في الخصام يعتذر الأكثر حباً وليس الأكثر خطأ
﹏﹏﹏﹏﹏﹏﹏﹏﹏﹏﹏﹏﹏﹏
الـكـاتبة فـاطـمه علـي 🦋
﹏﹏﹏﹏﹏﹏﹏﹏﹏﹏﹏﹏﹏﹏
فرح
ضلينا كاعدين بالمزرعة كل 3 ايام يجون الولد يجيبون خبز و لحم ومخضر لان سجاد ما عنده سيارة والبيت بنهاية المزرعة ميكدر يمشي كل هل مسافه................. علاقتنا نفس ما هيه نتفرج تلفزيون سوه لو نسولف شي عام وهيج نخلص يومنا ........................................ فد يوم كاعدين خابرت امه ضل يحجي وياها انوب كال اي هاي يمي جان ينطيني الموبايل ويأشرلي احجي .....
فرح : الوووو هلا خاله
نشميه : هلاا ......... عايني عليه كونج تريدين ترتاحين فارجي من العرب كله انه اكلج ويه ابني مالج عيشه
سجاد : اباوع عليها وجها صار اصفر بسرعه اخذت الموبايل وفتحت سبيكر
نشميه : تسمعيني لو لا
فرح : اي خاله
نشميه : وخلخاله تخلخل ضلوعج انه كلشي جاي يصير ما راهملي ولاني جارعته بس شبيدي ويه خوي ابو حيدر....... انه اريدج تفكرين كلش زيين ان جانج ادورين راحتج فارجي وانه بيدي اوصلج للولايه ومناك شوفيلج سيارة مصيبه التاخذج وتخلصني منج ولج شسويتي بينا دهر لفج ولف الخلفج
سجاد : فرح بس دموعها تنزل وامي نازله عليها
عز عليه اشوفها هيج صح امي بس هاي هم زوجتي والها حق عليه وامي حيل داست بطنها خاصه من كالت لف الخلفج
نشميه : ما تحجين موت لفاج وخلصنا منج
فرح : هااا خاله
نشميه : لا تبكبكين عيارة النسوان اعرفها كلها
سجاد : يمه ما كافي ما مليتي ليش هيج تسوين كل الدنيا فرحانتلي وانتي لا
يمه اني مقتنع بيها لا تحاولين بعد واني هذا الحجي كله راح اوصله لخالي صادق
نشميه : لا ما مليت يمه هاي البت ما ترهملك
سجاد : شمدريج يمه ما ترهملي
انتي تعرفيها لو اني ........كافي يمه لخاطر علي ..... مع السلامة...... سديت الخط خاف اضل اكثر واجرح امي بحجايه
فرح
تركته يحجي ورحت طلعت بره اريد اشتم هوه جان الجوء بارد و دنيا ليل...... ليش ما مكتوبلي استقر وارتاح امي من راحت اخذت وياها كل عاطفة وطيبة الدنيا عليه كل الي اشوفهم وتعرف عليهم جاي يأذوني
رجعت دخلت للبيت بوجهي نمت بفراشي بس ولا اخذت عيني نوم ما جنت مستعده لاي نقاش بيني وبين سجاد
اني الي دخلت روحي بهل دوامه استاهل جان لازم احسبها من البداية رجال شروگي من الجنوب اكيد كلشي يختلف عن السنه واكيد مو بالسهوله يتقبلون هل شي احنه هم عدنه عشائر ما تتقبل انو ابنها يتزوج وحده ما يعرفونها بس كلت الدنيا تغيرت واكيد بس بالبداية تفكيري جان عكس الي جاي اعيشه امه بالموبايل وهيج سوت شلون راح اعيش وياها شلون لو رجع سافر سجاد للشمال شراح تسوي بيه معقوله تحاول تكتلني لالا استغفرالله شبيج فرح شهل تفكير الاكشن ............................ ضليت طول الليل افكر واسولف ويه روحي طلع الفجر واني نفس الكعده كمت توضيت وصليت اباوع الجوء رغم البروده والضباب بس حلو قررت اطلع من البيت وين ما تاخذني رجليه
اخذت وياي الموبايل كلت كلشي يصير واني ما كايله لسجاد راح اطلع بس كلت ما ابتعد هواي........ المهم طلعت لبست صايه مالتي وفوكها قمصله امشي واتذكر ايامي اني ومروه من جنه صغار ومثل هيج جوء ماما تاخذنه للمدرسة اتذكر هيه شلون جانت تعاند وما تلبس هواي ملابس ولا تقبل بالقمصله ومن تبرد تجي تاخذ قمصلتي شكد مشتاقتلها اتمنى لو اعاتبها اتمنى لو اكلها شكد جنت محتاجه وكفتها وياي اتمنى لو اسالها ليش هيج تغيرت عليه لو هيج سوت وياي لو شلون انطاها گلبها تتركني باصعب ايام حياتي ما خافت على اختها من الدنيا ما يوم سالت نفسها اختي ويان شسوي ويه منو عايشه عدله لو ميته اني من طلعت من السكن لليوم محد يعرف عني شي صرت اتذكر ايامنا سوه و اتذكر مروان وليث وشلون جنه نلعب لو شلون جنه عايشين اتذكر حياتي قبل شلون مرتاحه دموعي تنزل ويه كل ذكره منهم........ ما انتبهت على غصن جبير مال شجرة جان تلتوي رجلي واوكع بالكاع كمت صرخت اااااخ يا يمه اااخ يا وجع گلبي رجلي جانت حجه حته ابجي
ضليت مكاني افرك بيها اريد اكوم ماكو اباوع الدنيا صارت سوده ولا عبالك صبح غيم اسود حاولت اكوم حته ارجع ما كدرت اباوع المكان كله زرع واشجار ولا اكو اثر للبيت شلون ارجع يا ربي ضليت كاعده بالنص ساعه ورها كمت ورجعت وكعت ما كدرت الم برجلي كلش قوي طلعت الموبايل وخابرت على سجاد
