هاجسي وافكاري شاغلها غرامه

البارت الخامس عشر

بطول ذا البارت ان شاءلله

"""""""""""""
مد رجوله يناظر النجوم الي ملت سماء اليوم جلس يتألمها وهو يتنهد ذكرته السماء بعيونها الي تلمع له كل مالمحها او جت عينه بعينها

تذكرها واقفه قباله قبل دقايق كيف طالعته بصدمه بعد ماطلبها تجي معه وابتسم بعد ما جاء في باله بعد هروبها من قدامه

وتوسعت ابتسامته اكثر واكثر بعد ماستذكر انها رجعت له بعد هروبها تقول ينتظرها لين تجهز نفسها واغراضها وتجيه حتى تسافر معه

همس لنفسه وهو يرجع شماغه وعقاله الي براسه على ورا شوي : والله انك حايس فيها ياسعود بس ماجابها الا حب القصايد في طريقي لين صارت تلعب بقلبي مثل لعب الهبايب في شعرها

طلع جواله من جيب ثوبه يكتب لامه رساله محتواها انه بيجيها وقال لنفسه بعد مارجع جواله وحطه بجيبه :لولا العيون الي ترجتنا ما
تعنينا لدياركم

رفع راسه وشاف مازن ولد عمه رايح لجهة بيت صافيه وعرف انه يدوره بعد ماسمع صوت جواله وعرف انه هو متصل عليه

رفع سعود جواله ياشر بنوره لمازن الي اشر بالسلام من بعيد وهو جاي له : حيك يابو زيد

رد سعود بعد ماكان متمدد وعدل جلسته : بقيت والله بس التحيه مهب التحيه والترحيب لك انت كملك معد شفناك

جلس مازن جنبه : تعرف اخر سنه لي الله يقلع الجامعه ودربها الطويل والله انها هلكتني

ربت سعود على كتفه : ماعليه يادكتور اخر سنه شد حيلك وارفع روسنا

مازن : هذا الي مخليني اصمل

رجع التفت مازن عليه يساله : الا انت وين رايح كني لمحت ثوبك معلق قي السياره

حط سعود عقاله وشماغه في حثله : بطلع ابها اسلم على الوالده واعود

ضحك مازن بعد ماشاف ماجد جاي لهم : شوف الخبل جاء

ضحك سعود بعد مارفع راسه شاف ماجد رافع ثوبه بين اسنانه ويجري من بيتهم لين سياره سعود

ماجد بعد مالقط انفاسه قال : على وش مجتمعين لا يكون تقطعون فيني

غمض سعود عيونه وهو يضحك ورجع ظهره من جديد على قزاز السياره : محد جاب طاريك

مازن طلع من جيبه بكت دخان وقال : باقي صاملين تقاطعونه ولا بتناشبوني

سعود : منب معود له شريت صحتي

ماجد سحب البكت من ايد مازن : كان ودي اكمل الصمله لكن مابردك

اخذ مازن ولاعته وولع لماجد بعد ماقال : والله انك كفو لا انحرقت رئتك تفداك الي معي

رفع سعود حاجبه بعد ماشافهم يحبون خشوم
بعض وقال : امي صافيه لا تشوفكم يالهطوف والله ان تطفيها بين عيونكم