°يا أمي خلاص أنا الزول ده ما دايراهو لا بتكلم معاي زي الناس ولا عندو لي حاجة كرهتو عديل دايرة أطلق منو
^بتقولي في شنو إنتِ دايرة تطلقي! نيستي أنكم عاقدين بس قريب شهر مالك يابت دايرة تطلقي؟
°يا أمي كلام زي الناس مابتكلم لا كلام حلو لا حاجة ياخ أقولها كيف ده مابعرف يعبر عن حبو ولا أقوليك شكلو مابحبني زاتو
^يابتي أهدي روقي وحاولي غيريهو ماتفقدي منك
°يا أمي بقول ليك ده مابحبني ظااهر لي ما دايرة تعرفي
^اسكتي يابت حب شنو وهبل شنو الزمن ده حب زاتو ماف تعرسي وبس قال حب قال دايرة بالحب شنو إنتِ
*
بعد ما أمي قالت كدا سكت منها أقول ليها شنو كلامها صاح حب شنو في الزمن ده عاينت للساعة لقيت وقعتي إتاخر شربت الشاي بي سرعة وطلعت لقيت ناصر لسه ما جاء ضربت لي بس مارفع اتأفأف زي نص ساعة جاء مشيت لي قالي بي برود كنت مشغول ومالحظت للزمن اتغظت منو كيف ركبت بي سكات وصلت الجامعة ونزلت هو دور عربتو ومشي سلمت علي صحبتي القيتها براء دخلتنا جوا وحضرت المحاضرات كلها
بعد ما اتنهت المحاضرات استنيتو لمن جاء راجع ركبت معاهو ووصلني البيت ده الموال بتاعي أنا وناصر
أنا إسمي نوال بنادوني نونا بقري طب جامعة إمدرمان الإسلامية قبل شهر عقدوا لي علي ناصر وأنا وهو مابنعرف بعض ولا بحب العلاقات الغير شرعية علاقتنا كانت بين الأهل بس ونحنا وهو بنبقي لي بعض يعني زي ماتقولوا زواج تقليدي ..حصل ماقالي كلمة طيبة مابحب أوري زول بي حركاتو بس لمن فاض بي وفكرت مرة ومرتين في الطلاق وريت أمي وده الحوار الشفتوا قبيل
وصلت البيت بي زهجت رقت في السرير نمت لي العصر قمت صليت وقعت مع أهلي لمن الغداء جاء واتغدينا
جاتني فايزة أختو الصغيرة هي صحبتي شديد قالت لي أخوي شافك الليلة زهجانة عشان كدا جاب ليك الهدية دي قالي شيليها وديها ليهو قلت ليها: بالله ولي مايجيبها هو قالت لي: أخوي وبتعرفي هو كدا مابظهر حبو بالمناسبة هو بحبك بس بتعرفي طبعو قلت ليها: لا ظاهر مابحبني نسيتي هو كان داير منو وبعدين اتزوجت وكسرت قلبو نسيتي ولالا قالت لي: داك كان زمان وهسي هو نساها وأنا بأكد ليك كدا ...ضحكت وقلت ليها: خلينا نغير الموضوع بالله عشان إنتِ براك عارفة هو كان بحبها كيف وحبو ظاهر ليها إنسي قالت لي: طيب نسيت
اتونسنا مسافة وتاني طلعت
بقت الليل كلو أفكر أنا ربطت أسمي وحياتي مع زول لا بقدرني ولا حاجة ولا بتكلم معاي مع إني مرتو صاح زمان كان خاطبني بس هسي مالو؟ الحاصل عليهو شنو تعبته والله تعب مبالغة
شلت تلفوني ورسلت لي رغم إني كنت مرسلة ليهو الصباح قلت لي
أخير ننفصل أنا وأنت مابنفع مع بعض أنت لا مقدرني ولا شايفة اي حب إتجاهك
قري رسالتي وما رد وده الطبيعي بتاعو جدعت التلفون بعيد وبقيت ببكي قريب ساعتين ببكي
بعد صلاة المغرب شلت تلفوني بي زهج لقيتو مرسل لي وبي كل برود
لي؟
إجي يا الي بتقول لي أنا لي؟ اتمغستا منو ورسلت لي عشان أنا ما دايراك نهائي
رسل لي"راحتك"
بقيت أقري في الرسالة مرة ومرتين وتلاتة وعيوني بقو طشاش طشاش وتاني دموعي بقت تنزل مسحتها وضحكت ضحكة خفيفة وقلت أستاهل زاتو مالي لصقة كدا هو مادايرني وظاهر طيب زاتو برتاح من الزول الغامض ده
اليوم التاني مشيت الجامعة وأنا الاكتيئاب ظاهر فيني صحبتي قدر ماحاولت تعرف مالي ما وريتها بعد انتهينا من المحاضرات رجعت البيت لقيت لمة وأهلي وأهلو قاعدين استغربت في شنو ولي المة دي كلها دخلت المطبخ لقيت أختي بتعمل في العصير سألتها في شنو ولي الناس دي جات حاصل حاجة ضحكت وقالت لي: اهدي يابت بس عرسكم دايرين يعملوا بدري عشان كدا قلت ليها عرس منو؟ وقصدك شنو قالت لي: كيف عرس منو عرسك إنتِ وناصر ....
بقيت اعاين ليها بي عدم وعي ونطقت وأنا ما مستوعبة الحاصل وقلت ليها: متين...قالت: الأسبوع الجاي
................................................
لم يكن البنفسج💜يوما لونا عاديا كباقي الألوان💜فهو لون لحب العزلة والكتمان والهدوء والسكينة💜هو لون لطيف يمكث في الأشياء الرقيقة💜هو لون لضحكت الأطفال والأمهات💜هو لون لشخص يضع بصمته بالخفاء لكي لا يصبح معروفا لحبه للعزلة
