هذا وين حبست طيارتي رحت ديت فاليزتي ورحت حكمت طاكسي مكملة للدار شحال توحشتهم .....ضك راني قدام الباب بقاو هذي الخطرة غير خطوات دخلت لداخل نجري قاعدة نعيط
اسيل"ماما بابا جدو"
مجازوش خمس دقايق لقيت الدار كامل هبطت انا كي شفتهم وحد الاحاسيس حكموني تعرف شعور متشوفش فاميلتك خمس سنين كومبلي امبعد في نهار يوقفو قدامكم كامل انا بطبيعتي نتأثر جا في خاطري نسوطي نعيط نبكي نضرب المهم ندير عفسة ماما جات تعنق فيا وتبوس النفس قطعاتو بصح حقها كبدتها بابا مبينليش بصح شفت دمعتو طاحت عنقتهم كامل ورحت عند جدي محمد و ماني زهور بستلهم راسهم و يديهم سلمت على عمومي و نساهم وبناتهم خدودي والله غير طابو العيد ومشي هاك هههه .... قعدنا في الصالو
عبد الله"كيفاه الغربة يابنتي توحشناك طولتي الغيبة"
هذا عمي الكبير حنين بزاف شغل بابا عندو بنتو زينب تهبل و وليدو احمد
اسيل"يتوحشك الخير ياعمي هذي حال القرايا نتوما حبيتو تتهناو مني وضك لاعبينها توحشتوني"
محمد"سعا هاك كي حوسنا على مصلحتك ولينا حبينا نتهناو منك نكارة الخير"
هذا جدي محمد معزتو كبيرة في قلبي
اسيل"هههه راني نتمسخر ياجدي تعرفني بصح عمبالكم كون برك كنتو معايا نهار لاسوتنونص تاعي خصيتوني ثما "
مليكة"متزعفيش يابنتي نخلفوها في فرحك ان شاء الله"
يما احن مخلوق في البشرية هذي مشي برك ماما هذي الروح تاعي صحبتي جوهرة حياتي
اسيل"راكم بديتو انا نقعد هنا معاكم منتزوجش حابيين تتهناو مني انا هذا وين وصلت عندكم حبيتو تزوجوني"
بداو كامل يضحكو حتى سمعنا صوت راجل
ادم"شكون حب يزوج اميرتي انا البرانساس تاعي تقعد عندي"
درت ليقيتو الكلب تاع خويا توحشتو رحت نجري عندو نعنق فيه شاف فيا
ادم"ياعمري على ختي كيفاه كبرت راكي صح برانساس بالحجاب مبروك"
اسيل"يسلمك خويا حشمتني"
ادم"علاه وجه الحشمة نتي "
ضربتو على صدرو وضحكنا ...خويا ادم اكثر واحد قريب ليا السند ونعم الاخ دايمن في كتافي نشفا يامات الليسي كنت تاع طوايش نضل نضارب غير هو لي نلقاه يحامي عليا امبعد يمدلي طريحة مسقمة هههه
هكاك وينطق واحد من موراه
سفيان"وحنا متوحشتيناش"
خزرت فيهم مليح
اسيل"متقولهاش سفيان وامير يتوحشكم الخير كيفاه راكم "
امير"الحمدالله رانا قدامك نتي لي شحال في الغربة "
وليد"ومتسلميش علينا الاخت"
اسيل"اسمحلي الاخ راني صح وليت اختاه منسلمش راك تشوف الحجاب ولا في باطل"
ادم"ياه ختي راحت للغربة وتسقمت شكون يقول هذي نتي كبرتي ثان في مخك"
اسيل"علاه لي يسمعك يقول كنت خارجة طريق"
عز الدين"ادم بركا متقلق ختك"
امير"بنت عمي نستعرف بيك طلعتي راسنا"
انا حشمت هبطت راسي منحبش تكون الهدرة غير عليا
حورية"اسكتو علينا خلاص شوفو كيفاه ولات غوز"
مرت عمي الدوزيام مصطفى نورمال بصح عندها شي طبايع بلا منهدرو عليهم
امال"ارواحي اسيل تريحي في شومبرتك وتحكي لعمتك على سويسرا كيفاه دايرة "
هذي هيا عمتي الصغيرة حبيبة قلبي طفولتي مكانش شابة بلا بيها هيا الحلاوة و السكر
طلعت معاها لشومبرة متبدلتش كامل كي نشوفها نتفكر المراهقة تاعي خطرات نضحك ومرات نندم على واش كنت دايرة الطوايش و المشاكل ميعلم بيهم غير ادم و احمد هذا وليد عمي الكبير نفس الاج تاع خويا كي منلقاش خويا نروح ليه نشتكي كنت نعرفو غير في وقت المشاكل هههه
هذاك النهار ديتو غير ضحك مع عمتي وزينب حتى ختي نعمة توحشتها بزاف مرانيش مأمنة جابت الباك وراهي جامعية ...حطيت راسي على المخدة وجبتها بوحد الرقدة اسطورية يومين تباع وانا غير نرقد سيختو الوقت مشي كيف كيف سما جاتني صعوبة في الرقاد ههه.....
ستوب خلاص يكفيكم هاد البارت نشالله برك يكون عاجبكم نكملو الخطرة الجاية 🫀✨
