شرف للبيع

chapitre 16🫠

شافها عرفها شكون وغير نضره قدامو كيرمش سها لولهة كأنه تذكر شي حاجة ورجع شاف فيها طلعها وهبطها من راسها حتى رجليها حتى حركات ليه فاتن يدو كضحك وناضت عنقاتو هازة تيليفون كتصور ولاح يدو ورا خصرها ..ميلات شيماء فديك اللحضة غير عينيها فهدوء وصمت كتشوف جيهتهم وهما واقفين كيضحو ويهضرو ..حيد لافيست حطها وعطا لشيماء بضهرو كأنها مكيناش..تنهدات بتنخصيصة كتكمد الحرقة بلا بنج وشافت قدامها وعينيها مغرغرين ويدها حدا وجها حاطة صبعها حدا عينها فين ما تبغي تهبط شي دمعة كتلقا ليها تحيدها .. فجأة تلقات موسيقى هادئة فالارجاء وصوت المغني فالميكرو كيردد
هاابي بيييرداي ثووووويووو...هابي بيييييورداي ثووووويوووو...
كلشي تلفت بابتسامة للصوت ومنهم شيماء متفاجئين وشي كيشوف شي والنادل هاز حلوة حمرا كلها لونها ماط جايبها جيهتهم جيهة الطبلة كيضحك حتى كمل المغني كلمته الاخيرة وقال
هااابي بيرداااي ثوووويو شيييمااااء ...
دارت شيماء يديها على فمها مصدومة والحلوة تحطات قدامها وتلفتات شافت فطوم نايضة واقفة هازة تيليفون كتصورها وضحك وكلشي كيشوف فيهم وطلقو ليهم موسيقى وبداو البنات والدراري كيسفقو عليها وهي مقادراش تصدق ومكانتش حتى فأحلامها ديك المفاجأة .كانت على سبة دمعو عينيها وحيدات المونطو عليها بكثرة المشاعر المختلطة صهدات وناضت وقفات فتحات يدييها لفطوم وعنقاتها بقوة بدات كتبكي وتنخصص وكلشي كيشوف فيها وتسفيقات .. تلفات مافهمات والو بدات كترعد ماعرفات ضحك ولا تبكي ..كان حتى انس متفاجأ قال لفطوم قولي نتي هاكا عليها بعدتو وجيتو لهنا بوحدكم ..
كحز كيضحك عند شيماء فتح يديه عنقها وحتى هي عنقاتو وكتمسح عينيها قاليها جوايوزاني فيغيس واخا ماقالتهاش ليا فاتي نجيب ليك كادو
ضحكات كترد شعرها بتوثر اللور قالت ليه ماعليش وعنقها الولد لاخر اللي حداه عنقاتو بارك ليها واللي جا عندها كتعنقو وضحك الا البنات حتى وحدة ماقربات ليها وزيد عليهم يازيد كان جالس بعيد كيشوف فيها وفديك المفاجأة اللي دارت ليها فطوم الغير متوقعة
رجعات جلسات قدام الحلوة كتشوف فيها وفالشمع شاعل وكضحك وفطوم كتسفق بيديها واقفة وتقوليها امنية ..امنية.امنية. يالاااه
سدات عينيها ولاقات يديها مع بعض كتجمع النفس وقالت وتمنات فنفسها قالت
ياربي. خليني ديما لفوق لفوق وخلي راسي عالي غلبني على اعدائي وعطيني قوة اكثر من لي كنتمنى .
حلات عينيها طفات الشمع وبداو كيسفقو ليها البعض وهز النادل الموس كيقطعها اجزاء ويحط لهم فوق الطبلة وشيماء كضحك .دارت رجل على وجل لاحت يدها ورا ضهر فطوم باستها فخدها وكل مرة تلوح شعرها للور بكتفها وراسها وقالت ليها كضحك
فااجئتيني عليها خرجتيني بزز مني. . فخبارك انا نسييييت واش ليوم لانيف ديالي عرفتي صدمتيني
مسحات فطوم على ضهرها قالت ليها بصحتك احبيبة قلبك ابيض وتستاهلي اكثر
جبدات فطوم هدية من صاكها صغيرة قالت ليها بصحتك حبي عقبة لمية سنة ان شاء الله
دارت شيماء يديها على فمها كضحك فاش شافت الكادو وشداتو حلاتو ، اما انس جاتو الغيرة ناض جلس بيناتهم ولاح يديه اللور وراهم بجوج قاليها ااااممم... غرت انا غرت
ضار عند شيماء قاليها سعداتك بصاحبتك الله يهديها عليا تبقا تجاوبني غير فتيليفون ماطالب والو
هزات راسها كضحك ومع الهزا جات عينها فيازيد هز المعلقة من الطبلة خدا طرف ديال الحلوى من واحد الطبسيل ودار ليها بيدو سونطي وكلاه
سبللات عينيها ودورات وجهها جهة انس وفطوم هزات طبسيل صغير ديال الحلوى فيدها كتاكل منو وعطات لفطوم وكلاتها وقاليها انس دوزتي دابا النعمة من حدا فمي ماحرامش عليك
هزات ليه طريف بالمعلقة دارتو ليه ففمو وقالت ليه هانتا لايبقا فيك الحال
قالت ليها فطوم كن سبقتيه هوا الاول لا تخرج فولدو توحيمة..ناري على مغيااار
ضحكات شيماء حتى شبعات على انس وفطوم
فطوم:ونوضي من وسطنا خليني ندوي مع صاحبتي
قاليها وادوي مالكي هانا كنسمع
فطوم:لاء مابغيتكش تسمع
قاليها لا باغي نسمع ..باغا تخططي لشي قطعة شي سيمانة
شاف فشيماء قاليها قولي ليا الصراحة ختي شيماء
علاش كتقطع تيليفون بالسيمانات وكطفيه ...ورجعات ديما طافياه
قالت ليه راه كتنسا متشارجيه
قاليها اممم نتوما الصحابات ...بيناااتكم شي حاجة
دفعاتو فطوم قالت ليه نوض نوض اش بينااتنا ..بيناااانكم شي حاجة اش بغا كاع يكون
ناضت جلسات عليه مالي مابغاش ينوض ليها وبقات كدفعو بمؤخرتها حتى كحزاتو وجلسات حدا شيماء ..حطات الاخيرة يدها على فمها قالت ليها شكون هاديك اللي مع يازيد
فطوم : هاديك هي فاتن ..فاتن لقلاق...ماديهاش فيهم خليييييهم ..حنا خرجنا نشطو نفرحو يعاودوها لمت مهم
شيماء:كيضرني قلبي اصاحبتي راه ربي واقف معايا وصافي
هزات فطوم حاجبها قالت ليها علاش يضرك قلبك مالها حسن منك !! ماعليها لا سر لا ملحة
تنهدات شيماء قالت ليها زويينة اصاحبتي باينة باها شي برجوازي تا هي
فطوم : بنت برجوازي وغاي يقلبها تاهي مالها غتفلت منها. كوراه تقبتها قد هاد طبسيل بتقلاب
ضحكات شيماء ويدها على فمها قالت ليها بقوة ما تألمت كنحس بقلبي فشل..مكنبغيش كاع نشوف جهتو
فطوم:صافي ميكي ..ماديهاش فيه خليه ...نجيب ليك مرايا واش نجيب ليك مرايا!!! ماعرفنا شكون بنت البرجوازي نتي ولا هي!!!! شوفي غير راسك اصاحبتي عرفتي كي كتباني راه واخا يبدلك بما احسن اللي عندو عندو ابااار الزين نتي فيك شي حاجة زوينة كتجدب اصاحبتي ومييلحة عليها ومسرارة ..هي كطير شوفي كي خفيفة !! هاهي لهيه غير كدور بيه ..نتي ماكنتيش هاكا بلعكس كنتي مرزنة هي ريحتها كاورية نتي ريحتك عربية.. الشعور والفورمة والضحيكة والانوثة والجليسة ..حيدي عليا تبقاي تقارني راسك بيها
تنهدات شيماء قالت ليها انا بقا فيا غير ديك كنبغيك اللي قلت ليه ..وزاد كيأكد عليا كل شوية يقولي كتبغيني ماكتبغيني وانا بحال الحمارة كنعنق فيه ونقوليه كنبغيك ..كنتفكرها كنمرض
فطوم:اففففف وها انا كنضل على انس بالحب حتى ناض فيه الحبوب..لهضرة مكتشري خضرة اصاحبتي صافي وقت وداز
شيماء:شكون اللي كبير انا ولا هي؟؟
شافت فيها فطوم قالت ليها هي غير نتي فورمة كتباني قدها ..هي راها عندها ستة وعشرين ومع ذلك كتباني نتي بعقلك عليها شوفي شوفي يالاه ..قولي لها تجلس
دابا
شيماء: تانتي ..راه داكشي اللي كيبغيو البنت تكون كطير من المقلة
هزات فطوم حاجبها قالت ليها تكون كطير كتر منا!!! طير تا تعيا ماتفوتناش فالطيران غير حنا طيرانا زايد نغزات عليها ..نوضي نوضي نوضي نشطحو ليوم عيد ميلادك ماتخلي. تا حاجة تفقصك
نوضاتها فطوم بزز منها كيضحكو قالت ليها نشطي عيد ميلادك هادا الى كان شي واحد خصو يحشم يحشمو هما اما حنا خارجين ناشطين وعندنا حفلتنا
بدات شيماء كضحك وجمعات شعرها اللور وبلا متحس لقات راسها كتمايل بأنوثة مع موسيقى فرنسية هادئة رمنسية وفطوم حتى هي كذلك ..جراتها من يدها لقدام كيضحكو وانس بيناتهم عاجبو الحال شد كل وحدة من جيه والبنات اللي معاه جالسين كيشوفو ..قالت وحدة لوحدة واش فاتي مخايفاش تاخدو ليها صاحبتها
قالت ليها لاخرى اختي مكيتفهموش ليا هادو !! عرفتي لخرى شكون
قالت ليها شكون ؟ عمري شفتها
قالت ليها هاديك راه لاكس ديال يازيد..
قالت ليها لاخرى بصح!!
ردت الاخرى قالت ليها ماطولش معاها دغيا قاليها بسلامة
ردت لاخرى:اصلا يازيد طايح ففاتن يدور تا يعيا ويرجع ليها
نغزاتها لاخرى قالت ليها قوليها لفاتن نشوفو شنو غدير
عضات لاخرى شفايفها قالت ليها نااري مغيارة يازيد مغعجبوش الحال الى قلناها ليها
كحزااتها الاخرى قالت ليها حيدي انا نقولها ليها ..اصلا غتعرف غتعرف
كانت فاتن جالسة شادة كارو فيدها و يازيد على رجل الكنبي شاد تيليفون فيديه بيناتهم بنت اخرى .دخلاتها بالهضرة والضحك حتى قالت ليها
عرفتي شكون هاديك
فاتن. نو شكون ؟
البنت: هاديك الاكس ديال يازيد ..عرفتك مافخبارك والو بغيت نقولها ليك
شافت فيها فاتن طلعاتها من رجليها لراسها وقالت ليها ن ميمكنش ماشي دوقو داك الشعر طويل وكحل بحال العود
البنت: غير تيقي احبيبة راه خرجات معانا واحد المرة وكان حتى هوا ..
رجعات فاتن اللور قالت ليها عادي كن بغاها كن بقا معاها ميرجعش ليا
دورات وجهها شافت فيازيد وبقات حاضياه وهوا كيكتب فتيليفون ورجعات ميكات كتهضر مع البنات ..حتى شافتو ناض وقف وقالت ليه بابتسامة شادة ليه فصبعو
فين غادي ؟
قاليها غنمشي نجيب الباور بانك من طموبيل غير خليك
بقات متبعة ليه العين وهوا كيدور بين رجلين صحابو اللي جالسين ..لقا شيماء واقفة قدامو كتسفق بيديها وضحك وفاتن حاضياه فاش وصل حتى لعندها بغا يدوز وقرب منها حتى قاس نيفو شعرها ومرر يدو على خصرها كحزها بشوية بلا متحس وداز مشا .
ماحسات شيماء بوالو فاش داز حداها وحتى فاش رجع كانت موسيقى سريعة كان كلشي واقف كيتسنا السنة الجديدة تدخل .حط تيليفون فوق الطبل وبقا واقف شاد كاس فيدو وفاتن جالسة مناضتش وكتسناه يجي عندها يقولها نوضي مالكي جالسة..طاح عليها الضيم بقات حاضياه وحاضية حركاتو و وكتشوف فشيماء معانقة هي وفطوم عاطياه بالضهر حيت اصلا ماشافتوش واقف وراها ويدو فجيبو ..
بدا العد العكسي ديال السنة الجديدة وكلشي كيتسنى فجو حافل ..دخلات السنة الجديدة والكل كيسفق وتزاحمو حدا الطبلة ..رجعات اللور مالقات فين تزيد تعكلات وحسات بيد تحطات على كرشها من اللور وهمس فودنها قاليها بفرونسي بشوية عليك احبيبة
باسها فودنها حتى طلعات معاها السخفة وبعدات عليه مضارتش وراها مشات نيشان هزات المونطو ديالها وفطوم تابعاها ..اما فاتن داز قدام عينيها كلشي وناضت هازة صاكها دازت من حداه غضبانة وحتى شيماء هزات صاكها بغيض خرجات من وسطهم تخشات فالمونطو ديالها ومشات كترعد وفطوم كتسولها شنو وقع ..
قالت ليها شيماء:حلي الباب وصليني ..حلي غنطيح ليك هنا بشي كريز
حلات فطوم الباب طلعو وانفاجرات شيماء بالبكا كتحلف وتعطي لقلبها الى عاودات خرجات ولا تجمعات معاهم وعطات وعد لراسها عمر الطريق تشركها معاهم وبدات كتشكي عاد فهمات فطوم شنو كاين وبدات كتسبو وتعايرو ماخلات فيه غير اللي نسات وقالت ليها عرفتي شنو ..بناقص من ديلمهم كاملين ..تا انا غنقلب على جدو داك انس ماعندي مندير بيه صافي الله يعاون الله يعاون ..مرض كي داير