صلااااا والسلااام على رسول الله ..
بالزغارت وصلى والسلام نبداو حكاية شيماء اللي شدات الباك بمعدل كيشرف ..فرحات امها وعائلتها وكلشي فرحان ليها وكاين اللي بكا بالفرحة ، من غير باها اللي عندو زايد ناقص.. تقرا ولا تجلس همو بوحدو ماهاماه لاقراية لا سعاية ..تشوفو تقول يخ تفو .. انسان عبوس مايضحك ما يخلي الناس يضحكو.. تقول وجهه عمرو تبسم ديما مكمش ..تكون ضاحك يطيح عليك الضيم فاش تشوفو وتحس براسك داير جريمة ولا واكل شي واحد فحقو ولا.درتي شي دنب ..تحس بالخوف والاحراج فنفس الوقت.
كلشي فالدار كيقفقف منو واكثرهم مرتو مسكينة..باز اللي صبرات ماتسطات ما طجات وولدات فوق هادشي خمسة دالبنات وثلاتة دالعزارة ..اللي شافهم يقول هنا نبات وهما حتى غير مازايدثن الطين بلة ..حتى واحد ماخدام وكيتسنا الخدمة تجرهم من رجليهم.. شيماء جات الوسطانية فخوتها وخواتاتها.. وديما داك الوسطاني كيكون منسي وحتى واحد مامسوق ليه ..ماعارفينو كيفاش عايش وشنو كيدير .. الوحيد اللي كايبان فالواجهة هوا مول الزبايل اللي ديما مفروش وضهرو مالح اللي وقعات يمسحوها فيه بحال الشيفونة ديال الفورنو . اودي عائلة مغربية مثل جل العائلات المتوسطة الطبقة او يمكن فقيرة حيت الوسطية ماعندو ما ناقصو ..اما هاد العائلة ديما خاصها وديما ناقصها.. الى شفتي من زاوية اخرى غتلقى جلول عندو الحق..حيت بوحدو هاز القفة على ثلاتة دالحتارف نهار ومطال شادين حيوط الحومة ..والبنات يالاه تزوجو منهم جوج وبقاو ثلاتة .. وبحال ديما كتلقى واحد الفرد من الاولاد مكيشبه لحتى واحد فعائلتو تقول ماشي ولدهم .. لا فالوجه لا واش الفعايل واخا راه كل واحد كيعوم بحرو فديك الدار وكل واحد عايش حياتو حسب شخصيتو والمحيط اللي داير بيه..
وسط حومة اكثر من شعبية فمدينة كازا بحي البرنوصي فراس الدرب فالقهوة الشعبية ديال القمارة اللي ريحة القهوة مضلمة والكارو اكثر من ريحة طموبيلات ..جالس على برا جلول العبوس.. شاد واحد الكارو بقا فيه غير سميتو وحالف ميطلقو حتى يقتلو بين صبعانو
لابس واحد الفيستة بالية ودير واحد البيرية بحال دوك المخرجين الزطايلية صحاب الشعاكك اللي مكمثلو الفن فحتى زفتة
جلس حداه الكوبي ديالو اللي ديما هوا وياه ملاسقين على الشكاوي وباكية ديال ماركيز
قاليه دحو مبروك النجاح اسمعت الزغارت من راس الدرب
خرج جلول داك الدخان بقرف وقاليه اودي. النجاح ... النجاح اش غنديرو بيه .. شدات الباك شدات ليا الصوارخ ..غا مغتزيد تجبدنا واحد ثلت سنين اخرى ولا يعلم الله شحال حتى تكرهنا فعيشتنا
قاليه دحو البنت بغات تقرا خليها تقرا ..
قاليه جلول تقرا الخرا .. غنزوجها منكدبش عليك ادحو غنزوجها مكاين قرايا ولا زمر
قاليه دحو وازوج اللي قبل منها عاد شوفها اصاحبي بانت ليك غا اللي باغا مسكينة تقرا
قاليه جلول وراه هنااا فين عواجت. راه هي بنت الحرام جايبة ليا لخطاب.. ديما جايين عندي كنقول بلاتي ولاكن منكدبش عليك اخاي دخو غنزوجها ..
قاليه دحو ولمن غتزوجها اودي
قاليه جلول جا طلبها واحد فميريكان قلت ليه صبر تشد داك النم ديال الباك ومنعطلكش.. امشي تصوفي راسها وتصوفينا تا حنا معاها وتعاونا على الزمان
رجع جلول للدار طالعة ليه حياتو فراسو ..تقول من نهار تزاد وهوا كاره الحياة مافي وجهه حتى ذرة امل الله يستر.
لقاهم ناشطين حاطين الحلوة وقال والله ماتبقا منكدة عليا بوحدي اجي نكدها على باباهم كاملين
نهض فيهم بالجيران ببناتو ومرتو تاهي قاليهم
واش مابقا حتى واحد يرتاح فدارو ..اش هاد الحلقة دايرين ليا هنا تكعدو خرجو عليا
قالت ليه واحد الجارة مصدومة
نعل الشيطان السي جلول البنت جابت تمنطاش تبارك الله فرحانين ليها
دار عندها بقا كيشوف فيها وقاليها جابت تمنطاش مليون. تمنطاش مريار ؟؟ تكعدي عليها سيري عد راجلك عطيني شبر تاع تيساع قالك طااامنطعااش ..الله يغبر لباباكم الشقف ختشفوو
تشتت كلشي شي زاد مع الباب شي هرب للكوزينة بالحلوة قسموها تما وكل واحد خدا حقو كلاه حسي مسي بلا دراما ولا بكا ولا مسلسلات حزينة. حيت اصلا مولفين النعمة تولي نقمة وتوحل ليهم فالقرجوطة من الصغر داكشي علاش دارو ليها سكة منين دوز ومولاها ربي
أنت تقرأ
شرف للبيع
Teen Fictionسلام عليكم الوريدات صفا بخير جيتكم بقصة جديدة و واعرة كتهضر على ظاهرة لي نتااشرات و لي هي الفسادة بطريقة طريفة و الواقع دياز بزاف البنات لي فرضات عليهم الحياة ايخرجو من ضارهم ❤️ هي العذراء لي تباعت من اجل الفلوس 😌💸 وهو الامبراطور لي تلاقاها و...
