يوميات حنونة

Part 5

يوميات حنونة 👩🏻

✨ الحلقة الخامسة : موعد غرامي 😍 .

بما ان الفترة الفاتت جانت كلها نكد ويا محاولاتي لإرضاء ام احمد .. فقررنا نلتقي اني وهو وننسى العالم 😍🙊 .. واحسن مناسبة حتى نلتقي الفلنتاين ❤️ .. طبعا قبل الطلعة جان لازم اشتريله هدية .. اخذت فلوس هواي ع اساس داطلع ويا ميس اشتريلي ملابس وهالسوالف .. بس مطلعت وياها لا طلعت ويانا اختي هبة 😒 .. من مميزات طلعة الطفل العراقي انه يخبصج حتى تطلعيه وورا ماتطلعيه يشلع قلبج حتى ترجعيه للبيت 😒 .. بدينا ندور بالمحلات فطبينا محل ملابس رجالي .. ومن اهم مميزات الطفل العراقي انه لماح ..
قالت هبة : هاي شنو محل رياجيل 😕 .
جاوبتها : اي مو ميس تريد تشتري لأخوها هدية .
- اني مو اختج اشتريلي هدية .
- ماشي تدللين بس صيري حبابة حتى اشتريلج .
- لا ماتشوفين شي اشتريلي الاول .
وبدت تبجي وعياط مال الزمها وانتف شعرها 😡 اشتريتلها لعابة ورجعنا للمحل .. اجة الي يشتغل بالمحل ع اساس يساعدنا ..
قال : تدورون ع شي معين ☺️ .
- اي اريد قميص .
- شنو قياسه لحبيبج 😉 .
مسوي نفسه عود ذكي 😒🙌🏻 ..
قلت : اخوية ترا 😒 .
- اي اي ادري 😂 .
حاولنا نطنشه بس بقى لازق .. عاد طلعنا من المحل .. بس طلعنا بدت البومة اختي هم تعوي تريد موطة .. اشتريتلها .. ورا تريد حمام وطولت عشر ساعات لو احيانا تودينا الحمام وتقول نسيت 😐 شنو نسيت اريد افتهم !!.😒 ..
والختامية بدت تنعس وتبجي ورجعووووني .. 😒 .. اني حمارة اطلع هيج شكول وياي 🙌🏻 ..

رجعت البيت واني ممشترية شي .. وبقدرة قادر الطفل العراقي بس يرجع البيت ترجع الطاقة بيه من جديد 😒 ...
قررت ان بيوم الطلعة نفسها اشتريله شي بسرعة واغلفه وينجب ويسكت لان تعبت 😒🙌🏻 .. صبغت اظافري احمر ولبست حجاب احمر وعود مسوية حركات 😕 .. جيت داطلع رحت استأذن من امي .. امي قالت : سألي ابوج .
رحت دأسال ابوية .. وطبعا استحالة تاخذين جملة مفيدة من اب عراقي ديتفرج اخبار .. عاد الا ابوية من يتفرج اخبار .. يعلي الصوت كلش .. الريموت لازمه بيده .. ويدخن وصافن .. تجين تقولين كلمة يأشر ب : اشششش .
وخلصت نشرة الاخبار السياسية بعدين الرياضية حتى البورصة شافها ع اساس عده اسهم😒 ... خلصت الاخبار كولولولولوش 💃🏻💃🏻 .. ورن جواله وبدا يحجي بيه 😤😤 .. خلص حجي اخيرا قتله بسرعة : بابا اريد اطلع اني وميس للمول .
كمش باكيت الجكاير مالته والجداحة والفون وقال : سألي امج اني حطلع .
😳😳😳 زين والساعتين الجنت انتظرها علمودك !!! .. رجعت لأمي للمطبخ وقتلها : بابا يقول سألي امج .
جيت امي دتحجي دق تليفون البيت 😑 .. رحت داجاوب جانت ام رانية وعادتا من صديقات الام يتصلن واجاوب تكون الاجابة وحدة ( الحمد الله ) خل اشوفكم مثال ..
ام رانية : هلو حبيبتي شلونج ؟.
- الحمد الله خالة .
- شلون امورج ؟.
- الحمد الله .
- احوالج ؟.
- الحمد الله .
- امج ؟.
- الحمد الله .
- دراستج شونها؟.
- الحمد الله .
باقيلي الحمد الله وحدة واطب الجنة 😒 ... اطيت امي الفون وطبعا امي تغلس ع اي سؤال مادام احد متصل بيها .. قعدت ع الكرسي بالمطبخ انتظرها تخلص .. وطبعا الافندي خبصني كلساع يقول شوكت تطلعين 😒🙌🏻 ... خلصت امي الفون واخيرا نطقت : ماكو طلعة اليوم .
- شنو 😳 ليش؟.
- اليوم الفلنتاين ميصير كل البنات الممتربايات طالعات .
- شدخل 😱 .
- ماكو هياتها ام رانية تقول وبعدين حتى هي متخلي بناتها يطلعن بهيج يوم .
واااو طبعا ام رانية بنت حلاااااال ☺️ ترا هذا الوجه يعني باقي ثانية وادفر الشخص 😤 ..
اتصلت برانية جاوبتني : الو .
- هلو رنوش شونج 😒 .
- هلا حياتي هابي فلنتاين دي 😍 .
( يمة يمة مو حرام 😒 ) : وينج عبالي ازورج ؟.
- اني طالعة ويا صديقاتي بالمول .
- اها يلا غير مرة .
مو ع اساس حرام ومتخلي بناتها خرب يومج ام رانية 😡😤😤😤 ...
بدلت وقعدت وانجبيت جان احمد ديتصل هواي .. جاوبته بعصبية : شكوووو 😡😡😡😡 .
- حبيبتي اسف داتصلج مرح اقدر اجي .
- 😒 اني همين .
- امي تعبت شوية وحوديها للدكتور .
الله يطيح حظها .. سديت الفون وبقيت مثل البومة ... اني والحدايق سوا 😒 .. طلعت الفلوس من جنطتي الجنت حشتري بيها هدية .. دزيت ع لفات فلافل ابرد قلبي .. وبيت اكل 😑 ..
وصلني مسج من احمد ( خبلة احبج 😍 )
دزيتله ( ولي ضايجة 😒 )
( طاح حظج عود داصالحج 😒🙌🏻 )
( هففف ماشي )
( ممحتاجين يوم اقولج بيه احبج وتحبيني لان من سنتين اني كل يوم يمر واني احبج اكثر )
ههههههههههههههههههههههههه .. مادري شقول بس مشاعري معاقة يعني من استحي اضحك .. 🙊🙊🙊🙈🙈🙈🙈🙈🙈 .. فدوة فدوة ..
بس جنت بعدني مضغوطة انه الفلنتاين واني بومة وقاعدة ومحسوبة ع المكبلين الي حاسديهم الحدايق .. فقررت اسوي شي مختلف .. الله هداني ورحت سويت عشا لأهلي ورتبته ع الطوالة وجبت الشموع الحمر ام الريحة ولو ميستاهلوهن بس يلا .. سويت جو رومانسي وفاجئتهم بيه ... تحت شعار ( الحب هو حب العائلة ) عجبهم حتى ابوية اطاني فلوس الله خل باجر اشتري بيها هدية لحمودتي 😍😍😍😍 ...

نهاية الحلقة ...