( يوميات حنونة 👩🏻 )
✨ الحلقة السادسة : عزة 😱 .
واحد الصبح يصبح ع خبر حلو ... قعدت من النوم ع صوت فيروز☺️ .. داجذب طبعا قعدت ع صوت ست الحبايب وهي تغرد من الصبح بصوت ناصيييي كلش اصلا يادوب ينسمع ☺️ ..
امي : حنوووووووووووووووووووووووووووووووووووووووونةحنونة حنونة حنونة حنونة حنونة ..
كروان ☺️ قعدت من النوم واني فرحانة اسمع اسمي ☺️ ..
- هاهية قعدت.
😒 👈🏻 هذا وجهي من اقعد الصبح .. قعدت داتريق وجان تجي ست الحبايب دتقعد وياي تحاجيني .. ياستار 🙊 ..
- حنونة اليوم حنطلع .
- الله وين وين 😍 .
- فاتحة .
واوو يعني يوم ماتعرض علية طلعة نروح عزة 😱 .. اصلا اني من زمان حاسة اني لقيطة 😒..
- ماما ماحب .
- ميصير هذا واجب والمرة جاملتنا هواي عيب وبعدين تاخذين اجر ..... الخ 😒.
- ماروح 😒 .
جيت داقوم جان يرن جوال امي .. جاوبت : هلا ام احمد ..
قعدت مرة ثانية داسمع شيحجون 👂🏻 .. قلبي يدق من امه تحجي ويا امه 😍🙊 ...
خلصت امي حجي وياها وقالت : هياتها الناس كلها حتروح .. حتى ام احمد رايحة .
الله حتروح ام الحب 😍😍 ...
قلت : لعد حروح .
- شعجب غيرتي رايج😒 .
- لان هذا واجب والمرة مسكينة لازم شوكت نروح !.
- بالاربعة العصر .
ركضت للغرفة ادور عباية حلوة للعرس .. اقصد العزة 🙊 .. وحطيت مكياج ورتبت روحي ولبست العباية 😌 ... جتي امي من دنريد نطالع شافتني 😳 ..
- صخام اشو حاطة مكياج !.
- لعد شون اروح هيج واني وجه الجوب 😒 .
- بنتي ميصير روحي مسحيه .
وجان اروح امسحه 🚶🏻.. وطلع واني جني بومه 💀.. رحنا للعزة بعيد الشر عن السامع ..
طبينا جانت ام احمد هناك 😍 سلمت عليها : هلو خالة البقية بحياتج .
- حبيبتي حياتج الباقية .. عفية بيج جيتي ويا امج خوما مثل بنات هالوكت ميقبلن يجن فواتح .
- لا خالة شون اصلا هذا واجب ونحصل اجر بعدين حتى نذكر اخرتنا وان ماكو شي بهالدنيا يدوم 😔 .
لحظة هاي مين داجيب هالحجي 😂😂🙊 ..
امي : بالقوة جتي .
هاي شنو 😳 متاكدين هاي امي !!.. زين ليش ..
شاورتها : ليش هيج 😒 .
- اني ماجذب .
وجان اسمع صوت مألوف علية 😒 اعرفه زين 🙌🏻 ... بوست امي وام احمد .. اي اي ام رانية 😒 .. ورانية همين ..
طبعا رانية حاطة مكياج وشونها واني جني غراب😒 .. سلمت ام احمد ع رانية : شونج حبيبتي زين جيتي ويا امج .
ام رانية : اصلا هي القالتلي خل نروح بنتي طول عمرها صاحبة واجب .
الله الله هيج الامهات 😒 ...
بدن النسوان يحجن والغريب بالموضوع انه مايخص العزة !..
اكو مريتين جانن ديحجن : شفتي بنت ام علي تطلقت .
ردت عليها الثانية : تستاهل .
زين عزة يعني بيه موت وناس حزينة وهمة ديجيبون بطاري ناس لاخ !! 😐 ..
والي بصفي تقول : جوعانة شوكت يجيبون العشا.
صخام الصخمكم !!😳😳 ...
لو ام رانية تسأل امي : هو المرحوم شمخلص؟.
شبيها العالم تخبلت !..
جاوبتها : خالة الولد مات وراح للمكان الي ميرحم الواحد لاشهادة ولا شي غير العمل الصالح ... يعني اتوقع لو كل واحد حط نفسه ويتخيل انه هذا العزة مالته ويشوف الحاضرين كلهم ونياتهم شونها يشوف منو الحزين صدق عليه والي جاين علمود القيل والقال !.. يلقى ان ماكو احد يحبه .. ع الاقل ندعيله نذكر الميت بالاشياء الزينة واحنا نتعض همين .
فجأة لقيت ام احمد حضنتني ودتبجي : حياتي بارك الله بيج فدوة لقلبج .
بست راسها : تسلمين خالة .
الله اخيرا اخيرا 😍😍😍😍 .. رن جوالها جاها مسج فتحته وقالت : هاي نور بنت اختي فدوة لعمرها تحب يومية تسال علية ومرة احمد مستقبلا .
طاح حظج وحظها وحظ احمد 😒🙌🏻 .. ناس تقهر هفف وين العشا تأخر اريد اطلع قهري بالاكل 😌 ..
نهاية الحلقة ...
