رواية سعود

بارت - ٦

السلام عليكم ورحمه الله

استمتعوا وعذروني ع الأخطاء ..

٧:٤٤ م الجمعه
استراحة ابو فيصل

وقف ابو عبد الكريم بجنب السيارات الصافه عند المدخل ، ونزل سعود بنفسه وهو يشوف عددها الكبير والي يدل ع كثر الحضور الي جا

عدل شماغه بيده اليمين وهو يمشى ورا عمه الي طفى السياره ، داهمته ريحة البخور الخفيفه بالجو وقدر يسمع صوت الرجال من المدخل

دخل سعود للمجلس وارتفعت أصوات الرجال اكثر في ترحيب واستقبال ، ابتسم بخفه وسلم عليهم بصوت مسموع جاعل أصوات ترحيبهم تخف وردود السلام تعلى

اقترب منه بسرعه صاحب الاستراحه وإلي كان لابس فوق ثوبه بشت اسود والابتسامه ع وجهه ، وبصوت عالي / ارررحبب ترااحب المططرر والسيلل

قرب من سعود وضمه بخفه / يالله ان تحييه

سعود ببتسامه / يسلّمك ويبقيك وكثر خيرك يبو فيصل وماكان له داعي ، ليش تكلف ع نفسك

ناظر ابو فيصل بوجه سعود  / م فيها كلافه وانا ابوك وهذا ولا شي ف حقك تستاهل أكثر من كذا ، تفضل تفضل 

تقدم سعود وبدا يسلم ع إلي كانوا حوله ويتحمدون له بالسلامه ونتبه لشخص اقترب منه ، سعود بعتب / ي عمي انا إلي اجي لعندك مو العكس جعني فداك

قرب سعود منه وهو يستند بعصاته وسلم ع راسه احتراما له ،

تكلم وهو يسلم ع خد سعود ورافع يده ماسك كتفه ويشده له / تلومني يسعود ؟ تلومني ونا مفارقن لي ضنا ؟ سنتين ونا ادعي الله م يفجعني فيك سنتين يسعود ونا فاقدن ولدي ، يعلم الله اني م ذقت الراحه فيها  

سعود إلي حس بعيونه تلمع من كلامه دنّق براسه ع رقبة إلي ماسكه وم حس بعقاله الي طاح من حركته ولوهله نسي المكان إلي هو فيه والناس الي حوله وانه واقف بنص المجلس

يسمع إلي يعاتبه وكنه يعاتب ولده... كنه حفيده بالأصح ، كبار السن والشيوخ كانوا نقطة ضعف سعود يلتمس فيهم حنيه مختلفه

رفع سعود راسه بهدوء ورد وهو مازال قريب منه / الله لا يفجعك ف غالي واخر أحزانك يبو براهيم

ابو ابراهيم وهو بنفس الوضعيه / البقاء لله يولدي عظم الله اجرك فيها واجرك ف مصيبتك راحت للي ارحم مني ومنك 

غمض سعود عيونه من سمع الكلمه الأولى ، ورد بصوت منخفض / ونعم بالله ، وجزاك الله خير
الله يرحم امواتنا وامواتكم