يوميات حنونة 👩🏻
( الحلقة الثالثة : لطلطة بكل مكان 😳! )
الناس تصبح ع خير حلو😍 .. ع شي يفرحه الا اني اصبح ع نكد بنكد😒 .. ولو هو اني الجبته لنفسي بس همين😒 ..
قبل ماقوم من جربايتي الصبح لازم اول شي افتح فوني اشوف الاخبار شكو ماكو وطبعا لازم اجيك ع انستجرام حمودي😍 .. طبعا افوت ع انستجرامه اكثر من مالتي .. رادار قاعدتله بكل مكان .. اسك . واتس .. فايبر .. انستا .. فيس .. ويجات .. كل مكان وراه وراه🏃🏻 ..
طبيت ع اخر صورة ناشرها البارحة شكوله .. فدوة لهالخلقة😍 .. مع اني شفت الصورة سبعة وخمسين الف مرة بس هم ارجع اشوفها😳 .. باوع ع كومنت لفت انتباهي ... وحدة معلقة : اووي فتوة تخبل .
فتوة😐 !... طبيت ع اكاونتها برايفت .. لا الشغلة مينسكت عليها بعدين هي شلون تعلقله هيج اكيد بينهم شي 😡.. طبعا بهيج حالة لازم اخابر ميس ..
خابرتها وجتي يمي وطبعا لأن قعدتها من الصبح فجان لازم احضرلها ريوق للخاتون ع اساس اتعاب مالتها ..
جتي الخبيرة😎 .. طبعا الصديقة العراقية خبرة حتى لو جانت حديقة😌 .. بس تحجي حكم عبالك جانت مكبلة مية سنة👌🏻 .. مميزات موبيدنا😇 ..
بديت اكل باظافري من اتوتر اسوي هيج ولو هو تعويد من الابتدائي من جانوا يوقفونا بالمدرسة تفتيش ع الاظافر بديت اتعلم اكلهن بسرعة قبل ميوصل دوري فصار تعويد ..
قالت ميس : خابريه وقوليله يطيها بلوك .
- اي تصدقين حخابره وادفره وادفرها .
واتصلت باحمد .. الي رد علية وهو نايم : مممممممم .
- قوم 😡.
- شكو ؟.
- بسرعة بسرعة قوم قوم .
- بيج شي شكو😨 ؟.
- افتح انستا😒 .
- ليش صاير شي ناشرين صورج شكو😱.
- صور شنو شدتحجي😏 .
- مادري انتي تخوفين😰 .
- اكو وحدة معلقتلك دتتلطلط قوم اضربها بلوك😤 .
- هههههههههههههههههههههههههههههههه صدق تحجين😂😂 .
قلت بعصبية : اي يلا😖😠 .
- بابا عيب شقوللها ميصير .
- ليش خايف حبيبتك ؟.
- لا ماعرفها .
- لعد شنو عيب .
- يعني بنية معلقة ع صورتي شنو مقايلة شي غلط .
- لامتلطلطة .
- حنونة روحي دانام .
- بسيطة ولي .
سديت الفون واني اريد الزمه واقطعه وانتف شعر البنية 😡 ... رجعت اجيك ع اكاونت احمد الملطلطة مسوية لايكات ع كل صوره !...
قالت ميس : عدي فكرة .
- شنية ؟.
- نسوي اكاونت مزيف ونسويلها ريكويست مال صداقة ونطب نشوف اكاونتها .
- ماشي .
وبدا فلم ريا وسكينة الجزء الثاني بطولتي وبطولة ميس 😈 ... سوينا اكاونت مرتب حطينا صورة 👩🏻 .. سوينا فولو لهواي عالم والحلو انهم ردولنا الفولو ... كتبت بالبايو كبريائي سر انثوتي ومن هاللغوة الزايدة 😪...
وسويتلها طلب صداقة .. المشكلة ان الي يشوف البايو مالتها يقول اووه هاي شنو الثقل ينقط وكبرياء ولطلطة ماريد وبالك عنه وهي ساحلة نفسها بالكومنتس ..
واخيرا قبلت طلب الصداقة ... حاطة صور الها لربع وجهها واقل من الربع هو عبارة عن جزء من الخد وعين عدسات وطاشة فوق صورتها اسمها حسب ماحسبت الحقوق يمكن سبعة اسمها !!.. انجلينا جولي موهيج !!.. 😏
والتعليقات : تموتين .. رووووووووعة .. تخبلين .. حاتة .. الخ ..
قالت ميس : هذولة صدق يحجون !.. شنو اليخبل هو شمبين منها 😕 !.
- مادري مصدومة بالعالم 😐 .
- عوفيها لحظة شوفي هاي البارحة رسالة وحدة دزتها لعلي .
طبعا علي حبيب ميس وهم مثلي بس مكافش ..
- شوفيني .
جانت رسالة من مجهول .. وحدة دازة احبك واموت عليك حس بية !..
طبيت ع البيج نفسه الي مسويله تاق .. اغلب رسايل المجهول اعتراف حب !.. لا والي يعترفون بنات اكثر ؟!.. ع وكتي من 3 سنين من اعترفلي احمد بحبه بوكتها طلعت روحه وعود مستحية بين مارديت عليه اني همين احبك ... !!..
حاولت اطنش فترة وطلعت ويا ميس للمول ع اساس نغير جو بس هي لوتية لأن تريد تشتري شغلة فلقتني حجة ...
احنا بالمول طبعا لطلطة الشباب تقرة الف بس عادي ترا يعني شغلة مو تعجب لان المعروف ولد يلحق بنية !.. عادي ..
المو عادي هو ..... جنا بجهة المطاعم دنطلب اكل .. واكو واحد قدامنا واقف بالسرة .. ع جهة بنية واقفة هي وصديقتها دتباوع ع الولد .. ووحدة تشاور اللخ .. لحد ماجتي من يمنا وقفت قدامنا يم الولد وقالت بدلع : لو سمحت .
رد عليها : تفضلي .
- اني صار جم مرة اشوفك هنا بالمول اني معجبة بيك .
لطمت ع خدي صخام !!... وتبادلوا الارقام والامور بالسيفتي واو😑 !!...
رجعت البيت واتصل احمد يصالحني .. بس بقينا نتعارك لان يومية وحدة تعلق وتتلطلط !..
يعني الي تحب واحد وع كل كومنت او شي تسويله عركة معناها لتحب احسن😌 ... مودفاع عالشباب بس الجو فوق ماهو ملوث تلوث زيادة بالملطلطين 😒...
يعني دنشوفهم بكل مكان😳 .. نت وعالواقع !.. مرح اقدر الزم وحدة وحدة واقوللها لتقربين لهالانسان !..
بس هو همين بقت عليه سالفة يطنشهم مويعجبه الوضع ويكبرون راسه .. والصراحة محد كبر راس فد ناس غير الملطلطين😏 ..
بنهاية اليوم قبل مانام واني داقلب بالانستا شفت حساب نور !.. بنت خالته لاحمد !..
ياني يا انتي ... يراد اجتماع طوارئ ويا ميس ..
نهاية الحلقة ..
