبعدين! المهم اليوم داك مشيت نضفت وغسلت العدة والهدوم واستحميت عملت بحث الهندسية اول خلصتو كلو بعدين عملت الكيمياء ساهرت فيهو عملت قهوة جات مواهب عاينت لي من فوق لتحت قالت لي م تنفعك ان شاء الله.. استفرغت طبعا😂.. تااني مشيت عملت قهوة وجيت شايلاها قدامها عاينت لي بغيظ كدا.. كملت الكيمياء الساعه 12 واتكلمت مع امين لحدي 2 كدا.. قال لي بتردد اليومداك في المطار.. قاطعتو قلت ليهو واثقه فيك م عايزه اعرف.. قال لي بنبرة غريبة يعني م غرتي؟ قلت ليهو لا! قال لي المهم دي اختي بالرضاعة وقفل الخط. قلت د مالو.. طبعا نون لما زغردت داك المديرة شاكلتها وخلتها تنضف الطابق حقنا كلو😂 د حصل زمان يوم الزغرودة داك لكن المهم.. امين قاطعني كم يوم كدا وتاني صالحني م سالتو و د زهجو زيادة.. مع اني من جوا متعلقه بيهو لكن نهاائي م بسألو.. المهم بقى كل مرة يطلب نتلاقى في محل او مطعم بالليل وبسوق واحدة من صحباتي ونمشي ومواهب شكت فيني ومعاملتها معاي ساءت وبقت تحاول تالف قصص تحكيها لابوي.. فعلا ابوي يوم التلاتاء ج كدا اداني محاضرة وكورك وسحب جوالي.. بدون م يسالني عن الحاصل.. م اشتغلت بالموضوع لانو اصلا دايما بعمل كدا.. المهم بعدها كان يوم اربعاء صحيت ولبست كنت حامشي بكرعيني لكن ابوي حماني وصلني بعربيتو.. لما نزلت امين كان واقف وبدور حولين المدرسه ابوي عاين ليهو كدااا ومشى.. اول م ابوي مشى هو جا علي لكن انا اتجاهلتو عشان عارفه حركات ابوي.. خشينا المدرسه الطابور كان علينا قدموهو بنات كتار ومنهم عائشه ديك قرت قران بصوت خلى بعض البنات يبكو يعني جدجد ماشاءالله تبارك الله.. انا قلت شعر.. بعدها خشينا الحصة الاولى كانت قرآن الاستاذ اسمو عبدالرؤوف استاذ فوق م انو صوتو سمح هو زاتو سمح ماشاءالله وياهو بنات الثانوي كلهم مكرشين عليهو وكدا.. عمرو زي 27 كدا.. ادانا مقطع نحفظو تلاهو وورانا المعاني وبيان الايات وطلع والفصل كالعادة انقلب فوقاني تحتاني.. لين قالت واااااااااااااااي ادوني رؤوف تاني م دايره شي بس عرسوني ليهو.. حنين قالت اتخيلت يصلي بي العشاء في بيتنا🙈🙈.. نون قالت والاعجب يصلي بي ركعتين شكر يوم عرسنا عشان ربنا جمعنا ببعض 🙈🙈اسراء قالت ليهم اتقو الله.. لو بقى راجلكم اتكسرو فيهو زي م دايرين لكن م كدا.. قلت لحنين والبيب حقك رايو شنو في الكلام د؟ قالت لي لو رؤوف اتقدم لي طوالي بجدعو بعد م اسفو طبعا نياهاهاهاها🤣.. اسراء قالت تعبت من التناقش معاكم ومشت قعدت مع ناس عائشة.. في بت كتبت اية عن الزواج في ورا كراسها وكتبت قلب صغير وكلمة بحبك صغيرة شديد ومشت ودتو للاستاذ يصحح ليها.. وواحدين هربو ليهو ورقات اعتراف في تربيزتو.. حنين مشت كتبت في السبورة قلب كبيررر جواهو حنين + عبدالرؤوف.. نون جات ضربتها وقالت ليها هيي ومسحت حنين خلتها نون.. شفنا استاذ جا ماري سريع اتكبكبنا ونون مسحت الكلام سريع ومن اللخبطه نست مكانها وين ووقعت وقعدنا نضحك فيها كترة ضحك🤣 هي زاتها بقت تضحك في روحها.. لكن بسرعة قامت ولملمت نفسها وقعدت زي البنات المحترمين.. في النهاية الاستاذ مر ساي ولا خش.. احنا ختينا نَفَسْنا.. قلت لنون متذكرة زمان في الروضة كنتي كيوووت وبت بت كدا على عكس اسي.. قالت لي قصدك شنو وبقينا نتكاوى ونتونس لحدي م فجاة جا استاذ عبدالرؤوف وشكلو معصب وقافله معاهو ووراهو استاذة ملامحها م بتبشر في الخير وبتحنس فيهو.. قال لينا ي تانيه 4 تتفضلو كلكم معاي على مكتب المديرة بدون نقاش.. الاستاذة قالت ليهو يا رؤوف انعل الشيطان هن قريب ال 70 بت كيف يجن كلهن؟ قال ليها اطلعي من راسي يا استاذة وتعالو كلكم ومشى خلانا مخلوعين.. حنين قالت وااي.. لين قالت عصبيتو حلوة.. نون قالت اتخيلت د غيرتو علي لما يشوفني واقفه مع ولد.. والفصل كلو بقى يعلق كدا وماف زول اتحرك لحد م جا تاني وقال بعصبية اشد عقابكم اتضاعف وجيتو جيتو م جيتو عندنا تصرف اكعب.. فجاة الفصل صنا وكل الناس قامو بتردد كدا.. كلنا الكمية الكبيرة د وصلنا مكتب المديرة..
..يتبع..

الحمدلله حمدا كثيراً طيبا مباركاً فيه❤

والحمدلله على كل حال💙

احمدو ربكم❤ .

بقلم/ مريم (مبتغى)