"رُدينا"
كنت بس واقفه وبعاين ليهم ميار شايلة الكيكة وبتغني لي مسلم وطيبة بتصفق ليها، شدة ما اتغبنت وزعلت لما ما عرفت اسوي شنو، والمشكلة عندهم برودة دم ما طبيعية، يعني انتو تجو بيتي وفي الوقت ده من غير ما تستأذنوا وكمان تخشوا لي غرفة نومي، هي البجاحة حدها وين عندكم؟
لما لقيت قعدتهم طولت وغلبني البسوي قلت ليهم: انتو ما عايزين تنومو؟ انا نعست ودخلت غرفتي وقفلت الباب علي، قعدت في السرير ودموعي جارية عشرة عشرة، بعد كم دقيقة كده مسلم جه خاشي لما شافني ببكي نزل على ركبه ومسح دموعي وهو بقول لي: طيب..اسف ما حصل شيء ونعتبره وقت مستقطع ونكمل من مكان ما كنا، خليني اول اتمعن في جمال الملاك القدامي ده، الحنة لايقه عليك شديد وباس يدي وشعرك حلو ما شاء الله وكان بلمس فيه ويشم ريحته، والفستان ح ياكل منك حته، وحتى الكعب عالي حلو، قلت ليه: اسمه هيلز قال لي: لي هلز ده، قلت ليك: هيلز يا مسلم هيلز، قال لي: كله واحد ما فرقت لكن حلو عليك، مشى جاب الولاعة وولع الشمع من جديد وقال لي: يلا غني لي عشان اتمنى أمنية واطفيه، غصبا عني بقيت بضحك في طريقة كلامه الكان قاصد يضحكني بيها، غنيت ليه وهو طفى الشمع وباس يديني الاتنين، قطعنا الكيك مع بعض ومسحت ليه الكريمة في شفايفه واكلتها، وهو كمان جلبطني بيها في وشي كله،
= وين هديتي؟
- نسيت..انت عارفه مشغوله اليوم كلو فما اتذكرها لكن وعد بجيبها ليك.
= وعد.. هو الكلام بقروش؟
- مسلم يااخ.
= نور عيونه لمسلم.
- انا جبتها ليك على فكرة.
= وانا كنت عارف لكن عايز اغلس عليك.
طلعتها من الدرج وخليته يتفرج على البوكس، عجبه القميص الأبيض وخصوصي انه هدية مني وكمان الصورة والجزلان وكل حاجه حرفيا،
- كل سنة وانت عيدي وحبيبي واحلى حاجه حصلت لي في حياتي، كل سنة وانت بتحبني وواقف جمبي وداعمني، كل سنة ونحن مع بعض وان شاء الله السنة الجاية معانا نونو صغير، لما قلت كده عيونه لمعت بطريقة رهيبة وختى يده على بطني،
= ماف هدية احلى من اني اجيب قطعة منك ربنا يرزقنا يا هدية حياتي♡
مسك يدي وخلاني اقيف واكون في مستوى بصره ختى يدين حولين رقبته وهو ماسك خصري، بعد شغلة غنية وخلانا نرقص عليها ونكمل باقي ليلتنا الخاصة♡
"طيبة"
- شفتي يا عمتي مرت ولدك العقربة بتعمل في شنو، اتاريها جات من قبيل وقاعدة في البيت بهناك ما عرضت وشها علينا عشان بتجهز للاحتفال، غايتو البت دي كعبة خلاص لي تعملو بالدس مسلم ده ما ولدك، شلتي في بطنك تسعة شهور وربيتي لغايه ما بقى راحل وعرسها ما تقول ليك تعالي سااي احتفلي معانا واكلي كيك، لالا لكن بالدس تعمل اي شي ونحن لو ما جينا بالصدفة ما كان عرفنا الحاصل شنو.
