﮼سأنظر ﮼إليك﮼دائما﮼بنفس ﮼الحُب ❤
﹏﹏﹏﹏﹏﹏﹏﹏﹏﹏﹏﹏﹏﹏
الـكاتـبـة فـاطـمـة عـلـي 🦋🦋
﹏﹏﹏﹏﹏﹏﹏﹏﹏﹏﹏﹏﹏﹏
سجاد : ضلينه لليل نفس الوضعيه كلها كاعده يم خالي المستشفى طردونه كلنه ضل عمي صلاح يمه واحنه بره المستشفى كاعدين
حيدر : سجاد ارجع للبيت انته اجيت من طريق بعيد وليل كله ما نايم ومناك عمتي خطيه لازم ترجع
سجاد : حيدر وخالي
كرار : احنه يمه لا يضل بالك كل الولد هنا
سجاد : خوش راح اروح بس اناملي ساعه وارجع موبايلي راح يضل مفتوح شنو يصير خابروني
حيدر : روح خويه الله وياك
سجاد
رجعت للبيت والطريق كله افكر شنو صار ليش هيج خالي وصل بي من القهر ينجلط و الولد يكولون كلشي ما بي وصلت للبيت كله ناس
سلمت على امي و حبوبه ضليت يمهن شويه وراها صعدت بس مهدود حيلي خايف خالي يكسرنا بس غسلت وبدلت ملابسي بوجهي للجربايه عيني بالسكف وبالي بالمستشفى خابرت حيدر كال نفس الوضعيه سديته جاي اكوم اطفي الضوء دخلت فرح
فرح : الله يساعدك
سجاد : ويساعدج
فرح : سجاد ميصير هيج مسوي بنفسك لعد خالتي شدكول لو بيبي لو الولد لا تخاف والله خالي حيصير زين ويعبرها وخاصه الجلطه الي مضروب بيها خفيفه صح هسه تعبان بس حيصير زين بمرور الوقت
سجاد : فرح ما اكدر اتصرف طبيعي هذا مو خالي ابوي
فرح : ميخالف يا عيني انته بس ادعيله ورب العالمين يشافي
سجاد : ان شاء الله ........................................ بعدني جاي انام صار صوت جوه نزلت فرح تركض اسمع من فوك خالي وضعه متخربط بوجهي لبست ملابسي ورجعت للمستشفى دخلت الوضع مو طبيعي اكو خطوره علي
.
.
.
.
.
شهد
ضلينا لثاني يوم نفس الوضع ونفس الناس وصارت كرايب من بعيد هم يجون البيت انترس ناس من بين الموجودين شفت سجى وعمتي كوثر بس بالي يم ابوي حته رجليه مابيه اكوم اسالم عليهم ضلينا صار الليل ما سمعنا غير كالو وضعه تخربط اكثر ودخلو انعاش هنا اني تخبلت كمت ادك ولطم وعمتي كلهم نفس الشي الي اذاني اكثر نظرة الشفقة بعيون الناس شردت منهم صعدت فوك بجيت لحد ما حسيت نفسي بعد ما عندي اي طاقه اكل ماكو من قبل يوم العصر يعني يوم ونص اني ابد ما ماكله ولا فرح ولاعمتي ولا بيبي واني عندي مشكلة بالضغط دائماً يهبط ضغطي ماحسيت غير الدنيا بدت تضلم بعيوني...........
صحيت على نفسي بغرفتي وعمتي يمي وعمه كوثر وسجى وياهم ولد شاب ما ميزت منو هوه بس لازم ايدي جاي يقيس الضغط
