حطينا الطابلة تاع القهوة بسفنج تاعي خرج يهبل كامل قاعدين ياكلو و صباعتيهم قريب راحو في الجرة هكاك السكات حتى نطق عمي مصطفى
مصطفى " اححم بابا حبيت نقول عفسة اذا تسمع "
محمد " راني نسمع فيك انطق "
مصطفى " كاين واحد خطب سيليا بنتي و حنا من جيهتنا رانا قابلين "
محمد " واش نقول ان شاء الله فيها خير المهم الطفلة تكون قابلة "
مصطفى " راهي قابلة بابا متخافش "
زهور " امالا فيها خير ياوليدي قول للجماعة يديرو نهار و يجو "
مصطفى " ايه يما خلي نهدر معاهم و نشوفو نهار"
امبعد عاود السكات فوق الطابلة انا خزرت في هذيك لي خطبوها تتبسم سنة العقل بانت متقولوليش برك هذاك لي حكاتلي عليه زينب طاحت على راسها المهبولة زعما تتستت علينا بصح في صوالحها عمية حطيت يدي على راسي حتى وين كملنا بدينا نلمو انا و البنات غير سيليا راحت لشومبرتها كنت نغسل ماعن و رحمة توصل ونعمة ترجعهم لبلاصتهم
نعمة " ياختي انا تشوكيت كي سمعت بالاك برك مول الموطو لي قالتلنا زينب عليه "
درتلها براسي ايه
أسيل " ايه مالا شكون حبيتي قالتلي زينب كون مجاتش تعرفها كون قالت ساحرها "
نعمة " هكاك ووصلت وين حابة راه جا خطبها"
أسيل " موصلتش و راح تندم وقيل معمبالكش بيه يبيع لادروغ "
حطت يدها على فمها
نعمة " اا ... منك صح تهدري "
أسيل " متهدريش بصح زينب قالتلي هذي الهدرة وزيد هي بنت عمك عمبالها بالحكاية تاعو و خرايبو"
نعمة " دقيقة حبستيلي عقلي هبلت هذي الجن العاشق حكمها "
أسيل " قالتلك انا نردو للطريق الصحيحة "
نعمة " مليحة هذي يماه لي رفداتو تسع شهور مقدرتش هي تقدر حسبتلها الدنيا سايبة ... الزواج ولا مؤسسة اعادة التأهيل"
أسيل " دبر راسها مراهيش طفلة صغير انا هدرت حتى نشف فمي "
درتلها زعما راني خيطت فمي
نعمة " كون تهدر معاها رحمة هي تفهم وزيد ختها تسمعلها "
رحمة " متسمعليش غير متعيوش روحكم "
انا طبسي طاح من يدي سمعتني كامل واش قلت بصح في التالي انا مزدتش من عندي قلت الصح
نعمة " سمعتينا "
رحمة " ايه ... متقلقوش ريسانكم بالتخمام انا ختها عييت معاها من اللول مكانتش تسمعلي ومام ثحوة زادت شجعتها وعماتها كثر تتحمل نتائج افعالها "
