كانت ليلة طويلة صبحات على بداية قصة جديدة ..قصة حب فعيون كل واحد منهم
نزلو لابسين حوايجهم والنور على وجههم كيضحكو وشادين اليدين وطلعو فالسيارة وحط ليها شنطها فالكوفر طلقات موسيقى من كثرة الفرحة بدات كتشطح عليها وتلعب فشعرها وهوا سايق بيها كيضحك ويشوف فيها وختماتها بتعنيقة كضحك حتى تسدو عينيها
عنقها بواحد اليد قاليها
ماعندك ماديري دابا هنا فكازا غتمشي تعيشي معايا فالرباط
شيماء: الا ديك الفيلا اللي فهرهرورة مانعيش فيها
مسح على راسها كيضحك قاليها لاالا هاديك ماشي ديالي دالي لافامي وكنت عايش فيها ..دابا راه عندي دارييي وعندي حياتي بوحدي واستقلييت..باقا عاقلة على يازيد ديال شحال هادي المستهتر
ضحكات بخجل قالت ليه لااا ماقلتش ليك مستهتر .
باسها فخدها ومشا شد الطريق للرباط مباشرة لحي الفيلات ووقف قدام فيلا باقا جديدة بأحدث تصميم بني ورمادي وزاج وحديقة كبيرة
وقفات شافت فيها قالت ليه هي هاديك دارك؟!!
شد ليها فيدها قاليها دارنا هادي
ردت :دارك زوينة
رد:دارنا زوينة
عنقها وباسها وهبط الشنطة من طموبيل اللي حط فالشرع حدا الباب وعطاها للعساس وشد فيدها بغا يدخل لاكن فجاة وقفاتهم بنت بصوتها وقالت
يازيييد
تلفتو بجوج وراهم كانت بنت طويلة لابسة سروال دجينز وسبرديلة وتيشورط مايلة على الكتف وشعرها قصير كاري بلونجو قالت ليه
بغيت نهضر معاك
بقا كيشوف فيها ومسح على دراع شيماء قاليها دخلي هانا جاي
دورات شيماء عينيها غادية وكتشوف فديك البنت ولخرى حتى هي كتشوف فيها وطلع وتهبط فشكلها وهي لابسة شورط كلاسيكي قصير من التوب قهوي والبودي البرتقالي وصندالتها ارميز وصاكها .
دخلات لاكن ما فاتتش الباب وبقات واقفة كطل وتسمع شنو كيقول
البنت: يازيد خاصنا نهضرو
رد: اش غنهضرو؟؟ علاش جيتي لهنا؟
ردت:جيت نهضر معاك ..خاصنا نجلسو ونهضرو
ربع يديه قاليها مكاين فاش نهضرو صافي سالينا
ردت: غادي نهضرووو ايازيد..غنهضرو على علاقتنا …انا جالسة كنتسناك تعيط ليا ونتا مشيتي تصاحبتي ولا منعرف اشنو درتي..
جرها من دراعها بقوة قاليها حتى تقداو ليك عاد جايا تهضري معايا وتبكي عليا.. ماعندي ماندير بحمقة بحالك سمعتي.. وصلات بيك الدرجة تقتليني انا ووحدة اصلا مكتعرفكش وبعيدة عليك
ردت: نتا خليتني ندير هادشي..نتا صدمتيني واش كتسمع ..صدمتيني انا مقادراش نتيق..مستحيل . . شنو درت ليك ياك كنا مزيانين وعادي كيفاش تقلبتي
طلق من دراعها وقال
مامرتاحش واش مكتفهميش..مادرتي ليا وااالو انا اللي فيا المشكل فهمتي دابا..سيري نسايني بداي خياة جديدة عطا الله الرجال..حسن ما نسيفط ليك لي يدخل فيك بشي كار ..مرييضة نتي ولا مالك !!
ردت بغضب كتبكي: نتا اللي مرضتيني..نتا اللي غتحمقني..من الاول ماتهضرش معايا ماتجيش عندي وماتخطبنيش اصلا
رد: واش كنت عارفك مزنزنة وغادي تفكري تقتلي كاع!! اصلا كن كنت عارفك هاكا عمرني كنت ندور بيك ..تخطبنا وسالينا شنو بغيتي خر؟ صافي سيري كملي حياتك ونساااااي ونسااااايني خرجي ليا من حياتي شحفتينا كاااع
ردت: شنو كاع اللي فيها مافياش انا؟؟ علاش بدلتيني بهادي؟؟ دارت ليك السحور؟!! انا متأكدة دارت ليك شي حاجة
رد: دابا نتي بهاد العقلية وهاد النيفو كتآمني بشي تخربيق!! بقات فطبيبة وبنت التازي ياحسرة شوفي كي كتفكري !!
ردت بهسترية : ماماك عندها الحق.. عندها الحق ماشي بخاطرك كدير هادشي..مستحيل شي واحد بحالك ينوض يسمح فواليديه وعائلته ويبغي يتزوج
هز يدو مسح على لحيتو بغضب وشافت الخاتم فصبعو وتصدمات بقات كتشوف فيه وقالت
تزوجتي؟؟!! تزوجتي ايازيد ؟!!
تلفت وراه ورجعات شيماء اللور تخبات وطلعات للدار دخلات وبقات واقفة كاتسناه حتى دخل وقالت
شكون هادي ؟ علاش بغات تهضر معاك
رد: هادي هي اللي كنت خاطب وفرتكناها ..
ردت: وعلاش كيقولو عليا ساحرة ليك!!!
رد: وهادا هوا بنادم نقوليه انا علاش ؟!! صافي يقولو اللي بغاو ..خلينا من لبشار
عنقها كيضحك قاليها اجي نوريك وداها
طلعات تشوف بيت النعاس ديالهم وتبسمات من شدة اعجابها لاكن تفكرات الحوار ديالو هوا وديك البنت وقالت
سمعتك كتقول لديك البنت اكسيدون ما اكسيدون؟ واش هي اللي بغات تقتلنا لبارح
شد فوجهها كيتنهد قاليها هاديك حمقة ..وقريب غادي تمشي تعالج ماتديهاش فيها.. نساااي كولشي راني قلت ليك نسااي صافي تزوجنا وسالينا
شيماء: و باباك وماماك وو
تنهد بنفاد الصبر وقال
ونسااايهم ..صافي تزوجنا دابا مع الوقت يتعودو ..نتي دابا وجدي ليا راسك تستاقري فالمغرب فمرة حيت عندي ليك واحد البلان ناضي ومابقاش الوقت بزاف
استغربات:اشمن بلان!!
رد: حتى تستقري هنا وتعرفيه ..السيمانة الجاية غنمشيو بجوج لامارات تاخدي الاوراق ديالك وكلشي ديالك وترجعي وديك الساعة غنبداو بديك صحيحة ..حسن من كثرة الهضرة بلا فايدة
ردت بالايجاب وتبسمات وقالت
فاتي غدا عندها الختانة
رد: عارف المهم غندوزو هاد الختانة ديالهم ونتحركو عندنا بزاف مايدار
عنقاتو ورتاحت على صدرو وسدات عينيها
حلاتهم على الاهازيج والفرح وفاتي فالعماريك..كما بغات الختانة تمشي مشات..القاعة عامرة غطرطق والمغنيين فالخشبة كينقزو ..القاعة كلها كحلة كبيرة والسقف معري بالقياطن فالباج والاضواء والتريات والورد فكل جهة.. الدنيا مقلوبة واللي قال الشعبي غير عند ولاد الشعب يطل على ليبوغجوا اش. كيديرو فالشعبي.
القعدة ماخواتش تنزل وحدة يطلعو جوج ..زادهم القعدات وطلعات ليك فاتي فوق الكعدة بالتاج والتكشيطة كتقطر بالعقيق ..طلعات حداها شيماء بتكشيطة حمرا والمشطة كبيرة فالشعر وليزاكسيوار وبداو يشتفو ويضحكو ..
بصراخ باش اسمعها فاتي قالت ليها
واا شفت عائلة راجل ومعارفو جاااو كي طرااا وجراااا
فات: واااا راه عرض لييييهم هوااااا بزز منهم يجيو ولا يغضب عليييهم هههه هااو شتف على بوهم هاااه شتف على بوووهم هاااه شتف على بوووهم هااه
بقاو هاك بالاك هاك بالاك وانس بالبذلة هاز ولدو الصغير كيشطح بيه والكبير عليه فرق الكعدة منع شحال من مرة من رجلين فاتي اللي كل مرة تجرو للجنب وتقول
واحييد..حيييد غنشطح
شيماء: خلي الدري يشطح
فاتي: غيطيح الزمر يمشي يجلس حدا حناه
أنت تقرأ
شرف للبيع
Novela Juvenilسلام عليكم الوريدات صفا بخير جيتكم بقصة جديدة و واعرة كتهضر على ظاهرة لي نتااشرات و لي هي الفسادة بطريقة طريفة و الواقع دياز بزاف البنات لي فرضات عليهم الحياة ايخرجو من ضارهم ❤️ هي العذراء لي تباعت من اجل الفلوس 😌💸 وهو الامبراطور لي تلاقاها و...
