رجعات الروح فزبيدة مسكينة رجعات تحسب الايام والليالي وقتاش شيماء ترجع ..بقا الاتصال بيناتهم مع فاتي حتى للنهار الموعود..النهار لكبير..
حلقات فيه الطائرة فوق ارض الوطن وحطات فوق ترابها .
خرجات من الباب مع المسافرين وحلات عينيها البراقة استنشقات هوائها وخفق قلبها لمصافحة البلاد الغالية لعزيزة ..وخفق لذكريات جات لبالها مباشرة من بعد ما حطات اول خطواتها فالمطار..
تغيير جدري كبير ..رزانة وتبات وكلام بصوت منخفض ورقة وانوثة ..خدات الاوراق ديالها وخرجات جارة حقيبتها الوحيدة وهازة صاك لوي فيتون فيدها وجامعة شعرها دائرة عشوائية فالاعلى.. يالاه هزات عينيها شافت مها جايا كتجري وفطوم وراها والدقايقية كيغنيو بسميتها وجلول كيتسابق مع زبيدة وختها وواولادها ..طاحت على حضن امها وطيحات الصاك والباليزة فالارض وكانت غتسخف من داك اللقاءالحار .عناق صعيب تفرقو وصعيب تفرق ام على بنتها واخا ماتبينش الحب اللي فقلبها لاكن الكبدة كتبقا خاصة وااحساس الام مختالف على جميع الاحاسيس..عنقات باها حتى هوا كتبكي وعنقها كيترعد غير بوحدو وعنقات ختها اللي بقات مصدومة فيها متقدرش تصدق ان هاديك ختها لدرجة حشمات حتى تعنقها..اما فطوم بقات هي اللخرة فالجنب كتبكي خلاتهم حتى دازو وشافت فيها كتنخصص وبقات وحدة تشوف فالاخرى ومشات عندها كتجري عنقاتها عناق اخوي مرافق بالذموع والمشاعر الجياشة..تحت انغام ودقات الدقايقة خرجو من المطار كانت الهوندة فاش جا كتسناهم طلعو فيها كلهم قردو مع الجناب اللور فالهواء الطلق كيتعانقو والدقايقة واقفين كيشطحو وجلول ركب لقدام قليه زيدي اسيدي يالاه
وصلات لهوندا للحي كتمايل بالدقايقية لقاو الجيران كلهم مجمعين لتحت كيشطحو ويزغرتو والنفاخات من البوطو ديال الضو للبوطو .
نزل جلول حل ليهم الساقطة اللي لور دردبو كاملين ..اما شيماء شدات ضهرها مباشرة فاش وقفات وبداو الجيران يبوسو ويعنقو كل وحدة من جهة ويجرو فيها ..طيحو ليها الشعر والصاك هزاتو فاتي هوا وتيليفون والباليزة دخلاتها ختها ..اما مها جات الوسط حيدات الصندالة وجلسات شتف هايتف وتزغرت ودور عندها تعنقها وكلشي كيسفق ويشتف والغبابر نايضين ..ضحكات فاتي لشيماء وتعانقو كيسفقو بيديهم وعطاوها الحليب والتمر وجات مها هازة واحد الغراف ديال الطين وقفاتو فوق راسها كتزغرت وهرساتو بيد المهراز ودخلوها للدار ودخلو كاع الجيران وراهم تا مابقاش الاكسيجين فالدار. جلول عيا يصبر فاللخر داق بيه الحال وجاتو الحالة وناض بدا عليهم هاك بلاك تا خرجهم كاملين بقات غير شيماء ودارهم وخوتها كلهم اللي كانو في انتضارها من بينهم الثلاتة الشماكرية اللي جالسين واحد حدا واحد كيشوفو فيها..واحد فيهم يدو كلها مضروبة ووجهو مخسر والثاني واشم بحال دفتر الدكريات ماخلا وردة ماخلا سمية ما خلا نسر شي. بالالوان وشي كحل. وتحسينة محرطة من الجنابواللوراني طويل مكردد مصبغو بالاصفر
اما التالت واقف لابس واحد السروال كامل مورد وعامر كتابة والصندالة مغبرة والتقاشر بيضين وتيشورط مصننة دوخهم بالريحة كتر من لخيرن..وعاد قوة البز ولاد البنات اللي تلاقاو ردو الدار بحال لاصال بالجرا والكراطي والغوات .
تهدنات الامور وبقا شي كيشوف شي وفاتي لاسقة حدا شيماء خايفة من خوتها .
وهانتي ابنيتي تشوفي على حالة.. الضلم وقلة شي
قاليه ولدو لكبير بواحدالصوت كيخلع
وصااافي تبقا علينااا عاوتاني بداك الديسك دالنم ..
جلول: خرج عليا ..خرج الله يحرق جدمك الكيدار اللي ولدك
ناض جبد كارو ورا ودنو قاليه هاوا غااادي..الق٠٠٠٠وي
خرج وقال التاني و هوا كيشوف فيها
صافا ختشي شيماء..وا غبرتيييي عنااااا
تبسمات ليه قالت ليه صافا خويا شكرا
زييدة : على سلامتك ابنيتي في داركم ..على سلااامتك
البنات سكتو كاملين بقاو غير كيشوف فيها من راسها لرجليها .
حطو الغدا الوسط فيه جوج دجاجات محمرين ورجع خوها الكبير يتغدا فيدو طرف دلحشيش. خشاه فالجيب وشد الخبز قسمو وتجمعو كاملين بخوتها اللي كل واحد فين كان كيحك و كيغمسو وياكلو والبنات تا هما اللي جا قدامها شيحاجة كتخشيها فمها وتخشي لولدها
الاخ الصغير:شدي عليا ولذك عنضرب مو لسقو..
جراتو مو من عنقو جلساتو قالت ليه :ريح تشاا لارض خرا كي داير
ماقدراتش تاكل ديك المرقة لاهي لا فاتي ومها كتمد ليها تاكل وفرحانة بيها..سالا باها الماكلة ودفع الكرسي دالميكة مسح فالجيلي وقال
ودابا باش انخلصو هاد الفرارج يالاه
ضربها بواحد تكريعة سمعوها من راس الدرب ومشا خرج وناضو خوتها واحد ورا واحد شي مسح فسروالو شي مشا يغسل ورجعو وقفو مبندين كل واحد كيشوف فيها بنص عين حتى تجمعات الطبلة وناضو البنات كل وحدة شكادير وزبيدة مربعة كتسولها على احوالها وكيفاش عايشة وشنو عاشت
تبسمات شيماء وباست ليها يدها قالت ليها الحمد لله اماما نتي بيخير
زبيدة: غا مللي رجعتي لي راني بييخير الكبيدة ..شفتك ابنيتي جبتي غا باليزة وحدة صغيرة علاش ماجبتيش حوايجك تجلسي معانا
شيماء: جيت غير نشوفوكم ونمشي عندي الخدمة خديت غير عطلة وصافي
فاتي: وايلي اخالتي المغرب عامر شراوط تا نتي ..تخرج تشري اللي بغات
شيماء: ااه فكرتيني..خاصني نصرف الفلوس
طار خوها الكبيرقاليها اري نمشي نصرف ليك شحال ربعالاف؟؟
قالت ليه لا خصني نصرف الدولار
جمع ديك اليد حك بيها راسو قاليها اااه الدولار
تم داخل جلول لقاهم كلهم تما فالدار وهز يديه قاليهم خرجو عليا من داري هاناري ياك تغاديتو؟؟ مالكم اش جاكم ليوم مابغيتوش تخرجو ليا من الدار
شاف شيماء نايضة هزات الصاك قاليها فين ابنيتي غادية
قالت ليه نمشي نصرف ونجي
حل الجيبقاليها اري نصرف ليك
قالت ليه لا غنصرف الدولار ابا
هز يدو لخوها لكبير قاليه تبع ختك لا يكريسيوها راه هازة الدامار في يديها تحرك الله يتبعك البلا ..سير تا تا تبعو ناشر ليا خراك هنايا نوض تكعد
خرجات مع راس الدرب شادة في فاتي وهازة صاكها ووراها جوج خوتها اللي مشرط كي الخريطة واللي واشم كي دفتر الدكرايات غاديين كيتمايلو.دازو من راس الدرب وطاحت ليهم فالودن
الناس ديال دوباااي الاماراتش
ضار ليه خوها الكبير فمو مردوم وسنانو مخززين وادفال كيطشطش شدو من وسط الدراري قاليه عااود اش قلتشييي …الامراتش
مد يدو لشيماء اللي خرجو عينها تخلعات قاليها ارييتشي داك تيليفون لهنا
عطاتو ليه بلا متردد شدو قاليها حللي ديري اليوتوب جبدي خدمشك نوريها ليه
جبدات ليه الفيديو كتفتف شدو خشاه ليه فعينو قاليه شتيها…بحال خشك اللي عنداك مطار فط٠٠٠٠ يا ولد ل٠٠٠٠ … شوفو تشا نتشوما
ذور الفيديو عليهم كاملين ودفع داك الشمكار قاليهوا دور ت٠٠٠٠د دابا قبل مانرفع. ٠٠٠٠ بوك
لاحو وزاد قاليها شدي تيليفونك
شداتو مشات وبقا التاني كيشوف فدراري قاليه شووف فياا..غنجي نفركع مك ..ولاد ب٠٠٠٠
مشات كترعد ركبات مع فاتي فالكاط كاط كحلة كتشعل وركب معاها الكبير بوحدو والصغير رجع لراس الدرب
مشات صرفات الدولار وخرجات من المصرف لقاتو واقف قالت ليه رضوان خويا صافي غير رجع للدار تا نجي غنمشي نتقدا شي حاجة
عطاتو خمسية درهم جديدة بقا غير كيشوف فيها وحرك ليها راسو بالايجاب تا الهضرة ماهضرش وضار مع الدورة مشا
حطات فاتي يدها على قلبها قالت ليها نااري ياختي كان غيسكت ليا القلب..مالكي على خمسية كلها نقصي شوية غا عشرين درهم خمسين درهم وكاع الى طرتي ميتين درهم ماضسريهمش غتوحلي معاهم هاني قلت ليك .. غيضرب الدورة ويجي يمرضك باش تعطيه وا زيري السمطة
شيماء: ماعرفت ما نعطيه ..خليه صافي هاهوا مشا..انا براسي خلعني ياختي !! ماخليتوش بحال هاكا كان شوية ناقص على هاكا دابا راه مايمكنش!! خلعني
فاتي: وا المهم زيري السمطة راه منو تلاتة غايمرضوك ..الى ساق باك الخبار عطيتيه خمسمية درهم يحيد سروال ..كن جيتي عليا كن مشيتي شديتي شي اوتيل ..تخافي ينوض شي واحد بالليل يكشطك يدي لك تيليفون ويخليك
شيماء: خلي هاد الليلة هاد دوز وغدا نخرج من الدار .
فاتي..انا راه خليت ولا دي مع ماما غيحمقوها ..تا انا شرطت عليها قلت ليها الى بغيتي تعيشي معايا اجي بوحدك وخلي داك الجلاخة فالدار بوحدو ..بلاتي نعيط نشوف اش كيديرو
هزات تيليفون عيطات كتسول
الو ماما.. شكايدير جاد وسيف الدين؟…وماتقايلييهمش غتحمقوني واكرام شكادير …واش انا كنخلصها باش دوش وتخليهم كيتكرططو بوحدهم..فرعي عليها الباب تخرج ولا تمشي ت٠٠٠ عليا
أنت تقرأ
شرف للبيع
Teen Fictionسلام عليكم الوريدات صفا بخير جيتكم بقصة جديدة و واعرة كتهضر على ظاهرة لي نتااشرات و لي هي الفسادة بطريقة طريفة و الواقع دياز بزاف البنات لي فرضات عليهم الحياة ايخرجو من ضارهم ❤️ هي العذراء لي تباعت من اجل الفلوس 😌💸 وهو الامبراطور لي تلاقاها و...
