يوميات حنونة

Part 17

( انتقام حنونة 😈 )

✨ الحلقة السابعة عشر : سالمين 😒 !.

رجع حمودتي بالليل من القهوة وهو متحمس 😒 ... قالي : تعالي للحديقة عدي اجتماع .
- خير اجتماع ويامن 😳 .
جرني من ايدي ونزلنا ... لقيته جامع رانية وشاكر وعلي صديقه ومرته دينا .. وسامر ومريم ها وصديقه السنجل الوحيد البينا عماد ...
قعدت وقلت : شكو شصاير😳 !.
احمد : هسة افهمكم .
سامر : اخي يلا ورايا صلاة اريد اروح اصلي .
شاكر : انتوا منو ؟😧 .
احمد : اكو مؤسسة من شباب وبنات وحملة جبيرة مسوينها ع الفيس وكل مواقع التواصع فاحنا نريد نشترك بيها ونساهم بتطور المجتمع .
لحظة هاي منو ابو المجتمع 😳👆🏻 هذا رجلي !.
رانية : الله احب اسوي خير لله بالله .
يمة من سندس متسكت ابد 😒 ...
احمد : الحملة هي للظواهر الي منتشرة بالمجتمع فاحنا دورنا حنتوزع بكذا مكان وننصح الناس ونوعيهم .
علي : شسم الحملة !.
احمد : سالمين !.
دينا : اوي شبيك هسة شقايلك قابل!.
احمد : هههههه اسم الحملة سالمين !.
وكلنا قررنا نشترك ... اول مهمة هي نوعي الشباب والبنات الي بالمولات ..
حددوا موعد .. ولبسنا تيشيرتات لونها ابيض مكتوب عليها ( سالمين ) 😳... بس سامر مكتوب ع تيشيرت ( ماذا دهاكم ! ) 😂😂 ...
ورحنا للمول ... وتوزعنا بنات بجهة وشباب بجهة ...
خل نبدي بالبنات .. طبعا رانية اول ماوصلنا خابرت امها لان باعتبار امها سباقة بفعل الخير😒 ...
جتي امها جان اشوف امي وياها 😳 .. ايه الي جاب الولية دي هنا😐 ...
جتي امي : بدال ماتنظفين وتعدلين لرجلج تسوين حملات !.
- ماما نظفت البيت وجيت 😑 .
جان تبدي ام رانية ورانية ... شافت شباب يدخنون راحت : هاي شنو دتدخنون !.
يعني كامشين جكاير قدامج شنو ديتبخرون !😏
واحد بيهم هز راسه 😐 ...
ام رانية : ميصير دتخنون مو زين اني ابني جان يدخن بس ضربوه عين تمرض .
زين اني راضية ذمتكم شدخل العين بابنها بالتدخين !... 😳😳😳😳 .. يعني مثلا الجكارة حسدته !!.. لو الجداحة غارت لان اشترى جداحة جديدة فقالت اضربه عين !..
قالت رانية بصوت ناعم : التدخين مضر للصحة كلش يخلي الواحد يكح .. بعدين الريحة متيبة يع .
فدوة للمتيبة 😒😒😒😒😒 ...
طبعا الشباب صافنين 😐 او مذهولين باللي ديشوفوه !...
رانية : احما حملة سالمين حتى نوعي الناس .
ام رانية : شوفوا هاي بنتي ماشاء الله عليها بكل فعل خير سباقة .. بنتي دايما تسوي اكل ثواب وتوزعه وشون طبخ عليها يجنن .. نادرة وست بيت تخبل .
هسة دتنصح لو دتسوي دعاية ! 😒🙌🏻🙌🏻 شدعي اكثر من هيج !!...
عاد امي بما انها تموت ع التنظيف فعدها قرون استشعار ضد اي شي وصخ ... شافت وحدة بمطعم ويا ابنها وابنها موصخ روحه ولاعب بالدنيا طوبة .. اموت من هالجهال المفروض ميطببوهم مطاعم 😒🙌🏻🙌🏻🙌🏻 ...
راحت امي قالتلها : سالمين !.
ابتسمت المرية : خير خالة !.
- بنتي ميصير هيج ابنج رتبيه ورتبي ملابسه .. نظافة الطفل تعكس نظافة امه بس معذورين هالجيل .. اني هذيج بنتي ( واشرت علية ) همين من جيلكم متحرك جسمها ولا تسوي شي وهياتها فاشلة ببيت رجلها .
سالمين 😳😳😳 شنو جايبيني كمثال ع النماذج الفاشلة !!!...
عاد اجة دور دينا ... شافت مرية تتعارك ويا رجلها وضايجة .. راحت عليها وقالت : ممكن اختي نحجي ع جنب !.
مشت وياها المرية ووقفوا جنب .. دينا : سالمين اختي دتتعاركين ويا زوجج !.
- ليش شكو 😐 .
- احنا حملة اسمها سالمين هدفنا نصلح المجتمع ونثقفه .
- اي موتني رجلي داشك بيه احسه ميحبني .
- لام ميصير هيج تقولين خلي عدج ثقة بنفسج وبرجلج اني رجلي عمري مسالته يخابر منو لو يحجي ويا منو ...
اويلي ع المرأة السندسية متقعد راحة 😒 يجيبن الحجي لنفسهن ...
كملت دينا : يعني رجلي علي يموت عليك يعشقني عشق يقولي لوما خوف ربي جان عبدتج .
موشايفج بقرة حتى يعبدج 😒 ترا البقر هم ينعبد لتحسبين روحج فد شي !!..
دينا : لدرجة ان من اطلع يبقى يشمشم بهدومي .
شنو هذا رجال لو جلب بوليسي 😒🙌🏻🙌🏻 ..
راحت مريم لقسم الالكترونيات جانوا مشغلين اغاني وهوسة ... راحت للرجال : اخي ميصير اغاني الله ميباركلك حشغلك شي حلو ويشرح الصدر .
الله هاي الناس التشتغل صح 😍👆🏻 ...
مريم : هاي المحاضرة تخبل علي الصوت خلي الكل يسمعها يتعض .
الله عليج يابنت خالتي الجميلة العاقلة 😇😘😍
بدت المحاضرة وصوت هذا الي يحسس قامت القيامة وصوت الشيخ يعيط : كفررررررة .. جميعكم كفرة ... اللاهين عن الصلاة والذين يذهبون الاسواق لشراء المتاع كفرة ... والذي يشتري هانفاً خلوياً ..
( ملاحظة .. هالمحاضرة تحديدا بصف قسم الجوالات ☺️ ) ..
كمل الشيخ : الهاتف الملعون .. الذي سيذهبكم جميعا للنار .. حسبنا ونعم الوكيل بمن يبيع هذه المفسدات .
بسرعة طفا الرجال التسجيل 😳😳😳😂😂😂😂😂😂 ... همزين مكسره ع راسها 😂😂 ..
يعني حلو ان تطفين الاغاني .. شغلي اناشيد سامي يوسف صوته حلو ومتدين .. شغلي وائل جسار اغانيه الدينية حلوة .. محاضرة لواحد عاقل وهادي مثلا عدنان ابراهيم انسان يخبل ... علي جمعة ... ع الاقل يحجون بصوت ناصي .... بس جماعة العياط هذولة شنو !..

نروح للشباب 👨🏻👨🏻 ...

نبدي بحبيبي 😍 اي بكيفي واسطة ... احمد وقف ع جنب يوزع بروشورات ( كتيبات صغيرونة ) ... فجتي بنيتين اخذن منه وقالت وحدة بدلع : فتوة اخوية شنو هاي !.
احمد : اختي هاي حملة اسمها سالمين وموجود هنا التفاصيل والمواقع مالتنا حتى اذا احد يريد يشترك ويانا .
البنية : ياي حلوة تلش .
انا هبتدي اتف 😒🙌🏻 ..
البنية اللاخ : اريد اشترك شون !.
احمد : دخلي ع هالمواقع وتقدرين تشوفين شون تشتركين ومواعيد حملتنا .
البنية : خاف ماعرف اقدر اتواصل وياك !.
احمد صفن للسالفة 😐 .. ديفكر اذا يوافق شحسوي بيه اني 😡 ..
احمد : تدللين حطيج الكك مال مرتي هي تنسق ويا البنات بالحملة .
البنية : ااام .. خلص حشترك اني باي .
وطفرن 😈✌🏻️✌🏻✌🏻 ...
المشكلة ان الملطلطين احيانا يحجون ع اللطلطة .. مو الكل طبعا بس الي يسمع حجي الملطلطين نقول الله شهالعقل الثقل ايبااه 😒 ..

اجة دور سامر ... سامر شاف وحدة ويا الكبل مالتها شابكين اصابعهم ببعض ودتحجي بالجوال تقول : هلا مامي .. اي اني ويا صديقتي داتمشى .
لا والاحلى حبيبها يبتسملها من تقول صديقتي .. فرحان اوي حضرتك 😂😂 ..
جان يروحلهم فجاة ويجر الجوال منها 😳😳😳😳 .. طبعا اخذ الجوال بسهولة منها من الصدمة .. يعني تخيل نفسك دتحجي وفجاة احد يخمطه منك 😳 !.... فعلا سالمين ! 😂😂 ...
حجا بالجوال : انها كاذبة بنتج دتمشي ويا واحد وايدها بايده ربيها .
الام : انت منو !.
سامر : احنا حملة سالمين .
واطاها الجوال .. فحبيبها عاط بسامر : انت شدخلك شبيك تريد تنكتل .
سامر : من راى منكم منكراً فليغيره بيده !.
البنية : وانت منو ابوية اخوية !.
سامر : ان لم تستحي فافعل ماشئت حدخلون النار .
تعال اتفل بوجهي اذالقيت احد حيدخل بالحملة من وراك 😒 ..
نجي ع عماد صديق احمد الصايع 😒 ... شاف شلة مزز عاد راحلهن ...
وصل : هلاوو .
البنات عاد شافولهن واحد صاك : هلاو .
- احنا مؤسسين حملة جبيرة ع جميع مواقع التواصل وطبعا اني صاحب الفكرة والمجهود كله واني رئيس الحملة اسمها سالمين .
البنية : عن شنو الحملة !.
عماد : حملة توعوية .. يعني فرضا بنات حلوات مثلج بالمول ويجي واحد يتحارش بيهن هالشي ميرضيني .
خف علينا يالبودي جارد 😒 ..
وحدة من البنات : حبيت هالحملة شون نشترك بيها !.
طلع كروت من جيبه وزعه عليهم : هذا رقمي الخاص خابروني واني اجاوب كل اسئلتكم ومفتوح طول الليل اجاوب ع مكالماتكم .. والي تريد معلومات زيادة ع هالحملة نحجي سكايب اشرحلها صوت وصورة ع اهداف الحملة .

اووه اللهم كثر من امثالك 😒 .. اذا كل واحد يريد ينصح يحجي ع السكايب معناها العراق بخير 😒🙌🏻 ..

جان علي وشاكر ديتمشون سوية يدورون احد ينصحوه ... علي شاف واحد بحده قاعد طالب هواي اكل سمين ...
علي : شاكر تعال نروح ننصح هذا نقوله اسراف وميصير واكو ناس ملاقية اكل .
شاكر : اوكي .
رن جوال علي وحدة من الحبايب .. علي : روح شاكر واني جاي وراك .
راح شاكر يم الرجال .. الرجال رفع راسه ديشوف شيريد .. جان يلزم الماعون مال برياني وياخذه ..
الرجال : هاي شنو شدتسوي .
شاكر : انجب هذا الاكل مالتي .
الرجال : مالتك شنو ابن ال..... توووووووووووت ..
عاد علي لحق شاكر بسرعة : لك مخبل شدتسوي .
اجة الرجال : ليا توووووووووت .
علي : احنا متاسفين .. شاكر رجع للرجال الماعون .
شمر شاكر الماعون ع الارض : شنو هاي ماحب اللحم اصلا هو اطانياه .
شافتهم رانية من بعيد وجتي ركض لشاكر : حبيبي شكورتي شكو !.
شاكر : ماحجي ويا بنات ملطلطات احنا مسوين حملة علمود الملطلطات امثالج امشي اني رجال مزوج امداج .
😂😂😂😂😂😂😂😂😂😂 البت دي بتصعب عليا ...
ورجعنا البيت واحنا منجزين واااو ☺️ ...

نهاية الحلقة ...