"رُدينا"
قد أكون استعجلت ويمكن لو من كم اسبوع بس زول قال لي اني ح اوافق اتزوج وبالسرعة دي ما كنت بصدق، الشعور الكنت بفتش عنه وبتخيله انا حاليا عايشه، حاسه بالأمان البخليني اكون مع واحد بعرفه من وقت قريب، اللي عشانه ح اخلي بيتي وغرفتي وكل تفاصيلي عشان ابني معاه تفاصيل جديدة بتخصنا، عشانه عايزة اكون زوجة صالحة وأم بإذن الله، وعشانه عايزة اكون الكتف والسند والحضن الآمن، عايزة اكون ليه الرفيقة والحبيبة وقت ما يحتاج لي، عايزة اكون من ضمن مسببات السعادة في حياته اذا ما كنت اهم سبب♡
اتفقت مع مسلم وحددنا موعد الزفاف وهو كلم بابا والحمدلله وافق، كنت مبسوطة شديد ما اتخيلت التفاصيل دي تكون حلوة كده، اول شيء جونا في البيت جابوا قولة الخير وامه قالت امشي اشتري الشيلة عشان العرس قريب والحق اجهز نفسي، وبرضو ما نسيت البيت وكنا شغالين على كل حاجه فيه لغايه ما بقى جاهز وطلع احلى من تخيلي.
مشيت مع نانا ورماز اختي ومرت بخاري اخو لي مسلم طيبة عشان نشتري الشيلة، اخترت أربعة تياب واحد حق سهرة وتوتل وبولستر وامازون، كانو بالنسبة لي كفاية وماف داعي اكتر منهم لانو ما اظن احتاج ليهم كتير، وكان اشتريت تلاته فساتين وتلاته عبايات بالأضافة للبس البيت وانا اصلا كان عندي كذه حاجه مخبياها من زمان للايام دي،
طيبة: اول مرة اشوف لي عروس بتنقص التياب عشان تشتري فساتين، يابت ما تبقي عويرة اخير ليك تميهم سته وبعد العرس اشتري فساتين زي ما عايزة ماف زول بمنعك.
- ما محتاجة اكتر من ديل ده الانا عايزة وكده مرتاحه.
طيبة: والناس تقول علينا شنو؟ ما قادرين نشتري لي مرت ولدنا شيلة زي الناس؟
- الشيلة جاية عشاني ولا عشان الناس؟ المهم رأي انا ما اي زول تاني.
نانا: رودي تعالي شوفي التوب ده حلو والله.
كانت محاولة من نانا عشان تهدي الجو لانو اتوتر وانا بصراحة ما قادرة اتحمل تدخلها ده، في اي حاجه اخترتها طلعت عيب ما عارفه هي شيلتها ولا شيلتي؟
نانا قالت لي اسمع الكلام وعشان ما تحصل نقاشات من البداية اشتري ستة تياب وبعد العرس ممكن اجي ابيعهم واجيب فساتين بدلهم، ودرأ للمشاكل اشترينا التياب ومعاهم الفساتين مش مسلم قال اجيب اللي نفسي فيه وانا عملت كده.
وبرضو لما مشينا نختار فستان الزفاف حصل نقاش لانو كان في حاجه معينة في بالي ويمكن دخلنا اكتر من عشرة محلات على كذه يوم وما لقيت فيها العايزها في المحل ال11 طيبة قالت: انا تاني ما بمشي معاكم فترت شنو هو عايزة تلبسي فستان الأميرة ديانا ما تختاري اي واحد وخلاص عذبتينا معاك كل يوم نطلع نفتش من صباح الرحمن رجليني وجعتني، قد يكون في نظرها ما شيء مهم وانا عاذراها لكن التفصيل ده بهمني، فمشيت لي وحدة دلوني عليها صحباتي وهي بتصمم فساتين اخترت القماش والتصميم واخدت مقاساتي وقالت ح تعمل لي فستاني♡
