( يوميات حنونة 👩🏻 )
الحلقة الثامنة عشر : شكورتي 😂 .
اليوم الحلقة كلها عن شاكر بس بما انه ينسى اذا حجالكم المواقف الي صادفته فاني رح احجيها 😌 ...
شاكر ورا الصدمة من حبيبته ماتت بسنة بدة ينسى ... بقى بالبيت لسنتين المسكين حتى جامعة مراح 😔 هذا الحب خوما مثل الفرنسيين بعد زواج عشرين سنة بس تموت قبل الاربعين يزوجون 😒🙌🏻 ولو شاكر يعتبر فرنسي بس هم عدنا زينين ...
بعد مابدى ينسى قرر يداوم جامعة ...
هاي اول يوم جامعة 👇🏻
(( اول يوم جامعة ))
ساعة بالسبعة الصبح طبت ام احمد لغرفته شاكر دتقعده ... قعدته : شاكر !!... شاكر !!.. يلا قوم .
قام مخترع : انتي منو وشون تطبين غرفتي 😧 .
امه : اني امك 😐 .
- اثبتيلي 😟 .
جان تهفه بضربه ع راسه : انجب شثبتلك .
اساسا ضربة الام العراقية اكبر اثبات ع امومتها وع جنسيتها 😂😂 ...
شاكر : زين امي شتريدين !.
- يلا قوم البس دتروح جامعة .
- ماشي .
طلعت وعافته ... قام من الجرباية .. نزع ملابسه وبقى صافن 😐 .. جان يرجع يلبس بجامة لاخ ويرجع ينام ...
ورا نص ساعة جتي امه انصدمت 😱 ..
- ولك اشووووووووو ملبست !.
- شكو قلتيلي روح نام .
- ياربي شسويت بحياتي 😭 .. قوم البس قدامي الاقيها منك لو من اخوانك الطايحين حظ لو من ابوك .
نعم انها الام العراقية من ترزل تسوي select لافراد الاسرة كلها .. وغالبا ما تختتك رزايلها بالاب ☺️ ...
واخيرا ابوه راح ديوصله وهو رايح للشغل بطريقه لان اذا ركب تكسي رح يسوي مشكلة 🙊 ...
وصله ابوه للجامعة نزل من السيارة وسد الباب جان يدق الجامة مال سيارة ..
فتح ابوه السيارة : ها نسيت شي .
- حجي شقد الكروة ! .
بقة ابوه صافن 😧 ... بعدين قال : اني ابوك .
- ابوية ميشتغل سايق تكسي ابوية رجال محترم مومثلك .
ابوه : وخر ايدك من الجامة .
وخرها جان يصعد الجام ويطفر الرجال 🏃🏻 ...
سمع احد يصيحه : شاكر .
التفت لقى واحد جاي عليه .. قله : انت منو ؟.
- اني عماد ابن جيرانكم متذكرني 😐 !.
- لا ... تشرفت بيك اني شاكر .
جان يسلم عليه بايده وسايره عماد : اني همين .
طبوا لجوا الجامعة ... هما ديمشون وقف شاكر وباوع ع عماد : انت منو !!! 😧 .
- اني عماد صديقكم وابن جيرانكم انت واحمد .
مد ايده يسلم شاكر : تشرفت اني شاكر .
ردله السلام عماد : اني اكثر .
دخل عماد شاكر للمحاضرة وراح ... بدا الاستاذ يشرح .. بنص الشرح جان ينسى كل شي وانصدم انه قاعد بمكان ميعرفه !... جان يقوم ديريد يطلع ...
شافه الاستاذ وقال : وين !.
- مادري انت شكو جايبني هنا خاطفني !.
جان الكل يضحك : 😂😂😂😂😂😂😂😂😂😂😂😂😂😂 .
الاستاذ : خاطفك شنو 😡 .
- اني حروح ابلغ عليك .
وطلع ركض من المحاضرة 🏃🏻🏃🏻 .. لحقه الاستاذ ...
التفت عليه : نعم صحتني !.
- وين رايح ؟.
- منو انت 😐 !.
- شنو !.
- عن اذنك اخي .
وعافه وراح 🏃🏻🏃🏻 ...
وصل للكافيه مال جامعة ... لقى عماد يصيحه : وينك يمعود دادور عليك .
- انت منو 😐 .
- اني عماد صديقكم وابن جيرانكم انت واحمد .
- تشرفت اني شاكر .
ومد ايده وسلم عليه ...
جانت اكو بنية دتباوع لشاكر ... ترا هو حات لوما النسيان 😍 ...
قال عماد : اكو وحدة تباوع عليك شكلها معجبة بيك .
- صدق 😍 .
- باوع روح حاجيها لان ابتسمتلك .
- ماشي .
وراحلها ابتسمت هي .. قاللها : مرحبا .
جاوبت : هلا .
- اني شاكر .
- اني رقية .. انت جديد هنا !.
- اي .
- نورت الجامعة .
- شكرا بنورج .
وفجاة راح وعافها 😳 ... يعني تخيلوا واحد دتحجون وياه فجاة يطفر 😳😳 ... هو ديمشي وقف قدامه عماد : هاي شنو وين رايح ؟.
- انت منو ؟.
- اني عماد صديقكم وابن جيرانكم .
- تشرفت اني شاكر .
وهم سلم عليه ...
- شكو عفت البنية !.
- يابنية !.
- هذيج .
- منية هاي !.
- المعجبة بيك !.
- صدق معجبة بية !.
- اي .
وجان يروحلها .. قال : مرحبا .
البنية : هلا بيك .
- اني شاكر .
- ادري .. وين رحت !.
- انتي منو !.
- اني رقية .
- تشرفت .
- اني اكثر ههههه .
وراح وعافها فجاة 😳 لا المشكلة مو هنانة !.. المشكلة ان البنية خابرت صديقتها وقالتلها ان واحد حات يشاقة وياها وكلساع يسوي مواقف ضريفة حتى يتعرف عليها 😂😂😂😂 ...
وبقة سنة بالجامعة .. ويومية بنية جايته تجبي وتقول يخوني لان ناسيها ..
...
اهله حاروا بيه فودوه لدكتور قاللهم ان حالة نفسية ...
الموقف الثاني .. هو انه دوم فاضحني اني واحمد ....
جنت اني وحمودتي بالاستقبال ساعة وحدة بالليل اخذنا الواهس واحنا دنلعب دومنا وبقينا ...
ففاز علية قال : اطيني جائزتي .
- شتريد 😒 .
- قبلة .
- قبلة !.
- اي قبليني ... يقولج قبلتها ٩٩ مرة ومدري شنو .
- يارااااجل صاير تشعر .
- اعجبج 😉😉 .
قرب مني ... قربت منه ... قرب اكثر ... قربت .. وخلاص جان هيبوس جان نسمع عيطة : ااااااه .
التفتنا لقينا شاكر يم باب الصالة .
عيط شاكر : حرامية بابا ماما حرامية بالبيت .
والكل جوي والتموا علينا ... امه : شكو شصاير !.
اشر علينا : هذولة ادبسزية جان يبوسها .
ام احمد : صخام احمد موعدكم غرفتكم متستحون .
شاكر : اريد بوسة .
ابو احمد : ابني روح غرفتك .
شاكر : ماحجي ويا ناس ماعرفها لتدخل ... اريد ابوس .
احمد : دتعال وياي واني حخليك تبوس .
شاكر : لا اريد ابوس هسة .
وبقا للصبح يدور بوسة ... لحد ماكلهم باسوا راسهم حتى يروح غرفته 😂😂😂😂😂 ...
....
اخر حدث جان ويا رانية بليلة الدخلة ... طبوا سوية للغرفة قعد ع الجرباية ... رانية سوت روحها مستحية وقعدت بصفه ☺️ ...
جان يندار عليها : منتظرة احد !.
- منتظرتك !.
- اني 😧 .
- اي ليش ؟.
- اني ماعرفج .
- اني زوجتك واليوم ليلة دخلتنا .
- الله صدق 😍 .
- اي حبيبي .
وجان تقوم ست المستحية وقال : افتحلي السحاب.
قام وراها وفتحلهياه .. التفت وقالت : حطب للحمام ابدل لان استحي ☺️ .
يمة المستحى يمة 😒 ...
هي دتروح للحمام جان يصيحها : يابنية !.
التفت : اني مرتك !.
- مادري بس انداري داسدلج السحاب مالتج مفتوح .
- لا اقعد انت اني هسة حجيك اقعد .
- ماشي .
طبت دتبدل جان تطلع تلقيه نايم ... قعدت ع الجرباية وصاحته : شكورتي .
قعد : انتي منو ؟.
- اني مرتك واليوم ليلة دخلتنا .
عدل نفسه وباوع ع قميص نومها قصير : ليا ادب سز يلي مستحين !.
- شكو 😳 .
- شون هيج تلبسين اهلج ماربوج !.
- ليش !.
- عيب عليج اني اغض البصر عن بنية مثلج .
- حبيبي اني مرتك 😭 .
- اني مزوج ! 😳 .
- اي واليوم ليلة دخلتنا .
جتي تقرب منه دتبوسه جان يدفعها ويقوم : الحقوووووا ... ياناس .. اذا مافضحتج .. تتحارشين بواحد مزوج ... ياناسس الحقووووا ...
وطبعا لحقناه اني واحمد وقضى ليلة الدخلة برفقة اخوه يباوعون فلم واني يم العوبة رانية بس تعوي .. وخربوا علينا ليلة بالفندق جنا ناوين نقضيها بالشقاوة 😒🙌🏻🙌🏻 عفية رانية لا خلصت منج سنجل ولا مزوجة ...
طاح حظج وحظ امج 😒🙌🏻
نهاية الحلقة ...
