"مسلم"
سبب ثقافتي المتحير فيها اغلب البعرفوني ودايما بقولو لي كيف واحد في عمرك بعرف كل ده كان ابوي، لانو انسان بحب القراية شديد عندنا في البيت غرفة كاملة عملها للكتبوفيما بعد بقت مكتبة ضخمة فيها اشكال والوان، ما خلى حاجه ما قراها وما شاء الله عليه ذاكرتو حديد ما بنسى اقتباس قراه وعجبو في كتاب وحتى المؤلف بكون حافظ اسمو، ومن كنا صغار بعمل لينا انا واخوي مسابقات البقدر يخلص كتاب في اسبوع منو ويخلص النقاط الفهمها، وفي الوقت الكانو الشفع فيه بحضرو قناة شباب المستقبل قريندايزر وسيف النار نحن كنا بين كتب الحديث وقصص الصحابة.
اخوي كان مضايق من الحته دي وشايف القراية حاجه فارغة وما منها فايدة وكفاية هو بقرا في المدرسة لي يقرا مرتين بستفيد شنو؟
لكني شلت شغف القراية من ابوي وبقى مستحيل اقعد فترة وما اقرا لما بحس بالنقص، ويمكن ده اكتر شيء ساعدني في الوقت الحالي، لانك كل ما تقرأ اكتر بتتوسع مدارك وترتفع افاقك وبكون عندك فهم مختلف بتتبنى وجهات نظر ومع كل مرة بثبت غلطها ولا صحتها انت بتتعلم.
قريت عن الحب في الروايات الكتب الشعر لكن الشعور لمن تكون انت الحاسي بيو كان مختلف عن المكتوب، حاجه فوق الوصف وفوق الخيال، الشعور الجواي بقول لي عايز بس رُدينا تكون معاي.
"رُدينا"
نانا: بت اللذينة انا قلت ليك شنو من البداية.
- ما عارفه يا نانا لانك بتقولي كلام كتير، لكن انا هسي اعمل شنو واتصرف كيف؟ بالجد ما عارفه حاسه بمشاعر تجاهو وخايفة يكون هو ما حاسي بشيء وده تعامله الطبيعي مع الناس وانا مكبرة الموضوع في حين من ناحيته ماف شيء.
+ يابت انت عويرة ولا شنو مسلم ده بحبك انا شفتها في عيونو.
- متين اكتشفتي الميزة دي؟
بتشوفي كلام العيون كمان؟
+ اقعدي اتريقي علي وشوفي منو البحل ليك مشاكلك ماشه زاتو.
- لا عليك الله تعالي لاني محتاجه ليك.
+ يابت القصة دي واضحة انت بس عايزة تتعولقي.
- واضحة كيف؟
+ وااي الحب بقاك غبية.
- طيب اخديني على قد عقلي واشرحي لي.
+ طيب يا استاذة مش انت حاليا ح تشتغلي في بيتو وتعملي الديكور.
- اي.
+ يلا خلال الفترة دي دققي في تعامله معاك وخصوصا قدام امو، شوفي بحاول يشكر فيك ويذكر محاسنك ويعقدكم مع بعض عشان تتونسو.
- ولو ما عمل حاجه من ديل؟
+ معناها نشوف خيار جديد ولا طماطم ههه.
