جاز الوقت حتى نوض نلقا الليل وانا لاخبر كانت الحداش تاع الليل وحكاية ادم وزينب لضك في راسي لازم نعرفها ضك شديت التيليفون وهبلت زينب باليزابال كسرت التيليفون عليها حتى وين رفدت باينة راقدة
اسيل"ضك يسموك نلقاك في شمبرتي ولا نجي لعندك"
كوبيت مخليتهاش تنطق خمس دقايق لقيتها جات لعندي مغمضة العينين قعدتها وبديت نشوف فيها وهيا تشوف فيا
زينب"وشبيك ياطفلة نوضتيني باه تقعدي تشوفي فيا"
اسيل"واش راه صاري بينك وبين خويا"
شفت الشوك في عينيها مكانتش تتوقع
زينب" انا وخوك والو مكاين حتى حاجة"
اسيل"متكذبيش عليا انا عندي احساس ميغلطش احكي خير منعرف وحدي"
هي سكتت على ضربة امبعد شافت فيا وطرطقت
زينب"تعيشي اسيل متقولي لحتى واحد انا وادم رانا في غولاسيون نحبو بعضانا "
اسيل"زينب انا نحبك ونعزك وادم ثان خويا بصح لي راكم ديرو فيه حرام وخاطي كامل ربي ميرضاش بيه "
زينب"بصح يحبني قالي راح يخطبني يامات برك والله ادم نعرفو عندو كلمة"
اسيل"عمبالي زينب خويا مكاش لي يعرفو كيما انا بصح راه حرام بغاك من اللول يروح يخطب ولا حتى يمد كلمة لباباك مشي هكا صحا نقولو حب يخطب هاذو اليامات عمبالك من يامات يولو شهور عوام عمبالي راكي تقولي معقدة بصح هذا كلام ربي ومراهش تخلف بالعكس راه دين تاعنا مدلنا قيمة مشي لي يجي يخدعنا بزوج كلمات نتي مرتي ناويك للحلال كون ناويك صح للحلال يجي من اللول يخطب "
زينب"بصح نحبو اسيل وكيما قلتي خوك"
اسيل"زينب انا راني ننصح فيك ضك راه متندميش منا للقدام وتلقايه خاطب وخداخرة خويا ومنديرش فيه لامان في بنات الناس كون جيت انا في بلاصتك خويا يقتلني مشي يشجعني شوفي كاينة وحدة مدولنا شومبرة وحدة نضل نشوفها تهدر مع واحد تحبو وهو غير يخدعها بالهدرة المعسولة تاع نحبك غير نتي لي نديك وهي تأمن في التالي خدعها وخطب بنت خالتو هذيك الطفلة شهور تبكي تندب مع التالي لقيناها انتحرت سما مذا بيا تسمعي هدرتي راني نهدر في مصلحتك"
زينب"سما كيفاه نخليه نتسيباراو اسيل واش نقولو كيفاه راح نقدر نقولو نتسيباراو"
اسيل"زينب تعيشي انا راني هنا معاك وواش راني نقولك هو الصح تخمي في هدرتي تلقايها صحيحة نتي برك خدمي عقلك مشي قلبك القلب دايمن يحب يديرها بينا وادم خليه عليا انا راح ندير لي عليا واذا كان من اللول حاب يخطب بلا جدو يجي يجري عند باباك "
شافت فيا زينب وجات عنقتني تبكي بديت نمسحلها في شعرها
اسيل"كلش يجوز تبكي ضك شوي خير متبكي غدوا بعد عوام راحو من حياتك اذا كتب ربي تتزوجو تتزوجو في الحلال كون جا الحرام حلال كون مراكمش تخبو في الغولاسيو تاعكم فهمتي زينب ضك ارقدي ومتخميش "
هذاك نهار رقدنا زينب مسكينة رقدت ودموع في عينيها بصح هكا خير من الندامة في التالي وهذاك خويا انا نوريلو الليالي السود يلعب ببنات الناس قبل متكون بنت عمو معليش خلوني برك نرقد شوي شوي برك ولا واش قالو .....
نضت بنص عين ملقيتش زينب تكون راحت المشكل فيا نحب الرقاد نضت غسلت وجهي ولبست حوايجي هبطت لقيت النساء تحت صبحت عليهم وقعدت
اسيل"وين راهي زينب مرانيش نشوف فيها"
نورا"والله يابنتي راح يوصلها ادم للجامعة "
اسيل"اييييه"
ربي معاها نشالله متضعفش و تمدلو صرف صحيح يحشم على روحو كيما يخاف على ختو من ولاد الحرام يخاف على بنات الناس
نعمة"اسيل وقيل بدلتيني بزينب "
اسيل"وقتاه صرات هذي شكون انا باه نبدلك نتي ختي الصغيرة مكاش لي يدي بلاصتك "
نعمة"امالا نهار الاربعاء نخرجو كيف كيف دبري راسك"
اسيل"هذا مكان راني هنا وقتاه تحبي بصح نسقسيكم وسمها رحمة وسيليا مراهمش يبانو غير الخير من نهار جيت مكاش حسهم "
امال"راهم عند عمتك سمية يعاونو فيها عندها عرس"
اسيل"متقوليليش صحوة تزوجت ومسمعتش"
نورا "بوه عليا صحوة تتزوج مزال عرس تاع وحدة ثما وتعرفي البنات يحبو العراس"
اسيل"ايه عندك الحق "
حورية"زعما نورا معلابالكش بلي صحوة راهي طامعة في وليدك احمد راهي تنومو في مناماتها"
زهور"علاه لالا نشالله يكتب المكتوب متلقاش نورا كيما بنت بنتي زين وتربية"
نعمة"بصح ماني صحوة مشي جور تاع احمد كامل انا نعرف"
انا شفت في نعمة تاع اسكتي واش هاذ الهدرة
زهور"علاه واش بيها بنت عمتك"
نعمة"كيشغل جاية تتفشش بزاف صغيرة في عقلها وزيد لبستها كيشغل احمد يموت على وحدة سيفيليزي غاع رانا عارفين كيفاه داير"
زهور"يابنتي حنا بكري مكانش كاين هذي تاع جور تاعي وتاعها كي يتزوجو يتسقمو فيزوج مع المسؤولية"
اسيل"ماني عندك الحق المسؤولية تكبرك بسيف عليك بصح مشي نزوجو الواحد باه يستعقل على حساب لوخر مراهيش مؤسسة اعادة التأهيل راه زواج "
نورا"عندك الحق يابنتي عندي شحال نسيي نفهمهم وليدي مراحش يتزوج باه يعاود يربي مرتو تزوج يبني دار "
زهور"اعرفي واش راكي تهدري نورا متخلينيش نخسر معاك يخليني برك وليدك نخطبلو نجيبلو صحوة وعينيا مغمضين "
خبط وحد السكات حسيت كون تنطق وحدة تنوض حرب هكاك حتى وين دخلت زينب تجري تبكي غاع شفنا معاها طلعت
اسيل"خليكم قاعدين انا نشوف واش بيها "
في ميزكم واش صرا مع زينب ؟؟👀
هدرة اسيل لزينب عجبتكم معاها ولا كونطر
وواش رايكم في العلاقات الغير شرعية
انا في رايي يدو بصاحبهم للواد وخطيكم
ونتلاقاو في البارتي الجاية نشالله
اسيل"نشالله نكون عجبتكم😌"
