قصه من الريف العراقي
للكاتبه امل مهدي 🌹
في احدى القرى الحدوديه الشرقيه
حيث الخضره وجدول المي الصافي اليمر بظهرالبساتين
كان في الشتاء لكثرة الأمطار والسيول النازله من التلال الحدوديه الجميله ينملي مي ويمر بسرعه فائقه
اما بالصيف المي يشح ويبقى الجدول يتغذه من العيون والفروع
التجمع منا ومناك
مناظر خلابه تجمع بين الخضره والمي الصافي ولون السماء الزركه الصافيه
الهدوء والعزله والجهل والظلم
عشناها بكل انواعها
في ظل بيت
جدي شرهان
كان الله منعم عليه بخير كيعان وحلال وبستان يحوي انواع أشجار الفاكهه والحمضيات والنخل
وبيته جبير وسط البستان
ويشتغل جوه ايده فلح و رعيان ياخذون الحلال يرعون بي على الحدود ويبقون ايام ياله يعاودون
شرهان عنده خيل اصيله اثنين
يوميه ياخذ واحد يركبه
ويفتر عليهم ويراقب الشواغيل
مالته.
كان شرهان عنده ٥ بنات وثنين اولاد
ناصر و منهل
ناصر مزوج فخريه وعنده سبع بنات وحده احله من الثانيه
بس ما كانَو بعينه ولا وحده منهن
امنيته ولد وما جاي الله يرزقه هلولد فظلت فخريه كل سنه تحبل بلكت الله ينطيهه الولد
ويسكتون عنه ناصر وأهله المسممين عيشته ويعيرو هه بخلفة البنات
ومنهل مزوج ساهره وعنده
اربع ولد جاسم الجبير وحسن وسعد وكامل الزغير
وبنت وحده اسمه فوزيه
ناصر.....
انه راح اتزوج...
فخريه... شنهو تزوج
.... اريدلي مره التجيب الولد كبرت وانتي صفطيتلي سرب
بنات
فخريه...... وانه شبيدي هاي الله وهاي عطيته
تريد اتنزل شريجه علي يا ناصر
انه ما ظل بالبيت لو سويته
ناصر... وانه ما جاي أخذ رايج
انه نويت وخلص اظليتي وان رحتي ما يهمني
فخريه.... جا لوصدك تسويه والله ما تشوفني بعد
ناصر.... بعد احسن
شرهان.... من الصبح تطاحنون اشبيكم
فخريه.... عمي ناصر يريد يزوج
ام ناصر....جا ولا تزوج شني
يريدله وليد والله محلله
فخريه..... لا عمه جا انت ترضيله
واني وبناتي السبعه وين اروحن
شرهان..... تبقين هنا انتي وبنياتج
وناصر ماكال باطل يريد وليد يسنده بكبرته
ويصير ظهر البناتج
فخريه.... جا انتم كلكم متفقين
وراضيله
ام ناصر.... كومي على شغلك
وعوفي الزلمه لا تعرضيله
لا هو أول واحد يثني ولا اخر واحد
وبعد اسبوع دخل ناصر و يا مرته الجديده اسمه منيره
بنت واحد من كرايب امه عايشين
بديالى
وهاي مسأله عاديه الرجال ياخذ وحده واثنين وحتى ثلاثه اذا الله منعم عليه مثل ناصر واهله
فكيف اذا ما عنده ولد يشيل اسمه
