مشينا محل كبير سمعت قالو انو اسمو مستشفى. طعنوني بحاجة في يدي كانت حاره بقيت ابكي.؛ عايزه امي😭. أحمد؛قلنا شنو نحنا قبيل، مش قلنا م عايزين ماما تزعل. طوالي قشيت دموعي.مسك يدي وقال لي وحده؛ هاك دي ملابس حمميها وغيري ليها. ساقتني دخلنا محل نظيف. طلعت لي ملابسي وفجأه جات مويه في راسي من عمود طويل (دش)، كانت شايله حاجه كدا كبت فيها سايل ريحتو حلوه ومشتها على جسمي (ليفه _غسول).قالت لي؛ اييك امك م قعد تحممك مالو جسمك ملان طين كدا.؛ م عندنا محل نستحم فيهو. بس كان حممتني قبل فتره. البت كانت بتعاين لي بنظره كدا م قدرت افهمها. اها حممتني وجففت لي جسمي ولبستني. قالت لي؛ ما شاء الله حلاتك. هاك شوفي بقيتي حلوه كيف. ادتني حاجه مربعة(مرايه) اول مره اشوف نفسي كدا، يعني دا لوني، بس اتغيرت كدا كيف، لالا اكيد عملت لي حاجه. سألتها ؛ ليه بقيت كدا دا م لوني. ابتسمت لي وقالت لي؛ نظفتي. عملت لي ضفيرتين. وساقتني طلعنا لعمو القبيل. أحمد؛ وينا نور.
قالت ليهو؛ هدى 😂. أحمد؛ دا م وقت هظار وينا البت القلت ليك حمميها. قالت ليهو؛ اجي ي اخواني والبخليني اهظر شنو، هدى نور، شكلها اول مره تتحمم. أحمد؛ سبحان الله وما شاء الله، ربنا يحفظها. نور.؛ ايوه. أحمد هاك. اداني مصاصه.؛ دي لي انا 😍. أحمد؛ ايوه. ضميتو وكنت مبسوطه اول مره زول يديني حاجه ؛ شكراً. أحمد؛ لا شكر على واجب، وطول م بتسمعي كلامي بديك زيها.؛ بالجد. أحمد؛ ايوه. شويه كدا جو ناس جارين؛ وينا بتنا. أحمد؛ انتو أهل أفراح.؛ ايوا انا ابوها محمد. ودي امها سحر. وديل اخوانها سامي وصابرين. الحمد لله اتلقت كنا بنفتش فيها لينا اكتر من 10 سنوات. أحمد؛ والله ي عم بتك في المشرحة. محمد؛ قلت شنو، مشرحة شنو ي زول 😳💔. القالو عليها سحر دي وقعت من طولها.الا سامي مسكها وعلى طول ودوها غرفه .
الابو خت يدو في صدرو أحمد قعدو في الكنبه. محمد؛ الحاصل شنو ي ولدي. أحمد؛ تقدرو تتفضلو معاي المكتب. شالني و مشينا وصلنا المكتب كان مقعدني في رجولو وانا باكل في المصاصة. أحمد؛ ممكن اعرف الحصل، وكيف وصلت للحالة دي، مدام عندها أهل المقعدها في الشارع شنو 😡. محمد دنقر؛ والله ي ابني أفراح دي زمان كانت فرحه البيت اسم على مسمى ، وما شاء الله ماشه عديل م حصل زعلتني ولا رفضت لي طلب، بس كل ما ماشه تكبر بالعمر بحس بيها اتغيرت. اهو لمن دخلت الثانوي تابعت ليها شله م كويسه زي م بقولو أصدقاء سوء، وعندها صحبتها اسمها رغدة، من شفتها حسيت بيها م تمام وحذرت أفراح منها بس كانت طيبه وعلى نياتها وما سمعت كلامي.
ياهو لمن جاء يوم و قالت ماشه لي رغدة، سامي وصلها وقال ليها لما تكوني راجعه اتصلي على، المغرب جاء م اتصلت قلت ليهو قوم ي ولد جيب اختك بتكون سرحت مع الونسه وما لاحظت للزمن. اها مشي ليها شويه كدا اتصل علينا قلت ليهو الحاصل شنو ي ولد، قال لي البيت هنا مقلوب فوق تحت شكلهم هربو مع بعض كيف الكلام دا. اتحركنا انا وسحر وصابرين ومشينا عليهم. قلت لي ابوها؛ كيف يطلعو وانت قاعد، رجل كرسي انت. قال لي؛ قالو ماشين الدكان وما جو، اصلا بتي م بتفكر تعمل حاجه زي دي اكيد بتك مسحت ليها رأسها. أصواتنا طلعت فوق.
إلا هدونا والحمد لله ركزنا في الاهم. طلعنا نفتش عليهم. يوم، يومين، اسبوع وما لقينا ليهم اي إثر. فتحنا بلاغ عدا شهر، شهرين، 4 شهور وبرضو في نفس الحاله 😓💔. لمن يأسنا. ودخلنا على الشهر الخامس جانا تلفون قالو رغدة لقوها في شقة مشبوهه و للاسف متوفيه.مشينا مع اهلا المستشفى الدكتور قال بتكم اتعرضت لاغتصاب ومن آثار الحقن الفي جسمها وتحليل الدم للاسف كانت مدمنه وسبب موتها انها اخدت جرعة زايده.
الوقت داك أفكاري جاطت. سألنا الشرطة مافي بت معاها قالو في بنات معاها. لما شفناهم أفراح م كانت من بينهم، حمدت الله. بس لسه كنت خايف ي ربي مشت وين. مرت ثلاث سنوات اخواني كانو بقولو لي بتكون ماتت، حتى لو حيه ي محمد بت تبيت يوم واحد بره البيت مشكلة خلي لمن بالشهور والسنين، اكيد بتكون غلطت وخافت تجيب ليك العار عشان كدا اختفت. انا رفضت أعلن وفاتها متأمل في رب العالمين يرجعها لي والحمد لله هسي لقيتها بس ليه خاتنها في المشرحة، بتفحصوها صح. أحمد م عرف يقول شنو شايفهم متجرسين؛ والله ي عمي الأعمار بيد الله، بتكم انتقلت الى رحمة ربنا، المشفي حيتكفل بكفنها م عليكم غير تدفنوها.
محمد؛ لا عايز اشوف بتي واسترها برأي . أحمد؛ طيب تمام يلا.؛ ماشين وين،لماما. أحمد؛ ايوه. وصلنا غرفة كبيرة فيها حيطة، الحيطه دي فيها أبواب مربعة الراجل جرا الباب طلعت طاولة كبيرة. أمي كانت راقده فيها كان لونها شاحب. عايزه انزل عمو مسكني أشر لي ب لا. محمد شافها وقعد في الأرض بقى يبكي من منظرها صابرين اغمى عليها. شالوها وطلعوها بره.سامي ساكت بس وبعاين ليها. سحر جات داخله والممرضه ماسكاها
يتبع✨
أنت تقرأ
سلسيون
Misteri / Thrillerتحكي عن طفله من أطفال الشوارع تمر بتجارب مريرة، وتفقد والدتها، وعلى مشارف البقاء وحيده تجد من يأويها
