الحلقة 12🎬
كملنا طريق ساكتين حتى وصلت لباب الدار هوما راحو كملو طريقهم وانا لقيت زينب هذاك وين دخلت مع نعمة ويديها معمرين بالساشيات
زينب"سبحان الله عمرك طويلة هذا وين كانت تقولي نعمة اسيل راحلها بزاف من عمرها كي مجاتش"
نعمة"والله غير خصيتي فيها "
اسيل"غزلتوني بهدرتكم تعرفو الخدمة واش دارت فيا ايه احكيلي كيفاه جاز نهاركم"
زينب"اليوم رحت نزيد نشري للجهاز ديت معايا نعمة ياودي قريب رحنا فيها انا منعرفش طريق وزدت ديت نعمة معايا سما خلات ياودي قريب سرقونا بصح ختك فحلة كانت شادة موس"
اسيل"اااه موس نعمة علاه"
نعمة"واش حسبتلك ضك تخافي لازم الموس وفليطوكس ميخطيش الصاك من نهار سمعت واحد في لافاك مدولو بضربة بالموس وليت نخاف ندي حذري"
اسيل"ههههه ياختي مليح سما يولو الناس يخافوك مشي العكس معليش ايه زينب كيفاه مع التوجاد لقيتي واش كنتي حابة"
زينب" ايه لقيت كلش يهبل عمبالك كون جات عليا نشري كلش البيجامات يهبلو و الربب تاع الدار واش نحكيلك شريت حتى وين خلاص بصح مكثرتش بزاف خايفة نسمان مور الزواج نحصل باللبسة هذيك بصح عمبالك واش خصني حبيت نشري شوي كتانات نسحقهم بصح ملقيتش واش حابة كامل مكاش بزاف حوانت "
اسيل"كاين وحد البازار يبيع الكتانات واش نقلك هبال تاع الصح جاي في لاغار الدوزيام تاع لافيل خلي نهدر مع خوك منخدمش نهار نروحو كيف كيف"
نعمة"ياه لالاة اسيل وليتي تعرفي كامل البلايص بصح مشفتكش خرجتي"
اسيل"باينة انا خفيفة كلش نشفالو كاين وحد الطفلة تاع الحومة كي رحت عندهم نمدلهم طبسيهم تاع الحلوة في خطبة زينب قعدنا مقصرين امبعد جبدناك وقالتلي كاين بزار تلقاي فيه كلش ختها شرات من ثم"
زينب"هايلة نشالله برك خويا يسمحلك في نهار متخدميش"
اسيل"انا نهدر معاه والباقي عليك"
زينب"كيفاه انا واش ندير"
اسيل"شوفي خطيبك ديجا ديرونجاني اليوم بالهدرة خليه اوموا يكون عندو فائدة يهدر مع احمد يقنعو"
زينب"نسيي"
اسيل"اضاربي معاه زينب اي عفسة المهم تكوني المظلومة وهو الظالم امبعد يسيي يرضيك يهدر مع احمد يخليني نروح معاك"
نعمة"واو نصفرلك حابة تنتقمي من ادم بزينب وتخليه هو بروحو يهدر مع احمد باه يسمحلك في نهار"
اسيل"واش حسبتلكم انا تقدرو تقولو متدينة و خلوقة متبعة كلام ربي بصح كاين صوالح منسكتش عليهم و نخرج وجهي الدوزيام طفلة ولا طفل لازم يخلص "
