( يوميات حنونة 👩🏻 )
✨ الحلقة الثانية عشر : رانية وام رانية 😒 .
لان رانية وامها يصعب الحجي عنهم قررت اسويلكم حلقة اوصفلكم مصايبهم 😒 اقصد مميزاتهم ☺️ ...
نبدي براس البلة .. اقصد بالام من الاكبر للاصغر .. مرح احجي حجي عادي لا حجي علمي جاي من تجارب ومواقف وخبرة 😌 ...
( ام رانية )
الموقف الاول 🌟 : ام رانية اجتماعية هواي .. وتحب هواي تحجي .. خصوصا ع العالم عاد بهالسالفة استاذة ورئيسة قسم الغيبة والنميمة 😂🙊 ..
باحد القعدات النسائية الودية .. طبعا اغلب قعدات النسوان نحط كرسي فارغ ابليس يجيب ورقة وقلم وياخذ كورس يمنا 😈 ...
المهم جنا قاعدين بما يرضي الله .. واسمع ام رانية تقول : اي هياتها ام حنين البارحة تعاركت ويا زوجها حيوان .
ستوب ☺️ ... خالة ترا الحيوان الدتحجين عليه ابوية احس 👆🏻😑 ... والاحلى انها تجيب سيرة الناس قدامهم غيبة شرعية يعني مو ورا ظهرهم 😒 ...
وحدة قالت : ليش شسوى ؟.
ام رانية : ميريد يخليها تشتغل رياجيل متخلفين .
طبيت اني بالموضوع : لا خالة هو مقال هيج ومتعاركوا بس اعترض ع الشغل مو فكرة انها تشتغل 😒 .
ام رانية : هههههه بعدها صغيرة خطية متفتهم بهالسوالف .
😒😒😒😒😒😒😒😒😒😒🙌🏻🙌🏻🙌🏻
النوع الي مثل ام رانية الي يسون السالفة ع كيفهم يسمعون حجاية ويبدون يكبرون بيها ويسوها فلم هندي 😒 ...
الموقف الثاني 🌟 : انها عادي تفشلج باي مكان وتقصف ام الجبهة ☺️ ..
مرة اتنيلت ع عيني وطلعت ويا بنتها وجتي ع حظي هي ويانا ... طبينا لمحل مال ملابس دنتفرج فسألت الي يبيع : اكو من هذا غير لون ؟.
ابتسم وقال : لا هاي اخر قطعة بس هاللون يلوق لج انتي بيضة .
جتي ام رانية 😡 : شكو ؟.
عبالي حترزلني لان داحاجيه 🙊🙊 ... قاللها : لا بس داقولج لبنتج ان يلوقلها هاللون لانها بيضة .
ام رانية وهي معصبة : لا هاي موبنتي 😑 ..
لزمت ايد رانية وقالت : هاي بنتي 😍 .. شوفي بنتي شلونها تخبل وشون حلوة وبعدين بنتي ابيض واطول وتجنن .. اشرت علية .. بنتي مو هيج 😒 .
لحظة 😳😳😳😳 .. كأنها سحلتني هسة !.. شنو بنتي مو هيج !.. شنو ششايفتني 😳 ..
مرح اتطرق لاحساسي وكتها وحغلس😡 .. المهم الموقف الثالث 🌟 : ان ذوقها رفيع كلش ☺️ .
تجي تقرا براس امي ع فرضا ملابس بفلان مكان حلوات ... وامي الحبابة تصدق 😑 ... فد مرة وصفتلنا ع محل جبييييييييييييير وملابسه رااااااقية يخبل يخبل ... رحنا للمحل اني من باب المحل قلبي انقبض 😟 ...
طبينا ليجوة ☺️ يخبل يخبل ... اي فهموا العكس 😊 احس داخلة بومباي بالهند 👳🏾 ... الالوانات !.. والهوسة وشي يفوق الوصف 😕 خوب الريحة واالو رهيبة 🙊 ..
الموقف الرابع 🌟 : ان سبحان الله الشباب كلهم ذبحوا وشمروا نفسهم وقطعوا روحهم علمود رانية ☺️ ..
بكل قعدة تقعدها ويا امي تقول : ذيج المرة رحنا للمستشفى رانية جانت تعبانة الدكتور شافها تخبل ( للعلم ان اي واحد يشوفها يتخبل 😑 ) مشال عيونه من عليها قال زوجينياها بس قتله بعدها تدرس ☺️ .
ومرة لخ : اكو واحد يشتغل بالوزارة شافها تخبل عليها قال لازم ازوجهاا موت روحه وجاب امه بسرعة حتى يخطبها بس هي ماقبلت تريد تخلص دراسة .
دايما الرياجيل يتخبلون عليها 😊 .. وطبعا امي بكل مرة صوت صرصور الليل يمها 🐜 .. حتى الي تقدمولي ورفضتهم متجيب سيرتهم ولا تعلق ☺️ ...
يلا اهم شي الروزرايز 😌 وحمودتي ...
