الحلقة حداش 🎬
مجازش بزاف وقت حتى وجدولي بيرو جديد كان غير قدام بيرو احمد بديت خدمة وواش نقوللكم هذوك الدوسيات لي جابتهملي ايمان السكرتيرا كثر من الاج تاعي على زهري بديتهم واحد مور لوخر بصح عجبوني المواضيع تاع القضايا تقول راني نقرا في حكايات ههههه المشكل السبة تاع القتل كيما هذي قالك مرا شتكات على وليدها بمحاولة القتل العمدي في اللول صح كانت راح تربح على شعرة حتى وين نطقت يمات المرا وقالتلهم بلي الام تعنف وليدها لفظيا وجسديا مرات حتى الموت هكاك ولات فيه عقدة نفسية ولا يستمتع بتعذيب الحيوانات كي تعنفو يماه وكي ولا مراهق كبر ولات جاتو الفكرة تاع ينتقم من يماه ويعذبها ... ولا هذي الراجل لي خطف ثلاثين طفلة وقتلهم بيسك لي حبها رفضاتو على جال فقير قدام الغاشي وتعرض للسخرية من صحابو لي خلا شعور الغضب و الانتقام يشعل فيه و في سبب القتل قال سييت نخلص العالم من جنس الاناث باه حتى راجل ميحسش بواش حسيت بسبتهم ومرانيش نادم ..... انا هكاك مزالني نقرا خطرات نضحك وحدي واش هاذو الاسباب قضية مور قضية وانا غير يعجبني الحال هذي برك متدربة سما كي نبدا خدمة كيفاه سيفيني لحقت للتالي لميت الدوسيات كامل و الورق لي فيهم المعلومات رحت لبيرو ميسيو احمد طبطبت قالي ندخل كي فتحت الباب لقيتو غارق وسط هذوك الورق و التيليفون مشي واحد مشي زوج غاع محبوش يحبسو غير يصونيو كان يهدر بواحد دارلي بعينيه نقعد غير كمل خزر فيا
احمد"كيفاه كملتي"
اسيل"ايه خلاص هامليك شوفهم اذا نقست عفسة فيهم قولي باه منعاودش الغلطة"
احمد"ايه خلاص ضك نشوف مديلي الخمسة اللولين نطل عليهم"
مديتلو كيما قالي وقعد يشوف فيهم وانا غير ندعي نكون درت كلش سواسوا
احمد"كلش واش نقولك خدمة متقونة في وقت قصير بصح شوفي هنا كي تبداي تفصلي الاحداث تاع القضايا يعني زعما هنا في قضايا تاع القتل وقتاه دارو لابوليس تقرير الطبيب الشرعي ولا وقتاه الجثة لقاوها و الوقت لي توفات فيها هذو احداث بزاف مهمين نسحقوهم صحا زيد نقطة حبيت نزيدهالك هنا....."
انا نضت لعندو نشوف وين راني مخصوصة هكاك ونبدا نوقف على صباعتين رجليا باه نشوف مليح روماركيت فرق الطول بيني وبينو كنت نبان بينازة قدامو مالغري خويا ادم كان طويل بصح مشي كيما احمد طلعت راسي لوجهو كان يشرح يحك لحيتو بيدو على عكس ادم ميحبش يطول لحيتو غير تطوال يروح ينحيها هذا وين روماركيت احمد كان عندو تقضيبة بين حواجبو زادت خلاتني نشوف ملامح وجهو هكاك واستغفرت هزيت راسي
احمد"نشالله تكوني فهمتي واش قلتلك ضك"
اسيل"ا.ه ايه باينة نشالله مراحش نزيد نغلط منا ورايح"
احمد"ايه نشالله وكيفاه حسيتي التدريب نهار اللول"
اسيل"في الصح كنت حاسباتو ميتحملش وواعر وحتى منقدرش بصح ضك لالا كلش ساهل نقدر نقول عجبني الحال"
