يوميات حنونة

الحلقة الاخيرة

( يوميات حنونة 👩🏻 )

✨ الحلقة الاخيرة : واخيرا !😍 .

اليوم هو عقدنا اني وحمودتي .. يعني هاهية .. صار حلالي ومايقدر بعد هو وامه واهله يرجعون بكلامهم .. ربطتهم 😌 ...
لا لحظة 😳 .. واذا رجع بكلامه 🙊😳 ...

المهم قررنا نسوي حفلة .. منمت طول الليل بقيت افكر بالحفلة واتخيلها😍🙊 ...
قعدت من الفجر طبعا قبل يوم امي طيحت حظي بالشغل 😒 ...
العصر جتي ام الصالون دتسويلي شعري والمكياج .. ولميس همين .. مكيجتني وخلصت ولبست الفستان .. اختاريت لونه ذهبي وطبعا الرجيم واضح ✌🏻️😌 ...
اني داباوع ع نفسي بالمرايا .. جان اشوف بابا غرفتي تنفتح وتطب جاسمية 😑 ..
جتي هي والخرز الي بملابسها تشخ تشخ بكل حركة تسويها 😒 .. وطبعا بوستني ..
باوع علية وقالت : اشو محاطة مكياج 😦 .
- حطيت شي خفيف ☺️ .
- ميصير حطي بعد .
هو اكل دتعزمني عليه بعد !! 😒🙌🏻 ..
- مشكورة ماريد .
جوي كل المعازيم وطلعتلهم .. قعدت مثل الاميرة بمكاني والكل اجة سلم علية 😌 ...
شفت ام رانية تصيحني هي قاعدة بمكانها : حنونة تعالي حبيبتي .
وتبتسم !... قمت من مكاني ورحتلها قلت : نعم خالة .
قالت للي بصفها : شوفيها !.. هاي تزوجت ورنوش لا كله من ورا عنادها تريد تكمل دراسة قتلج حظ القبايح .
😳😳😳😳😳😳😳😳😳😳😳😳😳😳لحظة !... انا بتشتم ياجدعان ولا ايه !!..
صايحتني حتى تفشلني !... هاي شنو متابت !!..

رجعت بكرامتي للكوشة ورجعوا الناس يباركولي ... شغلوا اغاني وقالت ام احمد : قومي حبيبتي حنونة رقصي .
سويت نفسي مستحية عود واني حموت واردح ع مزة مصرية خرب 💃🏻💃🏻💃🏻💃🏻 ... قالت ام رانية : هسة رنوش تقوم .
ورجت ايد رانية .. ورانية تسوي نفسها مستحية ☺️ ... قامت .. امها اطتها شال ربطته ع وركها وبدت 💃🏻💃🏻💃🏻💃🏻 ...
زين المستحة السوته من شوية وين راح !!..
وبدت ترقص وام احمد تريد تتفيك قامت تكيت 😒 زين كيتيلي اني محتاجة فلوس 🙊 .. زين رباعة عادي موافقة ..

خلصت فقرة الرقص الشرقي .. جان تقول ام رانية : بعدكم مشفتوا شي من رانية ..
شنو حتتحول !!.. شبقى بعد فقرة الساحر !! 😒
قالت : رنوش صوتها يخبل كومة قتلها شاركي بعرب ايدول تفوز .
طبعا رانية مسوية نفسها مستحية بعد اللحم الذبته 😒 ... جتي ام رانية يمي وقالت : حنونة روحي قعدي ع القنفة خلي رنوش تقعد هنا حتى الكل يشوفها .
باوعت ع امي اريد اتفل !... بس كأي ام عراقية بحفلة او بعزيمة بس ترزل بالنظرات 👀 ... فمن خلال النظرة فهمت ان ( انجبي وقومي ) .. وقمت قعدت بصف امي ...
قعدت رانية وبدت تغني 😒 كل ساع تستحضر روح .. ذيج الساعة الراقصة نحوى فؤاد هسة ام كلثوم .. بعد ساعة يمكن تصير سعاد حسني وتمثل 😒 ..
وغنت وصوتها عادي ... خلصت اغنية قالتلها امها : غني بعد وحدة لاخ .
باوعت ع امي ... طبعا امي دايرة وجهها مسوية الموضوع مو يمها عود 😒 ... وطبعا صوت صرصور الليل 🐜 ..
طبعا حفل العقد مالتي !!.. موجلسات وناسة !.. ولا ذا فويس 😒 ...
قامت ام احمد وهي كامشة فونها وقالت : احمد حيجي الي تريد تلبس حجابها ... قامت رانية ولبست حجابة وطلعت القذلة عود اغراء او مادري شنو موقعها !😕 ...
ميس عدلتني لان جنت وجه الجوب من الي سووه بية ...
قعدت عاقلة ع الكوشة ☺️ ... طب هو وابوه واخوته .. طبعا اخوته الممزوجين عينهم تدور مزز .. 😁
وصل يمي وقفت .. امه اطته طقم ذهب ديلبسنياه فاني نزعت الاكسسوار مالي ماحب الذهب .. لقيت جاسمية بوجهي قالت : جيبي حبيبتي اني اخذه .