البارت الرابع عشر
******
من شفتك شفت روحي
بلا مرايه.....
ولگيتك تشبه البيه وحيد
وحزنك ولايه.....
مصطفى الخزاعي
******
امل.....
اني وكتي كله اقره كتب وارسم بالبدايه بقلم الرصاص
ومن حسيت رسمي مو عادي واني امتلك موهبه وصيت ياسين على الوان ما ئيه ودفتر رسم اوراقه جبيره وبديت ارسم
مره كان علي بالديوانيه يمنه
واياد اخذ رسوماتي وراواهن اله
تعجب ونبهر بيهن
وكاله اكو معرض رسم بالمحافظه
خلي ندزهن ونشارك
وبالفعل شاركن رسوماتي بالمعرض وحصلت شهاده تقديريه من مدير التربيه
وودو عليه استلم جائزه وابويه ما رضى اشكد حاول ويا اياد ما قبل
يگول ما عندي بنات تروح اهناك موزين مخليها بالمدرسه
واكيد امي دورها جبير بقتل موهبتي كانت تموت اذا تشوفني اقرا بكتاب
..... ولج امل وين صرتي
..... يمه اهنا جان بيدي قصه
من الادب العالمي جابه ليث السعاد اقرأ بين
..... امشي كنسي بيت الهوش
...... هيه غير ام سلام تنظفه يوميه
...... وانت من اليوم وياها تعلمي مثل خواتج
..... وكفت معانده
والله معليه اتوسخ
..... ركضت ورايه واخذت القصه
وشككته وذبته بالتنور
...... بجيت وصيحت مو مالتي مال سعاد الكتاب ليش شكيتي
...... اصرخين بوجي يبر.... ك
وكتلتني بالصونده
من اجه ابويه كلتله تعارك وياها
وحتى طردها من البيت ونعته
بالوصخه والمهمله والقاسيه
وفعلا كلهم ذني عد امي
جنت اوگف يم الباب واسمع علي من يحجي ويه اياد
صوته واسلوبه وبساطة جذبني
مره اياد راد عشه
وجان علي يمنه
جبت الصينيه واجيت ودكيت الباب
...... اياد هذا العشه
...... طلع اياد اخذ الصينيه مني وتفاجا
شنو هذا تمن ماش وروبه
اكو واحد يتعشه تمن ماش بليل
اني سكتت خفت منه صار عصبي
اخذي رجعي ما ريده
علي...... اشبيك اياد ليش عصبت بساع
اشبي تمن الماش نعمه من الله
اني هسه قبل ما اجي اتعشيت روبه وخبز
..... انه الظهر ما آكلته بليل تريدني آكله
واكفه اسمعه شلون بسيط وهادئ
كل يوم يزيد اعجابي بي اكثر
خلصت هاي السنه
نجحت للاول متوسط...
واياد وعلي نجحو للخامس اعدادي
اني الوحيده من خواتي ما يطلعوني للسراحه لو للزرع
واياد بالعرك والعناد ملو منه وعافو
سعاد ولهفه اكدر اگول همه ذراع ابوي اليمين صحيح مجبورات
بس شايلات الحمل كله
وياسين من خوفه من ابويه وامي
مجبور يطلع ويه خواته
ابوي گام يسافر هوايه شهر بالموصل
واسبوع بالغربيه وسبوعين بالسماوه يودي حلال ويبيع ويشتري
ويرجع محمله سيارته تنكات الدهن والدبس والراشي وصناديك
الفاكهه من غير الهدايا اليجيبه صديقه السعودي محمود شيشه من يلتقون على الحدود للتهريب
ومرات يطلعون للصيد ويه ضباط
وشيوخ بصحراء السماوه
المستوى العاش بي ابوي المفروض احنه اميرات انعيش بي
بس حالنه حال الفلح التزرع بكاعه
والرعيان التسرح بحلاله
