තමන් ඉදිරියේ ජීවමාන ලෙස පෙනී සිටි ආගන්තුක තරුණිය විදුලියක් සේ අතුරුදන් වීම චාන් ට අදහා ගත නොහැකි විය. මේ අතර හදිසියේ මඟ හැරුණු චාන් ව සොයමින් පැමිණි ජී ලී හට දැක ගත හැකි වූයේ ගල් පිළිමයක් සේ ඉදිරියේ ඇති දෙයක් දෙස පුදුමයෙන් බලා සිටින චාන් වය.
දෑස් සේම මුවත‍් අයා ගෙන සිදුවූ දේ අදහා ගත නොහැකිව සිටි චාන් එක පාරටම ගැස්සී ගියේ කරට කිසිවෙකු අත දැමූ බැවිනි.
"චාන් මොකද මෙතන කරන්නෙ අපි හැම තැනම හොයනවා"
චාන් ගේ කරට අත දමාගෙන ජී ලී පැවැසුවේය. අනිත් මිතුරන් ද ඔවුන් හා එක් වූ බැවින් චාන් ඔහු දුටු දේ පවසන්නට විය.
"අයියෝ චාන් ඔයාට එහෙනම් ආව ගමන් කුමාරිකාවක් හම්බුනා නේද 😂"
"ඒක තමයි අපිට ඒ වාසනාව නෑනේ ෂුවර් එකටම චාන් ගෙ මූණ දැකල එයා බය වෙන්න ඇති "
" චාන් ආයේ එයාව දැක්කොත් මගේ නම්බර් එක දෙන්න පුළුවන්ද 😁"
මිතුරන්ගේ කෙළි කවට කතා සහ සිනා මැදින් ඔවුන් සැවොම මාලිගාව තුලට සෙමින් සෙමින් ඇතුල් වූයේ චාන් පැවැසූ දෙය කිසිවෙකුටත් විශ්වාස කළ නොහැකි නිසාය. නමුත් ජී ලී පැවැසුවේ පෙරදා කුමරියක් පිළිබඳ කතා වූ නිසා චාන් ගේ සිතේ එවැනි දෙයක් මැවෙන්න ඇති කියාය. එය ඇසූ විට චාන් ට පෙරදා මිතුරන් පැවැසූ නම මතක් විය.
'යාන්ලි ඒ නම ඇහුනම හිතට අමුතු දෙයක් දැනෙන්නෙ ඇයි, එතකොට මේ පරිසරය මීට කලින් ඇවිත් නැතත් ආවා වගේ මතකයක් තියෙන්නෙ ඇයි. එතකොට අර ගෑණු ළමයා හිතේ ඇදුණු රූපයක් නෙමෙයි කියලා මට හොඳටම විශ්වාසයි' තමන්ටම කියා ගනිමින් චාන් මිතුරන් සමග ඔහේ ඇවිදන් ගියේ තමන්ගේ සිතට දැනෙන අමුතු හැගීම් සමඟ අරගල කරමිනි. මිතුරන් හටද චාන් ගේ මේ හැසිරීම ප්‍රශ්නයක් උනේ වෙන වෙලාවක නම් මෙතැන දෙවනත‍් කරමින් ඇවිදින දගමල්ල කිසිත් කතා නොකර මුහුණ බිමට යොමා ඇවිදින තාලය ඔවුන්ට නුහුරු නිසාය..
"ලමයි මේ තියෙන්නෙ මේ ජියැන්ග් රාජධානිය පාලනය කරපු රජවරුන්ගේ චිත්‍ර. ඒ කාලේ දැන් වගේ ෆොටෝ ගන්න තරම් දියුණු නැති නිසා හැම රජ කෙනෙක්ම තමන්ගේ වගේම පවුලේ සමූහ රූප චිත්‍ර ශිල්පීන් ලවා ඇඳගෙන මාළිගාවේ බිත්ති වල මේ වගේ එල්ලලා තියෙනවා "
