ضارت الايام وضارت الاعوام ..داز عام وتبدل الحال من الموحال..كلها واش دار ليه الله.. وكل ها وحقو ونصيبو من الدنيا..اصعب حاجة يدوقها الانسان هوا الزنقة ..الزنقة تعلمك بالعصى اما الفم اللي يشرحلك ويفهمك ماعندهاش..من طيحة تتعلم اللي عمرك تنساه.. الزنقة صعيبة على الرجال حسبلاك البنات ..ولاكن كاينة ثغرة بين الولد البنت..البنت تقدر تلقا متاكل وماتشرب من نهارها وتخدم من ساعتها وتجمع راسها الى سايرات الزنقة وماجاتش ضدها..اما الولد كتشطحو وتلعب بيه كيف بغات..غير هوا الى كلا الدق كياكلو خفيف دغيا يبرا اما البنت الى كلات الدق كتبقا فيها الإمارة مدى الحياة ..دقة البنت اصعب من دقة الولد ..ولاكن الفرص متاحة للبنات اكثر من الاولاد . كاين اللي هربات من دارهم وتزوجات..كاين اللي مشات خدمات.. كاين اللي تحششات وتشمكرات..كاين اللي شفرات وكريسات وكاين اللثي تسجنات ولا قتلات ..وكاين اللي فسدات وماخلات مادارت.واغلبهم كيمشيو للفساد حيت هوا المخرج الاكثر سهولة .
بحال هاد النهار اللي خرجات فيه ..فنفس الوقيتة ونفس الساعة ..دار عليه العام تقول غير لبارح ..نزلات من التران فمحطة الرباط اكدال جارة باليزة كحلة ..لابسة كسوة باج كلها خيوط بحال شي شبكة وتحتها تبطينة وقصيرة فوق الركبة.. البانطوفة غوز مشعرة فالرجلين و الشعر كحل مجموع فالاعلى من الصهد بمقبط والنضاضر كوحل كبار مربعين .. الدفار بالفرانش فاليدين تقول نانسي عجرم فاغنية اخصماك اه
اما لاطاي منهضروش عليها ..التربيعة فالكتاف تقول مانكة والعضيمات باينين والصدر حدو قدو والمؤخرة كذلك .. الكرش مكايناش ..تبعاتها صاحبتها جارة باليزة فالاخضر فلاشي صغيرة حتى هي وعامرة عليها شوية ..الدجين مزير كامل مشرط والصنيدلة والدفيرات مصبوغين فالاحمر.. البودي قصير شوية على الكرشوالمؤخرة عاطية والصدر عامر ..اللي شافها يقول معمرة داكشي .. دايرة بيرسينغ فالنيف والشعر زعر طويل والنضاضر دالشمس ..غادية بشوية عليها كتمايل وقدامها شيماء بحال الحمامة..اللي جاي كيشوف فيهم واللي غادي كيشوف فيهم ..طلعو للفوق .. قالت ليها صاحبتها ضبرك الصباط؟
قالتليها شيماء قتلني ماشي غير ضبرني
قالت ليها صاحبتها قلت ليك قبل منتحركو راه غيضبرك
سكتات شيماء وطلعو للمحطة خرجو شدو طاكسي ازرق نيشان لاكدال بلا تعطال
وصلو لعمارة فشارع فرنسا فاكدال وطلعو فالاسانسور لواحد الطبقة من الطبقات ورنو الجرس فالباب وفتح ليهم شاب طويل قد الباب بابتسامة كيرحب قاليهم اهلا اهلا زارتنا البراكة
سلم عليهم بجوج بوسة للوحدة ودخلو كيسمعو الهضرة ديال الدراري وقبل ميتلفتو لقاو ربعة جالسين مجمعين ضايرين على طبلة طويلة مربعة طويلة ومدو يديهم دازو عليهم بالسلام الا واحد اللي سلمو عليه بالوجه وجلسات حداه شيماء ضربات ليه فخدو وهوا لابس شورط قصير كضحك قالت ليه فين احبي ومستقبل غيري
لاح يدو وراها عنقها قاليها حبك ..تا قرب يسالي الصيف عاد نتي جايا..عجباتك مراكش
حلات شعرها كتنفس لتحتو ودارت رجل على رجل تكات ليه على يدو قالت ليه شكون قالك كنت فمراكش ؟ ها اللي كانت فمراكش
شارت ليها بصبعها وجلس معاهم عادل..الشاب الطويل اللي فتح ليهم الباب قاليهم واايلي كنتي فأكادير؟. علاش ماقلتيهاش نشوفوك بعدا راه كنا واحد السيمانة تما
قالت ليهم ماحسابنيش.
طل عليها سيمو اللي حداها قاليها جايا بانطوفة؟
جرات واحد الصاك حداها جبدات باكية ديال الكارو قالت ليه ضبرني الصباط وحيدتو
جبدات واحد القطيب رقيق بحال عود المصاصة حطاتو فمها شغلاتو وحيدو ليها سيمو قاليها اش كيعجبك فهاد الكيغدون؟ كتحسي بشي حاجة ولا والو
خداتو ليها دارتو فمها قالت ليه خفيف ماشي ديالك.. انا ولفتو مانقدرش نبدلو دابا..الشي لاخر كيجيني قاصح
مدات يسرى يدها للصاك حتى هي جبدات ديالها قالت ليهم جاتني القطعة راسي غيتفركع
قاليهم واحد من الدراري عرفونا اصاحبي جالسين معاكم بحال الاصنام
قاليهم عادل وهوا حاط يدو على رجل يسرى
يسرى ..الزين الفنون
وهادي شيماء الزين الفنون حتى هي
هزات شيماء حاجبها قالت ليه الزين دالعالم انا
قاليها سيمو الزين ديال الكرة الارضية نتي
قالت ليه كضحك ايوا هاكاك .
تلفتات يسرى عند عادل قالت ليه لقيتي لينا داكشي علاش وصيتك اعادل
قاليها يالاه دويت معاه دابا قلت ليه عليكم قالي يدوزو يشوفوها
قالت ليه شيماء وفين اينا بلاصة بعدا؟
قاليهم عادل بغيتو سلا؟. وراه شاف ليكم فحي السلام
قالت ليه شيماء لااالا بعيدة عليا انا غير باش نوصل Université خاصني نفيق مع الستة !! لالا شوف لينا سلا جديدة قريبة الله يسهل عليك
قاليها عادل سلا جديدة غالية شوية دار مفرشة ناضية واحد ربعالاف درهم
قالت ليه يسرى اويلي على ربعالاف غيكري لينا فيلا غير تلتالاف
قاليها عادل نيكوصي معاه هبطيها ليه لداك الثمن وشوفي بعداالدار كي دايرة
قالت ليه شيماء تكون غير بحال هاديك اللي كنا فيها الاول باركة اصلا مكنجلسوش فيها
عنقها السيمو وقاليها اجي جلسي معايا الدار خاوية غير انا بوحدي.. علاش غتكري
قالت ليه اويلي منقدرش نتفرق على يسرى واصلا البعد انا همي هوا القرب وصافي.
قالت ليه يسرى وشفتينا اصلا غير كنعمرو فالدار والله كنكريوها غير باطل وصافي
هضرة تدي هضرة وهضرة تجيب هضرة .. طلب سيمو غدا جاهز جاهم حتى للدار تغداو وجلسو مجمعين ماحسوش بالوقت حتى ضربات التسعود ديال الليل وقاليهم عادل يالاه تخرجو ؟
قالت ليه يسرى اللي متكية فين غنخرجو ؟
قاليها سيمو بصح يالاه نقصرو فشي قنت حسن مانبقاو جالسين فالدار
قالت ليه شيماءانا باغا غير نعس
ناض سمو جرها من يدها قاليها نوضي براكة من العكز جالسين جالسين يالاه نبدلو القنات
ناضت مشات جرات باليزتها ودخلات لواحد البيت هي ويسرى حطاتها فوق واحد الكنبي وحلاتها ..كانت عامرة حوايج واخا صغيرة هازة العجب..قالت شيماء ليسرى مافيا اللي يلبس شي كسوة عاوتاني نضربها بشي سكرة ونبدا نتعرا
قالت ليها يسرى لبسي شي حاجة عادية
قالت ليها شيماء ويديها على جنابها شنو غنلبس؟ كلشي خاصو يتصبن
عطاتها يسرى قميجة فالاخضر مغلوق مايل للرمادي شوية ولبساتها مع حمالات صدر كوحل وعراتها من الصدر شوية ولبسات معاها شورط كلاسيكي كحل قصير وصباط وطلقات شعرها الاسود الطويل لوات ليه اطرافه بالبابيليز وحطات مكياج خفيف برزات بيه ملامحها وتبعات ليها رشات من الريحة
اما يسرى لبسات كسوة قصيرة توبها خفيف وكلها كتحرك الى غير ضحكات كلشي كيتهز .
خرجو لقاو الدراري كل واحد محني على تيليفونو فقنت لابسين واجدين مفركسين كيتسناوهم غير هما ..ناض كلشي هبط مع الاسانسور وطلعات شيماء فبي ايم كحلة مع سيمو ومعاهم واحدصاحبهم اللور وطلعات يسرى مع عادل ومعاهم جوج دراري اخرين ومشاو كيتشاورو فين يسهرو حتى تافقو كاملين على سوفيتيل .. دخلو من جهة البواط وتمو نازلين مع الدروج لاسفل فين كاينة السهرة حتى كطيح ليهم يسرى فالدروج وغوتات غوتة وحدة شدوها وقفوها ورجلها كضرها لاكن صبرات وقالت ليهم والو مكاين والو ..شدات فعادل بزز كملات المشية والدموع باغين يطيحو باينة كلاتها فرجلها وكمداتها نيت.
مشاو وسط الموسيقى وشي كيشطح. شي جالس شدو بلاصة كبيرة فيها كنابي دائري جلسو وطلبو مشروبات كل واحد وشنو كيبغي يشرب وحطو ليهم ثلاتة دااقراعي لوسط ..
شدات شيماء كاسها ودارت رجل على رجل وميلات راسها جهة يسرى قالت ليها حضي معايا راك عارفاني فاش كنشرب كنتجرتل
قالت ليها يسرى غنموت اشيماء رجلي عاطياني لحريق ماقدرتش نصبر
قالت ليها شيماءواقوليها نديوك لطبيب عنداك تكوني تهرستي
قالت ليها يسرى ماعرفتش المهم عاطياني الحريق غنشوف واش الى شربت غنسها
تكات كترتاح وشدات كاسها والدراري كل واحد فين جالس كيهضر ..ناض سيمو بغا ينوض شيماء تشطح لاكن مابغاتش قالت ليه اوييلي داكشي اللي بقا ليا ..ماقادرا حتى نوقف
وقف كيضحك كيطح فبلاصتو والكاس فيدو وهي كتشطح برجلها وتفرج حتى لمحات عينها واحد الركنة فيها بزاف ديال دراري والبنات جالسين معزولين فواحد البلاصة ومن بينهم واحد الشاب شديد الوسامة ..شهرو اشقر ودقنه محدد بحال السكين ولحيته خفيفة ..عينيه كبار زورق وحواجبه ونضراته حادة ..وجسد رياضي مستقيم لابس قميجة بيضا محلولة من الصدر وسروال كحل مع باسكيط فرجليه والساعة وفيدو شاد الكاس وكيهضر مع اللي حداه وكل مرة يشوف فيها..
غير شافتو وقبل ماتحقق فيه او تعرفو حاضيها ضرب قلبها بحال المدفع حتى حسات بالضربة غتخرج من بلاصتها ..ماعرفات اش وقع ليها ومالها علاش ضرب قلبها ديك الضربة ..ورجعات فكل مرة تشوف فيه كتحس بالقلب ضرب..ديك الساعة وبلا متفكر كحزات حدى يسرى دخلات فيها وبعدات من سيمو ورجعات كتراقب نضرات الشاب ليها بلا متبين انها مراقباه حتى تأكدات مية فالمية باللي حاط عليها العين وناضت وقفات قالت ليهم غنمشي طواليط ونجي
ناضت هزات صاكها ويلاه وقفات هز عينيه معاها ومع الضورة شافت فيه وتبسمات ليه بعينيها ومشات جهة الحمام .. وقفات قدام المرايا كتشوف وجهها وتقاد السنسلة على عنقها والقميجة ومشات حلات الباب لقاتو واقف كيتسناها بابتسامة وقاليها بونسواغ
قالت ليه بابتسامة بونسواغ
جبد تيليفون من جيبو طلب ليها النمرة الى بغات تعطيها ليه وتبسمات عطاتو نمرتها ومد ليها يدو قاليها
يزيد
تبسمات ومدات يدها ولاول مرة تحس بالدغدغة فيدها وزاد قلبها ضرب اكثر من الضربة الي قبل حتى تلفتت وقالت ليه شيماء. سلمات ومشات
رجعات لبلاصتها جلسات شوية وناضت قالت ليهم صافي عييت بغيت نعس
جلسو وراها شي شوية وناضو خرجو ..كان راسها تقيل بالشراب لاكن ماشي لدرجة السكر ، دخلو وكان السيمو ناوي يدخلها معاه لبيت النعاس لاكن رفضات ومشات نعسات هي ويسرى فبيت بوحدهم وشدو الباب عليهم
تلفتات يسرى عند شيماء قالت غدا خصنا نلقاو دار تكون كما بغات تكون ومانبقاوش فهاد الحالة دلخرى
قالت ليها شيماء لالا غدا غنمشيو وخا نعرفو نباتو فاوتيل ..اصلا غلطنا ملي جينا لهنا مكانش علينا نجيو..بنادم كيحساب راسو غير اجي و ح***وي ! صافي سهرنا معاهم وبايتين معاهم خاصهم ح****ونا عقلية دالخرى
قالت ليها يسرى مالو قاليك شي حاجة
قالت ليها شيماء يمشي يح****وي .. ماعجبوش الحال فاش قلت ليه غنعس حدا يسرى قالي علاش مابغيتيش تنعسي حدايا!! خرا كي داير على سؤال ! علاش مابغيتيش تنعسي حدايا اش كتجيني اخويا ولا كنجيك!! مخصلني ! ولا صافي فتحتي لينا باب دارك قلتي جابها الله ن****
قالت ليها يسرى خليه يمشي ي**** الصباح غنمشيو بحالنا من هنا بلا مايبقا بنادم يمن علينا
تقلبو كل وحدة عطات وجها لجيهة والصباح صبحو لابسين حوايجهم ومصايبين وجههم وخرجو لقاو الدراري جالسين ..ضحكو معاهم بلا ميبينو النوايا لاكن السيمو صبح منفخ قالب وجهه والى شد تيليفون كيهبط عليه ماباغيش يشوف جيهتهم ..قاليهم عادل شنو تفطرو البنات؟
قاليه السيمو تلاجة خاوية اصاحبي
شافت فيه شيماء بنص عين وناضت وقفات ضربات على ضهر عادل قالت ليه شكرا بلا متعدب راسك حنا اصلا غنمشيو
هز راسو فيهم وهما نايضين قاليهم وابلاتي بعدا نلقاو الدار
قالت ليه يسرى لقيناها عيط ليا السمسار هاد الصباح قالينا اجيو تشوفوها ..صافي غنمشيو نيشان نشدوها
قاليهم عادل ايوا مزيان الله يسخر واخا زربتو بغيناكم تجلسو معانا شوية
هزات شيماء صاكها قالت ليه مزال غنجلسو باقا الايام جايا
جرو باليزاتهم ومدو يديهم للشباب سلمو ومدات يدها لسيمو بابتسامة قالت ليه سيمو شكرا على ضيافة
هز عينو شاف فيها كي مع النفس زعما مافنيتو والو قاليهم صافي مشيتو ؟؟
سلمات عليه يسرى قالت ليه الله يخلف
شارت ليها شيماء بعينها وخرجو من الدار نزلو فالاسانسور وقالت ليها يسرى شفتي على فعايل
قالت ليها شيماء صافي يمشي يخرا انا اخر مرة تجي يدي فيدو .. دابا يتفش ويعيط ليا بحال ديما..الحنش اللي ولدو
تحل باب الاسانسور وخرجات لابسة شورط قصير دجين وتيشورط مايلة على الكتف معرياه وشهرها مجموع ونضاضر الشمس والصاك فيدها والباليزة جاواها وصندالة خفيفة. حداها يصرى نفس الشيء الشورط وتيشورط وشعرها مجموع ماحاطين ونضاضر الشمس ..خرجو لبرا قالت ليها يسرى يالاه نمشيو شي بلاصة نفطرو بعدا عاد نشوفو اش نديرو
شافت شيماء يمين يسار قالت ليها انا بعدا خاصني الصرف ماعندي حتى ريال
قالت ليها يسرى انا عندي فلوس مصرفة صرفت بعدا واحد خمسالاف درهم فمراكش
قالت ليها شيماء انا اللي خاصني نصرف كنضر د نجبد الدولار قدام شي قموم مغربي كيطيرك فالسما
قالت ليها يسرى حتى انا هاكاك .
مشاو جلسو فمكان نقي فاكدال يفطرو فيه فلاتيغاس والباليزات حداهم والشمس ساطعة لاكن القهوى مدرقة بالشجر والكاش عالي ملون ..دارت رجل على رجل كتشوف شنو طلب وصونا ليها تيلفون جبداتو من الصاك لقات نمرة عمرها شافتها وفتحات الخط جاوبات
الو ..
قاليها بونجوغ سافا
قالت ليه سافا الحمد لله شكون معايا؟
قاليها يزيد
تبسمات عرفاتو شكون يكون وخفق قلبها لاكن قالت ليه باستغراب شكون يزيد ؟؟
قاليها لبارح عطيتيني نمرتك فسوفيتيل
كانت غتزيد تنكر لاكن حشمات يقول هادي يعلم الله شحال من واحد عطاتو النمرة لباح حتى مابقاتش كتعقل. تبسمات قالت ليه ااه وي سافا الحمد اي توا
قاليها سافا ساف ماقلتيش ليا سميتك!
قالت ليه شيماء
قاليها متشرفين لاللة شيماء اش كتعاودي..كولشي مزيان
قالت ليه الحمد لله كلشي مزيان
قاليها بون قولي لي مسالية ليوم نشوفوك ولا ..
قالت ليه ليوم؟؟ ماعرفتش الصراحة حيت عندي شي حوايج خاصني نرصيهم هما اللولين باش نقدر نخرج
قاليها اوك سي با كغاف حتى تشوفي وردي عليا داكوغ
قالت ليه ان شاء الله
قاليها سينو كي صبحتي
حسات بيه باغي يجمع معاها شوية وبدات ليه قالت ليه
مزيان خرجت انا وصاحبتي نفطرو حيت عاد جينا من السفر
قاليها عاد جيتو من السفر بغيتي تقصدي لبارح جيتو؟
قالت ليه اه جينا من السفر لبارح وباقي شحال من حاجة مامقاداش خصنا نقادوها ليوم
قاليها اااه فهمتك ..مي ماشي مهم تقاديها ليوم ولا ؟
قالت ليه لالا مهم بزاف حيت جالسين فاوتيل وعاد غنشوفو شي دار للكرا
استغرب قاليها دار الكرا؟
قالت ليه اه ..مهم قصة طويلة هه
قاليها فينك دابا نتي غير فاكدال
قالت ليه اه غير فاكدال
قاليها اينا بلاصة كتفطرو فيها
عطاتو النعت ماضناتش يقول ليها غندوز عندكم حيت كان اصلا فطموبيل وسمعات صوت السينيال وقطعات معاه عضات شنايفها كتشوف فيسرى قالت ليها ناري واحد الاخ الكريم غيجي عندنا دابا
ضحكات يسرى قالت ليها خليه يجي يخلص هاد الفطور نيت
قالت ليها شيماء مابغيتوش يجي عندنا على الصباح اصاحبتي يشوفنا هاكا تفو كن غير ماقلتش ليه فين حنا
شدات جبهتها كتسوط وجبدات كارو شعلاتو كتكمي حتى وقفات قدامهم بورش كحلة كتلمع بجوج بيبان ونزل منها يزيد لابس تيشورط بيضاء وشورط كحل ديال النايك وحداء رياضي ابيض من بيض البيض ..شافتو يسرى نازل والنضاضر الشمس وقالت ليها الله على تيتيز شحال زين تقولي داير اشهار لبارفان
تلفتات شيماء شافتو داخل وحلات عينيها قالت ليها وييلي وييلي احم احم
طفات داك الكارو وماكملاتش هضرتها تبسمات حيت لقاتو عند راسها واقف..وقفات وصلات ليه للكتف ويسرى كتشوف فيهم مافهمات والو
يتبع
خليو معاكم نجمة 🌟
لبنات شهو الرئ ديالكم ف شيماء و يسرى شكون هو هد يازيد واش عندو شي دور في القصة ام عابر سبيل هههههه ؟؟؟
أنت تقرأ
شرف للبيع
Teen Fictionسلام عليكم الوريدات صفا بخير جيتكم بقصة جديدة و واعرة كتهضر على ظاهرة لي نتااشرات و لي هي الفسادة بطريقة طريفة و الواقع دياز بزاف البنات لي فرضات عليهم الحياة ايخرجو من ضارهم ❤️ هي العذراء لي تباعت من اجل الفلوس 😌💸 وهو الامبراطور لي تلاقاها و...
