سلسيون

الحلقه (27)

حتدمرها، عارفين انو العقاب للجاني بخفف عليها شويه، ايوه وقتها حتعرف انو حقها محفوظ وحتعرف انو عندها سند في الدنيا دي، والمفروض تكون انت. لكن تفتكر إذا حبستها في البيت حتغطي على الحصل، لو جاء زول وطلبها حتقول ليهو لا اكيد. ولو عرسها حتحصل مشاكل، حتى لو استخدمتو فكرة غتي قدحك (تعرسوها لود أهلها) هي م حتقدر تتعايش معاه. الكسره حاره وما بحس بيها غير العاشها. عليكم الله م تدمرو بناتكم م تسكتو طالبو بحقكم. عشان الحصل في بت فلان م يحصل في بتك.
عملت هاشتاق باسم "الحق حق يؤخذ ولو بالقوة"
وختمت الفيديو بانو اي بت تكتب اسم الولد الغلط فيها في ورقه ويلموها بكره  ونشرتو. كنت قاعده ومنتظره الحيحصل هل حالقي دعم ولا حيشتموني ويقولو على كلام م حلو. فضلت اعاين لل لاب لمن غفيت. صحيت بصوت؛ نور قومي شوفي التفاعل وصل لكم. قمت مخلوعه، وشفتو وقتها بجد اتزكرت كلام دكتور معاذ لما قال لي الله م بنسى زول. التفاعل وصل بالملايين، والمشاركة كذلك.
حتى التعاليق إيجابية واتعاطفو معاي، وقررو يعملو مسيره ويطالبو بالعداله والقصاص.
بقيت ابكي لاني كنت متوقعه عكس كدا تماماََ خالتو بهجة جات وهي زاتها مبسوطه. قمنا اتوضينا وأنور صلى بينا. وفضلنا ندعي انو ربنا يوفقنا.
قلت لانور يتصل على دكتور معاذ اكيد عندو نسخه من تحليل ال DNA. العملو لي بابا انا وعلى المجرم. وفعلاً جابو كان متكيف مني. اها انا اصلا النوم غلبني فضلت اصلي وادعي لمن الواطه أصبحت.
لبست واتحركنا المسيرة كانت الساعة 9 صح شفت التفاعل على الفيديو  لكن م اتوقعت انو ممكن الناس تجي وبالزات البنات الحصل فيهم المثل. لكن لما وصلت شفت جنس خلق. أظن يومها مافي زول فضل في بيتو.
اها بقينا ماشين لمن وصلت المنصة ادوني مكرفون؛ السلام عليكم.( ردو السلام) . واصلت؛ نحنا هنا اليوم م عشاني انا وبس لا عشان ابوي أحمد وعشان كل البنات الاتهضم حقهم، وعشان اي ابو خايف على بتو، لانو إذا م حاسبناهم مافي مره حتجيب بت في السودان تاني، حتى لو جابت م اظن تعتب باب غرفتها ايوه حتكون محبوسه دا كلو خوف الاهل من العار. ليه يحصل كل دا ونحنا قادرين نوقفهم. في حاجة اسمها حقوق انسان والي هي م متوفره في السودان. لكن دا م بعني انو نتجاهل الحاصل. نحنا هنا اليوم عشان نقضي على مفهوم الواسطه. في الدين ي جماعة مافي حاجه اسمها واسطه. غلطت تتحمل نتائج أفعالك. ونحنا لو بنعاقب المجرمين ما كان السجون اتملت لكن لا نحنا بنكدسهم وبنشجعهم على الغلط. المجرم دا لو م عاقبتو حيغلط تاني وثالث ورابع، والحيتأذي منو المجتمع اكيد. الناس المساكين ديل.
يعني شنو لو ولد مسؤول، دا م بعني انو تغلط وماف زول يسألك.
في ولد جاب لي كراتين ختاهم قدامي سالتو دا شنو. قال لي؛ ديل أسماء كل المجرمين. بكل أنواع الجرائم ضد البشريه. لكن الصندوق دا حق الاغتصاب. ي ساتر ديل كلهم. فتحت الصندوق وشلت ورقه ورقه وانا بقول في أسماءهم والناس بتهتف. بمقولتي "عدلك أو انتقامي". لمن خلصت الساعة كانت 2 اظن.
في ورقه وقعت من يدي دنقرت عشان ارفعها كدا اسمع ليك صوت زي الصفير فجأة الناس يكوركو جو جروني ليك ومنزلين لي راسي وانا م فاهمه حاجه. دخلوني في محل وحده من الامهات ادتني توبها لبستو واديتها عبايتي. طلعوني من المحل والشرطة جات. وصلت البيت كيف انا م عارفه.
جاني إشعار في التلفون بفيديو بنفس الهاشتاق النزلتو. فتحتو لقيتو عن المسيرة ركزو على الجزو الأخير لما دنقرت وسمعت صوت الصفير، اتضح انو كان عايزين يغتالوني. بس الحمد لله الكان في تصوير. خالتو بهجة قاعده تتحسبن عليهم ساي. طوالي طلعت غرفتي وعملت فيديو.