لا تنسون تصلون على النبي
قراءه ممتعه❤️
بعد مرور اسبوع من الحزن والتعب لليان وسيف وام ليان ، رجعوا للسعوديه واستقروا في بيت ابو ليان ، كانت ليان اغلب الوقت نايمه ماتبي تسوي شي، حتى اكل غصب تاكل وشغل ماتبي تشتغل انهارت وتعبت وتدمرت وحست انها وحيده، اما سيف الي يحاول يكون ثابت وقوي وقرر انه يتغير عشان ليان لان مر بنفس الشي الي مرت فيه ، توفى ابوها قبل لا تودعه وتشوفه ، اما ام ليان حالتها ماتسر ، نفس الشي حابسه نفسها والحين هي بالعده
الصباح
في بيت عمر:
كان هدوء تام، بعد الموقف الي صار بين شيخه وفيصل ما كلموا بعض ابد ، وفيصل اتخذ قرار وبينفذه باقرب وقت ، جميله وعمر مافي شي جديد عندهم
في غرفه فيصل:
فتح عيونه بعد نومه عميقه بسبب الاشغال الي سامي تعمد يخلي فيصل يسويها ، مد ايده يدور جواله واخذه وشاف الساعه وكانت ١٠ ونص ترك جواله وبعد اللحاف وقام اتجه يغسل ويبدل ، خرج من دوره المياه ، راح للدولاب ولبس ثوبه وشماغه ولبس ساعته ومد ايده للعطر واخذه وبخ بختين وطلع من الغرفه نزل وشاف ابوه جالس مع جميله يضحك ويسولف
فيصل وهو صاد: صباح الخير
عمر ابتسم: صباح النور، كانك متاخر؟
فيصل: يبا اليوم جمعه
عمر عقد حواجبه :صدق
فيصل : اي
عمر : وين بتروح !
فيصل : ابروح لجدي من زمان عنه عشان الحق عليه قبل لا يروح المسجد ، وعندي مشوار ضروري
عمر: طيب ، خل مشوارك لبعدين، بنروح للمزرعه
فيصل: متى!
عمر: بعد صلاه العصر
فيصل ناظر ساعته: اي يمدي اخلص اغراضي والحقكم
عمر: لا لا، بنروح جميع بنفس السياره
فيصل حس باحراج وماوده يركب بنفس السياره مع جميله بس ماقدر يقول لابوه لا
فيصل: ابشر، يلا عن اذنكم
عمر: اذنك معاك
جميله: كيف يعني؟؟
عمر: وش الي كيف يعني؟
جميله وهي تحاول تخفي ابتسامتها : بنروح جميع بنفس السياره!
عمر: اي ، اذا ماودك عادي نرو
جميله قاطعته: لا لا شدعوا عادي ماعندي مشكله
بيت الجد عقاب :
نزل الجد عقاب كعادته عشان يفطر وريحه البخور والقهوه ماليه المكان ، وعند الباب دخل فيصل مبتسم وتقدم لجده الي كان جالس وباس راسه
الجد عقاب: يالله حيه ، انت عايش معانا بنفس الكوكب
فيصل ضحك: هذي اعتبرها عتاب؟
الجد عقاب: عنبو دارك مانشوفك؟ ابد وينك ها وينك مختفي
فيصل: والله ياجدي مكروف كراف بالشركه
الجد عقاب ابتسم: يعطيك العافيه
الجده مزنه جت وهي ماسكه عكازتها وبايدها الثانيه المبخر ، فز فيصل اول ما شافها وتقدم يبوس راسها
مد ايده فيصل ياخذ المبخر وحطه بالطاوله الي عند التلفيزيون : عنك عنك
الجده مزنه: منهو ذا!
فيصل ضحك: افا
الجده مزنه: فصول، والله نسيتك ولا كانك حفيدي! علامك مختفي
فيصل: توني اقول لجدي مكروف والله
الجده مزنه: لا لا تراني زعلانه عليك ، اسمعني ان ما جيت المزرعه ازعل عليك
فيصل: لا افا عليك انا اول الناس هناك، الا صدق جدي وش طاري المزرعه
الجد عقاب: من زمان ما تجمعنا كلنا هناك
فيصل: اي والله وانت صادق زين تسوي
الجد عقاب: وعزمت ابو سلطان واهله
الجده مزنه: صدق!
الجد عقاب: ايه المزرعه كبيره وتشيلنا كلنا وزود
الجده مزنه: زين سويت من زمان ما شفت ام سلطان ، ملاك ورجلها عزمتهم
الجد عقاب: ايه تقول يمكن يجون
الجده مزنه: على خير، يلا حياكم عالفطور
الجد عقاب قام : يلا
قاموا واتجهوا يفطرون
نزل سامي : صباح الخير
الكل : صباح النور
الجده مزنه: ها بتفطر عندنا اليوم
سامي ابتسم: اي والله من زمان عنكم، حي الله فيصل
فيصل ابتسم من غير نفس : الله يحييك
الجد عقاب: اخلصوا وتولموا ، بنروح للمزرعه بعد صلاه العصر
سامي: المزرعه!
الجد عقاب: ايه المزرعه
سامي: لا مانيب جاي
الجد عقاب عقد حواجبه : وليه ان شاء الله
سامي: وين اجي انا وحريمي ! خلوني بالبيت ازين
الجد عقاب: لا لا ، محد يجلس بالبيت ، كلكم تجون
سامي : بس
الجد عقاب قاطعه بحده: كلمتي وحده ما اثنيها كلكم تجون يعني كلكم تجون، اخوي ثامر بيسير علينا وابيه يشوفكم كلكم مفهوم
الجده مزنه: رجع من مصر!
الجد عقاب: ايه قبل اسبوع رجع وكلمني وقلت له حياك المزرعه
سامي : ابشر ، يلا عن اذنكم
اتجه سامي يصعد وصادف ابراهيم عند الدرج ، نزل ابراهيم يبي يطلع ونادته الجده مزنه بصوت عالي: ابراهيم
ابراهيم وقف: سمي
الجده مزنه: تعال افطر
ابراهيم: نفسي مسدوده ما اشتهي
الجد عقاب: اسمع كلام جدتك وتعال
التفت ابراهيم واتجه يجلس معاهم
ابراهيم ابتسم لفيصل: اوه فيصل عندنا
فيصل ابتسم: ارحب ياهلا والله
ابراهيم: وينك مانشوفك
فيصل ضحك: اسال اخوك ، كارفني عدل
ابراهيم بصوت عالي: وتبوني اشتغل تحت رحمته بعد، الموت اهون
فيصل حاول يكتم ضحكته والجد عقاب دق الطاوله بايده بقوه
الجد عقاب: اقطع صوتك انت وياه، وانت
ابراهيم: سم
الجد عقاب: مسوي زعلان علي انت ووجهك اسبوع ماتجي تسلم علي وتطلع من الباب الخلفي عشان ما اشوفك وتشوفني ماتمشي علي فهمت، انا جدك المفروض انا الي ازعل مو انت فهمت، تحترمني غصبا عنك ولا والله يجيك كف ثاني فهمت
ابراهيم : ابشر
الجد عقاب: وجهز اغراضك
ابراهيم: بتطردني من البيت!
الجد عقاب: مسوي ظريف! اقول جهزهم وانت ساكت لاتنطرد صدق
قام الجد عقاب وهو معصب من ابراهيم وصعد غرفته
فيصل ضحك: تجيب لنفسك الكلام
ابراهيم: وانا وش دراني، يقول جهز اغراضك احسبه بيطردني
الجده مزنه: لا اله الا الله عليك كل وانت ساكت
ابراهيم: انا لاحظت شي
فيصل: وشو
ابراهيم: الحين هذي اسمها طاوله طعام
فيصل: صدق توني ادري
ابراهيم: انطم وخلني اكمل
فيصل ابتسم: طيب
الجده مزنه: يا ابراهيم اشغلتنا خلاص اعوذ بالله بالع رادو اكل وانت ساكت
ابراهيم: طيب خل اكمل
الجده مزنه تاففت : لاحول ولا قوة الا بالله زين زين كمل يلا
ابراهيم: اسمها طاوله طعام صح
فيصل: اي
ابراهيم: اجل ليه لما نجلس عليها نهذر واجد ، يعني المفروض ناكل واحنا ساكتين
الجده مزنه قامت : علم نفسك بالاول ، يلا اخلصوا عشان تلحقون عالصلاه
ابراهيم ابتسم وبينت غمازته: ابشري يا الحب
الجده مزنه ضحكت بخفه واتجهت تقرا قرآن
فيصل: انت ورا ما تسكت
ابراهيم: صدقني مادري ، عطني العسل
فيصل مد ايده لابراهيم
ابراهيم: يوووه ياشينك
فيصل ضحك ومد العسل لابراهيم
