طيفك ماف

9

كنت حاسه باطرافي باردة ومنملة وصحباتي من حولي جايطين وكلهم شي ببكو شي بتمكيجو شي بزغردو شي بحضنوني وانا غاضبه على زعلانه كدا و م عاجبني الوضع نهائيا يعني فجاة كدا بقيت مرة زول وانا عمري 16 او لسه م تميت 17! كنت حاسه بألم في قلبي م طبيعي،،... بقيت ابكي شديد بحرقة.. الناس حيكونو قايلنو من فرحة العقد لكن صحباتي بعرفوني اكتر من نفسي كلهم عرفو بكائي بكاء الم واتلمو فيني وبقو يواسوني.. اسراء قالت لي م كان تستعجلي.. طبعا كل واحدة حاضناني باتجاه وانا ف عالم تاني بس.. باقي البنات وبنات الاهل كانو بعاينو لينا باستغراب كدا احساس ديل مالهم..مواهب كانت لسه واقفه ف الباب عاينت لينا كداا قالت مشششم اسه الببكي شنو التقول ماتت م فكت بورتها.. ولا زعلانه عشان لسه م تميتي ال18؟؟ م تكوني لسه ف كلام لا لزواج القاصرات وكلام النسويات المطلوقات دا! المهم يا نادين تعالي ظبطيني مكياج قالو احتمال يعملو برنامج.. عارفه مكياجك رهيب شديد احسن من الارتست زاتو.. طبعا نادين بس بقت تعاين ليها بنظرة قرف كدا لما مواهب انسحبت ومرقت برا.. نادين قالت د شنو د طبعا الموهومه د صدقت! كان ف بنات اهل مواهب كتار ف الغرفه خلو مكياجهم وشعرهم وونستهم وقبلو على نادين على انها كيف تقول على مواهب كدا! وبقو يتشاكلو واحنا بنحاول نحجزهم م قادرين اصوات كواريكهم مبالغه! فجاة دخلت مواهب قالت في شنو م تفضحوني والله النسوان بس بتكلمو بصوت عالي لكن لو ركزو وسمعو كواريك والليله يوم عرس حتكون فضيحتنا فضيحه! قالت لبت اخوها مالك يا انسام هايجه كدا؟ قالت ليها يا عمتو الفاسخه دي قالت عليك موهومه.. مواهب باستغراب قالت ليها فاسخه منو؟ البت اشرت على نادين.. نادين طبعا ششغاله تكورك قالت ليها فاسخه امك انتِ ولونك المحروق دا انا من يومي بيضاء دقيقه بس! فتحت تلفونها طلعت صورة ليها يوم تخريجها من الروضة ولونها ابيض.. قالت ليها شوفي! فاسخه قال!! قالت ليها واضح انها فوتوشوب يعني اسه دايره تقنعيني انو اللون الابيض شديددد دا لون سودانيين؟؟ وبعدين امي دي تاج راسك وبقت تكورك شديد ونادين تكورك م بتقصر والشله كلها شغاله تردح مع نادين وتدافع عنها م عدا انا واسراء ساكتين بس.. وبهناك انسام دي وكلل البنات الفي الغرفه البعرفوها والما بعرفوها بدافعو عنها ف المهم الموضوع زاد .. مواهب ختت يدها ف راسها قالت ليهم ي جماعه الناس حيقولو شنو! الليله سجمك يا مواهب! هم ولا سامعنها مستمررررين يكوركو قامت مواهب فجاة كدا كوركت خلعتنا كلنا قالت يا بنات كلكن امرقو من الغرفه دي تعالو في غرفة تانيه تقعدو فيها خلو قليلات التربايه ديل براهن مع صحبتهم المجنونه دي.. كلل البنات مرقو يخ كانو كتار لدرجة مبالغه بنات جيران على صحبات على بنات اهل على بنات معارف وحلة واييييييييك الخ.. نون قالت د شنو الهواء الجاء فجأة د كانو كاتمين للدرجة د! غرفتك مسكينة ي دنو استحملتهم.. دمعتي نزلت.. كلهم حضنوني.. رتاج قالت لي بالمناسبة احنا لا مبسوطين لا زغردنا من قلبنا لا فرحانين للعرس دا اساسا لكن انجبرنا نعمل روحنا فرحانين.. قلت ليها هه لي م فرحانين؟ اسراء بعصبية قالت لي دايرانا نوافق نعرس ليك واحد م اتقى الله فيك واتجاوز حدودو اكتر من ميهـ مرة واستغلاك استغلالات بشعهـ وانتِ ف نفسك م جاهزة للزواج وكفاية جدا انو هو م خاف الله فيك.. حنين قالت زول بتاع لف ودوران انا مستغربة فيهو جدا و م عارفاهو عايز يصل لشنو لكن م مطمني،،... مزن قالت الله يستر بس.. لين قالت ليهم يا جماعه استهدو بالله انتو بتسمو نفسكم صحبات؟! هي الفيها مكفيها م ناقصه كلامكم السلبي دا.. كلهم قالو لي اسفين و م قاصدين ننصرف.. ضحكت قلت ليهم عادي وضحكتي جرت لبكية.. كلهم بقو يبكو معاي بقينا نبكي مسافه كدا وحنين واسراء شغالين يحولقو.. م عارفين نعمل شنو في المصيبة دي.. فجاة مواهب جات داخله كدا عاينت لينا باستغراب قالت يلا يا بنات امرقن.. ريان قالت ليها م مارقين.. مواهب قالت ليها قشران لو قبلت عليك م بخليك امرقي بـ ادبك بس.. لين قالت ليها نمرق ليه يعني.. سندس م زاحين منها ولا خطوة.. قالت ليهم اسه بتشوفو براكم.. فجاة كدا ج داخل امين لابس جلابية وطاقية وشال وشكلو كأنو طول زيادة😭 تلقائيا البنات مرقو لانو اساسا م كانو لابسين طرحهم خصوصا اسراء وشها كان كاشف.. وحنين.. المهم مرقو بسرعه لانو م عندهم خيار وكانو زاتو مخلوعين وخلوني براي مع دا.. هو كان شايل جوالو الاحدث ايفون.. ختاهو ف جيبو وابتسم وهو جاي علي.. انا بس بعاين ليهو جوا عيونو بغضب ومن جواي منهارة وبرجف وقلبي واجعني شديد وعايزه ابكي واستفرغ.. جا علي داير يقرب ويمسكني.. باسني ف راسي قال لي مبروك علينا وكل سنة وانتِ حقتي.. تفيت في وشو ولزيتو اديتو شلوت بأقوى م عندي وحاكيتو "كل سنة وانتِ حقتي".. هو طبعا مخلوع متوقعني زي اي بت الكلام دا حيفصلني وكدا.. بقيت اشلت فيهو وهو لسه مصدوم.. طبعا حالتي بالبلاء اساسا م متمكيجه وقاعده ابكي وشعري م بعرفو كيف.. المهم هو عاين لي كدا قال تمام ي سندس طلع تلفونو ومشى.. طوالي البنات جو داخلات حضنوني وبقيت ابكي وهم يبكو معاي.. قضينا يومنا بكاء والناس برا شغالين ضحك وونسة وضيافة وبنات الاهل متمكيجات وعايشات حياتهم قاعدات ف اوض تانيه.. فجاة جات داخله ام امين واخواتو وهم بزغردو وفرحانات امو زغردت وقالت لي بالجد امين عرف يختار ماشاءالله يا بتي سمحه.. اختو الكبيره قالت لي رغم انو واضح حالتك مأساوية و م زيك زي اي عروس ووشك م غسلتيهو لكن برضو سمحه ولا شنو يا امي؟ امها قالت ليها مرة ولدي سمحه كدا كدا.. انا طبعا قرفانه منهم بس منزله راسي هم قايلني خجلانه.. مواهب جات داخله وراهم بتزغرد ومعاها اخواتها وكم مرة كدا وقلبو الموضوع زغاريد وضحك ومرقو من الاوضه.. فجاة جو خيلاني وخالاتي داخلين البيت طبعا مدفوس فل ناس ومعاهم حبوبتي شايله عكازها رافعاهو فوق وبتكورك وخالاتي كل واحده هايجه اكتر من التانيه ونفس الشي خيلاني.. ابوي جا بقى يتشاكل مع خالي دايرين يتضاربو.. طبعا عشان عقدو لي،،، ناس خالتي شايفين م المفروض يحصل كدا لاني لسه صغيرة و م كملت تعليمي المهم فهم الناس المتحضرين ديل.. ومواهب شغاله تكورك مع خالتي وامها مع حبوبتي وباقي خالاتي مع اخوات مواهب والنسوان والضيوف وام امين كلهم اتدخلو الحكايه قلبت شكلة كبيرة مبالغه انا دخلت اوضتي قعدت ف الارض ختيت يديني ف اضنيني بقيت اهتز واصرخ واقول نينينينينينينينيننيي حرفيا شكلي كان زي الناس السايكو.. صحباتي كلهم مصدومات و م عارفين يعملو شنو اسراء شغاله لا اله الا الله💙! مزن شغاله تبكي معاي قعدت جمبي ف الواطه قالت معليش يا قلبي وحضنتني وانا بهتز.. المهم وضعي كعب م بعرف تاني حصل شنو بس بتذكر اني شبه نمت صحيت راسي لافي حاولت اقوم جيت واقعه.. صحباتي ف الاوضه لكن م عارفاهم وين لكن لما وقعت كلهم جو اتجاهي.. ضربت راسي بقى واجعني تاني نمت م حسيت بـ شي برضو.. صحيت بعد يومين قالو لي دخلت ف حاجه شبه الغيبوبه اثر ضربه الراس لكن صغيرة والمشكلة حلوها اعمامي الجو من البلد وخالاتي لسه م راضيات لكن الموضوع هدأ.. د كلو م هماني.. فجاة جات داخله مواهب قالت ليهم السنيوره صحت؟ خلاص بعد دا فكفكو بيوتكم م معقوله قاعدات لي 8 بنات زي القدر!
مف زول اشتغل بيها وصحباتي قعدو معاي لحدي م اطمنو علي كم يوم بعدها رجعو.. وضعي م كان كويس و لا عندي تلفون حتى بس بتذكر مواهب بتجهز هي وامها حاجات الحبسه عشان يحبسوني، وانا كأنو الموضوع م خاصيني بس حاسه بجرح عميييق في قلبي عمرو م حيبرأ.. وبما انو معندي طريقة تواصل كان كل يوم بتجي بت تطمن باقي البنات علي.. في يوم جات ام امين ومعاها واحده من اخواتو طبعا اختو سمحه ما شاء الله كدا عامله ميج ومهتمة بنفسها.... م ممكن اقول عليها سمينة بس يخ م عارفه اوصف المهم.. جات هي وامها قاعدين مع مواهب وانا قاعده ف اوضتي التلفزيون شغال برنامج كرتون مرة مرة اعاين فيهو وانا م فاهمه وباقي الوقت بعاين في الفراغ.. فجاة جات داخله اخت امين طبعا كنت سامعه اصواتهم من الصالة.. رغم انها اخت امين بس بحس اتجاهها احساس عكس امين بالجد حاسه اني مرتاحه ليها وطاقتها السعيدة تلقائيا بتملاني.. لما شفتها ابتسمت.. هي ابتسمت قالت لي عروستنا الحلوة.. جابت كرسي قعدت جمب سريري بقت تتونس معاي بعد شويه قالت لي معليش ي دنو لكن انا عاوزه اعمل ليك حاجه بناء على طلب امي م تزعلي تمام؟ استغربت! مشت فتشت ادراجي طلعت مكياجات ومشت جابت شنطتها طلعت مكياجات يلا مكياجي على مكياجها بدت تمكيجني و واضح انها زولة فنانة شديد تبارك الله ،،... الموضوع اخد قريب الساعة لكن واضح انها تعبت فيهو،،. لما خلصت بقت شغاله تقول ماشاءالله تقريبا قالتها 16 مرة.. كانت مبتسمة لدرجة انها قامت من مكانها وهي فرحانه وبتنطط وتكورك مامااا وجرت لامها برا.. فجاة امها جاتني داخله برضو عيونها بقت قلوب و كانت فرحانه شديد وقالت الصلاة على النبي دي مرة ولدي جد جد يا بختنا بيك.. وبقت تتكلم كتير وهي مبسوطه.. ومواهب وراها تضحك قالت شفتي بتي كيف! قلت اجي سبحان الله متين بقيت بتها! المهم اخدو قعدتهم ومشو م كان عندي اخلاق امسح المكياج لكن قمت استحميت وطبعا لما غسلت وشي عملت مزيل مكياج شلتو، طلعت احسن شويه.. اليوم كلو م كنت ماكله حاجه اصلا د بقى الطبيعي بتاعي لدرجة انو جسمي هزيل... مشيت كبيت حليب شربتو وانا بحضر سبيستون بعدها نمت.
اليوم التاني مواهب جات قالت نسابتك ديل قالو حيعملو حفله للعقد ولازم تلبسي فستان يكون خنفشاري،،،... الحفله حتكون ف مزرعة بعدها العرس بأسبوع.. و م حيكون عرس ساي طبعا امين حيعملو ليهو 7 حفلات ، واخر واحده الحنه، بعدها العرس واليوم البعدو الجرتق،،.. اما انتِ حنعمل ليك حنة ورقيص عروس وكم حفله تاني برضو!! قلت دا شنو العواره د (ف نفسي) وبعدين هم عندهم قروش قدر د من وين ماشاءالله! صح ابوي يعتبر من الاغنياء لكن م للدرجه د! الشغلة دي بتحتاج ميزانيات ملاينرة عديل!! قبل ما اعرف كانو بجوني خبيرات تجميل يعملو لي حاجات كدا ويهتمو بي قالو عشان اكون نايرة والبنات معاي لكن انا م مع زول بس حاسه نفسي منفصله كدا.. اي نزلوني دخان وعملو لي كل كلام الحبسه لكن م حاسه بيهو ولا انا مبسوطه لا صحباتي مبسوطات.. اسراء قالت لي يا سندس باذن الله ربنا حينصرك ويثيبك بس انتِ اتمسكي بيهو يا سندس لمرة واحده بس اذكري ربك!!! كنت ك العادة م معاها بس سرحانه كدا.. مؤخرا بقيت بتصرف بـ غرابة انا زاتي م متحكمة فيها.. المهم جا يوم العقد ولبست فستان اصفر وكان فعلا حفلة سمحه واي شي وكل الناس مزز وانا مزة وكل الناس شايفاني سمحه والكلام الفارغ دا.. م بتذكر زاتو حصل شنو في الحفله ولا كانت كيف لكن بتذكر اسراء كانت حاضراها وهي منقبه و قاعده بعيد قالت لي اول حفلة عرس احضرها بعد م بقى عمري 14.. بس عشان خاطرك لكن بسأل الله العظيم م يؤاخذك على ذنوب المعازف دا بالنسبة لانو عرسك لانو انتِ مستضعفه والموضوع م بيدك واساسا م اخترتي الموضوع د من الاساس.. ربنا يصبرك يا حبيبتي.. بعد كلامها د كنت حابكي شديد لكن اتذكرت انا وين.. بعد كم يوم كان يوم رقيص العروس ،طبعا بنات بس،،،.. قلت ليهم يا جماعه انا ف وضع م بسمح لي اقول كدا لكن حاقول.. انا عارفاكم بتحبو الربة وانا زاتي بحبها ف بتمنى انو اليوم دا نرقص بكل م اوتينا من قوة لعلنا نفرغ.. اسراء اتنهدت وقالت الكلام م بجيب نتيجة معاكم!! يوم الرقيص كنت طالعة قرضة شديد والحفلة كانت رقيص شديد ورقصة الرقبة دي نون بتظبطها شديد ف كانت بتعملها حلوة عديل.. المهم الحفله كانت جمهورررية حاضرنها بنات السودان كلهم تقريبا.. ف بت برضو اسمها ريان م بعرف جات من وين تقريبا بت جيراننا ولا شنو شكلها نوع بنات الجبنه ديلك برضو كانت حاضره وبتصور! ريان صحبتي جات اشتبكت معاها اتشاكلو وحجزوهم!! اساسا اتعودت على المشاكل البقت ملاحقاني ف كل مكان دي....،،
برضو كان ف يوم حنتي قبل يوم حنة امين، كنت لابسه ازرق غامق لكن م كحلي، المهم لون حلو شديد، واحلى شي فيني زماماتي التقليدية السودانيه زي حقت الجرتق..،، المهم كان ف حفله وداع عذوبية كدا عوارة بس كانو اكتر شي مستلمنها مواهب وصحباتها.. منهم صحباتها اخر مرة شفتهم زمان لما كنا عايشين ف السعوديه ف شافوني شافعه،، شغالين لي كبرتي كبرتي و م مصدقين! المهم بدون ما احس ولا اشعر جا يوم العرس!! يا الله انا بالجد بطلب من الله العون لانو انا م عارفه الحاصل شنو حرفيا الحياة ماشه وانا واقفه!! من الصباح الدنيا مقلوبه مقلوبه مقلوبه بطريقة مبالغه بس،،.... احنا ف بيت ناس حنين ومعانا بنات خالاتي وبنات الاهل كلهم وشغالين يتونسو عادي مع انهم حاسني م طبيعيه....،، بت خالي ريل بحبها شديد اكتر واحده قريبه لي برضو تعتبر صحبتي وعارفه.. المهم كانت فعلا كالدواء اللطيف💙❤. مزن قاعده تكورك قالت م دايرين كوافير ولا اي *****.. نادين قالت ليها الله ي بت فقدتي الادب ولا شنو!! اسراء قالت ليها لو الحفله بنات بس كان اتمكيجت معاكم لكن للاسف حاصل م سيحصل!! ممكن اعمل كل شي بس البس نقاب مغطي حتى عيوني عشان م يظهر شي.. للحنه د بتحننها معاكم يا ستي والجونتيات م بتقصر! حنين قالت ليها معاك ي سرو.. مزن قالت ليهم انتو بتتكلمو كأنو سندس وامين معرسين عن حب وكأنو دا عرس حقيقي!!! اسراء قالت ليها الحاصل حاصل يا مزن دا الربنا كاتبو لعلو لخير وانتِ يا مزن زولة مزة ماف داعي تغيري الحاجه دي الليله!م حنمشي العرس بخلقتنا القمنا بيها من النوم يعني!! مزن قالت ليها وافكارك حقت المكياج والزينة!! والموسيقى! مش مفروض العرس م يكون حفلة ولا ف صاله اصلا.. اسراء قالت ليها صاح يا مزن لكن.. صرخت فيهم قلت ليهم اسكتو كلكم انا م فارق معاي ان شاء الله نتمكيج كلنا او لا م فارق معاي بس المهم ياه بتمنى اخد حبه مخدره وانوم بس.. كلهم اتخلعو فيني طبعا! المهم بت عمتي زمرد جابت لي عصير جزر وقعدت تتونس معاي وحضنتني قالت لي حاشتاق ليك يا قلبي! صحي ماشين شهر العسل اسبانيا ومنها تستقرو ف جزر المالديف!! روان بت عمي قالت ليها بسمع الناس يمشو جزر المالديف شهر العسل واسبانيا احتمال استقرار لكن سندس وامين ديل عاكسنها😂 قلت ليهم هه صحي.. طبعا جاريتهم مع اني م كنت عارفه اساسا المعلومه د وانو ف شهر عسل اساسا.. لكن صحي متوقعه شنو من واحد عامل سبعه حفلات كل واحده ف صاله احسن من التانيه والعرس ف صالة الاحلام!!! جات اخت نون اسمها هوازن شايله مفتاح العربية وبتكورك وبتصفق قالت الدفعة الاولى للكوافير يا جماعة اي صاح العربية كبيرة وأي شي لكن م بتتجازف تتدفسو كلكم ف نفس العربية ياخ انتو كتار مبالغه على الاقل محتاجين مشية وجية 9 مرات عشان يجيبوكم كلكم!! الله يعين بس!! طبعا اول شي لسندس والمعاها عشان العروس لازم تبدا اول.. بالله فجاة البنات ديل قامو يتجارو للحمامات وخبيط الباب والجوطه بدت وكعكيك الشعر وبتاع.. وفي جوطه حاصله وواااي.. المهم في واحده قالت ليهم ي جماعه بس امرقو من الحمام سريع اصلا احنا ماشين الكوافير يظبطونا مفروض نطلع من هنا ساي! قالو ليها اصلا يا بت.. طبعا بيت ناس حنين فاضي لانو اهلها كلهم ف بيت ناس حبوبتي الي هو بيت العرس لانو بيت كبير!! والبيت خالنو لينا احنا البنات،، طبعا الغرف كلها مدفوسه فل والمراتب م تديك الدرب حتى الصاله والهول والمطبخ مليانين مراتب!! د من كترة البنات!! وعربية هوازن كبيرهـ يعني ممكن تشيل 9 بنات ف المرة الواحده لكن اتخيلو قالت تمشي وتجي تسعة مرات من كمية البنات!!! طبعا بما انو هنا كان معسكر بنات وكدا ف حتى اخوات صحباتي كلهم قاعدين معانا!! وشويه من بنات اهلهم... زحمه غايتو الحمدلله بس.. اي صح الاجواء شويه حلوة بس السكين الفي قلبي لسه مغروسه والجرح عميق ! المهم احنا جازفنا استحمينا وطلعنا،،.. هوازن وصلتنا الكوافير طبعا كوافير كبير شديد واحسن خبيرة فيهو مسكوها لي! طبعا حجزوهو بنات خالة امين! بدو يشتغلو فينا من اسه حاسه طاقة المزازة طالعة ماشاءالله بالجد تبارك الرحيم!! الدفع شغاله تجي وتجي و الكوافير اتملى بنات لدرجة انو بتاعات الكوافير اتوترو!! شغالين فيني تقريبا من 1 ضهر ل7 مساء،،... اخر شي لبست الفستان وبخروني وصوروني وقعدو يزغردو!! نون قالت لي ازغرد ي سندس؟ فكيتها انا زاتي زغروده طبعا بقينا نضحك😭😭😭 نون فكتها معاي ومزن ونادين ورتاج الاتعلمت حديثا ولين وريان وتصدقوني لو قلت ليكم حتى حنين واسراء فكوها معانا!! غير باقي دستة البنات طبعا! كان شي مبببالللغة.. جد يوم حلو الحمدلله رغم كل شي جواي.. وكان ف عربات اولاد كتيرة بدت تصل برا وعامله اصوات بوري بطريقة كدا! انا طوالي مزاجي رجع عكر تاني لاني حرفيا م دايره الشي دا بس دايره امشي مكان مريح وبعيد وآمن واتعالج من كل شي فيني!! يخ ماشاءالله حتى هوازن الي لحدي اخر لحظة مجهجهة بتوصل جات اتظبطت وطلعت مززززززة وفستانها ماشاءالله تبارك الله بالجد م عارفه اقول منو واخلي منو الناس كلها سمحين.. اسراء قالت لي قمرة يا قلبي.. اتلفت عليها،، يادوب شفتها! قعدت اصررررخ وفكوها معاي باقي الشله صرخه😭 كان شعرها مفلفل او كيرلي بطريقة حلوة شديدددد ونازل ف وشها وكل مرهـ تزحو من وشها يرجع ينزل فيهو تاني،،... والمكياج بالجد ماشاءالله ماشاءلله جاي معاها شديد والزمام وكل شي ياخ ماشاءالله تبارك الله،، كانت لابسه فستان اسود حلو شديد لكن طوالي مشت جابت العباية والطرحه عشان تلبس والنقاب! لين جابت لي مراية عشان اشوف روحي قالت لي انتِ لما تكوني صاحيه من النوم قمرة ف اتصوري اسه ي عزيزتي حتكوني كيف! اللهم بارك جد اقرو ليها يس!! قلت ليها لين شيلي المرايه د قبل م اكفتك م دايره اشوف انا.. اسراء قالت لي يا سندس بالمناسبة شعرك الكاشف د حيظهر ف الشرايط والصور ويكسبك ذنوب مبالغه انتِ م قدرها ولا في زول بستحملها بالاضافة للزينة وجمالك المبهر دا ماشاءالله! لين قالت ليها شايفه ف خيار في يدها ولا العرس دا اساسا بمزاجها؟ ريان قالت ليها على اساس هي ف الايام العاديه بتلبس طرحه ساي!؟؟! اسراء قالت يا جماعه استهدو بالله.. الزغاريد فجاة دورت تاني وجا داخل المشغل امين واصحابو والاولاد! بتاعات الكوافير بقو يتلفحو بالطرح والبنات يزغردن ساي وعيونهم عامله قلوب.. امين جاي علي مبتسم!!!،، المعوق د شكلو م اتعظ!!،، اسراء نزلت نقابها بسرعه وتوتر وغطت عيونها بقى م ظاهر منها ولا شي حتى ظفرها❤،،... الناس كلهم فجاة اتضايرو م بعرف طارو وين و بقينا انا وامين بس.
..يتبع.. 

بقلم/ مريم (مبتغى)

{رَبَّنَا لَا تَجْعَلْنَا فِتْنَةًۭ لِّلَّذِينَ كَفَرُوا۟ وَٱغْفِرْ لَنَا رَبَّنَآ ۖ إِنَّكَ أَنتَ ٱلْعَزِيزُ ٱلْحَكِيمُ ٥}