( يوميات حنونة 👩🏻 )
✨ الحلقة الثامنة : فلم رعب 👻 .
الفترة الفاتت وبسبب محاولاتي الطايح حظها ويا ام احمد نفسيتي صارت زفت فعلمود هيج امي انقهرت علية😔 .. لا لا معفتني من شغل البيت 😒بس قررت ولأول مرة ابات ببيت ناس مع اني كل مرة ابوس الايادي حتى توافق ابات ببيت ميس بس متقبل😓 ...
بس هالناس مو اي ناس قرايبها .. بيت خالها ومو كلش نعرفهم بس حسب وصفها ان بيتهم يخبل😍 وحديقته ترد الروح وان ولد خالها نفسهم يخبلون 😇...
تشجعت ووافقت ابات يمهم جم يوم 😌 ارخي اعصابي ...
ورحنا لبيتهم ابوية وصلني .. جان البيت يخبل من قدام والحديقة حسب حجيهم انها ليورا البيت وتخبل ...
استقبلتنا مرة خال امي 👵🏻 وبناتها الثنين وولدها .. شكلهم هادي عكس ماحجتلي امي 😒 .. ابوية راح وعافني من الباب طفر 🏃🏻 ...
طبيت ليجوة .. طبعا بيتهم تحفة ☺️ .. لا مويخبل لا جديات تحفة فنية يعني انتيكا ع قولة الوالدة باشا 😂 .. بس ستايله يذكرني بفلم رعب اسمه darker than night .. خصوصا مرة خال امي تشبه العجوزة المريبة الي تطلع بالفلم 😳 ...
قعدنا بالصالة وكلهم بس يبتسمولي وسكوووووووت ... بس نسمع صوت صرصور الليل 🐜 ...
قالت بنت خال امي : شكلج مستحية من عدنا .
شدخل مستحية بس انتوا شكولكم مريبة 😒 ..
قلتلها : اي شوي ☺️ .
قالت : حقولج نكتة حتى تحسين انج قاعدة بوسط اهلج .
يااراجل 😳 .. يلا خل نسمع بلكي يطلع دمهم خفيف ☺️ ..
قالت : اكو واحد جان خواف هواي كل يوم بالليل يسمع صوت مرعب .. الستارة مال شباك تتحرك بس الشباك ممفتوح .. وظلمة كلش والكل نايم ويسمع صوت احد يهمسله ..
لحظة ترا المفروض هاي نكتة مو قصة 😒 ..
كملت : ويومية يشوف خيالات وبيوم قال خلي اشوف شنو هالخيال الاسود اجة ديشوفه جان يطلع هذا الشيطان وموته وذبح راسه وكتب بدمه ع الحيطان وقطع اصابعه ونتف شعره ههاهاههاهاههاهاههاهاههاهاههاههاهاهاههاااههلهاها .
😳😳😳😳😳😳😳😳😳😳😳😳😳😳😳😳😳😳😳😳😳😳😳😳😳😳
والمشكلة ان كلهم ضحكوا نفس الضحكة : هاهاهاهاهاهاهاهاهاهاهاهاهاهاهاهاهاهااهاهااهاهاهاهاهاهاها .
!!!!... اني شفت هالفلم من قبل بنية هم طبت يم ناس اخرها طلعوا مصاصين دماء !!.. ها ها موقتلكم اني لقطية وامي دتنتقم مني 😒 .
قامت مرة خال امي ها نسيت اقوللكم اسمها ام خليل هو نفس مهند التركي بمسلسل ميرنا وخليل بس نسخة عراقية ع شوية ضحكة صفرة منه متبشر بالخير شفت هالضحكة قبل بفلم رعب 😳 ..
قامت ام خليل وهي خربانة ضحك .. اي اي بعدها خربانة ضحك ع النكتة 😳 ..
قالت: حبيبتي تعالي اخذج لغرفتج ارتاحي ولاحقين ع النكت .
ارجووووووكم كافي نكت اذا نكتكم هيج 😓😳 ...
رحت وياها للطابق الفوق واحنا دنصعد ع الدرج اكو هاي اللوحات المعلقة اي اي هي نفسها بالفلم اني شفتها 😳 ... انوبة اخر الدرج اكو صورة للمرحوم خال امي اي اي نفس الصورة الي بالفلم وعيونها تتحرك 😳😳😳 ..
بس محاولت اركز بالصورة خاف صدق تتحرك عيونه وتجيني سكتة قلبية ..
طبيت للغرفة جانت جرباية وحدة قتلها : خالة هاي غرفها البنات لو شنو ؟.
- لا هاي غرفة الج وحدج حبيبتي ارتاحي .
وطلعت وعافتني .. طبعا الغرفة مليانة صور قديمة اي اي نفس البلفلم 😳 .. طلعت فوني من الجنطة داخابر امي حسبي الله ونعم الوكيل بس 😒 ..
جاوبتني : ها حنونة حبيبتي .
- ماما اشو الناس مريبين .
- شنو !.
- رجعوني .
- انجبي اقولج خلوج بغرفة الضيوف مو ؟.
- شكلها هيج .
- قضيت طفولتي بهالغرفة باعيها تطل ع الحديقة .
- بعدني مفتحت الشباك هسة اشوف .
- ماشي .. وعيطت .. اي اي افتهمنا .. يلا حروح ابوج يريد العشا .
وسدته .. رحت فتحت الستاير داباوع المنظر ..😳😳😳😳😳😳😳😳 .. وين التخبل !!!... عبارة عن غابة !... اشجار متشابكة انوبة تخوف ياترد الروح 😐 .. زين اريد افتهم امي دازتني دتنتقم مني مثلا 😒 اذا اني لقطية خل تقولي عادي اصلا اكيف اعوفلها البيت 💃🏻...
غيرت ملابسي ولبست بيجامتي الجميلة ☺️لحظة خل اطيكم نبذة عن بيجاماتي 😌 .. بيجاماتي عبارة عن تك وتك .. بنطرون بجامة فلانية وياتيشيرت غير بيجاما .. وطبعا اسوي هالشي حسب تنسيق دقيق للالوان ☺️ .. لا لا خل ماجذب خاف اموت بهالبييت واني جذابة .. ممم يعني هي موكلش منسقة .. يعني هي ممنسقة .. ممم خلاص حقول الصدق عبارة عن زلاطة .. فرضا بيجاما تيشيرتها احمر البس بنطرون بيجاما لاخ اخضر 😌 .. واكو بيجامات الزق بيهن انتظرهن ينشفن من الغسل حتى البسهن مرة لاخ بعد صراع طويل ويا امي .. واحيانا القاها وصلة مسح بالمطبخ 😒لو وصلة اخشاب 😒 ...
سمعت صوت الباب يندق .. قلت بلطافة وطبعا اول مرة اجرب اقول تفضل لان عدنا بالبيت ماكو استئذان لا عدنا شي اسمه ( اقتحام او فتح باب خيبر ) فجأة تلاقيها دفروا الباب ويصيحون عبالك فاتحين مكة ! 😒 ..
طبت ام خليل وقالت : حبيبتي يلا العشا جاهز .
واااو اي اي بديت ارتاح دلال .. اذكر البارحة اهلي همين صاحوني ع العشا من امي نست تحمي خبز صاحتني احميه واجي اكل بطريقي 😒 لو من احد ينسى يجيب عصير يصيحوني 😒اسرة متعاونة جميلة ☺️ ..
نزلت وياها للصالة طبيت جانوا كلهم قاعدين ع الطاولة والاكل قدام كرسي واحد !.. شنو ينتظرون الجبير يخلص والفتافيت للبقية 😳 .. والله عائلة مريبة ماستغرب من اي شي يسوه ..
قعدت قاموا كلهم وابتسموا : بالعافية وطلعوا !..
ايه ده 😳 هو في ايه !... قبل ماتطلع بنتهم سألتها : شنو مرح تاكلون شكو ؟.
- لا حبيبتي هذا اكلج احنا حنطلع .
- ليش مناكل سوية شنو اكلتوا قبلي .
- لا بس عيب نقعد وياج وانتي تاكلين ميصير انتي ضيفة .
وطلعت !... زين شنو العيب بالموضوع !.. شنو حغتصب الدجاجة الحاطينها !.. لو الخيارة حتنزع هدومها !!.. شنو العيب 😳😳😳😳😳😳 ..
اكلت واني اباوع ع صورة المرحوم خال امي 😐 مريبة الصورة !.. خلصت سمعت صوت الباب يندق جتي ام خليل وقالت : خلصتي !.
- اي الحمد الله شكرا .
- بالعافية .
- يلا تعالي ويانا نشوف فلم .
طبيت للهول كلهم مجمعين قام ابنهم خليل وقال وهو ديضحك : حشغللكم فلم يخبل .
قعدنا وشغل فلم SAW طبعا ولا جزء شايفة منه اموت منه كافي دعايته التقرف .. جان واحد ديطققون رقبته وهمة ديباوعون وعادي ومتونسين 😳😳😳😳😳😳😳😳😳 ... خلص الفلم واني بعدني مصدومة جان افز ع صوت الساعة مال بيت الجبيرة .. طن طن .. اي اي نفس الساعة التطلع بافلام الرعب 😳 ...
قامت الام وقالت : يلا ع النوم .
صعدت للغرفة وسديت الباب واني مصدومة 😳 .. حاولت اتمدد ومافكر بهالبيت وطبعا ماطفيت الضوا .. بس اخاف .. خابرت حمودتي الحمار .. عود مزاعلين هالفترة بس انعل ابو الزعل بهالوكت ..
جاوبني عود بثقل : نعم !.
- خايفة .
- شنو ؟.
- اني بفلم رعب .
- شكو شنو شبيج !.
وحجيلته ع السالفة وكاي حبيب عراقي حمار ضحك : هههههههههههههههههههههههههههههههههههههه !.
- هي شنو تضحك .
- خلاص اسف .
- باوع .. ابقى وياي لحد الصبح .
- عدي شغل .
- ماكو متروح شغلك مو اهم مني فاهم !.
- ماشي .
وبقينا نسولف لحد الصبح ... نمت اني ع الفون ... قعدت ع صوت دق الباب ..
جانت خالة ام خليل وهم تريقت بحدي يمكن البيضة المسلوقة تستحي تنكل قدامهم لو الجاي دمه حامي ميرضاها ع المربى 😒 ...
خلصت ريوق جان اطلع للحديقة .. اقصد الغابة .. هدوء ومتشابكة !!..
مليت وطبيت ليجوة سألتهم : اكو واي فاي !.
رد خليل : لا .
شون عايشين لعد !!😒 ... جيت العصر داخابر ابوية لان اعصابي تعبت من هالبيت جان ما القى جوالي 😳😳😳 !!!...
سألتهم : محد شاف جوالي .
والكل جاوب : لا .
- زين اريد اخابر اهلي !.
قال خليل : عدج الارضي .
رحت داخابر ع الارضي ماكو حرارة 😳😳 ... وربي قتلكم شايفة هالفلم من قبل 😳😳😳😳😳😳😳😳😳😳😳😳😳 ..
رجعت للصالة داحاجيهم ملقيتهم !..
بوم بوم .. بوم بوم .. صوت قلبي .. ياقلب هو بقى بيا قلب !.. 😱😱😱😱😱 .. طلعت دادور عليهم جان القى بوجهي شي اسود يقول : بوووه .
عيطت : اااااااااه .
سمعتهم يضحكون ونزع خليل اللبس الاسود : هههههههههههههههههههههههههههههههههههههههههههههههههههههههههههههههههههههه .
قالت بنتهم نوال : هههههه مشى عليج المقلب .
- صخام !!.
خليل : شنو رايج احنا نحب نسوي مقالب وامج قالت تخافين من افلام الرعب هههههههههههههههههههههههههههه .
ليا اهبل ياابن الهبلة ياعيلة هبلة وواطية 😡😡😡😡😡 .
قتلهم : جنتوا كل هاي متقصدين !.
- اي هههههههههه .
عود مسوين نفسهم رامز واكل الجو ويسون مقالب امداهم
حسبي الله ونعم الوكيل بيكم وبامي وباحمد وبامه وبام رانية وبرانية 😒 ...
نهاية الحلقة ...
