خرجو قدام يسرى وهي تخرج عينيها فيهم قالت ليهم فين غاديين!!!
قالت ليها شيماء غادين غير واحد لانيف ديال واحد دري وصافي راجعين
بقات كتشوف فيهم بنص قالت ليهم امم ..
سكتات بدات غير كتشوف شيماء كدور عينيها وتقاد شعرها قدام مرايا حدا باب الدار قالت ليها ماشي انا اللي معروضة فطوم اللي كتعرفو انا غير داياني معاها
مجاوباتهمش يسرى وبقات غير كتشوف فيهم حتى خرجو وجبدات تيليفون كدوز نماري وحدة مور وحدة حتى تشد ليها واحد ل٠٠٠ق٠واد وقالت ليه
خويا عادل ..معاك يسرى ..مالك اخويا مابقيتيش كتعيط ليا مالي شنو درت ليك..انا خويا غا الدار تا واحد مابقا كيعيط مافهمت والو ..واش شي واحد محرشهم عليا ولا شنو...نمشييي اخويا نمشييي علاّوي ولا٠٠٠٠٠ ولا شقق اللي كان ..دابااا اخويا دابا نص ساعة ودوز عليا انا غنوض نوجد راسي
قطعات وناضت بالزربة قلبات ديك الشيشة خلات الجمر مشتت وكلشي مقلوب باش توجد فالوقت ومايخليهاش الشيفور..مشات لمكياج شيماء جلسات تقاد وتماكي وتوجد في حين وقفات سيارة فطوم البيكانطو فسوفيتيل ونزلو بجوج كيقادو الكساوي من جهة الصدر
شيماء:قاليك هنا
فطوم اه يالاه ندخلو غيكونو لداخل
دخلو من جهة البواط ونزلو مع الدروج بشوية ..وقفات شيماء قالت ليها قيسي قلبي غيسكت
ضارت عندها فطوم قالت ليها ماتبيينيش ليه صافي ضربيها فسطاش
كملو الهبطة مع صخب الموسيقى والضلام والاضواء كتلعب دخلو لقاو الدنيا عامرة كتنغل
شي كيشطح البرمان كيخلط الكيسان والمشروبات وشي كان مجمع فالركاني..تسلطات عليهم الاضواء بانو عاطيين مع اللحم كيبري والبرونزاج والشعر كحل طويل ..كاين اللي قلعهم من الدخلة بداك الشعر الكحل وكاين اللي معارف كاع واش كاين داك الوسط اصلا.
بقات فطوم كتقلب بعينيها حتى شافتو جالس فطائرة كنبية كبيرة والطبلة الوسط وكتار بيهم بنات وولاد ..شار ليها بيدو وضحكات ليه مشات جارة شيماء بيدها حتى لعندهم وتعانقو كيتسالمو وهوا فرحان بيهم ..سلم على فطوم وتبع ليها شيماء قاليهم نهار كبير هادا ..
فطوم:ترحب بيك الجنة
بداو يسلمو على اللي معاهم من الشباب كانو باينين غير ولاد فلان وفلان هادا شاد سيكار هادا شاد كاس..غير السوايع الغالية والقميجات الماركات والزين مشتت ..هادا طويل هادا قصير هادا سمر هادا ابيض.والبنات معاهم مكاين غير لونكلي والفرونسي وحتى وحدة مامطولة شعرها ..هادي كوب كاغسون شعرها كحل هادي زعرة شعرها كاري هادي شعرها قهوي قصير ..حتى وحدة فيهم ما لابسة بديك الاناقة ديال فطوم وشيماء والاكثرية فطوم وشيماء ماشي ليهم تفحبين فالدم لافالجلسة لا فااهضرة بلا ميشعرو كيلقاو راسهم كيديرو تصرفات كتجدي الانضار تماما كتصرفات هيفاء وهبي وطريقتها فالهضرة عكس الاخريات اللي خفيفات والجلسة عادية
عرفهم انس على البنات وبدا يعد ليهم فاسامي الدرادي غير بالكنيات المرموقة وداز للبنات اللي ماعطاوش وجه لفطوم وشيماء وحسو بيهم بداو كيتغامزو مع بعضياتهم ويضحكو
شيماء: ديري راسك زي الاطرش في الزفة
رشقاتها وبداو كيضحكو وجلسو بين الكليكة حدا انس ..دورات شيماء عينيها قالت ليها صاحبونا ماكاينش
فطوم: غيكون كيفتح لشي واحد فهاد الوقيتة
بدات فطوم كضحك وتلفتات حطات يدها على رجلو قالت ليه فين صاحبك
قاليها عندو شي حاجة دابا يجي
فطوم: خدام ؟
انس:عندو واحد لوبيغاسيون ايغجون
ضارت عند شيماء قالت ليها ايوا هانتي الناس مامسياليينش ..قالك عندو داكشي ايغجون
قرصاتها شيماء قالت ليها ها العار بعدي من الفرونسي هتكتيها خليك فالدارجة الله يرحم باك
طلات على انس وحدة من البنات وهوا لايح يدو ورا فطوم كيهضر هوا وياها ويشوف فيها باعجاب على شوية يبوسها. قالت ليه بفرونسي يازيد مغيجيش؟
ضرب قلب شيماء وشافت فيها بقات كتشوف كي دايرة ورد عليها انس قاليها نعيط ليه نشوف فين شادها
جبد تيليفون يالاه كان غيعيط شاف واحد من صحابو جالس حدا شيماء ولاح يدو وراها بغا يدخلها لاكن انس كتب ليه مسج رسلو ليه وحل الصديق تيليفون وشيماء جالسة حداه كتهضر معاه قرات داك المسج وقلبات وجهها جهة فطوم قالت ليها بخفوت
انس كتب مسج لهادا لي حدايا قاليه ماتحاولش صاحبت يازيد
ضارت عندها فطوم قالت ليه نااري كتفكري فاش كنفكر
ضحكات شيماء قالت ليها شيطانة هه..نديرها ؟
فطوم:ضبري راسك
شيماء:قلبي غيسكت فاش سمعت يازيد غيجي..خاصني نتقل راسي شوية..عندك شي طرف ..هوا اللي غيتقلني
كحزات ليها فطوم الصاك قالت ليها راه مفتوخ هزي صاكي ديه طواليط كميه تما
تبسمات شيماء وهزات البكية دالكارو من صاكها بتخبية وناضت قاليها انس فين غادية
قالت ليه فطوم غير طواليط ومشات شيماء كتمايل دخلات طواليط وسدات عليها جبدات واحد الجوان وجلسات فوق الرخامة دايرة رجل على رجل كتكمي وطفي فاافابو
خرجات من طواليط كتمضغ المسكة تقول فيها نعاس..عينيها معسلين والابتسامة والهدنة والراحة ..غادية جهة لكليكة حتى بان ليها يازيد جالس فالطرف فوق الكنبي لابس قميجة بيضاء محلولة على الصدر ودجين والساعة فاليد والشعر مقاد والحفرة دالزين فالحكنك والدقن محدد واللحية كيشعل بالزين فتيلة.شاد تيليفون فيدو وحداه البنت اللي سولات عليه جالسة على يد الفطوي ومتكي على ضهرو معنقاه كتشوف معاه فتيليفون وكتهضر وضحك وكيجاوبها.
بلعات شيماء ريقها وضارت عطاتهم بالضهر كتسوط على راسها وقلبها كيزدح كتستاعد باش تقابلو .
سدات عينيها وبقات هاكاك شوية حتى قاليها واحد بالفرونسي واش جاتك الدوخة !
حلات عينيها تبسمات قالت ليه لالا شكرا
تنهدات وهزات يدها طلقات اصابعها كتشوف فدافرها وتستجمع انوثها من خلال ديك الحركة وهزات راسها بديك التبسيمة معسلة مشات نيشان دار ليها الدري اللي كان حداها بلاصة حدا فطوم جلسات وتخشات بيناتهم عطات بالضهر للجهة ديال يازيد وتكات جنب كتهضر مع فطوم وانس دايرة رجل على رجل وشدات الكاس فيدها
شافت فيها فطوم قالت ليها مزال مشافك
شيماء :حضي معاه بلا متعيقي
فطوم: هاهوا هز راسو على تيليفون ..اححححح شافك اشيماء ناررييييي كي دار ..بغييييتك تشوفي عينيه ..
شيماء بابتسام : شنو كيدير دابا ؟ باقي كيهضر مع ديك ختنا .
فطوم : لا كيشوف جيهتك ..
شيماء:فيا الريحة؟
فطوم: لا مافيكش فيك ريحة زوينة
شيماء:كميت جوج جوانات كنحس براسي تقيل وعضامي اكثر
فطوم:انا الحشيش كيهرب ليا لعقل نتي لعكس ديالي.يازيد كيشوف فيك
تقادات شيماء فالجلسة وجمعات شعرها للجنب بقا غير ضهرها وخصرها المنحوت جهتو وقالت ليها
خليه ..هاحنا نشوفو شكون غيتهد انا ولا هوا
فطوم: واضوري عندو
شيماء والله منضور مبغيتش عيني تجي فعينيه غتجيني الضحكة..بدا الشراب كيلعب عليا خصني نتقل
تلفت انس جيهتهم قاليهم فاش كتهضرو
قالت ليه فطوم والو غير كنتجمعو
قاليها خاصنا نديرو شي تسافيرة
قالت ليه فطوم علاش لا
بقات شيماء متكية حلفات مادور وحتى هوا ماتحركش من بلاصتو لاكن مرة مرة كيشوف جيهتها
قربات فطوم من انس قالت ليه شكون ديك البنت اللي مع يازيد
قاليها الاكس ديالو
هزات فطوم راسها قالت ليه ااااه
ضارت عند شيماء قالت ليها عتقي..ديك ختنا الاكس ديالو ومزال مساخية بيه غير كتلسق
حكات شيماء ودنها والابتسامة مدهونة بالعسل فلعينين قالت ليها عنقي عواج وجاني النعاس ..حضي معايا راه السكرة كتخرجني كدير ليا النعاس
فطوم: شربي الماء خففي الدم شوية وماتشربيش دقة وحدة ..
شافت شيماء فوحدة ناضت كتشطح من بين الحضور وتهضر ودارت يدها على فمها قالت ليها ويلي ويلي ويلي عتقي هاديك ويلي على شوهة ..ناري حشمت بلاصتها الحمد لله انا كنسكر كنزيان كنولي ضريفة اما كن راني دابة واقفة فوق الطبلة كنوريهم تر٠م٠٠تي
فطوم : احم يازيد ناض وقف ..بلاتي كيسلم على شي واحد
شيماء: خونا اللي حدايا شكايدير
فطوم:ناض حتى هوا كيشطح مع شي واحد..الرضااا!!
شيماء:شكون جلس حدايا؟
فطوم: ههه يازيد توسع حداك
رجعات شيماء حمرا قالت ليها شتو كحز عندي ..ناري قلبي غيسكت..قيسي والله تاتقيسي
قاست ليها قطوم قلبها وقالت ليها كضحك اويييلي مالكي غتموتي
شيماء: ماعرفت مالي ماقدراش نتحرك
فطوم: جلسات حداه الاكس دنم داكشي علاش كحز عندك دار ليها بلاصة
شيماء: بغيت غير ندور نجلس كي الناس تفوو ..عواج ليا ضهري
تنهدات وهزات ضهرها على الكنبة لاحت شعرها اللور ولاح يزيد يدو ورا ضهرها تكا وتكات عليها لاحت عليه الشعر لاكن مايلة جهة فطوم وعينيها كيلمعو عاضة على شنايفها
شيماء: لاح يدو ورايا عتقيني! مافهمتش اش بغا يدير
فطوم غير مركنة جالسة كدوح برجلها وضحك بين انس وشيماء قالت ليها والله مينوض ليك دابا تما هههه
شيماء: غندور غنطير عليه بشي بوسة قدام القوم ونعري على اللاص عييت نصبر ماكرهتش نعنقو.توحشتو
خرجات فطوم عينيها قالت ليها زيري اشمن عنداك
شيماء: غير كنهضر ..واخا نموت مانديرهاش..شنو كيدير. دابا
فطوم:كتهضر معاك ديك الخوينزة كتوريه شي حاجة فتيليفون
أنت تقرأ
شرف للبيع
أدب المراهقينسلام عليكم الوريدات صفا بخير جيتكم بقصة جديدة و واعرة كتهضر على ظاهرة لي نتااشرات و لي هي الفسادة بطريقة طريفة و الواقع دياز بزاف البنات لي فرضات عليهم الحياة ايخرجو من ضارهم ❤️ هي العذراء لي تباعت من اجل الفلوس 😌💸 وهو الامبراطور لي تلاقاها و...
