سلسيون

الحلقه (23)

وما انسى البنات البغلطو ويرمو أطفالهم في القمامة ديل لو بيدي اعمل ليهم إزالة رحم عشان النعمه الرفسوها دي م يلقوها تاني. كنت ببكي ومقهوره. معاذ؛ ليه عايزه تعملي كدا، في حاجه تانية ولا خلاص.؛ لا م خلاص حانتقم لكل بت اتأذت وفي الاخير انتحرت من وجعها، و أي بت أهلها قتلوها بعد ما عرفو الحصل عشان يدارو العار، و اي بت اضطرت تسكت وما تشتكي ي اما عشان م تأذي أهلها وتداري معاهم على الفضيحة. ي اما عشان مافي امل والزول العمل فيها كدا عندو واسطة في الحالة دي حتكون أذت نفسها واسرتها وحتموت من المغصه. معاذ؛ ايوا وإذا عملتي كدا حتكوني مرتاحه.؛ حاكون مطمئنة انو وقتها ما حيكون في أطفال شوارع، مافي طفل حيبكي بليل من الجوع أو من البرد أو من المرض وما لاقي اليعالجو، مافي طفل حيفتح ويشوف كل الأطفال الفي سنو بقرو ومع أهلهم وهو براهو م عندو زول، يمكن انا محظوظه، لا انا محظوظه شديد كمان، عشان ربنا وقعني مع ام زي أفراح، لكن في الما لقو حد جنبهم. بقيت ابكي. معاذ؛ فضي الجواك، طيب ي نور انتي عارفه انو في حلول أفضل. قشيت دموعي وعاينت ليه. معاذ؛ ممكن أحمد والجهات القانونية يقومو بالشغل دا، عارفه كيف. هزيت ليهو راسي ب لا. معاذ؛ ممكن يعاقبو اي زول غلط ويطبقو الشريعه الإسلامية، انتي عارفة لو جلدو اثنين قدام الملاء أو رجمو اثنين الناس حتخاف، وفي الحته دي بالزات مافي واسطة، لانو لو جينا لقصة الواسطه دي كتار حينفدو بجلدهم وحيعيدوها وبكدا نحنا م حنكون احدثنا اي فرق.؛ و كمان في حالات الاغتصاب لازم الولد يتعاقب. معاذ؛ ايوه لازم يتعاقب عشان البت حقها م يتهضم. ابتسمت هو كمان ابتسم. معاذ؛ اها دي حلول ولا م حلول.؛ هه حلول جزريه. ابتسامتي اختفت لما اتزكرت امي الله يرحمها وابوي وحبوبتي معاذ؛ صح الحصل م هين ولا ساهل بس ختي في بالك أنو اي حاجة حصلت معاك لخير م يعلم به الا رب العالمين، الدنيا اصلا زايلة، نحنا جينا على الدنيا عشان نحصد عمل صالح يجعلنا في الآخرة من أصحاب الجنه، ف بتمنى تديهم فرصة وما تقفلي نفسك في الغرفه، انزلي تحت اقعدي معاهم بغض النظر عن الحاسة بيه ، اجتهدي عشان تقدري تنقذي اطفال الشوارع وتحققي هدفك. وما تخافي كلنا معاك لمن تصلي، ختي الرحمن في قلبك وباذنه ما حتخيبي. اتفقنا.؛ اتفقنا. معاذ؛ حاولي جددي طاقتك، اعملي روتين جديد، نمي مواهبك وابدعي فيها، م تقعدي في الزاوية،لانو لو قلتي الناس بأذوني وانا م بقدر اتحمل حتنهاري اكتر، لازم تواجهي مخاوفك وتثبتي لأي زول قلل منك أو شكك في قدراتك، انو انتي قادره، وطول م انتي عندك قضية واصلي في الطريق واصبري الدنيا م ساهله، بس خليك عارفة انو ربنا في وما بنسى زول حيديك قدر تعبك واكتر.
بجد كلامي معاهو خفف على كتير، ودا كلو وانا لسه م عارفه هو منو وبعمل شنو هنا.
طلع مني قفلت باب الغرفه ونمت.
من جانب احمد؛ اها كيف هي أن شاء الله كويسه. معاذ؛ ايوه كويسه م عندها عوجه بس جاء في بالها الانتقام، ودي حاجه طبيعيه نتيجة للمرت بيه. بس انا وريتها كيف توجه غضبها للحته الصح. وبإذن الله حتكون بخير. أحمد؛ والله م عارف اقول ليك شنو. معاذ؛ يخ معقوله، ما تقول حاجة ربنا يقويها بس. يلا انا استأذن.
صحيت وفتحت الباب لقيت خالاتي خاتين كرسيين وقاعدين حارسني.صابرين؛ نور انتي كويسه. هزيت راسي ب اي. كنت بتلفت. صابرين؛ عايزه ابوك، تحت انادي ليك. دقيقه. دا كلو وانا خشمي  م فتحتو.
نادين؛ نور ممكن نتكلم. عاينت ليها شفتها لابسه نفس العقد الانا لابساه. رفعت حقي هي من شافتو وقفت. نادين؛ زمان لما نور اتزوجت اشترت لي نفسها ولي نفس السلسل. ممكن اوريك. جات لفت الدلايه كم لفة لمن فتحت. شفت صورة بتين. نادين؛ دي انا ودي امك نور، انتي بتشبهيها كتير، الحمد لله لقيناك. فتحت لي يدينها ضمتني وبقت تبكي وانا كمان بكيت معاها. ابوي وصابرين جو. ابوي جاني مخلوع؛ نور مالك حاسه بحاجة. ضحكت؛ لا انا كويسه. أحمد؛ الحمد لله ان شاء الله دائما كويسه .؛ بابا انا عارفه الحصل م ساهل علينا كلنا، بس انا قررت امشي مع جدو محمد. أحمد؛ شنو، تمشي مع منو، نور وعايزة تخلي أبوك لمنو.؛ م حاخليك لزول وحنتكلم يومي وحازهجك بالمكالمات. أحمد؛ ليه عايزه تمشي ي نور م مرتاحه هنا، طيب لو م مرتاحه انا عندي بيت ممكن نمشي نقعد فيهو عادي.؛ بابا م كدا، بس انا م عايزه اسبب ليك مشاكل اكتر من كدا، كفايه الحصل، هسي شوف صحتك نزلت كيف بسببي وبسبب مشاكلي الما بتنتهي.