"مسلم"
طلعت رُدين من بيتنا وهي زعلانه بالشكل ده ما عجبتني، خصوصي لما شفت دموعها حسيت قلبي اتقبض، انا عايز اشوفها بتضحك بس لانو الزعل ما بليق عليها، ما بليق عليها غير كل شيء جميل زيها.
حاولت اعرف من ميساء الحصل بينهم شنو وما طلعت بفايدة، وكمان لمن اتصلت عليها ما ردت وبالي انشغل عليها، وزي ما بلقو كنت كايس لي حِجة عشان اشوفها واتسلبطت في السبب ده، شلت ليها من عندنا وردة اظن بت ناعمة ومرهفة زيها ح تحبها، جات وهي كاره التوب ومغطية وشها وبتتكلم بخوف، لكن برضو كانت حلوة ازن لي هي كل يوم بتزيد حلاوة، وفعلا زي ما اتوقعت تعابير وشها لما شافت الوردة كانت الطف ما رأت عيناي، انا البت دي الا اعرسها ما بقدر اخليها لي زول غيري، فراشه زيها لازم تكون في الحفظ والصون مع واحد بحبها وبحترمها وبقدرها وعارفه قيمتها وقدر كيف هي غالية عندو♡
"رُدينا"
طبعا ما كنت اتوقع انه جاي وجايب لي معاه ورد، للحظات حسيت نفسي في مسلسل ولا فلم لا الكلام ده بحصل في الواقع يعني؟
ومعاي انا شخصيا؟
تقريبا ده ما سوداني الله العالم يكونو خاطفنه من اي بلد وخاتنه هنا، لانو دي ما تصرفات اولاد وطني العزيز، ولا اولاد وطني تطورو للدرجة دي؟
ولا عشان انا ما بعرف وما حصل جربت اتخلعت؟
الرياكشانات اللي اترسمت على وشي كانت غبية بشكل ما طبيعي خالص، حسيت بيه شوية ويقول لي انت ما بتعرفي للحاجات دي جيبي الوردة اديها لي وحده غيرك، شكرته على اهتمامه انه جه المسافة دي كلها عشان يراضيني وكمان جايب لي معاه وردة بالجد حتى الشكر ما بوفيه حقه.
المهم نزلت براحه ورجعت البيت بعد دسيت الوردة تحت التوب وطلعت المسكن عشان خالتو تشوفه، دخلت جوا وقبل ما اشيل نفسي كويس نانا هاجمتني لما ختيت يدي على قلبي وهي كمان ختت يدها،
نانا: مالو قلبك بدق كده كنت جارية؟
اها ما قلت لي الحصل؟
اها قال ليك شنو؟
وجه هسي لي؟
واتكلمتو في شنو؟
ما تتكلمي ساكته مالك؟
- ممكن تديني نفس عشان اقدر اتكلم، بسببك قربت امشي للكريم واسكن ود اللحد.
+ بسببي انا برضو قلبك ده ما دقه من الخوف وأنا عارفه من شنو، وغمزت لي.
- ممكن تبطلي أحلام وردية وتصحي من الخيال ده.
+ اها انجزي سرعة ما قادرة انتظر.
- جه عشان ما رديت عليه وكنت طلعت من بيتهم زعلانه وجاب لي معاه وردة، وريتها ليها.
+ لا يااخ والله كضااابه، وردة عديل كده؟
