اليوم ديسيديت نروح عند أحمد نقولو قابلة طولت عليه السيد بزاف جيت خارجة من الشومبرة وانا قلبي غير يدق محبش يحبس حبست حطيت يدي عليه
أسيل " اووف واش بيك نتا ثاني احبس علينا كون نوقف قدام احمد نورمال يسمعك "
تبسمت مع روحي كملت نمشي شفت ماني زهور في الجنان رحت لعندها
أسيل " صباح الخير ماني "
زهور " صباح النور يابنتي اقعدي اقعدي "
قعدت هي سكتت
زهور " واش راكي عندي شحال مهدرتش معاك"
اسيل" الحمدالله راكي تشوفي فيا مام انا توحشت الهدرة معاك"
زهور" ايه و جيتي في وقتك كنت باغية ضك نطلع لعندك"
اسيل " غير الخير قوليلي"
زهور " تعرفي صفية لي جات في عرس زينب لي تضاربت مع حورية ودارولنا التبهدايل مع الغاشي "
أسيل " ههه ايه هذيك كيفاه ننساها كلاتني بعينيها قلت ضك تنوض تضارب معايا "
زهور " ... في الصح راهي باغية تخطبك لوليدها "
انا سكت قلت مع روحي واش جابني واش جابني
زهور " واش بيك سكتي ... يابنتي الطفلة قد مدور تخلاص بيها في دار راجلها و وليدها نعرفو متربي و خدام متلقايش خير منو "
قلت بيني وبين روحي مراهش خير من أحمد و كون مجاتش عيب نقوللها ديه لصحوة كي مكاش خير منو ياك تموتي عليها
أسيل " ياك تعرفي ماني انا واش رايي "
زهور " مفهمتش واش كاين في راسك الزواج مشي عيب باه تقعدي ترفضي يا طفلة عندك الحق ديري برك الشوفة الشرعية اذا معجبكش متقبليش "
أسيل " منديرش متسيفوش عليا حاجة مرانيش حابتها مشي بسيف انا معنديش حاجة بزواج ... واذا ديرونجيتكم كي راني قاعدة هنا نورمال نخرج نكري "
زهور " واش هاذ الهدرة مراكيش قاعدة فوق ريصانا "
أسيل " شوفي ماني نقادرك و متفهميهاش قلة احترام بصح راهي سيليا قدي ولا كبيرة عليا عمري لاسمعتك جبدتيلها على هذا sujet غير انا لي تقوليلي هاذي الهدرة وليت نحس في عمري ربعين سنة واذا مخصوصة في الزين قوليلي برك يفوتني قطار الزواج بكري "
شفتها سكتت مقالت والو
أسيل " راني رايحة ضك ... ايه جيت نسقسي و ان شاء الله متكونيش زعفتي من واش قلتلك ضك تعرفيني والله غير نحبك "
رحت بستلها راسها و عنقتها
زهور " شكون يزعف من هذا الزين و السكر ... ايه واش رحتي تسقسي "
أسيل " كنت نحوس على أحمد عندي هدرة معاه ملقيتوش "
زهور " راح مع الرجال لصلاة الجمعة "
