فجأة صحيت...بقيت اتلفت يمين وشمال وانادي في ناصر...حواء جات جارية قالت لي قولي بسم الله ....ناصر هسي كويس ودهو المستشفي وأزعفوا...قلت ليها: بقي كيف والضربو ده منو والحصل شنو وديني ليهو سرعة
قالت لي: ده أبو أسامة ناصر كان داير يطعن أسامة بس أبوهو جاء وضربو بالمسدس هسي هو في السجن أما ناصر ودهو المستشفي....قلت ليها: دايرة أمشي أشوفو خلوني أمشي...مسكتني وقالت لي: ماتعملي في نفسك كدا الدكتورة قالت: عندك مضاعفات ومحتاجة راحة إرتاحي أول عشان جسمك مابستحمل مشقة المواصلات...قلت ليها: لالا أنا كويسة ...وقمت دايرة أمشي راسي دور لمن قعت في الأرض...جات مسكتني وقومتني وختتني في السرير قالت لي: مش قلت ليك ما بتقدري تمشي أحسن ليك ارتاحي أول...بكيت هي حضنتني وقالت : ماتبكي إن شاء الله كل الأمور ح تكون علي مايرام...بقت تهدي فيني وتمسح علي في شعري لحدي ما نمت ....ماصحيت إلا بي زول بهز فيني ...فتحت عيوني لقيتها أمي...قلت ليها: الجابك شنو يا أمي!! قالت لي: ولا ثانية ما تقعدي هنا يلا أرح البيت بعد الحصل دايرة تقعد....دايرة أتكلم قاطعتني وقالت لي: أهل ناصر حالفين مايخلوا حق ولدهم وإنتِ مستنية هنا شنو لا ناصر ولا أسامة ما تتزوجي ما دايرين مشاكل ووجع راس...
°بتقولي في شنو يا مرة
عاينت قدامي لقيت أبوي...هو جاء علينا وقال: الناس أديناهم كلمة ده كلام شنو البتقولي فيهو ده وما تنسي ناصر براهو داير يتهجم علي أسامة ولو أبو اسامة غلط هو غلطو شنو أمي قالت لي: أنا ما بهني لا أسامة لا غيرو بتي ما دايراها تدخل في مشاكل أحسن نقيف هنا وخلاص...قال ليها: لا ..نحنا أديناهم كلمة وانتهي الموضوع...أختي قالت بعد إذنكم يا أمي وأبوي الموضوع تقرروا نونا ...وعاينوا لي...أمي قالت لي: أها قولي خيارك...قلت في سري أنا لو أخترت أبعد من الأتنين هو الخيار الأمثل بس أسامة ماعمل شي وهو أختارني ما زي ناصر ترشيح من أهلوا ....قلت ليهم: أنا ماشفت من أسامة شي غلط عشان ارفضو ...أبوي قالي: وده القرار الصاح يا بتي ربنا يحفظ...أمي زعلت وطلعت... طلعت وراها وقلت ليها: يا أمي أفهميني أنا مابقدر أرفص أسامة عشان الموضوع ده هو ماعمل شي وناصر الجاء أتهجم عليهو...قالت لي: أعملوا الدايرن تعملوا أنا أصلاً كلامي مابمشي..خلوني ساي شماعة في البيت بس...حضنتها وقلت ليها: أنت ست البيت كلو وكلامك فوق راسنا بس يا أمي أسامة ماعمل غلط عشان ارفضو ...قالت لي: بس إنتِ دايرة ناصر صح... سكت مارديت عليها....قالت لي: لي بعملي كدا يعني دايرة زول وتختاري زول تاني....قلت ليها: ناصر ظلمني وقهرني وأنا أكتفيت منو اما أسامة بإذن الله مع مرور الزمن ح أحبو. قالت لي: ربنا يكتب ليك السمح يا بتي
//////////////////////////////////////////////////
#إبتهال
في يوم كنت بفتش في شغل لقيت أسيل جاتني وقالت لي: لي عملتي كدا أنا مش صحبتك لي وافقتي علي قاسم...قلت ليها: والله يا أسيل أنا نسيت موضوعك عشان كدا...قالت لي: ما لقيتي زول غني وإنتِ فقيرة ومقطعة يعني ح تتذكريني مثلاً...دايرة أرد ليها مشت مني...قلبي وجعني عليها...اليوم ده لقيت لي شركة ودخلت لي المعاينة بعد عذاب وتلتلة قالوا لي لحدي ما تظهر النتيجة...قلت إن شاء الله يقبلوني...وصلت البيت....ارتحت شوية وغسلت الهدوم....فجأة تلفوني ضرب كانت أسيل...فتحت الخط ...وقلت ليها : يا أسيل افهميني أنا نسيت إنك كنتِ دايرة بس هسي لو دايرة أخلي بخلي ليك...قالت لي: مامشكلة نسيت الموضوع عادي يعني الزواج قسمة ونصيب أنا ما زعلانة منك.....قلت ليها: يعني مازعلانة جد جد.....ضحكت وقالت لي: يابت ما زعلانة عادي وح أكون وزريتك في العرس...قلت ليها: بجد فرحتيني كنت شايلة همك طيب يابت من هسي إنتِ وزريتي...ضحكت معاي وإتنونسنا حبه وقفلت.....هم كبير من قلبي إنزاح الحمد لله
