رواية سعود

بارت - ١٣

السلام عليكم ورحمة الله

استمتعوا وعذروني ع الأخطاء..

١٠:١١ م الأحد

بعد ثواني من ركوبه سيارته وتحريكها ، لحقته سيارة تركي ع مسافه وبعد لحظات عرفوا وين متجه بعد م اخذ الطريق السريع ع البلد

رفع مرتبته بعد م كانت سادحه وتكلم
بستهزاء / النيه واضحه.. شكله م ياخذ إلا المعتق

تركي إلي مركز ع السياره البيضاء / متأكد يمقرن؟ ذا الطقوعي حده يهايط بس

طلع مقرن بكت الدخان من الدرج / والله ذا العلم ، وأرسلت لحاتم يشوف لو وجهه ظهر ف التسجيلات عنده ، وان صار فهذا هو كلبنا الضايع

حك راسه مو مصدق ان ذا إلي كان ناويه وقعد يفكر وش السبب اصلا ، ناظر لمقرن الي ولع الزقاره / طيب احنا ليش نلحقه الحين؟ مو احسن نبلغ؟

اخذ نفس منها وستند / لانه رايح يكيّف وحنا نبي نعرف من ذولا إلي يشتري من عندهم ، ولا! مو احسن.. تبي ترجع للناس إلي رموك من البدايه؟!

شد بيده ع الدركسون / الضابط إلي مسك قضيتي فعلا كان يبي يبَريني..

قاطعه مقرن وهو يضحك / يبَرّيك؟!! تركي انت القضيه راكبتك ومفصّله عليك! باقي تِرجي منهم شي؟!

زفر تركي وأسرع من غير م يحس / ومين بيحاسبه غيرهم ؟! مين بيسجنه ويقصه غيرهم؟! ومين بيشَهّر فيه عند خلق الله غيرهم؟!

رجع يشفط من زقارته ويبتسم بسخريه / لا منت صاحي.. احنا بنحاسبه وحنا بنقصه وحنا بنشهر فيه ، مافي شي يقدرون يسووه ولا نقدر ، ولّا مب عاجبك مستوى خدمتنا؟!

هد تركي بعد م قابلتهم زحمه / مب كذا... سعود وهله من حقهم يعرفون الصدق ، ولّا بيظل طول عمره يشوفني قاتل اخته..

فتح الشباك وحط يده ع الحافه ورد وهو يطالع برا / بتظل قدام الناس الشخص الي ارتكب الفعل سواء بلغت ولا لا.. وتِذَكر اول شي قلته يوم جيتني.. خذ حقك ولا تفكر بشي ثاني

شد ع فكه من مقرن إلي لخّص الموضوع بجمله منه وعارف انه صادق بكلامه ، لف للي م يبي يناظره / ع الاقل سعود..

ناظره بعد م سمع نبرت صوته وشاف انعكاس انوار السيارات الحمرا بعينه إلي لمعت ، صفن فيه لثواني يشوف فيها عيونه الناعسه إلي بان عليها التعب وانعسها زياده

قطع هذي اللحظات صوت البوري الجاي من ورا ولفوا وجيههم ، حرك تركي السياره ورد مقرن بعد م رجع يدخن /  قله.. لكن لو سألك "ليه كان ناويك" وش بتقول ؟