قالت ليها يسرى شحال من واحد واصل تزوج بنت الشعب ومن البار كاع ..والى كنتي ماعينكش فالزواج معاه فاش عينك؟ غطيحي فيها شي طيحة خايبة اجا ماخرجك منها
قالت ليها شيماء اولا داك اللي كيتزوج بنت التحت انا بعدا عمرني شفتو ..جبديه عطيني شي سمية ديال شي واحد واصل عنده منصب ومحيط فيه غير فلان وفلان من غير دوك اللي طالعين بالتجارة دارو لاباس من الورث عندهم الفلوس ولاكن مكانة اجتماعية ماعندهمش.. راه كاين فرق بين واحد خانز فلوس عايش مستوى عالي وبين واحد عندو الفلوس والمستوى والمكانة الاجتماعية..كلشي طالع على هاد المكانة الاجتماعية اباغ الفلوس هادي هي النقطة اللي كتقول ليك سطوب بلا مانكدبو على راسنا ونبقاو نحلمو بشي حاجة مكايناش..هادوك علامن كتهضري نتي بوحدهم الفلوس كاينة المكانة اللي تفتح ليهم العينين على وحدين اخرين بحالهم مكايناش وعاد الشعبية اللي عند بات يازيد ومو ..معروف كيدوز فالتلفازة سميتو كتبرق مكاينش اللي مكيعرفوش ..نجي انا نتزوج ليه بولدو ..عمرو جرب حتى عيشتنا كي دايرة كيشوفها غير فالاخبار وكيهضرو غير بالاسامي..
تنهدات بعمق خرجات النفس تقول كانت كدابز لاكن خرجات حرقة وغصة فصدرها وقالت ليها بأسى
اختي انا عارفة راسي الى طرت غنتزوج طبيب عادي قرا على راسو وخدم على راسو ولا شي واحد واخا لاباس عليه ماعندو حتى علاقة بالاسامي والاوسمة..اما يازيد راه ولد مو وباه وهوا براسو كي خلاها تكونات ليه الفكرة فراسو تعايش معاها ميقبلش على راسو وحدة بحالي واخا نكون ماشي غير مهندسة كنسوق الطيارة..اهم حاجة بنت من شكون با. وانا با غا زطايلي وخوتي كتر منو ومي قالت ليهم فالجهل ماتعرفو والو..
قالت ليها يسرى واختي نتي تعرفي ..الصراحة عندك الحق..ولاكن الى ماكنتيش كتشوفي بعيد بلا متعلقي بيه
قالت ليها شيماء غادي نتصاحبو شوية دالوقت نعيشو اللحضة..انا كدبت عليه باش مايحتاقرنيش وصافي ونطول معاه ..مانعرف شنو جاي من هنا لقدام كي شفتي كاع هادو اللي عايشين الحب والتضحيات تزوجو ..كلشي تفرتك ..كتجي واحد الوقت كتبدل كلشي اللهم نعيشو اللحضة نخليو دكرايات زوينين ..ماشي بحال مانعيشوش كاع ..غيجي واحد النهار غنهز راسي شي هزة عالمية اصلا هاد الطريق ماشي ديالي ماشي على قبلها خرجت ومغاديش نطول فيها ..نسالي قرايتي نجمع شوية دالفلوس نزيد لبرا انا علاش اصلا ختاريت جامعة دولية وهاد التخصص ..غير باش يهزني من هاد البلاد ..ديك الساعة حياة اخرى ..ديك الساعة غنجلس مع شكون وشكون وفلان وفرتلان وانا شخصية نفرض راسي عليهم بزز من اصل منهم
جمعات شيماء وطوات وفشات خليقتها وما فقلبها على يسرى وناضو لبسو حوايجهم .. لبسات شورط بحال العادة خفيف ديال النايك وكلاكيطة وتيشورط بيضاء وجمعات شعرها ونضارات وعطات ليسرى شنو تلبس على دوقها باش تحيي فيها الجمال من جديد اللي بدا كيدبل
سدو الباب وخرجو ضارو مور العمارة على الطريق كانت كتسناهم تما طيوطا كحلة كبيرة كتبري .حلو الكوفر حطو الباليزات وطلعو لقاو البنات تما ..جلسو وحدة مكتهضر مع الاخرى والبنات غير الغزالة على ختها والرقة والجمال
تلفت عندها محجوب قاليها على سلامتك الزين
شاف جهة يسرى وماهضرش معاها
قالت ليه شيماء كي جاتك النمرة دالبارح شتك كاع مادرتي بناقص مني ليوم
شاف فيها فالمرايا وكان راجل اربعيني كبير قرع كامل وشامات ..قاليها لااالا ماعندي منقول..تي راه هي الزين وكلشي
سولاتو وحدة قالت ليه وقتاش جا حمودي ؟لبارح ولا ليوم
قاليها لبارح الزين
قالت ليه انا سمعت جا سيمانة هادي امحجوب والبنات راه من سيمانة وهما تما
قاليها كدبو عليك الزين ..انا عاد كي دويت مع مصطفى لبارح قالي جمع العزلة للشيخ لغدا ..شكون قاليك تي واه سيمانة باش جا
قالت ليه جيهان لواية هي اللي قالتها ليا
قاليها وهوا سايق تي سيري ..جيهان وجها وجه معلاّية ماشي وجه الشيوخ ..بغات تبان علك
وقف فالطريق فحي اخر طلعات بنت اخرى ناقشة الحنة حتى للركبة واليدين حتى لاكواع نقش هندي ولابسة كسوة قصيرة بالسماطي وهازة صاك كبير..طلعات معاهم جلسات فالصف اللوراني اللي منو للكوفر وزاد شويةكيهز البنات وشاف فيهم قاليهم جبتو التكاشط؟
قالو ليه جبناهم
قاليهم يالاه وجدوهم هاحنا قربنا للبراج
لبسو القفاطن والتكاشط بالزربة وطلقو الشعور قبل ما يوصلو لبراج البوليس..وقفوهم كيبحثو لقاوهم لابسين التكاشط وقاليهم محجوب ها نتا اشاف غادي بالعائلة للعرس ..
خوا ليه الطريق دازو عاد تنفسو وحيدو دوك القفاطن وجمعو شعرهم وتنفسو فاتو داك الطريق
قالت ليه شيماء مكايناش طريق اخرى دخلنا حي رياض من غير هاد الجايحة امحجوب؟ شي نهار غنمشيو ابرياء بلا دليل
قاليها واييه ..كاينة وحدة على عكراش كيصلحو فيها ..شتي شوقع لحمزة ؟
قالت ليه اللي حداه مالو اش وقع؟ ليه
قالت ليه اللور. مسكيين بقا فيا وبقاو فيا البنات ..خرجات عليه سارة وواحد الوحدة اخرى
قالت ليه شيماء مالو شنو طرا ليه؟؟
قاليها شدوه البوليس كان غادي كيطير ماحسابش ليه الردادر فالطريق بغا يوصل بالزربة.. لقاو معاه البنات قلبو ليهم الصيكان لقاو الواقي وسليبات عرفو من الخلية جمعوه بالبنات بكلشي ..هما دوزو فيها 48 ساعة فالجيور وهوا خرج بمليون ونص و48 ساعة
وصلو لحي الفيلات..دخلة من هنا دخلة من هنا وصلو للفيلا المعلومة .. دخلات السيارة مع الباب لكبير للساحة لكبيرة ديال الفيلا اللي دايرة بحال شي فيرمة فالمساحة ديالها..كانو تما اكثر من عشرين سيارة واقفة والرجال والنسا حتى هما وحتى الشباب اصحاب السيارات تقول عندهم العرس..هادا جامع البنات ديالو كيهضر معاهم ويتافق معاهم وهادا كاع مامسوق شاعل كارو متكي على باب الطموبيل ..هادا حط عشرة البنات ورجع خرج يجيب لخرين..وهادي لابسة سورفيت كتجري ورا البنات اللي بانت ليها زوينة عاطية للعين تشدها تاخد نمرتها باش تكون مجموعتها اللي ماترفضش اثناء العزلة.
سن البنات كاملين مافايتش ستة وعشرين سنة واقل سن طناش لسنة .. اما اللي كيتسماو قوادات ولا قواد السن ماشي مهم عندهم المهم المنتوج اللي عندهم .
خرجات يسرى وشيماء باليزاتهم ودخلو بحال الى داخلين شي اكاديمية كبيرة ..كانت الفيلا كلها محلولة من لداخل وصالونات خفاف عصريين ومدورة بالزاج .. وكانت لهاد الفيلا بالخصوص اسم الفيلا الذهبية اللي من بعد نعرفو علاش تسمات بهاد الاسم..لاكن واخا فيلا دهبية مكيعيطوش ليها بداك الاسم ..لاكن كانت معروفة فهاد الوسط بحال اللؤؤة باسم مارتينيز.
كانت ليها مساحة كبيرة ودروج واسعين كبار وستايل اوروبي زوين كانت عامرة بالبنات .. فيهم اللي عاد وصلو وفيهم اللي كيدورو بالبيجامات تما وجالسين
من جميع المدن بدون اسثناء جاو ومن جميع انحاء المملكة.. كل وحدة منين جات وكاين اللي جات من على برا ..كاين اللي من المحطة لسيارة الشيفور وكاين اللي من المطار حتى لعندهم . كلهم هدفهم واحد اللي هوا المال والنشاط بطبيعة الحال وكلهم مختارين بعناية من طرف الشوافرية وكلهم زوينات الا البعض منهم اللي كانو على رؤوس الاصابع.
مالقات شيماء ويسرى فين يجلسو ومشاو جلسو فالدروج مع البنات وخلاو الشنط محطوطين وحدو يد على خد كيتسناو
وشي مامسوق لشي
جبدات شيماء كارو شعلاتو وعطات واحد ليسرى وقالت ليها وحدة وراها عطيني معاك عطاتها ورداتو فالصاك حتى حا عندهم محجوب قاليها يالاه
قالت ليه ويسرى تمشي معايا
قاليها غتبقا مع البنات هنا يدوزو فالعزلة..يالاه
ناضت جرات باليزتها وعطات سوارت الدار ليسرى في حالة ما تريفولات ورجعات للدار ..جرات شنطتها خارجة والبنات شي داخل شي هابط من الدروج .ركبات مع محجوب ومشاو كيتجمعو فالطريق قالت ليه واش هوا قاليك جيبها
قاليها مقالي ماقلت ليه انا غنديك تما تجلسي رسمية وعندك حجة ماشي بحال لخرين
قالت ليه عنداك اصدر يسرى صافي خليها طلعات مرحبا ماطلعاتش ترجع .
وصلها لقصر بين الغابات جهة عكراش وكانت تما حياة اخرى من القصور.
دور واحد التيليفون باش دخل من الباب اللول والعسكر خليجي على برا واقف منهم ااعرب ومنهم الهنود . طار على طريق من ليمن لاول مبنى قدامو اللي كان معزول والسكان والكالم ووقف نزلها ونزل معاها جارة شنطتها لقا تما المدعي مصطفى واللي هوا واحد من الوفد ديال الشيخ.وكان هاز مسؤولية هادشي كامل وواقف عليها
شاف فشيماء قاليه هي هادي
قاليه محجوب وهوا كيعنقها من كتفها هي هادي..فرطوطة دالعام الفايت
تبسم ليها قاليها دخلي ودخلات حطات جميع الاجهزة اللي هازة ..ليزيات. تيليفون اي حاجة بدات كتسيني وهي دايزة فباب التفتيش
جمعات ليها وحدة لابسة طابلية بيضا كلشي فساشي وسدات عليه وخشاتو فواحد المجر طرقات عليه وكملات شيماء الاجرائات الروتينية فداك القصر.
دخلات عند طبيبة نعسات على ضهرها فحصاتها وقالت ليها مكتنعسيش بزاف؟
قالت ليها شيماء لا
قالت ليها الطبيبة شحال دابا باش ديفيغيتي
قالت ليها شيماء شي عام ..الصيف اللي فات ..هنايا نيت
حركات ليها الطبيبة راسها وقالت ليها شيماء انا ديما كونطرول وديما ساكنة فكابيني عند طبيبة ديالي عارفة شنو كاين
قالت ليها الطبيبة باينة باين اللي كتراقب راسها واللي مساليا.. الصباح راه لقينا وحدة فيها السيدة كانت غتنوض هنا
ناضت شيماء لبسات حوايجها قالت ليها الله يستر انا اصلا كنقوليهم باقا بنت ديما من نهار فتحني الشيخ
قالت ليها الطبيبة حسن ليك ردي البال لصحتك وراسك راكي باقا نقية ماضيعيش راسك
ضحكات معاها شيماء قالت ليها لالا ماتخافيش عليا عارفة شكندير
مدات يدها خداو ليها الدم حللوه فالبلاصة وخرجو النتيجة فالبلاصة وجمعو ليها الضوسي خرجوه معاها خداه مسطفى وخرجات ودعات محجوب وهوا كيشوف فيها فرحان ويردد
الزين النقى والشعولية يخليلي اللي مايحشمش بيا
جرات باليزتها وخرجات من الادارة مشات تلتاحق بالبقية ..غادية فالطريق ومصطفى كيهضر معاها ..جبد تيليفون قاليها عطيني نمرتك ..عطاتها ليه وعنقها من ضهرها دخل هوا وياها لواحد المبنى بحال شي اوتيل فيه قاعة لتحت ديال الجلوس والباقي لفوق كله غرف.
مالقاتش البنات بزاف لقات غير شي بنات اجنبيات كيهضرو مع بعضياتهم شادين كارو ومغربيات كيمشيو ويجي تما وشي سوريات العدد مافاتيش عشرين بنت منتشارين فداك المكان والخدم اكثر من عددهم ..جات عندها وحدة لابسة سروال وقميجة كحلة مكتوب على البادج ديالها اسم النوامة. اللي هوا اسم القصر فين هي حاليا..
تلاقات تما مع بنت كتعرفها من قديم الزمان فجأة ومشات عنقاتها وبتبالدو القبل وفرحو مللي تلاقار تما ..
كانت البنت زوينة وطويلة شعرها كحل حتى هي مربياه لهاد الوسط ..
جلسو كيتعاودو ويتبادلو اطراف الحديث وكل وحدة تسول عاى اخبار الاخرى وقالت ليها شيماء شكون جابك؟ لعضم؟
قالت ليها فطوم لا جيت مع الشلحة
كشرات شيماء وجهها قالت ليها مع ديك الق****بة الله يعطيها الكونسير
استغربات فطوم قالت ليها علاش مالكي معاها حتى نتي
قالت ليها شيماء ماعرفتيش اشنو دارت ليا!! مالقيتي معامن تخدمي غير مع امينة الشلحة
قالت ليها فطوم وهي معرفة عليها بنت لكلاب ولاكن انا مادارتش معايا الفعايل لخد الساعة
قالت ليها شيماء انا راه كانت غتخرج ليا على حياتي وحبساتني سيمانة فالفيلا سدات عليا انا والبنات ثلت ايام ماكلينا النعمة كنت غنموت ..
تخلعات فطوم قالت ليها علاش اويلي عاودي لي ..نتي اصلا ماقلتيش ليا شكون خرجك نهار الاول واش هي ؟
تنهدات شيماء قالت ليها انا نعاود ليك كلشي من الاول..
أنت تقرأ
شرف للبيع
Novela Juvenilسلام عليكم الوريدات صفا بخير جيتكم بقصة جديدة و واعرة كتهضر على ظاهرة لي نتااشرات و لي هي الفسادة بطريقة طريفة و الواقع دياز بزاف البنات لي فرضات عليهم الحياة ايخرجو من ضارهم ❤️ هي العذراء لي تباعت من اجل الفلوس 😌💸 وهو الامبراطور لي تلاقاها و...
