"مسلم"
رُدين كان مفترض تتسمى الحنينة او حنان او اي حاجه توصف ربع الحنو الشفتو فيها، اول مرة في حياتي القى شخص بخاف علي زي امي، سهرت جمبي في السرير وعملت لي مكمدات ما كانت بتتأخر علي في اي حاجه، مراعية لي اكلي وشرابي مواعيد دواي حافظاها اكتر مني، اهملت كل شيء وبقت واقفة قصاد صحتي واني ابقى كويس لحدي ما الحمدلله بقيت كويس، وزي ما قالو في الشين بتلقى السمح في مرضي لقيت رُدين♡
"رُدينا"
الحمدلله مسلم اتحسن كتير عن اول وصحته رجعت ليه بعد كرم ربنا عليه واهتمامي، ما كنت شايفه الحاجات اللي بعملها ليه واجب علي بقدر ما شايفه نفسي حابه كل اللي بعمله وعايزة اراعيه اكتر، ما عايزة يحس بإي ألم او ضيق وياريت لو بقدر امرض بدله او حتى اتقاسم المرض معاه، الحمدلله رجعت ليه ضحكته الحلوة ومرحه وكل هظاره وكمان غزله فيني، كنت فاقدة التفاصيل دي وهو عيان لكن الحمدلله هسي كلها رجعت.
وبما انه بقى كويس ونزل الشغل انا كمان مفترض انزل عشان اتأخرت على شغلي كتير، جهزنا سوا وطلعنا بدري يوصلني وعنده مشوار تاني ما حكى لي ماشي وين، المهم دخلت سلمت على الكل وسألوني عن صحة مسلم وقلت ليهم الحمدلله بلغ العافية، دقيت الباب لي مستر نجم الدين ودخلت بعد اذن لي،
نجم: اووو موظفتنا الغايبة.
- اخيرا رجعت.
= حمدلله على سلامتك.
- الله يسلمك يارب.
= راجيك شغل كتير.
- اي محضرة نفسي.
= طيب على شغلك.
- لو سمحت لي عايزة اول اتكلم معاك في موضوع.
= اتفضلي.
- اظن لي انت شايف وملاحظ لي معاملة ميساء لي وده تعامل انا ما برضاه لي نفسي ولا بقبل شخص تاني يعاملني بيه، اذا ما كان في طريقة نحل بيها الخلاف ونحن سوا بطلب اتنقل اي فرع تاني، منها نحافظ على التعامل المحترم بينا.
= طبعا انا مدرك وشايف البحصل وما كنت عايز تصل بينا لهنا لكن الموضوع ده بقى عندي وانا بتصرف.
- طيب يا مستر واسفه اذا ازعجتك.
= ولا يهمك.
رجعت مكتبي وشفت في علي شنو شغل وبديت فيه بكل سلاسه ورواق.
مضى اليوم على خير ما يرام خصوصي انو نفسيات هانم ما جات وده اكتر شيء فرحني، لما طلعت ما لقيت مسلم اتصلت عليه قال لي عربيته عطلت وحاليا هو في الشارع منتظر الميكانيكي عشان يجيه، قلت ليه طيب انا برجع البيت وبنتظرك للغدا قال لي طيب لكن ما تطبخي انا بجيب معاي من برا، قلت الحمدلله اهو ريحني من مهمة شاقة وهي ما شاقة ودي دراما مني بس.
