ميسم:"بقات متبعاها وكأنها فهمات حالتها..
خصها تنفارد بيها وتجلس معها
تفهم حالتها هي ختها وحتى حد مغايبغيلها الخير من غييرها..رغم أنها مزال مامصارحها إلا وأنها علاقتهم أكثر من الإخوة..كيفهمو بعضياتهم من نظرة وحدة ..وكيواسيو بعضهم فور ميحسو باليأس
تنهدات بعمق ودارت لعندو لقاتو متبعها بنظرات عتاب يأس حزن ..قالت وهي كتشوف فييه"شكرا على توصيلك ليها..اا جون ياك؟
جوسلين:"دار لعندها وهز راسو بالإيجاب"هي بوحدها لي كتعيطلي بجون..باش عرفتيها
ميسم:"تبسمات"ديما كتعاود علييك بطريقة غير مباشرة..وبلا ماتحس..تفكرت هاد الاسم وضنيت أنه ليك حيت متقارب مع اسمك..المهم نخلييك..فرصة سعييدة..ونتمنا متكونش فهمتيني غلط..نتا عارف أسماء عندي عزيزة ومنبغيش شي حاجة تآذيها..
جوسلين:تشرفت بمعرفتك..متخافيش كوني مطمأنة عليها..غنكون ديما فجنبها 'حك ورا ودنيه بتوتر'واخة تردي ليها البال هاد الأسبوع خدمات فيه بزااف..خصها الراحة ..واخة كنقول ليها متضغطش على راسها بزااف مكتسمعش..نتي ختها وغتعرفيلها حسن مني احم..ااحتا من الغدا مكلاتش زعما
ميسم:"تبسمات وهضرات مقاطها"صافي فهمت..كون هاني.."شافت فيه مطولة وهضرات مراقبة ملامحو"أنا لي ختها وممشطوناش عليها لهاد الدرجة..على مابالي خديتي دور الأخ بجدية..
جوسلين:"جمع ابتسامتو وتغيرات ملامحو..ودعها وزاد مكسيري مخليها متبعاه وعلى فمها ابتسامة عريضة..الواضح أنها غتلقى صعوبة مع هاد الزوج..أكيد هاد التغيير كامل كان من تأثيرو عليها..
وصلات للدار حلات الباب ودخلات..حيدات سباطها وتمت غادا تجاه غرفتها لي كان مردود وكيتسمعو منو شهقات خفيفة..حلاتو بهدوء وهي تلمحها كالسة وجامعة رجليها لعندها وحاطة راسها عليهم وكتبكي في صمت..
طلعات راسها وكيف لمحاتها بدات تمسح فدموعها بنترة ..محاولة تخبي حزنها لي سببو مجهول بالنسبة ليها ..
قربات لعندها وكلسات فجانبها..عنقاتها من خصرها وحطات راسها على كتفها..هزات يديها بدات دوز على شعرها بحنية ..ضرها خاطرها وهي كتشوف حالة ختها ولي الظاهر عليها أنها كانت كتبين القوة وداخلها مزال ديك البنت الضعيفة اليائسة..
ميسم:علاش كتبكي..عاودي لي وغترتاحي..
ايلا كنتي بصح كتعتابريني ختك عاوديلي وخوي قلبك
أسماء:"بعدات وطلعات فيها راسها وعينيها حمرين بالبكا"معرفتش..كلشي مخلط مقادراش نفرز مشاعري ..من واحد الناحية معجبة بالمدير طريقة كلامو تعاملو وسامتو كلشي ..وكنحس بالفراغ ايلا مشفتوش نهار واحد..ومن واحد الناحية جون ..كنفكر هو الشخص لي كيفهممي من نظرة وحدة هو لي كيضحكني ويخرجني من حزني..كيهتم لأدق تفاصلي وو اليوم"مسحات دمعتها "منين قال كنعتابرها بحال ختي حسيت بإحساس غرييب أميسم ..حسييت بالخنقة مقدرتش نتحمل ديك الكلمة ..مفاهمة فراسي والو..عاونيني أختي
ميسم:"مسحات يديها برقة وابتسمات ابتسامة عريضة "نتي كتعتابريه كصديق لا أقل لا أكثر ومشاعرك تجاهو مكتعداش الصداقة يااك؟..وبالنسبة لمديرك واش مجرد إعجاب أو حب خصك تفهمي حقيقة مشاعرك أ مِلِي..أأسماء نتي بين نارين دبا
أسماء:"حطات يديها على وجها"معرفتش تالفة..كيفاش غندير نعرف عطيني الحل منقدرش نبقى هاكا
ميسم:"صمتات لثواني عاد نطقات"الغيرة..والخوف من فقدان الشخص لي كنبغيو هما لي كيحددو مدى حبنا ليه
أسماء:"شافت فيها باستفهام
ميسم:عمرك حسيتي بالخوف تجاه شي حد خايفاه يتآذى..أو غرتي عليه
أسماء:"هزات راسها بالسلب لكن فور ماتفكرات الموقف لي طرا ليها معاه..منين حاول ينقدها قالت"فصراحة آه لا معرفتش..
هادي شي مدة جون نهرس من يدو حيت حاول ينقدني وتما تعطب..
معرفتش ديك الساعة خفت عليه ولمت راسي ..خفت لتكون شي حاجة خطيرة وميبقاش يزاول خدمتو هادا هو السبب..آه خفتو يضيع خدمتو بسبابي لا غير ماخفتوش يتآذى بفف معرفتش
ميسم:"دلات شفايفها"حالتك صعييبة أ ختي..
المعيار الوحييد لي بقاليك هو الغييرة...
أسماء:زعما؟
ميسم:دبا غير جيني نيشان..كنتي كتبكي حيت قال عليك بحال ختو..إذن نتي مكتعتابريش كصديق و
أسماء:"وقفات متجاهلة كلامها"راني قلت لييك أميسم متحكرييش
ميسم:"وقفات تقابلات معاها"بالي بحالا رض لييك الصرف منين قلتي عليه صديقك..وهو باش يختاصر عليك الطريق قال ختي
أسماء:"دارت لعندها بزربة "بغيتي تقصدي انه مقصدش ديك الكلمة يااك..هو مكيشوفنيش على أني ختو
ميسم:"جابت ليها الضحكة ..رغم أنها فاهمة مشاعرها الملخبطة إلا وبغاتها تتأكد لنفسها"ومانعرف شوفي نتي..خليني دبا أنا لي
حريرتي حريرة
أسماء:علاش نتي مالك
ميسم:تخاصمنا
أسماء:وايلي وعلاش؟
ميسم:معرفتش علاش خدا موقف ..ماهو لي داني لعندة بنفسو وأصلا كيبقا ولد عمي يعني عادي...غيكون مزال سحابلو كيبغيني داكشي علاش
أسماء:وباش عرفتيها هاد ولد عمك نساك
ميسم:وراه باينة..يعني هاداكشي كانت مراهقة منو وصافي ..ميمكنش يكون من بعد كاع هاد السنين مزال كيبغيني..'هزات تيليفونها وشافت فيه لدقائق'نحزرو ولا نخلييه...لا لا خلييه حسن حتى يعرف راسو هو لي غالط..تقلق على والو
أسماء:بغيتي ديري فيها عزة نفسي..
مقلقة السيد عاد كتعفري..باز ليه معاك
ميسم:"شافت من الشرجم"دغيا ضلام الحال..المهم نخلييك آه وريحي راسك شوية..الماكلة غتلقاي كلشي فالثلاجة..جون ديالك وصاك عليا الله يخليه لييك
أسماء:"ابتسمات ببلاهة"شنو قالييك؟
ميسم:ااح وتسمعييه ..قالي ردي ليها البال وراها مزال مامغدية كون مقاطعتوش كون قالي خليني انا نمشي نقابلها لييك..أستغفر الله"شافتها كيفاش رجعو ملامح وجهها تطلقو .."ايوا سيري ديري لي وصاك عليه ليمشي يتقلقلينا'سكتات شوية'شفتك طلقتيها ورجعتي تبسمي غير بوحدك..شكاتسناي
أسماء:"حكات ورا عنقها بتوتر وخرجات هاربة من نظرات ميسم لي كيشككوها فراسها "
بقات متبعها وهي مبتاسمة هزات صاكها وتمت خارجة قاصدة المستشفى
أنت تقرأ
الواقع المر
Romanceرواية بالدارجة المغربية ... تأليفي : Wisso_Thr القصة غتكون بين الضابط نيار لي كيقلب على الأطباء لي متورطين في عمليات التجارة بالاعضاء ديال المرضى بشكل سري والطبيبة ميسم لي غتعاونو
