عذبة مثل صوت ابو نايف قوية مثل قصيد بن فطيس.

البارت 10

البارت 10

سبحان الله وبحمده سبحان الله العظيم
-مزن-
طلعت مع البنات لغرفتهم ونامت بسرير جوري بعد صراخ ودموع وشهقات ما وقفت من الوجع والآلم
جوري وهي تناظرها وتكلم جنى : كل ذا عشان قالت له تتسمع من وراء الابواب ؟ اقسم بالله متخلف
جنى بتنهيده : ما تعرفين جابر ، الكلمة بحسابها عنده ويحسبنا في غرفة تحقيق
جوري : حسبي على الي وظفه بالعسكرية وخلاه يصير ضابط
جنى: حرام عمي ماله دخل ، اخوك حلمه كذا
جوري : لا ، هو الي جبره اخوي متغير لانه داخل عسكريه غصب وقال ايش قال وصية ابوك ، الله ياخذ عمي كذاب ، تذكرين شخصية جابر الي قبل ؟ تذكرين لما كان يقول لنا ان شاء الله اصير طيار وافر فيكم العالم ؟ تغير وكثير من بعد ما دخل عسكرية غصب والسبب عمك ، لا تدافعين عنه
جنى بتنهيده :اشتقت لشخصيته قبل ، الحين صرنا نخاف منه بعد ما كنا نحتمي فيه من كلشي
جوري :تدرين لي فترة اسمعه يصارخ بالملحق ، وكل ما اسمع ادعي على عمي
بكت جنى : اكيد شاف الويل بالعسكرية
وناظروا مزن الي صحت على اصواتهم
جوري :نامي وارتاحي
مزن :عطشت
جنى :بجيب لك موية
جوري :بنزل معك بسوي اكل جيعانه
مزن بخوف :بنزل معكم
ونزلوا ثلاثتهم وبطريقهم بالدرج قابلوا جابر وهو داخل البيت ، انتبهت جوري لايده الحمرا وخزته وخزوه البنات بنظراتهم ومشوا وهم متجاهلينه ، تجاهل نظراتهم ودخل المطبخ وهو ياخذ ثلج وقارورة موية وطلع لغرفته
جنى بخوف :ليه اخذ ثلج ؟
جوري : قلعته، جعلها ما تسلم
وبداوا يسوون اكل لهم وشربت مزن مويه وطلعوا لغرفتهم
—-
كانت جوري تأكل مزن بسبب ايدها الي عليها شاش
جوري : والله ما تأكلين باليسار وانا موجوده
مزن بضحكة :طيب بشويش
وسكتوا من انفتح الباب ودخل جابر وبهدوء :مين سمح لك تستخدمين جهازي ؟

-قصيد-
كانت تتابع مسلسلها بهدوء وهي ناويه ترجع لوحدتها ولهدوءها وتنفرد مع نفسها ومسلسلاتها ، بوسط اندماجها قطع عليها اشعار واتس وكان محتواه :بلغي اخوك انه انفصل من الشغل قبل يبدا فيه .
عدلت جلستها وهي تقوم ودخلت على الاشعار وهي ترسل استفهام وكتبت : مين ؟ وليه انفصل ؟
رد عليها : يكفي انك تبلغينه لجل ما يتعب نفسه
قصيد وهي تكتب : لا ، اخوي لسى ما بدا في دوامه وفرحان كثير بوظيفته لا تقطعون رزقه الله يخليكم ، واصلا ما سوا شي مافيه سبب يخليكم تفصلونه قبل يداوم
——
قرأ رسالتها وكتب : انتي السبب
وقفل جواله وقام وهو ياخذ له شور وتاركها بدوامة اسئلتها
——
انصدمت من رده وكتبت : وشدخلني ؟؟! صبر انا مالي دخل ، هي رد
وصارت ترسل حروف عشوائية وهي تتذكر فرحة سند بالوظيفة ، سجلت اسمه بالواتس وهي تدق عليه اكثر من مره وتدعي يرد ، وقامت من سريرها وهي تمشي بالغرفة بخوف وبصراخ : رد الله ياخذك
وسكتت من دخل سند بثوبه : قصيدوه اكوي ثوبي ، عاد لا اوصيك اكويه زين اول يوم وكذا لازم اكون مشخص
ناظرته بصمت لحتى طلع ورجعت تدق اكثر من مره وترسل كثير
——
خلص شور وطلع وهو يجفف شعره وناظر الاكل بالطاوله
سحب لابتوبه وبدا يشتغل فيه ويأكل ، ومتجاهل جواله الي انفجر من الاتصالات والرسايل
——
بدأت تسجل فويسات وهي تترجاه ما يفصل اخوها وجاهله مين قاعده تكلم ، وتدعي يقرا كلامها او يشوف رسايلها وهي خايفه من ردة فعل سند لو قالت له
-
خلص اكل وقام وهو يسحب جواله وشاف رسايلها وفتح فويسها وهو يسمع صوتها لاول مره بدون عصبية وهواش وكان هادي وبنبرة ترجي وطلب
رد عليها : انتي متعوده ترسلين صوتك لآي احد ؟