"مسلم"
يااخ الحجة دي دخلت فيني شريحة عايزة توقف قلبي عديل، المنافسة مع المغتربين شرسة وغالبا ود البلد هو البخسر كل مرة وانا ما كنت مستعد اخسر رُدين، الحمدلله انو طلع مقلب منها وماف حاجه من دي حاصلة، وبما انها قالت موافقة على رُدين وما عندها اي مشكلة ماف حاجه تعطلنا تاني، مشيت اتكلمت مع اعمامي وقلت ليهم انا بقيت على العرس خلاص وفي اقرب بنمشي ليهم في بيتهم.
في الوقت الكانت هي مشغولة مع التخريج والمناقشة كنت مشغول بجهز في البيت، بما انو الصور في والناس برضو رجعتهم الشغل من غير ما تعرف عشان لمن العرس يتم بإذن الله تلقى بيتها جاهز، وبرضو كنت شغال على تفاصيل كتيرة لازم اتخلص منها لانو بعدين ما عندي ليها وقت.
يوم المناقشة كنت منتظرها من لما جات ودخلت وطلعت ما مشيت ليها اول لانو ما عايز اوترتها، كل ما تشوفني بحس بيها بتتوتر ولا تخاف وما كنت عايز يحصل كده في يوم مهم زي ده، وبرضو استغليت الفرصة لمن شفت صحبتها واقفة مع وحده اتوقعتها تكون امها من الشبه، مشيت اتعرفت عليهم وعرفتهم على نفسي واتكلمت مع الام بشكل خاص وقلت ليها بصريح العبارة انا عايز اتقدم لي رُدين لكن بعد تخلص من الجوطة دي وشلت رقم ابوها عشان اتكلم معاه، لكن طلبت منهم ماف زول يتكلم قدامها لاني عايزها تعرف مني وهم وافقوا وكان عليهم مبادئ فرح طمنتني.
لمن طلعت كان لابد امشي ابارك ليها واتعاملت عادي وكأنو ماف شيء حاصل وعرفتني على اهلها وعملنا فيها ما بنعرف بعض، في اليوم البعده اتكلمت مع ابوها وفاتحتو في الموضوع وقال عايز يلاقيني ونتكلم مع بعض وبعد يسأل مني ويشوف راي بتو بحصل كل خير، وده الحصل مشيت ليو في مكان شغله اتكلم معاي اكتر من ساعتين وكان انسان ذكي جدا ومنتقي اسألتو، ما سأل عن شغل وقروش ودخلك كم في الشهر ولا عندك بيت ولا عربية، كان بسألني عن الدين وحقوق الزوجة على زوجها والعكس عن تربية الاولاد وعن الحياة الزوجية السوية والقايمة على المحبة الود والمودة، من اسألتو انا زاد يقيني انو رُدين هي الانسانة المناسبة لي وماف انسب منها ولو في انا ما عايز غيرها♡
طبعا مشيت حضرت التخريج لكن عشان كنت مشغول ما قدرت انتظر لحدي اخر الفعاليات واضطريت اطلع بدري، ومع انشغالي نسيت اتصل عليها ولا ارسل ليها لانو لمت فضيت كان الوقت اتأخر خالص، الصباح ضربت ليها ما ردت وعرفتها زعلانه لكن ردي عشان اقول ليك انا ماشي الصالون احلق عشان جاي اتعرف على اهلك، ما ردت وقفلت التلفون ضربت لي ابوها عشان ءأكد موعدنا واني جاي مع ناس بيتنا نتعرف وهو موافقين وان شاء الله يوافقوا اجيب اعمامي ونجي.
اخترت قميص كحلي لاني شايفها بتحب اللون ده وعايز امشي ليها بلون تحبه يمكن كده توافق ههه، ظبطت نفسي تمام من عطري ومظهري وشعري لانو في اول مقابلة مع اهلها بأثر كتير، ومرات مظهرك بكون ليو الدور الاكبر في تحديد شخصيتك ومدى قبولك عشان كده ما اهملته، طلعت مع الحجة زينب وكانت قاشرة وبكل سماحتها واناقتها وكذلك اخوي ومرتو.
