#مراس_الدعجاء
للكاتبة هدهد
لا تنسون التصويت والمتابعة للحساب وتعليقاتكم الي احبهم 🎀💙
✤———————————————✤
اني محمد رزاق... شخص ماعنده اخوه بس اخت وحده
عشت عيشه عاديه بس تغير كل شي من جان عمري 7 سنوات
من استـشهـد والــدي رحمة الله عليَّه وانگلبت حياتنا 180 درجة
جنت طفل صف أول ابتدائي وما فهمت بس بوقتها ابوي بعد ما راح يرجع.. جنت ابجي اشتاقله ومرت الايام وكطفل نسيته
جنت بيوم ملتهي مع الجهال بالشارع ألعب .. أمي حتى ما تهتم لو ابات بره وكل همها نفسها
جانت تصبلي أكل كل يوم اتغدة وتخليني اطلع لليل بره يالله أرجع
بيوم من الايام واني توني صار عمري 8 سنوات شفت سيارتين گدام بيتنا وركضت عبالي أبوي رجع
تفكير طفل ما ينلام
من دخلت شفت امي كاشخه بالمطبخ وتحضر بالاستكانات وفرحانه وبكل براءة سألتها
-يمه رجع أبوي ؟
باوعتلي مصدومه بعدها خزرتني وهمست
-أبوك مات شيجيبه بعد؟ ادخل بدل يالله يمنه خطار بسرعة وصير حباب لا اگطع العوده على جسمك
ركضت لغرفتي خايف لان صدك جانت اذا تعصب تگطعني من الكتل.. لبست نفس لبس المدرسه قميصي وبنطرون وبقيت متردد استحي اطلع لو لا
شويه وسمعت صوت خالي حامد يصيحلي وركض طلعت.. شفت بيبيتي ام امي وخالي ورجال غريب بالصالة كاعدين
خالي طبطب على مكان يمه وحجه
-حامد: تعال خالي سلم
تقدمت ما اعرف على منو أسلم أول وسحبني الرجال الغريب يسلم عليه وبعدها سلمت على بيبي واخر شي خالي
حجه الرجال الغريب بصوت هادي
-هلا حبيبي شلونك؟
هزيت راسي وحجيت بتوتر
-الحمدلله
كعدت متوتر وتعجبت من دخلت امي متكشخه وانطتهم الجاي واني أفكر شلون امي تطلع كدام الرجال الغريب ومطلعه شعرها والي تعجبت منه اكثر محد معترض
الرجال ما شال عيونه عن امي وهيه خجلانه ما اعرف شنو من شعور بگلبي صار وخفت احجي وانضرب منها
جانوا يحجون سوالف ما مفهومه وآخر شي حجت بيبيتي وكالت
-صارت حلالك يمه وبكيفك شتقرر احنه حاضرين
أنت تقرأ
مراس الدعجاء
Actionمرات تندم أشد ندم على قرار تاخذة بدون تفكير -أي مثل حالتي هسه، حزام الكاميرا ملفوف على رگبتي وواگفه بمكان أظلم بعيد شوي عن الشارع الرئيسي الفارغ بهالمكان.. شلون انثولت وأجيت؟؟؟ خلي أوصف الكم المكان، گدامي سيارات سباق تتحضر حتى تنطلق وانا شنو دوري؟ أ...
