عذبة مثل صوت ابو نايف قوية مثل قصيد بن فطيس.

البارت 19

البارت 19

-قصيد-
دخلت جناحها وفتحت شنطتها وهي تدور هويتها
وسحبتها من لقتها وطلعت وهي تنزل ، وصارت تدور لاحمد ، دخلت للصالة وشافته قاعد مع معن الي كان ياكل وماسك الجوال بايده ومو منتبه لسوالف البنات
تجاهلت وجوده وتقدمت وهي تعطي احمد هويتها : هاذي هي باقي فيه شي ثاني ؟
احمد وهو يناظرها : لا ، بخليهم يخلصون لك الاجراءات وبأذن الله بكرة الليل وهو عندك
رفع راسه عن جواله من سمع صوتها وناظرها وهي واقفة قدام احمد ونطق : اجراءات وش ؟
لفت عليه وهي تناظره بصمت وخزته وهي تقعد
ناظرها بحدة ونطق : اجراءات وش ؟
تدخلت اميرة وقالت : موضوع جوازها المسكينة تبي ترجع لاهلها ما تنلام
معن وهو يناظرها : انا قايل بخلصه لك
تدخل احمد : انت مشغول والبنت طلبتني وانا فاضي
ما شال عينه عنها وهو يناظرها وهي مطنشته وقاعدة على جوالها ، قام وهو يطلع من المجلس وتوجه لجناحه وهو يرسل لها : تعالي فوق
انتظر دقيقتين وهو ينتظرها تقرا رسالته ، ولكن للاسف ما قراتها ، واتصل عليها وهو ينتظر ردها
وصلها اتصاله وحطت جوالها سايلنت وهي تتجاهله وكانها ترد حركته له
رفعت راسها للعاملة الي دخلت : مدام ماما عزيزة يبغى انتي
عقدت حواجبها وهي مو عارفه من عزيزة ، لفت على احمد من قال : عمتي ام معن الظاهر تبيك
رفعت حواجبها : اوه
وقامت وهي تمشي مع العاملة وناظرتها من وقفت عند جناحه ونطقت : متاكدة مدام هنا ؟
العاملة : يس مدام
هزت راسها وتقدمت وهي تدق الباب ، وسرعان ما شهقت من فتح الباب وسحبها ، ناظرته بصدمه وهي تسحب ايدها الي مسكها: خير ان شاء الله ؟
معن بحدة : ادق ليه ما تردين ؟
قصيد ببرود : والله نسيت من حضرتك عشان ارد ؟
معن : تكلمي زي الناس ، وسالتك ليه ما تردين ،و خليك الحين من موضوع المكالمة ، تعالي لموضوع الجواز مو قايل بس اخلصه لك بترجعين ؟
قصيد : والله بكيفي متى مابي ارجع برجع مو انت الي تحدد ، وثانيا دامك يالامير تتخير مين الي ترد عليهم بالثواني ومين الي تسحب عليهم ، لا تحاسبني لا عاملتك بالمثل ، وانا اخترت اسفهك ولا ارد عليك لا يكون زعلت ؟

-مزن-
ناظرت جابر من دخل وهو يقعد معهم ، ما كان بالها مع سوالفهم وهي تناظره وتتأمل كل جزء فيه ، وتتذكر رسالة عزام لجوري ، بدأت تتأمل ضحكاته مع خواته وتنهدت وهي تطرد الرسالة من بالها ، وناظرت جوري الي قالت : اجل بالصبح نروح نشتري فستان لمزن والاغراض الناقصة
جابر : الصباح مستلم ، يمكن اسلم العصر
جوري : خلاص حلو العصر
وبعد سوالف وفضايح خلص النعناع وقام الكل وهم ينامون
—
-تسريع احداث -
بيوم الملكة
كان البيت بحاله استنفار والكل يشتغل
جوري : البنات وصلوا ، جنى رتبي الغرفة الي حوستيها
جنى وهي تبخر فستانها :عادي البنات ميانه ، بعدين مهي محوسه كثير
جوري : اقول رتبيها بيجون بيضبطون اشكالهم هنا ، بعدين مزن وينها ؟
جنى بضحكة : تسوي عصير ليمون تقول مابي اتوتر وابي اريح اعصابي
—
بالمطبخ *
كانت تقطع الليمون وهي متوتره وسمعت صوت البنات ولفت بوجهها وبدون ما تنتبه قطعت ايدها ، شهقت بوجع وركضت للثلاجة بسرعه لجل تأخذ ثلج ، لكن قطع ركضها من دخل وهو مستعجل : وين العود والبخور ؟؟
صدمت فيه وشهقت وهي توسع عيونها من طبع الدم بثوبه وصرخ بصدمه : لا يرحم امك الرجال قدهم بالمجلس
ناظرته وبلعت ريقها وهي خايفه منه : بالغلط
ناظرها وهو كاتم غضبه : انتي وش تدورين بالمطبخ ؟
مزن بتوتر : اسوي عصير ليمون
سحبها بعصبية وهو يفتح صنبور المويه ويرش على اصبعها :رايقه انتي
مزن وهي تناظره بالشماغ وريحة عطره لصقت فيها : عندك ثوب ثاني انت؟
لف وهو يناظرها : ما عليك مني بتدبر امري ، وش بتسوين باصبعك انتي ؟
كانت بترد لكن لفت معه من دخلت جوري وهي تركض وبخوف: مزن تخيلي شفت عزاام