طيفك ماف

2

الولد ج علي وهو مبتسم قال لي مالك ان شاء الله خير تلفونك مقفول .. من الخلعه مشيت جري دخلت المدرسه ومبعرف حنين حصل ليها شنو.. تاني جيتها راجعه في استاذة شافتني دايره امرق حمرت لي شديد عملت نفسي دايره امشي جنب الباب ساي وفي نفس الوقت جات حنين داخله حكيت ليها ومشينا للبنات وريناهم والفسحه انتهت.. سامعه استاذ الفيزياء قال بصوت عالي بدخلو بهنا ويمرقو بهنا صحي ناقصاات عقل ودين.. مر اليوم ورجعت البيت ابوي رجع لي تلفوني قال لي تاني م تساهري فيهو.. م فتحتو دخلتو الدولاب عديت كم يوم بركز على القرايه بس وبعدها غلبني فتحتو.. لقيت مكالمات من الولد الكسار حذفت رقمو وعديت عادي.. مواهب بقت تتوحم وبطنها كبرت وكانت بتمثل انو حملها صعب واليوم كلو تتالم لدرجة انو مسكوني نضافة البيت وغسيل العدة والهدوم والمكوة وكل شي بس بقت تطبخ هي.. واخواتها كل يوم واحده معاها حتى المعرسه جات من شهر العسل عزمناهم جونا وحضرو الشريط وقالت لي عاد ي سندس بدون كذب ولا مجامله كنتي نجفه وفي كم واحد طلبك لكن رفضناهم طبعا قلت البت لسه شافعه ياداب في تانيه ثانوي.. مواهب بخلعه قالت ليها لييي طفشتيهم.. تاني انتبهت على نفسها.. (طبعا هي قبل كدا خطبتني غصب وعمري ١٢ وفكيت الخطوبة بالغصب بعد م ابوي شاف خطيبي بحاول يغتصبني.. واسه لسه بتحاول تعرسني م عارفه هدفها شنو.. فجاة ج ماري الولد داك في الشريط قالت والله امين قاشر كيف.. قلت بعد السماحه د اسمو شين.. مشيت حكيت للبنات اسراء قالت لي د اسم من اسماء الرسول كيف يكون شين.. وبعدين جوطتكم ف العرس د م عجبتني ويا سندس اطهر ليك ولي قلبك احذفي رقمو قبل م يخطي خطوة.. قلت ليها حذفتو واسم نون الغبي د روحتو.. نون قالت اصلكم عوراء ومتخلفين من يومكم خليكم كدا لما تبورو.. اسراء قالت ليها الدايرك بجيك بالباب ي السمحهه.. قلت ليهم خلاص يخ اسكتو.. اسراء قالت لي احظريهو عشان ترتاحي.. ف شي جواي حماني ف م رديت عليها بس.. عدا كم يوم وكل يوم في شارع المدرسه بشوف الولد داك واقف يعاين لي.. في يوم فجاة تلفوني ضرب رقم غريب رديت جاني صوتو.. قال لي والله شحتفتي روحي ولو م واضح ي ستي انا بحبك.. وعايزك لقدام.. خلينا نخطي خطوة جادة وانا م بتاع لعب ولا بتاع الكلام د اديني فرصه.. انا فالبدايه اتغظت من حركاتك وكلامي الذكوري كان بسبب خوفي عليك لاني والله لقيت نفسي بحبك وشارع مدرستك بقى محل الامان بالنسبه لي.. سجلت المكالمه بضبانتها وسمعتها للبنات وكلهم فارو واسراء جاطت قالت لي انت م حظرتيهو لحد اسه و..و..و.. نون قالت ليها يبت سندس قدرنا م صغيرة خليها تجرب طعم الارتباط.. اسراء قالت ليها انت عارفه انو المشكله مافي العمر وكان علي طعم الحرام م تجربو نهائي د طعم حرام م ارتباط.. صراحه م اشتغلت بيهم خليتهم بتشاكلو وقعدت مع نفسي لقيت نفسي منجذبة ليهو ف قلت لو ضرب تاني حاديهو فرصة.. في اليوم التاني في المدرسه واحنا مارقين نهاية اليوم لقيتو واقف ومبتسم ولما شافني ج علي وانا في شي جواي فرح وفرهد وحس باحساس جميل كدا.. ف تلقائيا لقيت نفسي ببتسم وانا لما ابتسمت هو ابتسم وقال اححا ابتسامة من الجنة وبقى يشغلها لي وانا م سكتو ولا شاكلتو بس دنقرت وبقيت اتبسم وانا حاسه باحساس حلو وهو في نهاية كلامو قال لي عارفه انك احلى زول بتبسم؟ اها وافقتي على العرض ولالا؟ مد لي يدو وقال انا امين.. مديت يدي وقلت وانا سندس.. فجاة طلع قلم مبعرفو من وين ورسم لي قلب (الحركه دي قرف قرف شديد نسال الله السلامة) وطلع خاتم لبسني ليهو قال لي عشان يعرفو انك حقتي وبعدها قال لي بينا الشبكه ومشى وهو بغمز لي.. فجاة البنات ظهرو من ولا مكان وبقو يقولو اووو ويشغلوها لي.. حكيت ليهم واتونسنا مسافه بعدها افترقنا.. رجعت البيت لقيت مواهب شغاله تبكي وتقول وااي ي بطني ي الصادق الحقني.. وابوي قاعد في الارض متحير.. لما شافني قال لي غيري سريع وخشي المطبخ نضفيهو وغسلي العدة ونضفي البيت كلو عشان احتمال نمشي المستشفى.. وهو كذلك.. استحميت غيرت ونضفت البيت كلو.. د كلو و م ماكله طبعا.. غسلت هدومي حقت المدرسه شريتها مواهب شافتني وانا بغسل قالت لي غسلي حقاتي وحقات ابوك ديل معاك عليك الله.. كانو هدوم كتيرة ف قعدت وقت بغسل.. لما خلصت الساعه كانت ٨ مساء.. كنت بشر في اخر قطعة من الحوش لما ابوي ج داخل.. شكلو كان برا.. م انتبهت زاتو.. كان شايل كبابي ميلك شيك تقريبا كبايتين.. قلت اكيد واحدة ليهو وواحدة لمرتو وانا يهودية من بني قريظة😒.. ولاحظو انا م اتغديت ولا اتعشيت ولا شربت شاي ولا اي شي بس على فطور المدرسه.. رتبت الحاجات وختيت الطشت محلو سامعه ابوي دخل لمواهب واداها وهي قعدت تتدلع.. مشيت استحميت تاني لانو الجو كان حار ودخلت غرفتي فتحت المكيف فجاة سمعت صوت ابوي بقول يا سندس.. قال لي خودك ومدة لي الكباية.. طبعا بقيت اعاين ليهو مخلوعه انا م استوعبت صدمه قبيل حقت امين فجاة ابوي يتغير.. شلتها منو وانا ساكته.. قال لي احنا ماشين المستشفى البسي يلا.. لبست عبايتي ومرقت معاهم مشينا المستشفى الدكتور قال لينا بتتدلع وماف شي خطير كتب ليها فيتامينات وقال انو وجع البطن شي طبيعي وهي يادوب ليها ٣ شهور.. رجعنا البيت شلت الميلك شيك من التلاجه وشغلت المكيف القفلتو ومشيت جبت سلطة فواكه لقيتها واكلتها وشربت الميلك شيك وقلت انوم على كدا بس قلت أمسك التلفون شوية الرقم الغريب اتصل.. قفلت وسجلتو بامين وختيت قلب تاني رجع ضرب رديت..
قال لي شنو يا لي قفلتي.. قلت ليهو ماف حاجه.. كنت ساكته وهو بفتح مواضيع من ماف ونص كلامو غزل وكلام معسول وبدا يخليني شويه شويه اوثق فيهو وارتاح ليهو.. اليوم داك م قفل الا الساعه ١٢ ونص بعد تحانيس مني عشان انوم للمدرسه.. وبقى كل يوم في المدرسه بلاقيني في الشارع وانا اساسا م عارفاهو عرف مدرستي كيف لكن م سالتو.. مرات بجيب لي رصيد مرات شوكولاتات وورود وهدايا.. وانا كان كل يوم بكبر في نظري اكتر.. امتحانات الفترة الاولى كبست وانا بقيت احاول اجتهد مع اني م مهتمه (شاطرة لكن م مهتمة).. بقينا نقرا ونقرا ونعصر نفسنا بالقوة وبدت الامتحانات والجدول واثنائو كل يوم كان بلاقيني في نفس المكان ويشجعني ويمسك يدي ويقول لي انا معاك ويديني عبارات تحفيزية حتى اشترى لي مذكرات.. عدت الامتحانات وقالو بعدها اجازة اسبوعين.. مواهب قالت امها مسافرة الامارات لاخوها هناك ولازم تمشي معاها.. ابوي قال ليها وسندس؟ قالت ليهو خليها تقعد مع خالاتها م بجيها شي.. ابوي م عاجبو الكلام لكن وافق ومشيت قعدت في بيت حبوبتي وخالي وخالاتي وهم طبعا بحبوني شديد وحبهم كان ظاهر في اقل التصرفات.. صحباتي كانو بجوني كل يوم في بيت ناس حبوبه ومرة حنكنا حبوبة مرقنا.. ريان سرقت عربية امها وعملت نفسها كبيرة وتامة ال١٨ وسقنا حمنا الخرطوم كلها.. وكنت كل يوم في نص الليل بتكلم مع امين وهو بقول انو اشتاق لي وبتاع.. المهم قال انو لازم نتلاقى في مطعم (..) قلت لهو بخلعه المطعم د فخم شديد ( احنا مستوانا فوق المتوسط لكن برضو م متعودة على الرفاهية لانو قروش ابوي بتمشي لمواهب ).. قال لي م يغلى عليك.. قلت ليهو ناس حبوبة بسالوني.. قال لي اعملي نفسك طالعه مع صحبتك.. قولي ليهم اسراء عشان اكتر واحدة ملتزمة وبثقو فيها.. قلت ليهو بظبط الموضوع متخاف.. مشيت لحبوبة عصرت كرعينها واتونست معاها قلت ليها عاوزه امرق.. قالت لي قبل يومين مش صعتو؟ قلت ليها ديك كانت جماعيه اسه د مع اسراء وحنين بس.. قالت لي الوقت م اتاخر؟ قلت ليها خلي خالتو صفية توصلنا بعربيتها.. قالت لي بس عشانك ي غاليه ي بت الغاليه.. وعيونها دمعت.. بستها ف راسها ومسحت دموعها وانا بتمالك نفسي وطلعت فوق على غرفة خالتو.. حبوبة د نهائي م صعبه وبتحبني وطوالي بتوافق لي.. كلمت خالتي جات وغشينا بيت اسراء وحنين وفي خمسه دقائق فهمت كل واحده فيهم سريع واسراء م فهمتها كويس عشان م ترفض لي.. بس ديل اول اسمين جو ف راسي ف قلتهم لحبوبة وعشان م اغير كلامي سقتهم.. خالتي قالت اها ماشين وين وريتها قالت انتو من الواطه م قمتو جبتو القروش د من وين عشان تمشو.. وقعدت تهظر معانا وكدا لحد م وصلتنا وقالت بتجي الساعه ١٠ بالليل تسوقنا.. حنين قالت احي ي حي لازم اضرب ليوسف يجيني هنا.. قلت ليها واحمد؟ قالت لي كسرت حنكو ي بت.. اسراء قالت اتقو الله! ي سندس جد القصه د مدخلت راسي جينا لي؟ كلمتها قعدت تجوط وقالت لي انا بلغتك ومشت قعدت في محل بعيد منطوي وطلبت قهوة سوداء.. امين جا اشر لينا وحنين شغاله تنبرش قلت ليها احترمي نفسك يبت.. قالت م فاضيه ليك يلا زاتو البيب حقي ج.. مشت فجاة كدا ظهر ولد سمح وطويل تقريبا قريب لطول امين.. يعني يمكن امين ١٩٤ والولد ١٩٢.. امين ج وقعد وابتسم ابتسامه كسارة خلت عيوني عامله قلوب وبقيت متنحه فيهو.. انا بقيت بتنفسو عديل كدا متعلقه بيهو لدرجة بعيدة.. طلب لينا وقال انا جبتك عشان حاسي انو في حاجه م عارفها عنك.. قلبي وقع في رجليني وبرجفه قلت ليهو كيف؟ قال لي في حزن مبالغه في عيونك سببو شنو؟ طوالي قعدت ابكي وقلت ليهو لانو ماف شي في حياتي سمح ويستاهل الفرح.. كلها سواد ف سواد..،، قال لي وانا وصحباتك وحبوبتك وخالاتك؟ قلت ليهو اي انتو الوحيدين وبالذات انت ربنا يحفظك لي حبيبي.. ابتسم وقال لي قلتي شنو.. عملت رايحه.. بقى يشغلها لي.. ضحكت وانا ببكي قلت ليهو خلاص.. صورني طبعا.. المهم قلت ليهو انا في حياتي مف شي حلو امي وابوي اولاد عم عرسوهم غصب وكل الناس كانت بتحب امي لانها زوله كويسه واخلاقها حلوة عدا ابوي كان بكرها لانها سرقت منو حبيبتو الي هي مواهب بما انها عرسها هي و م عرس مواهب بقى يسكر ويجي يضربها وطبعا كنا في السعودية.. لحد ما انا اتولدت وعمري ٤ هو كل يوم بعنفها وانا متذكرة الكلام د طشاش غير اني بسمعو ف القصص والحكاوي،،.. امي كانت حامل باختي الدايما قالت انو حتسميها سوسن لحد م في يوم ابوي ج ضربها شديد لما اجهضت بطريقة كعبة شديد وكمان اكتشفو ليها ورم خبيث منتشر في الراس واتوفت اليوم البعدو..
..يتبع..

بقلم/ مريم (مبتغى)

(فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا) 

استغفر الله العظيم ❤